| 原本諗住10點鐘開會，但因為聯絡不足，搞到12點先開始…
一傾就傾到3點鐘先食飯。 然後整點網站的東東後就出去食飯， 食完走之前在電視見到紅雨已發出了， 外面雨勢都幾大，又行雷閃電，而且已經幾夜下， 所以諗住截的士回家，但唔知行咩衰運， 明明好多架的士，都要截幾個字先截到… 跟住雨勢越黎越大，能見度極低， 出面又水浸、又撞車、又死火… 然後在收音機聽到…黑雨發出了…嘩！係今年第一次呢… 最後11點左右先返到屋企，好彩個server冇死到… |
| 一早落樓飲茶，慶祝母親的生日，
下午去左城大開舊生會的會議， 首先去那裡的canteen食晏， 那裡不但裝修正(起碼好過科大同中大)， 而且勁平(咖哩飯$12)，下次去開o個頭都要響o個度食！ 跟住在某課室開會開左兩個鐘後就返屋企， 然後晚上落樓下食飯再慶祝母親的生日。 半年的暑假就咁過去了，聽日就要返學咯~~ 真係有點唔捨得…呢個暑假真係好充實呀 又要搏鬥十幾個月先可以再happy了… |
| 一早被嘈醒：「停課呀！」出面雖然都落住雨，
但都似乎未至於要停課o個隻，於是上網confirm下， 結果開學日真係要延遲了… chat左一陣之後就繼續訓，然後10點起身， 開始繁忙的工作… |
| 今日真係可以開學咯…出面仲有D太陽…
第一日就差D遲到(好似F.1時咁)，好彩home room在地下， 否則跑到索氣… 跟住去hall進行開學禮， 新校長竟然用英文致訓辭，真係搞野… 然後完左後就返課室處理班務…我唔知點解被選中做班長… 跟住11點幾放學咯~下午仍然忙著學生會的東東… |
| 第一日上堂，雖然唔係點教書，但已經有D睡意…
last堂班主任堂又唔知點解再被選中做班會文書…有冇搞錯… 下午開左近五個鐘的會議…累死了… 晚上還要打番一份二份報告…原來學生會真係唔係咁易做… 不過做落都學到唔少野，而且幾好玩， 所以都希望有得繼續做落去啦… |
| 今日有三堂空堂，但好快就過左…
下午放左學綵排聽日的學生會宣傳活動， 一直排到6點… 晚上仍然忙著學生會的東東… |
| 6點起身搭小巴，7點番到學校，目的只係為下午的學生會宣傳
進行最後綵排。雖然8點都未到，但太陽已經幾晒下， 而且仲有堆同學在附近睇住，但我地都繼續努力練習， 結果這個宣傳總算順利完成，諗番下， 我地成班人在45小時內可搞出咁多野出黎，都真係幾犀利下… 下午又係開會，出面雨勢越黎越大， 跟住突然有宣佈：「天文台已經懸掛紅雨警告， 稍後可能改掛黑雨警告…」剛好個會開完， 就拿拿聲番去。我同同學兩個人一把遮， 結果都要濕哂半邊身，鞋裡裝哂水，真係刺激… 晚上傾電話傾左兩粒鐘，好耐未試過啦，傾得好爽， 不過又好似sai左唔少時間咁，最來都忙極了… 但難得禮拜五晚，鬆一鬆都好o既… |
| 下個禮拜又搞氣象迷聚會，今次係去石澳BBQ，
由於自己都未去過，於是就趁今日放假， 同幾位網友往那裡視察環境。 首先去筲箕灣看看那裡有得買野食同埋所需用品， 跟住就搭巴士去石澳(呢世人第一次搭新巴！)， 那裡的沙灘真係幾正，幾乎想跳落去游… 看完燒烤爐等東東後，有人建議上大頭洲一看， 結果看完番黎就5:40了，仲約左家人6:15在旺角… 於是急忙離去，結果7:00先去到… 晚飯後往紅磡睇sammi的演唱會， 這個…都算幾好聽吧！ 回到家時已是12:15了…好[支力]… |
| 早上同屋企人飲茶然後與公司的人傾公事，
下午往學校開舊生會的會議直至五點， 跟著返屋企拿點東西出去地鐵站影印， 傍晚跟朋友到商埸行行同到M記吃點東西， 晚上和家人到壽司鋪食飯。跟住番屋企。 全日四圍走，但全日都在荃灣度過。 |
| 下午開會maths club的會後往地鐵站拎番噚日影印的東東，
點知仲要等多個鐘，一個鐘後去番那裡先發覺唔夠錢， 又要去提款，經過兩重波折後， 拎左箱野先知原來100份X27人係重成咁… 行十步就要停一停…真辛苦… |
| 今日總共開左三個會，都可算係破哂個人紀錄。
(電腦學會、學生會、舊生會) 晚上番到屋企正準備工作時，突然聽到「嘟嘟嘟…」 立即看看電視，眼見美國世貿中心穿哂窿咁， 國防部就著哂火咁，跟住過多陣世貿中心就lump哂， 成個紐約冒哂煙，好似做緊活火溶城咁， 諗起都心寒…真係勁恐怖… 原來今日係世界和平日，真係得人驚 但願世界真係和平 |
| 全日電視都係講關於美國遇襲的消息，
同學都係討論這個話題， 功課都係關於此新聞的， 希望此事能早日解決啦， 見到咁多人死傷都真係好難過… 今日終於唔使在放學後開會，係開學後首次， 回家後都在看那些新聞，結果工作又延遲， 搞到兩點半先訓… |
| 經過連續兩晚共8小時的睡眠後，
今日番學間中出現釣魚現象，咁快就這樣子，慘了… 下午又係開三個會(班會、舊生會、學生會)， 晚上又處理一輪文書工作， 都唔知幾時先可以抖抖… |
| 放學後冇會開，不過都要在學校幫手搞學生會d野…
夜晚聯絡聽日聚會的人，總算順利，冇尷尬的事發生… 今晚係1點半訓…因為要整近200塊宣傳學生會用的牌仔… |
| 上晝番學校繼續準備學生會宣傳的東東，
中午時因為有急事所以番左屋企，順便準備晚上的聚會， 搞掂就出發往筲箕灣買野及準備集合。 今次聚會有27人參加，都算幾多下，仲有鄰台的台長… 大家燒完就玩「一筆out消」，但題目似乎深左少少， 加上D人唔識bank，結果得$16獎金(最高係$3000)… 但成個聚會總算幾成功吧…大家都玩得幾開心 番到屋企已經12點幾，跟住搞番哂D野…結果3點先訓… |
| 訓到12點半先起身…但都唔多夠咁，仲係好[支力]…
2點落樓下食午飯…然後返上屋企繼續訓晏覺， 簡直就係虛度左成日… 晚上過海食自助餐，慶祝母親的農曆生日， 不過好似冇乜胃口咁… |
| 天未光個鬧鐘就響了，唔係因為個鬧鐘壞左，
而係因為今日要一早返學校做學生會宣傳。 5:50落到樓下，天都只係剛剛光左，街上非常之冷清， 得幾個阿伯做晨運。因為咁早，好多車都未開， 我唯有一改以往返學方法，改搭巴士再行路。 途中遇到學生會的內副，結果我地係全校第一個回校， 當時係上午6點30分。之後忙碌的工作就開始， 要走上走落貼宣傳品，直到7點左右就到下面派傳單： 「請支持一號咖哩閣！」呢句話講左超過一百次， 全校千幾個學生我諗我地都派左9成， 一直派到7:58先返上課室。 放學後仲要同各位同學講聲byebye，咁先完成全日的宣傳。 下午放學會的會議都不禁訓著了，之後回家都訓左兩個鐘… 仲有三日宣傳，希望我頂得訓吧… |
| 都係好多野做呀…救命…又好眼訓…
又要好多功課要做，好[支力]呀… |
| 應該6點9番到學校搞學生會宣傳，結果6點5先醒，
唯有立即起身早餐都唔食飛的返去。 一朝早企響度又打鼓又大嗌，都咪話唔辛苦， 仲要畀阿sir話太嘈畀人投訴， 又有個唔知邊位同學叫我地收聲，真係受唔少氣。 聽到同學的反應，似乎隔離個閣受歡迎D… 雖然做SU真係辛苦左D，但我都唔希望我地會輸， 唯有在淨番一個禮拜盡力而為吧… |
| 今日又係五點八起身，一落床就伸隻手出窗外：
「哎呀…冇落雨添…」學生會今日送遮套黎做宣傳， 如果冇落雨，那400個遮套就要報銷， 好彩出門口後就開始落雨了，所有遮套亦全部送出。 晚上睇番學生會個討論區，見到有人話我地必輸， 真係令人心淡…唯有下個禮拜盡最後努力啦… |
| 今日成日都在家做功課。
同埋為學生會的事煩惱… 好多問題發生左，都唔知點解決… |
| 今日天氣非常之好，如果去游水就正…
可惜又要開舊生會會議，討論下星期的會員大會事項。 回家匆匆忙忙地回應了學生會討論區的一堆批評後， 就出去食晚飯了。食完飯又趕番屋企回應那些討論區批評… 真係令人嘔電… |
| 學校第一次集會我就要上台宣佈，不過表現還算不錯吧…
下午好快地開左輔導組的會就返屋企，原本打算整下班網， 點知部機中哂病毒，搞左兩粒鐘先recover番，真係激死… |
| 學生會最後一日宣傳了，大家都谷盡哂，
成千個書簽全部派哂。 下晝因為要準備在hall宣傳的事， 所以買飯返學校食，真係好耐未試過咯… 放學後罕有地冇會要開， 但為左學生會的事同某幹事傾左個幾鐘， 結果都係五點先走… 返到屋企就忙著個board的事， 為學生會盡最後努力… 其實而家我都冇咩期望了，唯有輸少當贏啦~ |
| 今日就係選學生會的大日子，一返到學校就四圍都係旗仔，
好似好大件事咁…之後就每人派張選票， 原來內閣成員都可以投，咁我當然唔會倒自己米… 好快就到左緊張的時刻了，4點正投票結束後， 一個個投票箱搬到geog room，然後點票正式開始。 我一入去就見到一個個「正」字在黑板上， 果然係好似選特首咁，嗌一下「1號」就在1號那邊加一畫… 見到隔離閣那邊多D「正」字，都已經知道結果如何， 失望就當然有啦，不過情緒還算可以啦… 最後結果係309票對572票，已經比大家想像的好了… 晚上幾個一齊去打邊爐慶功(慶祝工作完成)， 雖然係輸了，但大家都玩得好開心咁， 可能係因為大家本身已經好多野做吧，冇左學生會可能更好… 唉…結果真係輸左，而且比我預期的略差(我估400對500)， 不過總算得到豐富的經驗，而且都玩得幾開心， 整整一個月來的心機該冇白廢到吧?!.. 希望隔離閣能將學生會搞得好好睇睇啦… |
| 今日放學，所以訓到好晏…
原本打算今日去唱K，可惜多野做，又好[支力]， 所以結果都冇去… 食完午飯後一直對著電腦呆呆咁， 做唔到D乜野出黎… 夜晚出去參加舊生會的會員大會， 夜麻麻返學校原來都幾恐怖的~~~ 開到9點幾先返到屋企… |
| 今日破戒…去左踩單車…
七點幾就起身搭巴士去大圍， 食完早餐後就出發了。 一口氣踩到大埔(1小時15分)，破左歷來的紀錄… 午飯後又一口氣踩到大尾督， 3點半開始回程，6點左右返到大圍， 真係[支力]到行都行唔到咁滯… 然後趕去沙田同屋企人食晚餐，不過[支力]到冇乜胃口… 今次真係歷來最[支力]的一次活動… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |