| 今日暑期工冇野要做，咁o岩科大又要返去做lab，時間配合得天衣無縫~ 朝早約埋D同學響荔景等，結果等左15分鐘，然後就一齊搭車去科大~ 原來搭小巴好快就去到科大，結果去到lab門口等左15分鐘… 今次係第一次正式上lab，去到個TA(唔知乜Assistant)就講野， 不過大家都係冇乜點理…但我第一次上lab點都要聽下書o既… 跟住就開始寫program，寫完仲有成個鐘淨低， 就開始研究份功課，不過一直都有error，debug極都唔得，唯有放棄… 然後個個同學都搞掂哂就走先…去LG7(即係大家樂)食晏， 跟住見有時間，就諗住帶冇去科大camp o既去玩下LG2之旅， (LG2詳情資料請睇呢日日記) 不過搵左一輪都搵唔到個入口響邊，兜左好耐先搵到… 去到個入口(即係男廁)裡面都有唔少人，所以只係男o既可以去… 上次去camp時係成班人搭哂手咁行，但今次只係得三個人一齊， 雖然有少少光射入黎，但都已經勁驚，仲要聽到有D怪聲… 出到黎都仲驚驚地，下次要試下一個人自己行先得~~ 行完LG2都冇乜好做，就搭車出返九龍… 下晝約左人上去同遊船河間野傾數，睇下可唔可以減低舊生會捐失… 不過時間預錯左，早左半粒鐘去到，結果又係響度等等等… 人齊就上去間野，一開門o個個人就問「係咪想加人呀?」… 跟住慢慢解釋番我地o既苦況，硬住頭皮咁希望佢減低個人數， 不過其實D船已經一早安排好，根本就冇可能改， 佢都好詳細咁解釋佢地o既難處，我地都無謂再死撐啦… 跟住就返荃灣準備開會，但去到仲有大半個鐘，又要等等等等等… 途中撞到個同學，即刻極力邀請佢去遊船河，都總算成功左… 根本我地諗住周圍行下可以搵到其他同學，連機鋪都搵過， 不過都係失敗…唯有慢慢行去開會地點(又係M記)… 去到又要等…其間買左個新地杯黎飲，初初飲都冇乜野， 不過當D新地同可樂撈埋一齊o個陣…浸味簡直… 所以下次飲的話一定要食左個雪糕先… 呢個係舊生會緊急特別會議，目的當然係搵人去遊船河， 結果得出黎o既最後絕招係減價同開放畀所有人報名， 於是大家就瘋狂打電話搵各自o既朋友，初部成績似乎唔錯… 然後就繼續討論當日節目，順便又示範下D遊戲，結果傾到成7.幾… 食完飯之後唔知點解極忙，可能係因為成日都冇上網， 結果電視又冇睇，功課又冇做，仲要搞到成1.先寫完日記… |
| 今日終於要返聖文德做番個present，我地組仲約早半個鐘諗住傾野， 結果要同平日返學一樣咁早起身，成晚只係訓左五粒鐘… 臨走時先記得未print野，要即刻入房print，好彩仲趕得切… 響地鐵度都訓到死下死下…好彩冇訓過站… 去到未齊人，唯有上住網等…結果等左差唔多夠鐘先齊人， 最後都係冇傾到任何野… 一開始，原來唔係present，係有個和記staff介紹一個組織， 然後要我地假設自己係D com，要設計一個比賽推廣D安全健康訊息… 同埋要假設自己係參實者，要點樣present得好D… 呢個係一個即時project，得一個鐘諗idea， 但佢一開始講到勁唔清楚，結果大家都諗得勁趕… 我自問冇乜創意，好彩D組員都諗到唔少野，我就補充下咁， 終於響限時內諗哂D idea同埋整埋個ppt~ 首先有兩組present先，不過佢地似出黎棟篤笑多D，我地都放心D~ 每組present完都有Q&A時間，頭兩組勁畀人叉， 不過我地o個組就好順利present完，而且Q&A完全冇人問問題… 搞掂哂七組就投票睇下邊組最好，贏左有獎品~ 結果我地o個組居然贏左~~獎品係一個腰包… present完就夠鐘食飯，我地都諗唔到去邊度食好， 有人提出飛的去荷李活食，既然冇人反對就即刻截車去~ 去到就上food court搵位然後分批買野食， 我食左個海南雞飯，有汽水有湯飲，都唔錯~ 食飽飯諗住散步返去，諗住的士唔使跳錶實好快返到去， 點知都要行三個字…加上天氣炎熱，返到去成身汗… 返到去又係上網…但班和記staff遲到，等左勁耐先開始… 下晝首先係抽籤決定下個禮拜做乜project， 我地抽到係movie editing…聽聞要返和記office做… 不過都應該好過其他組…要周圍走去做survey… 但另外下個禮拜有個task要做…去唔同地方巡查ISP收費情況， 我地o個組係去東區同東涌…都諗緊去唔去好… 搞掂呢D野就開始present，今次由第七組開始， 呢幾組都講得好pro，聽到我訓著左，真係好驚我地唔夠野講… 我地present時唯有吹下水咁，結果都吹到12分鐘，都唔差啦~ 最後竟然搞到要開OT，七組present哂已經係5:50… 返到屋企都差唔多開飯… 夜晚繼續盡全力搵人去遊船河，因為聽日已經係舉行日子喇… 最終畀我搵到細佬同6個網友去，都總算有番D安慰… 可惜其他幹事搵o個班friend淆哂，到夜晚仲有9個名額… 而家希望聽日有奇蹟出現… |
| 今日係舊生會遊船河的日子，朝早見窗外有D雨， 最驚D人見落雨淆底，令舊生會損失更慘重… 起身之後就打電話搵阿姨，不過原來佢黎唔到…咁都冇計了… 最後出席人數係20人…仲欠10人… 跟住就上網睇睇天氣，點知一上就話升左個熱帶低氣壓， 隨即就出一號，即刻要將工作重點放響個網度… 由於今次係今年第一次打風，所以乜野都未準備好， 淨係因為天文台將「懸掛」改做「發出」已經要改哂D script， 另外因為server問題又要搞一輪，結果用左成個鐘先搞掂… 然後就已經夠鐘出發食飯然後買野，落去大家樂仲賣緊早餐… 等左幾個字先買到野，匆忙地食完個飯就搭車去地鐵站… 我去到已經遲左1分鐘，但竟然未有人到， 就響呢個時候又有兩個基督徒走埋黎搭訕… (類似情形響上年都曾經遇過…) 不過佢地冇點sell野，反而係我同佢地sell遊船河，不過佢地黎唔到… 齊人就去百佳買飲品同零食，淨係捧D水都已經捧到死死下… 買齊野就一齊搭地鐵去，其間約左個和記同事拎番D野， 結果響太子站等左十分鐘…然後上左架車又行得勁慢， 行到去鐘樓都已經遲左15分鐘…但竟然得幾個人到左… 首先就去銀行噤機，然後等左一輪就再去捧埋D晚餐， 去到就已經齊人…雖然有個幹事黎唔到，但多左個網友黎， 最終都有20人上船…冇人淆底都已經好好~ 上到船首先周圍行下，又上船頂影相曬太陽(其實係天陰…)， 不過隻船搖得好犀利下，落返下面好似有D暈，訓番陣就冇事… 原來船公司話隻船會駛去西貢，不過聽聞o個度大浪， 所以要改去南區…過左個零鐘隻船就駛到去南丫島石排灣喇… 隻船停定就打算開始集體遊戲，不過突然有人提議唱K， 網友們又燒左幾隻VCD出黎，裡面裝左大堆新歌，於是大家就開始唱… 另外一批人就去打牌，最終D集體遊戲都係冇左件事… 大概5.左右就一齊影張合照，然後就繼續各自各活動， 但冇幾耐就開始落雨，仲突然落到勁大，唯有入番哂室內… 我入番去先醒起我對襪放左上船頂，走番上去又搵唔到， 以為有人拎左落黎…點知畀人掟左去第度，結果畀雨淋濕哂… 6.就係開飯時間，20人食30人份量o既自助餐，結果當然食淨唔少… 我食飽就開始收錢，然後就開始釣墨魚行動， 不過唔知點解似乎D人對呢個活動興趣不大… 我一放個u落去已經覺得好重，一扯就見到海面有堆墨汁， 可惜條墨魚就扯唔到上黎…再釣左陣又有料到， 不過都係上唔到黎…決定放棄… 大概釣到8.就要開始回程，我見出面幾好風就出去船頭度下， 跟住成班網友就輪住走出黎坐，結果搞到我冇位坐… 我就走上船頂同大家玩估故仔遊戲，沿途風勢都幾大， 同埋周圍都有行雷，好彩冇落雨~ 隻船差唔多10.就回到尖沙咀碼頭，然後大家就解散~ 我就同幹事們拎埋D野走，其間落勁大雨，把遮又爛左，都幾狼狽… 上到地鐵大家勁玩數手指遊戲，一直玩到落車為止，勁好玩^^ 回到家已經11.，成日冇上網…要搞返個熱帶低氣壓D資料， 寫日記都已經係.半鐘的事… 總括黎講，今次遊船河o既報名情況真係極度令人失望， 20人當然竟然有三份一係我D網友，成堆舊生完全唔知去哂邊… 不過今日都總算幾順利，雖然冷氣船轉左中式船，又有天氣影響， 同埋我最初都驚舊生同網友會唔會夾唔黎， 雖然主要都係各自各玩，但個氣氛都總算幾好， 真係要多謝幾位網友咁畀面出席，如果唔係令舊生會損失更慘重… |
| 朝早起身諗住已經出左三號，點知仍然冇料到， 早上基本上只係處理北冕的事… 開門見到有好多親戚響廳度，阿姨就煮左個麵畀我做brunch~ 食飽飽下晝就繼續追下風，同埋聽下個科大course D lecture… (其實只係為左得到D quiz問題…)， 仲有做功課，今日終於完成一樣喇~ 大概4.就出發去彩虹…出席科大camp友聚會~ 久別重逢，大家依然係咁靜…可惜唔齊12個組員…有3個黎唔到… 等齊人之後就出發去買野準備夜晚打邊爐， 先後去左街市同兩間超市，然後就搭小巴入科大~ 入到去橫風橫雨，好彩沿途一直有瓦遮頭… 今次係響hall 4某common room進行打邊爐活動， 準備哂D野就開餐，我自己就勁餓，雖然我不斷食…食到勁飽， 不過有人之前已經幾飽，所以到最後都食淨唔少野… 食完已經係10.幾，不過仲有節目…就係去行死人沙灘… 話說呢度就係兩年前某自殺案發現屍體地點… 我地出番小巴站，去到某條小路，然後摸黑行條小徑， 大概行左半粒鐘先去到個沙灘，已經係11.幾… 然後大家要我唱歌先肯走(-_-)，結果擾攘左幾個字先離開， 返到上小巴站都已經過左12.… 等車等左兩個字都終於有車，可惜上唔哂人，淨番兩個要等下班車… 結果去到成12.半先有車，去到彩虹即刻跑上前面架小巴返荃灣… 不過返到荃灣都已經成1.，小巴尾班車都已經開左， 唯有飛的返麗城，結果1.2就已經返到屋企~ 不過聽日仲要返工…真係[才羅]命… |
| 暑期工踏入第二星期，又要一早7.幾起身… 一落床就即刻睇北冕，不過佢已經遠去，仲登陸埋，都有D失望… 食完早餐準時出門口搭地鐵，但去到太子站遇到前所未見o既長龍， 觀塘線列車遲遲未到達，等左成五分鐘先有車， 點知架車入左月台一半又停低左，此時條龍已經排到過對面月台咁滯… 等左兩分鐘架車先駛哂入月台，可惜架車塞爆人，冇可能迫到上車… 又再過多兩分鐘另一班車就到，不過呢架又要等多一分鐘先開始， 計埋計埋即係我響太子站已經等左十分鐘… 然後又塞地鐵，架車行行下又停，結果8:52先響黃大仙落車… 之後即刻跑去搭小巴上聖文德，好彩都冇遲到… 朝早主要工作係準備呢個禮拜o既project， 我地呢組係做video editing，首先要諗下拍乜野， 我自問訓得五粒幾鐘就真係諗唔到咩idea， 不過好彩有位有豐富拍video經驗o既組員， 否則成組人就咁坐響度唔知做乜… 傾完就午飯時間，因為我地食完飯要返和記昂船洲office， 所以午飯就去美孚食…搭完車去都仲有成個半鐘時間， 首先搵間茶餐廳，全部清一色食牛腩麵， 然後悶悶地就周圍行，結果去到間冒險樂園， 大家就呆呆咁睇住人地玩，最後見到部氣墊球就買銀仔黎玩， 然後輪流玩左幾輪…咁先hEA哂o個個幾鐘… 會合番D和記staff之後就搭專車去office， 只見架車響D貨櫃之間穿插，轉眼就去左… 然後入去某間房度，D人示範左D equipment畀我地睇， 跟住D人就叫我地開始工作喇… 不過我地除左download番D software之外都冇咩好做， 結果唯有上下網，影下相，畫下公仔咁… 因為5.8先有專車載員工走，所以我地要由3. hEA到5.幾先走得… 晚飯後準備做功課，不過見到D中化又唔知寫乜好， 結果寫得o個幾行字，做到10.幾就決定放棄， 然後溫書準備聽日科大course考試… |
| 今日o既工作係拍video…地點係組員甲讀o既德望學校… 響彩虹站集合好哂之後就搭小巴上去， 登記左之後就坐響個梳化度等左一輪， 然後唔知點解要幫手搬部desktop去第二度， 跟住就上某課室度開始進行拍攝工作~ 上到去已經見到一班組員甲o既同學響度等候扮學生， 然後組員甲就做攝影，淨番幾個只係間唔中扮下學生咁… 其實呢個video係描述一班學生患左「尊師重道癲狂症」， 即係類似adXdas個廣告咁…成班人見到miss就癲哂咁… 不過呢個其實係組員甲以前用過的idea，今次只係重拍… 拍左個幾鐘終於拍完，然後就用部desktop黎剪片， 不過今次仍然係拍video經驗豐富o既組員甲負責操刀， 結果連埋我在內o既其餘四位組員就得個睇字… 最後搞到1.半左右就收工，搭返小巴出彩虹解散~ 夜晚要去科大考試，我諗住班同學朝早有入科大上tutorial， 食完飯就入去同佢地會合，於是就求其搵間大快活食完就搭小巴入去… 點知去到打畀佢地先知佢地根本冇上tutorial…而家先出發… 去到科大係2.半，考試係5.，要打發兩個幾鐘時間的確不易， 首先就入書店睇下書，然後就勁上網，上到4.幾D同學先出現… 等到差唔多5.就入得個試場，其實即係演講廳~ 入到去就令人懷緬番科大camp o既情境~~ 呢份卷要做兩粒鐘，全部都係考C++， 我用左9個字完成，然後check完一次卷訓左半個鐘再check第二次， 不過出番去先發覺有一條做漏左野… 但係呢份卷都比我想像中易…只係有好多地方陰人… 考完就一齊去LG7食晚飯，食飽又再黎一次LG2之旅…已經係第三次， 今次全程開住部DC黎照，只係照到地下好多陰司紙， 但已經完全唔覺得驚，因為已經熟習哂條路… 行完就再去hall睇四窗三房，不過只係見到四窗，冇入去睇三房… 睇完就出番去搭車返荃灣，然後一齊去飲野，大家叫埋哂D唔知咩黎飲， 我叫左「西瓜朱古力」，竟然係最好味o個杯… 然後個個互試對方飲品，結果飲到11.幾先回到家… 聽日就係放榜o既大日子，雖然已經唔關我事， 但都有唔少朋友聽日就會知道自己o既會考成績， 無論係考一科定係八科九科都好， 我都響度祝大家有個美滿o既成績啦~ 同埋明年今日就輪到我放jupas，即係仲有一年我就知入邊間U咯… |
| 一早起身洗面食早餐準備返工， 食完打個電話問問同事幾點要返到去，點知原來下晝先要返…-_- 於是睇左陣報紙之後就返上床大覺訓， 訓左成個鐘先起身，即時精神哂~ 今日係會考放榜日，起左身就上網睇下朋友們的成績， 首先係網友，今年有成10個都係今年考，咁當然有人歡喜有人愁， 不過整體黎講大家都唔錯啦，都恭喜D掂左o既， 同埋祝D未搵到學校o既聽日順順利利啦~ 跟住到幾位重考英文o既同學，基本上我都唔係收到好多消息， 不過有個icq話我知佢有A(勁過我!)，仲話請大家食飯慶祝，好野~ 食完午飯就出發去美孚會合組員，準備一齊搭車去和記office， 不過大家都遲到，結果miss左一班車， 結果等齊人之後要響40度o既高溫下等幾個字先有下班車… 去到就開工，今日要繼續整movie同埋整opearation guide同ppt， 不過間房得一部機有裝office，結果要等人拎部notebook黎先開到工， 但整movie o個度唔多順利，結果要成6.先搞掂… 返到屋企細佬就話佢部機上唔到網，但已經夠鐘食飯， 於是食完飯即刻整，結果整左半粒鐘先搞完… 然後就即刻開始執hkspeed個project，突然話要聽日交，趕到我… 結果做到1.半都未完成…好眼訓呀… |
| 今日又係唔使返工，咁o岩又要返科大， 晨早就起身寫埋噚日未完成的project，然後就出門口， 又係去荔景集合然後一齊搭地鐵再轉小巴入科大… 一過左火雞就見到atrium好多攤位遊戲，非常熱鬧… 原來今日係收生日，D人當哂我地係freshman， 我地都想扮係然後去玩下… 上到lab門口就已經入得，跟住就開始寫program， 大概用左半粒鐘時間寫完，然後淨番o個個半鐘係用黎睇相… 跟住去LG1食飯，食完就搭返小巴落地鐵站， 然後有人提出去油塘站參觀，於是就一齊搭地鐵往油塘進發~ 去到油塘站就上大堂行左一輪，然後搭車過北角再轉返上荃灣… 上到荃灣線眼訓到差唔多全程都訓著哂… 返到屋企為左做和記個task，要打電話問下唔同屋苑唔同ISP收費， 不過原來我負責o既其中一個都唔係屋苑，另一個就唔知響邊， 結果問左一個就算…但要扮住響另一個屋苑都幾煩… 然後夜晚仲要執埋D ppt準備聽日present， 聽日已經係暑期工last day咯，時間過得真快~ 夜晚同場加映節目係死唔斷氣hkspeed project， 做左成年都仲未完成，簡直可以破世界紀錄… |
| 轉眼間已經係和記暑期工最後一日，如常7.4起身然後打開電視， 無啦啦又出黃雨，估唔到返工第一日同last day都係大雨… 朝早要做o既同上個禮拜五做o既幾乎一樣， 又係得一個鐘諗idea，由於我地上次已經諗左唔少， 所以今次都幾輕鬆，大家仲得閒玩搵字遊戲… 結果7組都順利present，冇乜特別~ 午飯時間出面仍然係落緊大雨，求其走去對面間茶餐廳食算… 今日有兩個半鐘lunch time，我地用左半粒鐘就食完野， 咁o岩電視播《瘦身男女》，大家就坐響度慢慢睇， 都睇左半套咁滯…返到學校時發覺間房度門竟然鎖左， 好彩等一陣就有人黎開門，唔係吽響間房出面悶死都似… 下晝present番大家準備o既project， 我地o個組主要都係播番之前拍o個條片出黎， 初初拍o個陣都冇覺得咁好笑，剪接完之後變得勁好笑， 大家睇見都笑到碌地，我自己都笑到斷氣… 全部人present哂之後，兩個禮拜o既工作正式結束~~ 然後填番份問卷同交番員工證，然後個staff就講D肺腑之言， 咁就正式解散喇，臨走當然同幾位組員合照一番~ 呢兩個禮拜的確過得好快，同埋都好似冇做過乜野咁… 其實呢份工同我想像中差好遠，初初以為要日日返足朝9晚5， 點知原來係勁free，兩個禮拜四都可以返科大上lab~ 不過其實都學到唔少野，但最初我諗住學多D practical o既野， 呢兩個禮拜就完全冇提及過… 但anyway，呢兩個禮拜都過得唔錯丫，呢千二蚊都幾易賺~ (不過我未夠18歲，人工竟然唔可以自動轉帳，要搵日去黃埔拎…) 夜晚總算冇工作要做喇，就好好休息下， 趁機會睇下網頁，執下相咁，咁就過左一晚~ 未來一個禮拜都冇乜野做，可以抖返下啦~~ |
| 今日有人請睇《超力仔》，起身食完早餐就出發去旺角， 等到夠哂鐘個主角(請o個位人兄)都未到，打畀佢竟然係o岩o岩起身， 唯有我地去戲院等住先…結果開左場20分鐘先到， 入到去套戲已經做左一段時間，不過好彩都未有乜野劇情發展… 我地坐左一個鐘套戲就做完，呢套當然冇之前o個D咁好睇啦， 不過都已經比我想像中好~ 睇完就成班人企左響門口諗跟住去邊， 既然都已經午飯時間，不如直情去k lunch算… 結果去左綠盒唱，都唱左兩個半鐘… 不過唔知係咪因為朝早食左個辣麵，今日把聲都唔多掂… 唱完又搵地方hEA，期間我見到部機諗住上下網， 其他人就行住先，諗住一陣會合番， 但聯絡方面出左問題，最後我響信和呆等左三個字， 然後又話響先達門口等，結果又呆等多三個字先至會合番， 呆左半個鐘搞到我乜mood都冇哂… 然後一齊去許留山食完西米露就解散返屋企， 車上我都已經訓哂，回到家又繼續訓… 突然心血來潮諗住做下科大course份功課， 結果食完飯就已經做完，大概用左個幾鐘~ 夜晚睇左陣獎門人，跟住班會主席就打黎傾下個禮拜班會camp事宜， 結果一傾就傾左兩個鐘，原本諗住做埋D功課都做唔到了… |
| 正所謂夏日炎炎正好眠，今日一覺訓到12.幾， 經過成個禮拜唔夠訓之後終於都可以訓番夠本，真係enjoy~ 午飯後就慢慢做功課，做左幾粒鐘都終於完成所有暑期功課~ 見出面咁好天，真係想出去游水…錯過左個機會添… 夜晚過阿姨度BBQ，今次得4個人燒，不過原來少少人燒都幾正~ 好耐都未試過份日記咁短，不過咁都好丫， 日日咁多野做都未必係一件好事，得閒吽一吽充下電都唔錯丫~ |
| 今日係瘋狂唱K日，朝早約左科大camp友唱lunch， 下晝就係同網友去energy，真係唱足成日~ 朝早上陣網就出發去尖沙咀…我遲左五分鐘但都未齊人， 齊哂就行去美麗華間紅盒，7個人去間超大房，訓哂響度都得… 前排唱女仔歌唱到癲哂，搞到個喉嚨傷哂， 加上噚晚BBQ，結果第一首歌都已經唱唔到…決定只唱男歌算… 不過似乎我唱第一首時已經嚇親人，D人唱完都唔願遞咪畀我… 似乎我要休養一輪先可以再唱女仔歌… 原本呢度可以唱到4.，但約左網友2.響旺角，遲到要罰做變態野… 所以我1.9就要提早離開，然後趕搭地鐵去…差3分鐘遲到… 今次9個人又係畀間超大房，最初大家都冇乜野， 不過越唱越high，過左陣就開始玩骰仔， 跟住又玩[木凳]，掟黎掟去…個個都癲哂… 然後又點左D勁搞野o既歌，笑到大家碌地… 結果由2.唱到8.幾，真係非常之盡興~ 唱完就再食埋飯先走，返到屋企已經差唔多10.， 但聽日出發去班會三日兩夜camp，又係未執行李， 而且好眼訓…要準備未來兩日通頂… |
| 今日係班會camp o既大日子，朝早上左陣網就出發， 呢次要拎埋個爐走，準備夜晚打邊爐，所以都幾狼狽下… 響荃灣等齊人之後就一齊搭地鐵去東涌，然後慢慢等車， 不過去梅窩D車都幾疏下，所以等車都等左幾耐下， 大家已經急不及待趁呢個機會鋤D… 坐左成粒鐘架車先到梅窩，然後就去搵渡假屋， 經過一段海濱小徑，行過條小橋，經過沙灘， 再沿小溪進入鄉村，然後行到條村盡頭，終於都搵到間屋， 沿途太陽暴曬，氣溫40度，仲要拎住大堆行李，真係[才羅]命… 上到廳首先係分房同分組買野準備BBQ同打邊爐， 然後就各自分工：打牌、UNO、鋤D，總之各有各忙… 跟住我見樓下有單車租，$20可以租一晚，咁平就梗係即刻整番架啦~ 租完就踩出去玩下，順便陪人出碼頭食午飯~ 食完就去惠康買返D水(大家嚴重缺水)，返房之後大家就搵野玩， 我就教大家玩響上次網友camp同人研製出黎o既UNOR棉胎， 大家都玩得不亦樂乎，真係幾有滿足感^^ 差唔多8.就上天台準備透爐然後BBQ，但竟然冇人買打火機同報紙， 最後要問其他人借打火機，然後搵幾個人出買報紙… 就響呢個時候，細佬已經搭船去到碼頭，所以我要出去接佢… 話說佢join左呢個camp，但朝早又去海洋公園，所以要自己入梅窩… 接左佢返黎大家已經燒緊，咁我都急不及待食野喇~ 又8.幾燒到10.幾，大家都已經飽哂，就執番好D野然後落返廳玩遊戲~ 首先係玩左陣三語版拍七，然後就到數數字， 輸左o個pair就要出去做變態動作，我都做左兩次… 玩到2.左右就入房講鬼故，十幾個人迫埋響張床上面， 熄哂燈就開始講喇…D鬼故都咪話唔恐怖，不過成班人圍哂坐就唔驚啦… 講到3.幾就出番廳，然後大家無無聊聊就播下歌睇下電視， 大概去到5.就返房沖涼準備出去睇日出，不過時間緊迫， 我都趕唔切沖，求其換件衫就出門口了… |
| 去到海灘大家就開始等日出，不過日出個位畀座山遮住， 所以要再等多一段時間先有野睇，大家就趁機會玩下沙… 等到成7.個太陽終於出黎喇~ 睇完日出大家就出碼頭M記食早餐，返到渡假屋都已經8.幾， 我就睇下電視，然後就去沖涼，沖完又睇多陣電視睇到10.， 然後過隔離房同人鋤D鋤到11.幾，跟住就去廳準備食晏喇… 結果第一晚係完全冇訓過，但都唔係覺得太眼訓… 大家陸續咁起哂身之後就拉大隊出碼頭， 然後搵到間茶餐廳就嗌野食，嗌完就要即刻搵銀行噤機， 因為我拎左五舊水入camp，但畀camp錢畀左$350， 渡假屋按金畀左$100，買水買左$50，如果再唔噤機就冇錢找數… 食完飯就要去百佳買報紙同膠紙準備一陣玩遊戲， 買完就返渡假屋然後開始做野… 期間拎份報紙一睇，見到幅相影住個地方好面善… 原來係話有個大賊可能匿藏響離島，所以梅窩碼頭有好多差佬響度巡… 我地仲講笑話個賊已經匿左入我地間屋… 搞掂哂D物品就一齊出海灘，搵到個靚地方就開始玩遊戲， 其實呢個遊戲係我諗出黎o既，參考自科大camp定向環節o既一部分， 就係要分組走入用報紙圍住o既圈入面，然後扮火車咁行去岸邊， 用杯[才畢]水落個大水樽度，限時鬥[才畢]得最多水… 不過示範點玩時份報紙已經整爛哂，所以決定放棄報紙… 頭幾組玩o個陣都冇乜野，係除左我玩o個陣整爛對拖鞋， 要即刻去買過對…不過去到最後一組大家就開始癲， 然後就開始瘋狂水戰時間，大家係咁掟人落水，個個全身都濕哂… 期間發現我條單車鎖鎖匙失左蹤，不過搵極都搵唔到… 玩左陣之後大家就索性去游水，結果游左個幾鐘先返上水， 原來已經係5.，負責打邊爐o既就一齊出碼頭買野， 我就要捧住支水慢慢行返渡假屋，返到水已經超[支力]，好想訓覺… 沖完涼之後見到班人話去銀礦洞探險， 於是就成隊單車隊咁沿小徑一直行， 去到個瀑布就停低參觀下，不過呢個時候已經天黑，都睇唔到乜野… 睇完瀑布大家都話[支力]，所以放棄去銀礦洞， 大家就踩單車落返去，沿路一直係落斜，真係爽~ 返番渡假屋之後就係開飯時間，今晚係一檯打邊爐， 一檯燒埋噚晚食剩D野，不過大部分人都係主力打邊爐， 加上大家都好肚餓，所以個個都圍住個爐等食野， 一打開個煲十幾隻手就瘋狂夾野食，真係唔知「淥死誰手」… 雖然我隻碗擺正響個煲隔離，但次次都只係夾到少少野， 所以差唔多食哂D野時都仲幾餓下，好彩仲有幾包烏冬， 咁先填得飽個肚，再食埋D菜就真係飽哂~~ 食飽飯冇野做，大家就開始拎D水彈出黎玩， 然後個個越玩越激動，仲拎埋膠袋同水樽黎裝水， 掟到所有人全身濕透，同埋搞到天台水浸… 玩到差唔多11.，大家就換返套衫先， 然後11.半左右就開始singing con特別會議… 話說放暑假前班主任話希望我地下年歌唱比賽可以用7B名義組隊參賽， 今日就初步傾下唱乜歌同用乜野樂器， 結果呢個會都開左一個鐘~ 今晚o既集體遊戲係bilibala心底話， 我畀人問左條「你最後悔做過乜事?」 面對呢D咁哲理o既問題…諗左好耐都諗唔到， 結果大家唔耐煩就走去食宵夜先…食完都終於諗到啦… 然後D人就開始盤問大家o既愛情問題， 問問下搞到我好眼訓，聽聽下都洽著左… 結果到左5.左右，呢隻game終於玩完，我就返房訓了… |
| 隻錶準時10.半響起，然後就去刷牙洗面， 搞掂一切之後就執埋D野準備離開， 不過去到廳先發現原來唔少人都未起身，唯有鋤陣D解下悶先… 到左11.半大家都起哂身，就陸續洗面換衫執野， 然後再搞掂埋D錢銀問題，成12.3先離開… 落到樓下發現我租o個架單車已經畀人搬番去原位， 我又冇登記又冇畀按金，都係由佢放響度算咯… 大家一抽二lung咁行去噚日食晏o個間茶餐廳準備食晏， 不過我地有幾個下晝要去科大上lab，所以決定買野上船食， 一齊響門口影左大合照之後就同大家講再見喇~ 然後去M記買左午餐就即刻上左隻慢船，冇耐就開船~ 響船上食野的確好狼狽下，尤其是食巨無霸… 呢架的確係慢船，坐左成粒鐘先去到中環， 然後再轉地鐵同小巴，結果遲左半粒鐘先入到科大(應該要3.去到)… 上到去就即刻搵機做，不過部機壞完keyboard又壞mouse， 整左幾個字結果要換過部機，搞到差唔多5.先寫完個program， 然後等埋其他同學搞掂，結果6.半先離開科大… 返到屋企已經開左飯，食完飯就開始執相， 同做哂呢幾日未做o既野，最後開始補寫日記， 不過寫左一日已經1.幾，唯有去訓先…之前2晚夾埋訓得5粒鐘… 講番呢個camp啦~今次都玩得好刺激，起碼正過上兩年o既班會camp， 最好係今次去camp終於冇落雨喇！仲要日日都陽光普照！ 如果唔係都冇玩得咁開心~ |
| 過去兩晚夾埋訓得五粒鐘，今日當然要訓飽佢， 所以一直訓到12.幾先起身~ 起左身就補寫日記，但寫左一日就夠鐘食飯， 食完飯就要出門口去hkspeed office，諗住搞埋D script同埋出糧~ 不過上到去先知竟然一個二個都唔響度， 結果糧又未出到，script又只係寫到少少，真係白走一趟… 返到屋企食完飯主要都係繼續補寫日記， 寫到成10.先寫完，今日真係花左唔少時間響日記度… 順帶一提，之前我搞錯D野，禮拜一之後o既留言我都收唔到… 如果唔嫌煩o既唔該留左次，多謝哂^^ |
| 去完個camp返黎都仲有D[支力]，所以今日決定留響屋企， 成朝都係上網，冇乜野做過…下晝仍然係上網，都係冇乜野做過， 直到4.幾心血來潮，就開始寫份readme，寫左個幾鐘已經千幾字… 6.幾就出門口，約網友出荃灣食飯然後去睇千嬅concert~ 話說原本我係同屋企人睇，不過突然話有張飛多左， 而且係兩張飛分開坐，於是我就同網友一齊坐，順便就一齊去紅館… 食完飯就搭地鐵轉火車去紅磡，去到紅館竟然早左半粒鐘… 於是去兜個圈先，然後先入去坐，跟住就睇下份場刊消磨下時間~ 等左陣之後突然見家人出現…仲坐埋一齊， 原來「分開坐」係個誤會，唔同閘唔同段唔同位原來相距咁近… 噚日就話千嬅肚痛所以遲左個幾鐘，今日遲左半個鐘就開始~ 一開始覺得冇乜特別野，不過換衫期間播o個套片真係好搞笑~ 同埋今次終於體會到乜野叫做大笑姑婆…無啦啦都可以笑一餐… 唱到11.半左右終於完，真係幾好睇，幾滿足~ 臨完場前已經收到phone話已經出左一號， 一出場就突然傾盤大雨，真係「應景」… 因為唔夠遮，所以決定一行五人一齊搭的士， 但我地電召左架八折的士要等半粒鐘先到， 結果兜哂D地方之後返到屋企已經係12.9… 返到屋企覺得餓餓，整左個杯麵黎食，真係超正~ |
| 今日主要活動都係追蹤黃蜂o既去向， 呢隻黃蜂都真係幾難搞下，動向好似隻黃蜂咁難以推測， 不過夜晚又穩定番，聽日都有望出三號喇~ 除左追風之外，今日繼續寫埋份readme，夜晚終於寫完喇~ 晏晝家人突然心血來潮話去游水，但出面又橫風橫雨，都諗住放棄， 不過最後都係決定去荃景圍泳池游，於是一行五人又飛的去… 換左衫就準備落水，一出更衣室就見到出面勁大雨， 即刻飛奔落池先至冇咁凍…雨勢冇幾耐就減弱左， 但之後突然又落暴雨，仲要連埋D風吹埋黎，打落個身度都幾痛， 同埋成個人畀風吹到好凍，估唔到一號風球之下游水真係咁刺激… 游左個幾鐘已經超凍，所以決定離去，然後又一行五人飛的返去… 夜晚家人又心血來潮想食pizza，於是就即call速遞， 五人食四人餐都幾飽~ |
| 一朝早彈起身睇下隻黃蜂點樣，原來都仲係一號， 上陣網就夠鐘食飯，跟住就出門口返hkspeed office， 期間天氣都ok，不過去到牛頭角過左天橋就突然傾盤大雨， 就算擔左遮行到上office都已經成條褲濕哂… 跟住心血來潮走上天台吹下風，不過o個陣風勢細左， 而且又冇乜雨，所以清勁都唔到… 一落返黎就見到天文台話未來一兩小時將會出三號， 點知兩小時就話無需出三號，真係玩野，好彩我冇點同人唱… 今日返去主要都係搞掂個新project，同埋出糧， 有四位數字，當幫補下我的暑期開支都唔錯~~ 同埋公司今日極多人，搞到冇位坐… 仲有個「堪輿學家」黎左同大家講下流年運程… 不過搞完今日個project聽日都仲要返公司，忙忙… |
| 今日除左要返公司之外，仲要去黃埔拎返和記暑期工份糧… 食完飯11.9問返個lunch time幾時…1.至2.… 我諗住即刻出發…1.前都應該去到，於是換衫就走… 去到尖沙咀1:35，應該都冇問題，就行去小巴站， 點知見到架車o岩o岩走左…要等左十分鐘… 但架車又撞正哂D燈位，結果1:05先去到黃埔… 上次黎黃埔簽約又係因為太早所以要搵辦法打發時間， 估唔到今次出糧又要咁做…不過今次有成個鐘都幾難搞， 所以首先行左陣吉之島，連美食廣場都兜左個圈… 然後再行隔離商場…見到間舖頭個裝修幾得意，又走左入去~ 原來係寵物店，睇下D貓貓狗狗咁又睇左幾個字~ 然後再去另一個商場…見到間書店又入去睇下書咁， 順順利利就過左一粒鐘！點知打去原來個負責人未返， 又要等多20分鐘…唯有去海邊吹下風，不過個feel都唔錯~ 拎左張千二蚊o既cheque之後就即搭小巴出地鐵站然後去觀塘， 沿途可能太眼訓，由油麻地到鑽石山一直訓哂，真係爽~ 幫同事買左D信封之後就行返office，今日個情況同噚日相反， office靜到不得了…等左幾個字先有人返， 然後就講解新project要點做，跟住就即刻開工， 做唔哂就返屋企繼續，結果11.就搞掂！ |
| 今日再次出旺角唱K，同時為網友補祝生日~ 出荃灣午飯後就搭地鐵去旺角，然後一行9人就入左間普通大o既房， 然後大家又好似上次咁玩到癲哂，期間仲有生日蛋糕食，唔錯~ 同埋我把聲似乎已經好返D，希望繼續keep落去，禮拜日又唱過~ 6.幾就要提早離開，因為約左阿媽食飯， 去佢朋友o既親戚位於慈雲山o既屋企打邊爐， 我諗住6.半上車7.都應該去到卦，點知架車左兜右兜， 撞正旺角人車爭路D地方，結果遲左15分鐘先去到… 上到去睇左陣百萬富翁先開始食，呢集係我新一輯播出以黎第一次睇… 食到勁飽再睇埋烈火就走，坐極速小巴，聽4首歌已經返到荃灣~ 返到屋企就極速溫書，準備聽日科大course o既大考~ |
| 朝早未夠7.已經醒左…望一望，細佬已經起左身， 佢今日去三日兩夜wild camp，借埋部相機比佢， 希望佢同部相機安然無恙咁返黎啦… 同埋我一醒就感到周圍彌漫住一浸煙味， 夜晚又見周街有人燒衣，似乎今年的節目氣氛特別濃厚… 同往日o既禮拜四一樣，今日仍然係要返科大上lab， 不過今次已經係最後一次，短期內都唔會再到科大了… 同平日去科大一樣，約左同學響荔景等， 不過出發時遇到好多阻滯，諗住我實係last， 點知臨到荔景先發覺原來有同學坐同一班車… 上完lab就去LG7食午飯，然後就一齊去圖書館溫書準備一陣o既考試~ 雖然科大圖書館我都去過幾次，但次次都只係上網， 又未上過上層，原來靜到不得了，而且有超級大海景，真係正~ 由2.幾溫到5.，乜都溫熟哂啦，就去返試場門口準備~ 等左陣就可以入去，呢個演講廳就係我科大camp last day時， 為大家「獻唱」o既地點，又勾起唔少回憶~ 今次份卷唔算難，但長過mid-term，做完check過卷已經冇乜時間淨… 做完又有點頭昏腦脹，始終噚晚都唔多夠訓… 去到小巴站，突然心血來潮想去搭下將軍澳線， 於是搭小巴去坑口，然後去KFC食左個雞扒定食， 食飽就入地鐵站，玩下八仔餘值機、入閘機、電子路線圖等， 然後就搭去寶琳再返轉頭，終於都去勻咁多個站~ 返到屋企差唔多11.，跟住仲要寫program，好似係12.前交， 結果遲左10分鐘先寫完… |
| 最近都唔多夠訓，所以今日訓晏D，11.先起身，一起就覺得好肚餓… 好彩有大碗炒飯食，好快就填飽個肚~ 晏晝又返hkspeed搞project野，返到去就見到張fax， 上個月做個project可以唔使做喇…不過都唔係咩值得慶賀o既事… 然後又黎多新project，係關於D占卜神算o既，都幾得意， 響office已經做好大半，返到屋企就搞掂埋，效率都唔錯~ 既然今日冇乜野寫，就講下今日搭地鐵返屋企時遇到o既趣事… 話說去到荔景時，有個婆婆上左車，有好心人士即刻讓座， 但個婆婆霸住個位又唔坐，只係一味多謝個讓座人士， 直到有人係咁嗌佢「坐啦」，佢先慢慢坐低… 坐低冇耐架車已經到左葵芳，個婆婆突然問「呢度係咪葵芳呀?」 有人答係，佢就即刻奔向門口，點知已經「嘟嘟嘟…」 唯有即刻企定響度，然後問周圍D人點算… 跟住有個人教佢，「拿，等到大窩口先好落車， 咁就可以直接行去對面月台，然後搭番兩個站…」 佢一路講就順手指住度門，點知個婆婆即刻衝埋度門諗住落車… 然後架車去到葵興，個人就話「呢度就唔好落車喇， 因為要走上走落先過到對面月台，好唔方便…」 佢一路講就順手指住度門，點知個婆婆即刻衝埋度門諗住落車… 直到大窩口個婆婆終於都落車喇，希望佢去到葵芳識落車吧… 件事都仲未完，落左地鐵去到村巴站時，咁o岩撞到阿姨， 傾左幾句佢架車就到左，然後上左車又同我打招呼， 點知條龍裡面有個人以為阿姨同佢揮手，佢又竟然向番阿姨揮手， 跟住我睇清楚D，原來佢就係響地鐵教阿婆o個位好心人士… 架車返到麗城，發覺呢個人原來同自己住響同一座…真係有緣… 跟住諗諗下…呢個人好似響自己住個層o既走廊見過… |
| 今日係hkspeed員工單車同樂日(我都係噚日先知有件咁o既事)， 7.半就要起身，食過早餐就搭車往大圍，搭兩程車都唔使等車， 於是早左15分鐘去到等候地點，好彩有部touch screen電話畀我上下網~ 等到9.就有兩人到左，於是就揀車先，因為我揹住個袋， 所以借左個籃黎用，但因為已經變左形，所以要搵索帶綁住架單車， 至於點解要咁詳細形容呢D野，睇落去就會知… 到9.半左右，終於等齊人，一行六人借哂單車之後就出發， 首先係去百佳買水，點知走o個陣個防盜系統突然響起， 然後我再穿過去又再響多次，即係話我中左招… 跟住個職員就要我拎哂個袋裡面D野出黎檢查， 最後搵到支我之前響屈臣氏買o既太陽油出黎， 懷疑就係呢支野令到個防盜系統啟動左… 結果又要將D野放番入袋，拖延左幾分鐘時間… 買左水之後大家放哂入我個籃度，因為其他人架車都冇籃… 跟住就順便放多個袋上去，加重哂個籃o既負擔… 踩o個陣都比以前辛苦左，不過呢個都唔係重點… 然後大家再去隔離M記極速食早餐，飽飽就一齊出發喇~ 首先就一口氣由大圍踩到馬料水，買左D野飲就繼續， 再踩去到大埔海濱公園，大概用左個零鐘時間~ 去到呢度大家就要稍作休息，結果抖左成半粒鐘先繼續出發… 踩過條長命斜大家又要抖抖，點知我一放低架單車就反車， 拎番上黎就發覺綁住個籃o既其中一條索帶斷左， 唯有搵個風速計條繩綁住佢先… 跟住再一口氣踩到近大尾督o既一間茶座， 到呢個時候大家都覺餓，於是放低單車入去食野， 我諗冇理由由部風速計綁響出面，唯有解左佢， 然後隨手搵個膠袋再綁番好個籃… 我響間茶座叫左個麵(都幾飽)，然後再睇下電視順便涼下冷氣， 大概.零鐘就繼續出發喇，去到某間士多又再停低買D野飲， 點知一開車發覺甩左鍊，又要搞一搞先可以繼續出發… 大概2.半終於去到大尾督同埋過埋個壩， 抖左一陣就下算繼續前行，但有兩人頂唔順， 淨低四人繼續行，去到一棵樹下就叫去到終點， 大家坐響個石頭度抖下欣賞下風景咁， 突然我又發現架單車反左，仲要另一個索帶都斷埋， 團友即刻用極原始方法綁番好個籃，就係用幾條草扎埋一齊… 穩陣起見就用番條斷左o既索帶再綁多次… 抖左幾個字就開始回程，不幸地去到個壩時有位團友受傷， 結果用左幾個字黎療傷，呢個時候我就開始心急喇… 因為我約左網友今日去海洋公園， 4.3響金鐘等，但而家2.9仲響大尾督… 但團友受傷之後元氣都大傷，結果途中又要休息， 最後抖到3.9先出發…返到大埔又兜左大段路， 期間又要落樓梯，搞到幾條草同條索帶又再爛埋， 結果要隻手頂住個籃先可以繼續…去到還車地點已經係4.半… 還完車已經遲到15分鐘，好彩有團友[才查]車， 即刻極速車我去尖沙咀轉地鐵，雖然係冇乜駕駛經驗， 但有人在旁指導，都已經[才查]得唔錯， 用左25分鐘就由大埔去到尖沙咀~ 期間網友打黎，我唔想佢地等咁耐，唯有叫佢地出發先… 然後即刻落車跑向地鐵站，點知一落車隻腳就抽筋， 但都唔理咁多，忍住痛咁衝去地鐵站， 搭到去金鐘就即刻買飛上車，差唔多去到時打畀網友， 點知佢地已經諗住上纜車，我唯有一落車即刻極速奔去纜車站… 上到山頂首先入摩天塔坐番轉順便涼下冷氣， 日落o既景色真係好靚，只可惜部相機仍然借左畀細佬… 然後再去見唔到海獅o既太平洋海洋， 跟住大家有點餓，就去食下午茶，然後再行去機動城， 玩左韆鞦同海盜船，但因為太多人，所以都排左幾耐下， 玩完呢兩樣就已經成9.，於是就去M記食晚飯， 食完飽飽就去海洋館行下消化下先， 但大家掛住影相，結果都行到成10.… 跟住大家仲想玩越礦飛車，就即刻搭電梯落去， 去到滑浪大家又諗住玩埋，點知行到去龍尾就話唔畀排… 不過見太空摩天輪冇乜人排，所以就順便玩埋先~ 然後再去越礦飛車，好快就排到，大家一早諗定影相時擺咩pose， 點知架車經過時都冇著閃光燈，出番黎時發覺「系統故障」… 玩完哂之後已經10.9，就去纜車站落番正門走， 不過呢個時候大家都諗住離去，所以都要排成半個鐘先上到車… 架車行到一半突然停左，大家都驚到係咁尖叫， (其實係大家情緒高漲…都唔係真係驚…) 不過停左一陣又再開番，大概11.半就到左， 然後就出去等車，不過已經排左勁多人， 但好彩冇耐就有兩架車，12.3就去到地鐵站~ 我諗住響地鐵大覺訓，於是搭去中環再調頭， 可惜唔知點解又訓唔著，去到荔景先訓著，去到荃灣差D唔知醒… 望望錶已經12.10，諗住實冇小巴搭，點知出到去竟然仲有架車， 順利響1.返到屋企，然後即刻沖涼，再上一上網， 1.半就訓了，實在未試過咁[支力]… |
| 經過噚日o既極速單車之旅+夜遊海洋公園之後， 成個人已經完全散哂，所以今日都訓到12.先起身， 然後就補寫日記，實在太多野寫，寫左個幾鐘先寫完… 寫完已經差唔多2.，就落去大家樂食午飯， 然後就出荃灣M記出席舊生會會議(我都係今日先知有件咁o既事)… 由於太耐冇開會，所以今日討論o既野十分之多， 又要傾下個月舉行o既annual dinner， 又要檢討之前o既足球比賽同遊船河， 一諗番起遊船河就越說越激動，講講下就講到呢個會o既歷史， 又講點解D人咁唔願意參加舊生會活動， 結果由3.傾到7.半，真係誇張… 散會之後就同家人食飯，今餐係去食壽司， 原本都唔係覺好餓，但一食都食到七碟… 食飽飽就返屋企，諗住開始設計annual dinner個網， 不過唔知點解突然冇mood做野，好耐都未試過咁… 唔知係咪因為暑假就完呢… |
| 今日係半官方班會唱K日，不過竟然咁o岩有堆同學一早約左今日去唱， 然後有幾個又話少人所以唔去，結果最後得4個人去(連埋我細佬)… 不過都唔緊要啦，唯有當好似平時唱K咁囉… 一開聲就發覺把聲勁有問題，唱男仔歌都嚴重走音， 唔知係咪因為朝早未開聲，或者前晚去海洋公園嗌得太盡? 不過食完碟飯之後就好好多，只可惜下晝要返hkspeed， 唱到.半左右就要走喇…(但其實我一準備離開時D staff就趕哂我地走) 離開之後就搭車返office，同往常一樣寫program寫到6.就走， 晚飯後以極速完成舊生會annual dinner網站， 好耐冇玩過o既flash都控制自如，勁呀~ |
| 今日冇節目，所以留響屋企搞下網站事務， 首先係清埋hkspeed D project同執執annual dinner個網， 晏晝落大家樂同阿媽午飯然後去百佳購物， 返到黎突然心血來潮就整番主頁個flash， 用左兩粒鐘左右完成，好似冇上次個咁好睇，不過都用住先啦~ 6.就開飯，因為夜晚有個eason音樂會(我都係前幾日先知有件咁o既事)， 食飽就出發去位於大學會堂o既會場，去到門口見到打哂蛇餅， 好彩撞到識o既人，好快就順利入到去~ 呢個大學會堂已經12年冇去過喇，上次黎呢度係幼稚園畢業禮！ 我仲試過響台上表演！雖然係咁耐之前o既事， 但對於呢度都仲有D似曾相識的感覺~ 講番個音樂會，雖然個台好細下，但設備齊全， 有馬桶、洗水盤、尿兜，仲有一名女子響浴缸度沖涼… 我地坐得遠左D，不過免費o既野都唔好要求咁多~ 呢個音樂會唱左個半鐘就完，得幾首係eason自己o既歌， 我就覺得唔係好夠喉，不過免費o既野都唔好要求咁多~ |
| 今日係網友單車同樂日，我一直都掙扎緊到底去唔去好， 直至臨訓醒前發左個夢，就係我訓到唔知醒，結果去唔到， 然後見大家玩得好開心，於是就勁失望… 所以我真係訓醒o個陣都係決定去啦~ 去到大圍又係早左10分鐘，唯有上陣網先， 等到夠鐘都唔見人，望清楚D原來班人已經入左大快活食早餐… 然後等到大概10.大家都食飽哂，就出去租車，搞掂哂就出發~ 點知去到文化博物館先發覺唔見左個人，唯有派人四出搜尋， 擾攘左半粒鐘都仲未搵到，唯有繼續行程先… 似乎今日大家唔多夠力，好快就要休息，結果踩到12.幾先去到大埔， 期間失蹤者原來已經去到大埔，仲要上同學屋企上網， 先至搵到我個電話再打番黎，最終都響大埔回合番… 去到大埔又係入M記午飯，食完就去買水，然後繼續出發往大尾督~ 3.幾去到大尾督，過左壩之後抖唔夠幾分鐘就回程… 由於朝早發生過有人走失事件，所以我決定做殿後， 但期間有人受左傷又不斷抽筋，所以速度極慢， 我仲要踩最後面，所以完全係龜速… 最後大家終於響6.半左右返到大圍交車，然後就解散回家食飯… 今次雖然要由大埔踩番去大埔，但就冇前幾日o個次咁[支力]， 可能係因為今日速度偏慢，同埋架車都幾順~ 距離開學o既日子都唔多，過埋今日我都要修心養性準備F.7咯… |
| 今日要返學校搞舊生會annual dinner個board， 午飯後就準備回校，不過hEA下hEA下，結果搞到遲到添… 我成個暑假都未返過學校，之前聽聞學校搞到面目全非， 去到門口，果然見外牆搭哂棚，成個雨天操場塊地鋪過哂， 最令人眼冤o既係課室裝哂冷氣(但要等多年先開得)！ 首先要做o既係剪紙同買野，不過學校實在太熱， 所以決定移去M記進行，然後大家就係咁剪紙， 期間校長經過就入黎同我地講下舊生會D野， 佢似乎有意叫我地U莊…嘩！F.7仲點搞舊生會… 剪完D野就拎返學校釘，不過個board響樓梯度，實在熱到不得了… 雖然個board都幾簡單下，但由於大家熱到唔願郁， 結果由3.幾釘到5.幾先搞掂… 然後再出荃灣去某間曬相舖影學生相， 阿媽話呢間勁平，所以指定要呢間… 笠番件校服一坐低，個職員就用部好似傻瓜機o既相機影左兩張， 希望影出黎個質素冇問題啦… 返到屋企訓左陣覺又上左陣網，打字期間突然乜都熄哂， 原來係成幢樓停電，即刻搵電筒用… 撞o岩晚飯時間，響酷熱天氣警告生效期間， 仲要冇風扇o既情況下食飯都的確幾慘，好彩有手提風扇頂住先… 為左令間屋光D我地打開左度門，見到出面D細路玩得好開心， 真係羨慕呢種鄰居關係…平日我同D鄰居都冇乜兩句… 正當我食完飯，正諗緊做咩好時，突然又有番電，時間o岩o岩好~ |
| 朝早起身搞搞wic，午飯後就出發去葵芳， 話說有同學諗住兩機一寬頻，但又唔識裝， 我見今日得閒所以就上門幫佢裝，順便參觀下間屋~ 首先去新都會買野食，成年冇去過，嘩！靚左好多呀！ 搞掂就搭小巴入青衣，然後大家食野我就裝野， 原本諗住都要裝半粒鐘，不過結果好快就搞掂… 雖然話係裝機，但其實成班人約埋上黎… 話就話上黎一齊做功課，不過其實完全冇做過… 又玩下兔仔，然後又打下牌咁，跟住又彈琴拉小提琴… 結果玩到6.幾先走，返到屋企都差唔多開飯… |
| 朝早繼續搞搞wic，今日進度都唔錯，自動更新部分進行得如火如荼~ 午飯後又去大河道M記出席舊生會annual dinner特別會議， 今次又係超級馬拉松式會議，因為實在太多野傾， 期間畀個經理趕我地，我地唯有即刻買返D野上黎食然後繼續開會(奸招~)… 最後由1.半開到5.9先開完，破左幾日前的紀錄… 話咁快聽日就係暑假最後一日，時間過得真快啊… 諗住last day休息下，點知夜晚有舊生會幹事打黎叫我聽日返學校釘poster… 至於今晚都係搞下wic，然後宣傳下個annual dinner咁… 吸取遊船河經驗，今次一定要做多D宣傳攻勢， 而且今次起碼要100人，真係唔係咁容易… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |