年月 日　

7月1日

今日回歸紀念日放假，好野~但阿媽竟然唔知我放公眾假，一朝早叫我起身…
訓到晏一晏先起身，今日都休息下，睇下隻狗啦~冇咩特別…

7月2日

星期日，訓到差唔多3點先起身，但之前一早比隻狗嘈醒過…
唉…今日終於「開金口」…但其實呢度唔比養狗，都係要佢安靜先得…
夜晚出左尖咀食buffet，都有一段時間冇食過啦，呵呵~今晚戰鬥力不錯~
返到屋企又處理隻狗，幫佢執屎執尿啦…其實我都唔係主人…well~

7月3日

今日又開工啦~呢排又忙返啦，今日幾份job一齊黎，幸好冇搞亂到…
比人召左入房，原來之後有人事變動，唔知係咪好事…
今日開始成個月都冇得帶飯，好好享受出街食o既一個月啦~

7月4日

今日冇噚日咁多野執，不過有單大野都未做完，
後日就dead，唔知做唔做得切呢~
夜晚開會，都冇實質討論d乜，都係講下個team未來動向…
之後組聚，去pizza hut食飯，都不錯~又了解大家同公司多左啦~

7月6日

今日有份野dead，剛好今日做完~但可惜之後就冇野做，勁眼訓…
之後出左旺角，今晚有網友生日，去食飯慶祝~越黎越多網友返工啦~

7月7日

今日成日都係得d零零碎碎o既工作做，都幾多時間係hea…好眼訓耶…
準時收工，今日早d返屋企上下網先，之後就落街食飯啦~
返埋聽日半晝就休息下啦~好眼訓…

7月8日

今日呢半晝都幾難捱…又試大家都坐響度冇野做…
仲響度傾公司使唔使加部風扇…d冷氣唔夠涼呢…
臨放工一個鐘先開始有野做，聊勝於無啦~
之後放工返屋企休息啦~

7月9日

噚晚季軍戰又睇下訓下咁…結果今日訓到3點先起身…
落去買個tea食，上下網都差唔多到夜晚…
今晚出左去旺角同大同食飯，又係沙嗲王啦…
好多人呀今晚，大家吹下水講下近況，不錯呀~

7月10日

噚晚睇世界盃決賽，睇到拎埋盃，訓得4個鐘，勁眼訓呀…
今日仲要返工冇野做…捱左成日，好辛苦啊…
淨係下晝有同事「夾硬」比左d唔應該係我做o既野我做…哈哈~
夜晚又組聚…過銅鑼灣食日本野~飽到不得了~同d同事熟左dd咁啦~
又要多謝edward呢一餐啦~都唔好意思再食佢咁多餐啦…暫時…

7月11日

今日唔係完全冇野做，但好都多時間係優閒，結果就有一下訓左…
比edward發現叫醒左，唔知係咪好事呢…唉…
唔知點解今日成日都好累，明明噚晚都訓左7個幾鐘…
夜晚早d返屋企休息下啦…

7月12日

今朝返工飲返咖啡，冇再唔小心訓著啦…但都係勉強支撐落去…
今日一份job都冇做過，但下晝有同事要打一份野，好多中文，
結果我就使出多年icq練返黎o既極速速成，總算可以一展所長，哈哈~
之後都係準時收工啦~

7月13日

今日派job果位同事放病假，結果當然又有優閒o既一日~
之前又話就黎開始忙，都呃人o既…真係唔知點樣虛渡光陰好…
一夠鐘放工拿拿聲走啦~

7月14日

呼…今日終於過d比較充實o既日子啦~差唔多成日都有野做了，好野~
晏晝食飯…well…行左去間遠o既大家樂…似乎真係食到山窮水盡…
不過係今個月先冇得帶飯，之後唔係成日出去食應該感覺好d~
個風打唔成，但係夜晚唔知點解勁大風…

7月17日

又返工啦今日…今日算忙又唔係太忙，算不錯啦~
但食完飯公司個network死左半粒鐘，原來上唔到網(唔係互聯網)
係咩都做唔到…因為全部野都駁左network drive…
夜晚返屋企…食自己啦…未來幾日屋企人去旅行，都係食自己…

7月18日

今日係得朝早有job做，之後下晝都係做個悶o既task，一夠鐘放工就走啦…
屋企人去左旅行，今晚唔單止食自己，仲要照顧埋三隻倉鼠同一隻狗，好忙~

7月19日

今日好似冇乜野做，但d時間又過得幾快~
下晝有個奇怪o既job要做，但做唔切之餘仲要臨放工先知做錯，過兩日再做啦…
夜晚返去探下阿婆啦，呢幾日都冇去睇下佢…
嗯…今晚一輪咀講左好多野，聽完唔知點解有d想喊…唉~
今晚又係大家樂，唔知幾時先有餐飽肚o既晚餐呢…

7月21日

今日接二連三有job做，時間過得好快呢~心情都愉快d~
呢兩日都去左幾遠o既食肆食晏，都算不錯吧~總好過黎黎去去一兩間…
放左工返屋企食個飯，之後出左去同中同打羽毛球…
好耐冇做過運動啦~今次體力都只係勉強應付到…都幾暢快丫~
今日出左hon，算係意料中事吧~

7月23日

呢幾日都行左好多路，又去左打波，今日決定大覺訓休息下…
同埋趁得閒出去飛下個髮…可能係最後一次用學生證優惠…
hea下hea下的日子都不錯，一個禮拜hea一日o岩o岩好~

7月24日

又返工啦~今日做埋上個禮拜o既job…
有d野唔識本來諗住自己試一輪先，但最後都問左人…
結果上晝就做完左…原本係星期四dead…
下晝試下test case之後又hea…又要扮有野做…無奈…

7月25日

今朝hea左一輪，之後同個同事比edward召左入房，
原來係上堂學野，不過等o既時間仲多過講，結果變左吹水…
下晝有大job做啦，deadline係8月3…唔知今次要做幾耐呢…

7月26日

朝早撞到個大學同學，原來大家都係響合和返工，佢都係做IT…
問我諗住之後做d咩…哈~而家呢份都係返左兩個幾月…做落先算啦…
今日keep住做同一份job，估計今個禮拜可以做完啦~
之前熱左幾日，今日終於涼返少少，食晏去得遠d都冇咁辛苦啦~

7月27日

今日隔離位同事放假，唔計組長的話成組淨返我一個programmer…
不過都係好似平時咁做野，今日做完份大job啦又…
我地組有個客用緊個舊版本program，成日都有bug，今日又要執…
仲要臨放工先搞，結果搞到7點都係搞唔掂，聽日先繼續…

7月29日

噚日同今日都係執同一個bug，一改就要改幾十set file，
全部都係做同一個動作，其實都幾悶…不過better than none~
呢幾日都落雨，噚日仲要比風吹爛把遮…用左幾次咋陰公…
收工果陣擔住把爛遮，勁樣衰…即刻要去買返把標榜係「防風」o既遮…

7月30日

今日又要還睡債，訓左十幾個鐘…
其實之前個禮拜都唔係訓得特別少…唔知點解仲係想訓…
起左身都係上下網…兩餐都係大家樂渡過…

7月31日

又開工啦，都係做返d零零碎碎o既工作，
下晝又有段時間冇job做啦，hea下咁過…
今日又有同事離開啦…呢排隔一兩個禮拜就有同事走…
但係同呢位同事一句野都冇講過，well…

20016789101112月
2002123456789101112月
2003123456789101112月
2004123456789101112月
2005123456789101112月
2006123456789101112月
2007123456789101112月