| 休息左兩日之後，今日又再出發去班會camp喇~梅窩四日三夜之旅！ 又係上一陣網之後就出發…首先同同學去食晏~ 不過落到樓下先記住冇拎到拖鞋，而拖鞋去camp係不能缺少的， 所以又走番上去…但係噤極門鐘都冇人應，甚至打電話入去都冇人聽， 結果響門口呆企五分鐘先入得去…屋企人唔係去左toilet就係訓緊… 呢個拎拖鞋事件令我遲到左五分鐘，但係出到去先發現個個都遲！ 原來今日得3個人出去食，而且個個都遲到… 結果就去左沙嗲王等位先…仲要間舖未準備好， 等左幾個字先齊人…同埋可以嗌野食… 食完之後再join埋幾個同學就一齊搭車去中環啦~ 今次搭1點鐘慢船去梅窩，去到碼頭間士多度拎房(?)， 但係因為冇單加上book camp果個人唔響現場而擾攘左一輪先行得… 上年班camp又係黎呢度，所以今次對個環境絕對唔陌生啦~ 去到拎完鎖匙，發現今次同上年係同一間屋！只不過落左一層！ 搞掂哂D野之後就出去租單車，順便踩出去買野~ 買完D飲品同燒烤用品就拎番去先，之後再出去買燒烤食品， 買完我地幾個偷偷地踩左去一個神秘直升機場， 計劃第日黎呢度釣魚…呢度個景的確幾正~但係釣魚係否決左o既… 踩完番黎已經7點幾，準備上去透爐啦， 但上到去先發現冇人有帶打火機…(我以為我自己有) 結果要開廚房個煤氣爐，放張報紙埋去， 然後好似運送聖火咁運上天台… 食飽飽都已經成11點，落番去就到沖涼時間， 然後就係集體遊戲時間…玩完之後兩點幾… 跟住播左套《情聖》黎睇，諗住應該都幾好笑啦， 點知D笑位我完全笑唔出，睇睇下仲訓著左… 矇矓之間套戲就做完，跟住就到非常刺激o既遊戲：耍盲雞！ 我都唔敢做D高危動作去畀人捉到，但有次無啦啦畀人推左出去囉… 矇住眼咩都睇唔到…個感覺好特別囉…好似唔知去左咩空間咁… 完全分唔到方向，又唔知自己摸到乜…好彩都唔係玩左好耐… 玩完之後勁熱囉…跟住係唔記得自己做過乜o既… 到6點幾就出去食早餐…踢住拖響M記望住個海景食住件熱香餅， 個感覺好舒服呀~食飽飽就返去睇香港早晨， 去到8點左右就頂唔順，入左間房訓左… |
| Esther 2003/08/08 09:16 話時話, 我讀書0個陣好似未去過營, 都幾恨有你所 描寫的所有經歷。  嗯… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |