| 今日係氣象迷聚會大日子，今次係響銀線灣燒野食~ 一早起身就為左出將軍澳飲茶然後霸爐… 不過之前o個晚都幾夜訓下，所以響地鐵都訓左好一陣子… 去到間酒樓原來都好靚好大下，不過都係要慢慢等位， 大家就開始搵野講黎打發時間，點知講講下就問埋我D勁私人問題， 仲越講越興起，越講越離譜，有位之後都繼續講，真係極度無奈… 飲飲下陸續有網友加入，結果飲到2.先完， 我坐個位係咁畀冷氣吹住，我又著得一件，凍到我… 最初我預算飲到1.左右就去霸爐，而家遲哂大家仲竟然懶懶閒， 我都冇佢地乎…然後決定分兩批活動，一批先去霸爐， 另一批就去買野準備透燼，我就選擇左後者… 買完野之後就再分兩批，一批捧D野去銀線灣，另一批準備買食品， 我又再選擇左後者…由於時間尚早，所以就坐下行下先買野， 不過去到超級市場又發現時間已經幾緊迫下，距離集合時間唔夠一個鐘… 雖然我買BBQ食品經驗都幾豐富，但今次買30人野都真係幾難預， 又要睇實個budget，又驚大家唔夠食，於是要不停格價， 好彩有人幫手，否則就真係踢哂腳… 計到最尾應該大家都夠食，仲有百幾蚊淨低，唔錯~ 找完數之後時間都真係無多，就拿拿臨捧住大堆野去集合地點… 去到集合地點竟然得小貓一兩隻，原來D人一係就遲到， 一係勁早到所以行開左…等等下又有一兩個話黎緊， 結果等左50分鐘先完全齊人，為免D人等得唔耐煩， 唯有叫佢地先行搭的士去銀線灣… 最後等埋我細佬就一齊出發前往目的地，轉眼就去到喇~ 銀線灣查實中秋節o個陣都已經去過，不過o個次響石灘燒， 仲要畀雨淋到七彩，今日又好似想落雨，大家怕又再好似上次咁， 加上根本都霸唔夠爐，所以最後都係要租爐… 呢度雖則有瓦遮頭，但係就勁黑，而且最後都冇落雨… 既然租爐就梗係唔使我地透爐，大家就企哂響度等食… 搞掂哂大家就準備食，不過竟然得我一個拆袋拎野， 真係負責人就咩都要負責…結果大家開始食我先開始燒… 今次我地租左四個爐，我就當然周圍走， 期間我用把風扇仔黎撥下個爐，點知個轉葉突然之間飛左落個爐度， 即刻就有一股毒氣攻出黎，等我搵野撩走個轉葉o個陣， 個轉葉已經熔左黐住個網…結果一個爐就咁荒廢左， 最慘係陪左我個半月o既風扇仔就咁玩完… 我食左幾條腸就有人投訴唔夠野食，但檯面仲有好多野淨低， 原來個個都鍾意食BBQ快餐，即係淨食腸丸唔食扒翼， 響群眾壓力之下，我唯有同大家去百佳買野補給… 雖則燒烤場距離間百佳都好近，但就要行一段1:5斜路，都咪話唔辛苦… 本來要去買野我都冇乜野，最緊要大家肯夾番D錢， 但問題係大家呻完唔夠野食之後，買完野大家竟然話飽… 大家食飽飯冇野做就開始搵野黎玩，玩到冇野好玩又搵我黎玩， 結果又好似暑假釣墨魚時咁畀人強暴，估唔到網友都可以玩到咁癲… 之後影大合照又搞左一大輪，全世界進入癲瘋狀態… 最後就hEA到11.幾先走，仲要等一輪先有的士搭番出地鐵站… 返到荃灣已經12.半，班人仲話去食糖水， 其實係走去茶餐廳食宵夜…食完返到屋企都1.半， 搞多兩個鐘我先訓覺…成個人完全崩潰… 今次第九次氣象迷聚會，未試過有一次係搞得咁辛苦同埋大家玩得咁癲， 可能因為事前準備不足，搞到最尾好多野要執生， 仲要頻頻撲撲，簡直[支力]到七彩，好彩有人同我按摩鬆弛下~ 至於玩得癲方面…其實我自己就冇乜所謂，玩得再癲都得， 但今次始終都叫做公開聚會，我點都唔想響有唔熟o既人o既情況之下癲成咁… 不過其實我已經好耐冇見過班網友，終於有機會聚下就真係唔錯， 但之後已經唔知幾時有機會再聚過… 總之今日就真係悲喜交集，搞到個人都開始癲癲地… |
| 貓貓 2002/10/13 19:01 強暴~~ 有冇相睇先？ 勁私人問題~~ 又係咩呀？  你就想…我自己都未睇過… 話明私人問題我又點可以答你呢… |
| Ming 2002/10/14 07:27 我估下得唔得呀? 我估d私人問題係同你有關(廢話). 我估d私人問題同你私生活有關(唔知呢?). 我估d私人問題係同你身邊某d人有關(應該係啦?). 得. 當然. 係. 冇. |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |