| 今日又係考英文，考埋listening同作文~ 又係9.3先返去報到，不過一返到去即刻要爆石，又要啪丸以防萬一… 今次考之前D DJ冇上次考中化o個陣咁有趣… 一路聽有D倦意…不過到真係考o個陣就梗係冇啦… 今年多左個section，多左時間準備囉… 不過咁都未必代表一定高分，我諗我都算係咁囉… 跟住有兩個半鐘lunch time，我地幾個去左吉野家， 諗番起陸運會o個晚…都係坐同一個位， 不過o個陣勁熱鬧，今日就冷清好多… o個陣傾到唔知時間，今日完全唔知點hEA… 食完一路坐響度傾計，講完一個話題：「咦? 過左5分鐘咋…」 結果都幾辛苦先hEA到成個鐘… 但最尾D時間反而就得太「吻」，返到去差D遲到… 晏晝考作文，我揀左一條話如果畀你揀想留響香港定去外國， 諗都唔諗就作左香港，最尾仲好感性咁寫左句(當然係英文寫)： 「雖然而家香港經歷好多困難，但而家唔係諗離唔離開o既時候， 反而我地應該合力解決面前o既所有困境， 因為香港始終係我地o既家－大家都響獅子山下長大。」 我差D就想譯埋首「獅子山下」出黎架喇:P 搭村巴，撞到上次話o個個阿媽個friend個仔， 佢話見D百佳惠康個個癲哂咁掃貨， 返到麗城果然見到D師奶一袋二袋咁捧野走… 上到屋企，只見電視話「並無打算將香港列為疫埠」， 都知到大事不妙，上網先知原來有人玩野… 雖然話今日係愚人節，但呢個玩笑實在開得太大喇… 香港人已經畀個肺炎搞到人心惶惶， 而家再嚇一嚇，市面即刻瘋狂哂… 我覺得呢個時勢拎呢D玩笑黎玩好冇人性囉… o個個人仲要得14歲…好彩差佬好快就拉到佢， 希望佢得到應得o既教訓，知道邊D野應該做邊D唔應該囉… 除左話疫埠單野最大單之外，今日上網都見到有唔同大小謠言， 話會炸左淘大E座又有，特首同阿松宣佈請辭都有… 班人放假冇野做就搵呢D野黎玩，真係冇品…影衰哂其他青少年… 仲有班師奶…聽到消息就瘋狂掃貨， 「點解你又出黎掃貨o既?」「我都唔知點解呀…見人地掃我咪掃囉…」 都唔知好嬲定好笑… 夜晚突然有震撼o既消息，張國榮去世… 因為有上面單野，所以我都係聽收音機先敢confirm… 無啦啦又多一單唔開心o既新聞，真係黎得太突然… 不過我對佢認識都唔係咁多，平時都冇特別留意佢， 所以就算話係突發…都冇羅文o個次咁感觸囉…況且佢今次係自殺… |
| Esther 2003/04/02 09:18 越多不如意事發生, 大家越要正面一D, 萬大事都會 有方法解決的, 別灰心, 但願全人類安然無恙。 |
| 彩漫草 2003/04/02 23:18 而家D人EQ太低，肺炎事件都唔知有冇令大家團結o左 張國榮就係自殺先至震撼，羅文大家都有心理準備嘛  你係咪講疫埠單野先…呢個唔係關乎IQ咩? |
| 凱凱 2003/04/04 02:46 都同EQ有少少關係的‥Ｄ人唔識獨立思考‥又唔冷 靜‥ 嗯…係喎 |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |