年月 日　
9月10日

9月1日

今日又要返公司啦，因為開學啦，想盡快試好d野嘛…
一來想快d收錢，二來都唔想等到忙果陣先要改野…
除左今日係星期四之外，今次返去仲有樣野唔同…
就係沿途多左好多學生哥~今日開學啦~
大家要好好珍惜校園生活啊~

搞掂d野返屋企，即刻訓返個靚覺先…
夜晚又努力地開工啦…
又去左打波，已經係最後一次啦…
開左學應該都冇乜機會再打了…

9月2日

今日返左去中大…同個partner搞FYP d野…
其實係去左地理系果邊，學下關於GIS(地理訊息系統)o既野，
簡單黎講就係點樣用數據儲存地圖o既資料啦~
唉…其實都唔知用唔用到，我驚搞到最尾都係得個吉…
之後想順便上去搵prof傾下野，點知搵唔到佢，算吧~

夜晚有節目，唔想返屋企，結果去左入宿了~
其實我咩行李都冇拎，當去參觀下 i-house吧~
嘩…呢棟宿真係好鬼遠…仲要經過上年住o既陳宿，唉…
去到都係做個登記手續啦…然後就上房參觀~
呢度真係好似屋企…無論地板、客廳定係個浴缸…

響宿hea完再去lab hea，之後就出旺角了~
今次大O組聚…主要都係因為其中一個女就黎要走了…
今日都算齊人，都係爭個女黎唔到…
去左買禮物，之後去食飯同飲野吹水，氣氛都ok~

之前同人傾開ocamp氣氛問題，其實真係主要靠d仔女…
組爸組媽可以做到o既野唔係好多，頂多係帶起個頭囉…
之後佢地keep唔keep到，都要睇d仔女自己啦…
我果組呢…一坐埋一齊就大家傾到計…
但…下次組聚可唔可以係仔女自己約呢…

9月3日

今日搬宿啦~上陣網就收電腦準備就緒啦~
同個中同call左架車入去，因為大家都住 i-house~
去到竟然落雨，要擔住遮搬野都幾麻煩…

擺低野後諗住各自拎返寄宿o既野，
點知中同果度竟然因為太多其他野而拎唔到，
最後佢同我夾手夾腳將我袋勁重o既野拎返落宿…
跟住set返部電腦，但搞極都上唔到網，真麻煩…

夜晚出左去銅鑼灣食buffet，慶祝阿媽生日~
果度o既賣點係鵝肝…我印象中應該未食過呢樣野…
不過食完之後又唔係想像中咁正…點解會咁矜貴架呢…
成檯人係咁講是非，好好笑~
之後大家仲有下場，返荃灣唱K…
但我要做野又累，結果冇去啦…

9月4日

今日響屋企大訓特訓…因為呢排都唔夠訓…
起左身又到下午茶時間…之後hea住咁上網…
唉…冇左自己部電腦，上住網都做唔到d乜…

夜晚出左荃灣間新開o既酒樓食飯，好飽…
呢排真係越開越多川滬菜館，不過真係幾好食~
食完拎返d野返宿啦…今晚正式響 i-house 訓啦~
幸好好快就搞到上網，不過仲要係咁執野…

9月5日

開學啦~話咁快已經係大學最後一年…要好好珍惜~
今個sem…最早果堂都係12.半…可以慢慢訓了~
今朝矇矓間…有個同房走左入黎…
但都係放低少少野就走了…well…

之後去上堂，見返好多同學呢~
今日上果兩堂都好多人呢…估唔到year 3都咁熱鬧…
不過相對黎講，lab就冷清左好多…大家去哂邊呢…
夜晚食飯都係得兩個人…
要有心理準備…以後食飯要成日食自己呢…

9月6日

今日有4堂…已經係今個sem最多堂o既一日啦…
中間d吉堂去左搵老細，都應該係傾得最耐o既一次…
一直冇乜頭緒o既FYP，依然係冇乜頭緒…頂硬上啦…
我諗盡過力o既話，professor總會睇到下卦…
以後每個禮拜都要見佢一次，算係好事黎o既…
我呢份人冇乜壓力o既話…都好難做到乜野出黎…

之後諗住去保健處book洗牙，30蚊優惠價，
呢三年之內點都要洗一次啦~唔洗走寶呀…
不過去到見到d booking全部都係12月…
我又唔知邊日考試…唯有遲d再黎過…

跟住上堂，講一堆數，終於不支倒下去…
又係照notes讀，放break果陣決定走佬…
其實都有野做…今日都要返office執手尾…
今日最大貢獻係整左個 upload file o既system~
以後改野可以唔使特登返office啦…(果度用唔到FTP…)

原本滿心歡喜以為今日有糧出啦，
點知做完d野果陣，會計小姐已經走左，天啊…
算…我忍…哼…跟住去食飯，當自己出左糧先啦，
黎個酥皮龍蝦湯鐵板餐，豪一豪佢！

返到宿…遇到來自瑞典o既鄰居…
勉勉強強傾左5分鐘，最頂癮係我教左佢一兩句國語…
開始觀察到呢度唔同宿生o既習慣…
外國o既通常好早訓，新認識o既一定會企響度傾一餐先…
內地o既就似乎唔太喜識人，同埋通常都聯群結隊出沒…
本地o既…通常都匿響房裡面上網啦~

9月7日

今日唯一一堂我都走左…因為約左網友食飯…
原本係想去飲茶，但而家竟然留哂位比教職員，可惡…
上年我成日去飲都唔覺係咁，最終拗左好耐都係徒勞無功…
最後死死地氣咁去左NA can食…sorry…大家屈就下啦…

之後本來想約埋個partner做FYP，
不過溝通問題，gap左，最終今日咩都冇做過…
希望呢個情況以後都唔會再發生…
我唔想再浪費時間啦…聽日都要努力啦…

夜晚本來返宿睇下個開幕典禮，
不過見唔到識人，又冇位坐，最終都走左…
其實我都要出去還書…兩本書遲左一日還，罰3蚊，激死…
跟住就出左去同班CE同學食飯，好耐冇去過泰源啦~
我早到拎左位先，但我洗哂d野再玩左幾鋪泡泡龍先有人黎…

今晚都算熱鬧o既，都算幾開心~不過好似咁快食完o既…
食完仲有餘興節目，去左shaw打機~yo~
唔覺唔覺參觀左兩間宿，唔知之後仲有冇機會呢…
唔知點解…響宿硬係冇意慾打機…
但同其他人一齊果陣就好enjoy~

今日同房終於出現啦，但都只係傾左兩句…
希望聽日可以同佢傾下計啦~

9月8日

今日又係得一堂~唉…成堂對住notes教數，又可以自製dayoff啦…
之後去左lab傾FYP d野，今次終於有系統咁傾過一次啦…
睇返上年個FYP…其實真係幾頹下，原來咁就有8個credit…
傾完返宿試下用PDA上網，最終都係失敗…聽日打去問下先…

夜晚食完飯去左睇下CE O night，主要係想見下d freshmen~
今年唔覺有乜宣傳…都有十幾廿個freshmen去，都ok喎…
本身個活動都幾悶下，但我地幾個玩野就搞到好好笑~
真係希望班freshmen會響CE裡面玩得開心啦~

9月9日

今日係UCFYP日…朝早落lab reg左assembly先…
呢次要一次reg五個人，所以都要開哂成排機…
已經每隔幾秒reload一次，一load到果下已經冇左百幾個位…
經過緊張刺激o既工作之後，就同d partners食飯啦…

跟住補拍返d片，諗左好多爆笑情節，雖然最後都冇拍到…
之後去上stot，幾組人各自簡介下自己個project…
嗯…呢幾組做d野都唔算好頹，反而係我地組個title最頹…
但既然title一早定左，都冇辦法啦…做好之後o既工作就算啦~

present完就散水，落lab hea陣都返屋企啦…
途經沙田，去左間peoples問PDA上網d野，
而家d服務又唔錯喎，乜都幫你set好~
但最gap係我部PDA冇電…不過都應該上到網啦~yo~

9月10日

話說幾個禮拜前，有個小學o既班主任打比我，
叫我返去小學出席校友會活動…其實就係今日~
我自從小學畢業…差唔多10年黎，只係返過小學一次…
雖然同小學同學絕少聯絡，但既然難得有個咁o既機會，
咪返去睇下囉…至少都可以參觀下間學校卦…

返到去，只係見到幾個熟口熟面o既miss阿sir，
佢地個樣仲係同9年前變乎一模一樣呢…
不過就一直都搵唔返自己果屆d人…
直至響禮堂坐低一排…比個阿sir點左相，
先至同兩個同學相認返…哈哈~

一開始其實都幾無聊…成班人乖乖坐響度開會員大會…
仲要逐條會章解釋…天啊…呢度大部份都係細路，邊個聽呀…
之後就到踢人入會時間，我地好巧妙咁避開左，哈哈~
上左去d課室兜左一轉，好鬼懷念呢~

跟住落返hall，宣佈校友會正式成立…
之後茶點時間，我梗係唔會錯過啦~
然後再同幾個同學老師吹水、影相，
再跟大隊參觀多一次間學校，今次可以入埋裡面睇呢~
響小學逗留左3個鐘先走，真係難得~

估唔到我小學摺成咁…到而家都仲有機會比我搵返d回憶~
今日好多時間都係同兩個小學o既同班同學一齊，
雖然兩個人都好多年冇見，但又傾返n年前o既野，
感覺又陌生又熟悉~唔知會唔會有機會約返一班人出黎聚舊呢?

夜晚接住睇翻叮同 titanic，正~

9月11日

今朝出左去同網友唱K，未試過唱一次可以爛幾次聲…
今次有新朋友出席，好似好耐冇試過啦~
唱完去左打陣機先走，打鼓打到手痛…

之後同阿媽去揀電視，因為應承左送一部做生日禮物~
咁當然唔係什麼幾十吋plasma，就算我比得起都唔捨得買啦…
只係一部十幾吋CRT，放響阿媽間房度，
原本果部冇聲出…壞左幾年先下定決心換左佢…
原來呢隻電視已經好罕有，行左好多間先有呢…
雖然呢份禮物幾年前已經話送…希望阿媽都開心啦~

跟住去佐敦食埋飯就返屋企執野，
仲睇埋個迪士尼晚會先返宿~
迪士尼搞氣氛真有一手，如果你受o既話，真係會好開心~
聽日就開幕啦~好興奮呀~哈哈~

9月12日

今日又返學啦~連續五堂要上呀！
有科今日上tuto，完全唔知發生乜野事，
最後決定drop鬼左佢啦…呢個sem得12分，仲有咩好take?
唉~而家搞到下個sem又要add一科又drop一科，都幾煩呢…
不過我最憎d怒計數o既course，煩d都冇計啦…

上完堂又返lab打陣機，突然好多人走左入黎…
平時呢個lab都冇乜人，點解無啦啦會咁…
突然有個人企響度話歡迎各位 take XXX呢科…
well…點解個lab突然變左課室都冇人通知我地…
結果勁gap咁撤走…去食飯啦…

唉…而家好多canteen都加左價，真係無良呀…
不過今餐食果個泰式河粉又唔錯喎…我覺得~
跟住又入左shaw打陣winning…仲去左做gym…
好日都唔做一次，一做就入shaw做，我響UC都未做過呢…哈~

9月13日

今日冇咩特別…上完堂去左SE dept，
FYP想搵下發聲軟件o既資料，
一去到佢就比左隻software我地用，正~
哈哈，好似幾好玩咁呢~

跟住去補習，開學第一次補啦…
原本呢個唔諗住補架喇…不過又加價又比埋細佬我補，算啦~
但其實今日補細佬，價錢同以前一樣…
之後返宿啦…部機慢到嘔…

9月14日

今日d時間分配非常之差…
首先一起身去左上堂，遲到了…
上完呢堂又趕住去上tuto，呢科本來都未決定take唔take…
呢堂tuto好得意…而且好益智…十足十以前細個去d電腦興趣班咁，
要跟住d指示係咁copy & paste，仲有個tutor周圍睇下大家有冇問題…

跟住本來去食飯，但之後又要見FYP老細，
結果匆匆買左舊包一路行一路食算了…
見完老細，又要上堂啦，上完就響lab勁hea…
做住兩個FYP d野啦…其實都係為左等同人食飯…
之後又入左shaw，今次冇機打，但食左幾件月餅補數~

終於firm好時間表啦，drop一科add返一科，
結果星期一要上9.半堂，但多左星期四day off~
聽日就係我人生第一日day off啦~好好享受~

9月15日

yo~人生第一日day off~
今日好多時間都係hea…都係試下FYP d野啦~
仲有搞埋add drop d野囉…走黎走去…

夜晚去左院慶傾莊，最終都係決定去睇下玩唔玩~
初初去到都唔見有識人，好彩同埋個網友一齊去…
跟住決定入宣傳部，原來裡面有幾個都熟口熟面呢…
以一個老鬼身份再玩宣傳部，希望玩得開心啦~

9月16日

今日上左目前為止最早o既「堂」…月會…
呢次講心臟病…中間訓左一陣啦~
食完飯上左UC搞返cap帶o既野，
搞左n次…今日終於搞到啦…唉…

之後出去補習，今次大小通吃，連補兩個半鐘，都ok啦~
期間有同學打黎叫我返中大玩，唉~早d約嘛…
我一早話左返屋企食飯…下次啦…
補完返屋企過左優閒o既一晚啦~

9月17日

今日迎月…日頭都係吽響屋企…
其實都幾悶…悶到搵功課黎做…
同埋剪片囉…UCFYP段片終於大功告成啦~

夜晚去左阿姨果邊，本來係天台BBQ架…
但因為天雨關係取消左…但係都好正~
變左食西餐咁，成家人圍住有講有笑，幾好~
期間播返d十幾年前o既片段，笑爆咀~

之後返屋企hea陣，就再出去黃金海岸join班網友~
佢地之前去左BBQ，但我唔去啦…都食唔到幾多野…
我去主要係為左提供蠟燭比大家玩…
玩到3點散水…我都仲未玩夠呢~

9月18日

今日中秋節…祝大家中秋節快樂~
今日都冇咩特別…晏晝同夜晚都出左去玩，
夜晚飯就響屋企食啦~

9月19日

今日又去左同網友踩單車~今次有新朋友加入呢…
今次條路線都係大圍至大尾督…但去左大埔交車…
估唔到今日天氣咁好~幸好都唔覺熱…
踩到差唔多達點散水…響大埔食埋飯直接返中大啦…

返到宿…唔知點解好似好多野做…
但做做下竟然mouse壞埋…激死…

9月20日

放完幾日假，又上堂啦~
今日都係得兩堂…之後去lab上網…
最緊要係remote返自己部機…噚晚mouse壞左嘛…
仲有玩下噚日download隻PDA地圖，好好玩~

跟住出左去，終於有糧出啦~感動…
但拎張支票一睇，咦，得一半o既…原來仲要再分多期…唉~
之後去左深水步…join埋個同學買野…
我要買mouse同頹書，30蚊有optical，ok啦~
買完野…幾個人去左明將擦返餐，再去m記食雪糕，正~
敖巴士返中大…返到宿都12點啦…

9月21日

今日開始響宿煮麵食…但冇熱水供應，煲勁耐先水滾…
結果係趕唔到校巴去上堂…行到賤build已經身水身汗…
之後個tuto…其實d野我上次都做完…唯有做下自己野啦~
見老細…開始冇咩意義…今個禮拜都冇咩建樹…

上完堂…傾下寫game個project點做啦~
take左呢個寫game course，都應該幾得意~
寫完的話比大家玩下啦~哈哈~

今晚去左開宣傳部第一次會…嘩…好多人…點開…
後尾分左細部…先至真係傾到野…
我都係做返電腦野啦…不過當然之後玩果d要預埋我啦~
傾左兩個鐘…其實都唔使傾咁耐…

9月22日

今日day off，出左去唱K，yo~
幾個月冇download歌，out哂啦…
原來winmx已經虧左，好彩仲有新渠道…

去左補習，淨係講正負數加減…都講到勁複雜咁…救命…
返宿試下個GIS software，即係「地理資訊系統」o既程式…
呢舊野當然係for FYP用啦…好似幾好玩咁喎~

9月23日

又係day off…其實連續四日放假，可以報團去旅行啦…
今日落左lab傾FYP野…又分左工做野，努力啦…
之後就係nonstop補習三小時，好累呀…
返到屋企…梗係追下風啦~今年呢個風最有睇頭架啦…

9月24日

今朝又要返公司傾野…唉~果位同事平時響大陸做野，
一個禮拜先響公司出現一兩次，結果今日先傾到野…
今次簡直就係開會咁，傾左兩個鐘…又有好多野要大改啦…
之後食埋晏，返到屋企都3、4點啦…

今日成日都三號風球，呢個風都幾爽呀~
仲有班網友出左去追風，真係好玩…
我上網睇左陣野…去左訓晏覺啦…
夜晚…睇下叮皇，寫下FYP野咁啦~

9月25日

今日開工啦…噚日傾過o既野實在太複雜…
原來想計好條數，真係咁多case要考慮…
進展一般…要繼續努力啦…

夜晚出左去同中同聚，去九龍城食越南野~
今次都有過半班出席，好耐未試過咁齊人了~
自己未算好投入，但總算係開心o既一晚~
呢餐食得好飽呀~正~睇埋電視先返中大，
之後又努力開工了…個腦好實呢…

9月26日

今日第一日上早堂…因為呢科新add但上個禮拜放假…
本來都唔打算上，但我諗今堂都唔上，以後都應該唔會再上…
結果去到都捱到一堂…但最後連累今日其他堂都訓哂…

好難得午餐同晚餐都響中大canteen食~
可惜個午餐冇乜時間比我品嘗…med can燒雞脾實在冇得頂！

今朝雖然落左波，但成日都橫風橫雨，
結果把遮宣佈骨折死亡，呢把都算用得耐啦…

唔知點解突然好似忙左好多咁，一日都係果份工，
仲係計緊噚日條數，好難計呀…噢賣吉…

9月27日

今朝一起身唔知點解好累好眼訓咁，之後上果堂都訓左下…
跟住返lab努力工作，終於搞掂一份「project」啦…實在很頹…
之後去開會，無啦啦宣傳部細部要開個會，傾design d野…
d貨要出得咁趕…應該都咇到時間做o既…
其實咁多人都係一人出一件貨左右o者…

今晚又繼續開工啦…世紀大難題終於比我搞掂…喇卦…

9月28日

今日上完一堂走左去影班相…今次影得好古怪下…
原本個soc約點半鐘影，但我驚等到點半我地班d人走哂，
結果上完堂就拿拿臨叫大家影左先，
最後現莊就影唔到三年大合照…算啦…

上完堂想去book洗牙，點知閂左門啦…
之後響lab hea，等開會…今晚又開宣傳部…
今次幾多野傾，都開得幾耐下…
跟住返宿搞塊banner，搞到冇做到其他野添…

9月29日

今日終於去左book洗牙了…明年1月23日…希望到時記得啦…
之後仲申請埋中大信用卡…身為中大人梗係要有返張！
迎新禮品就聽日到期啦，拎返張50蚊現金券都好丫~

跟住去做功課，開頭毫無頭緒，原來只係照dup code，竟然…
之後補習，等車果陣見到個細路，你眼望我眼，感覺好怪…
補完返中大，入shaw食pizza~不過好遲先嗌，10點先開始食…
一路食一路睇一套gap戲…什麼快閃隊…
周星馳式o既西片…ok好笑啦，最頂癮都係d字幕…

9月30日

一起身落左本部傾UCFYP…好耐冇傾過啦…
主要都係想執下個powerpoint咁，
雖然我地仲有一個月多d先present，都要準備下啦~
食埋飯再去圖書館搵少少資料就散band啦~

跟住返lab做野，都係開工，諗住都做得七七八八啦，
點知做哂成個下晝都未做完…唉~
夜晚去左NA千，本來唔係特別有興趣，因為上年實在太悶…
其實係諗住攝返d飛，但其實最後又賣得哂，不過算啦…

今次食韓燒，我唯有盡量搵d菜呀炒飯頂肚啦…
但見到d肉喳喳聲，都忍唔到口，食左少少咁啦~
今年d嘉賓好過上年好多，方力申theresa鄭伊健，
仲有爆炸猛男PHD…可惜佢地都係做返電視見過o既野…

最緊要都係陳以誠！我地班人見到佢就勁high！
仲派人獻花比佢~雖然d「花」其實只係d生菜插入個樽度，
但陳醫生收到不知幾開心，仲係咁拎住…笑死我地…
最尾伊健都未出場我地班人就走左，淨返幾個留守…
但其實我覺得唱友情歲月氣氛都唔錯丫…

20016789101112月
2002123456789101112月
2003123456789101112月
2004123456789101112月
2005123456789101112月
2006123456789101112月
2007123456789101112月