7月1日

今日係七一，不過冇去遊行啦…都有諗過去唔去o既，咁我上年都去過…
不過一來冇人約啦，二來又冇白色衫啦，三來又真係太熱啦…
結果今日都係走左去玩，去左食韓燒同睇戲~
韓燒果度足足坐左兩粒鐘，食到超飽呀~
跟住行過去戲院，一行出室外，簡直熱到好似入左焗爐咁，天啊…

去到戲院發覺排哂長龍，仲要冇位，結果要行去另一間買飛…
今次睇《蜘蛛俠》，都幾正，同expect o既差唔多啦~
睇完就搭西鐵返屋企啦…又行過條海濱長廊啦…
半年前o既今日，我就係去完組聚飲大左，結果要d組mate扶我行呢條路返屋企…
轉眼間過左6個月，呢段日子真係發生左好多事呢~

夜晚出和民食，都好似好耐冇去過啦~
等左一個鐘就有位啦，比以前快左好多喇…
今次首次發現和民有件難食o既野，叫做炸雞翼…
飩飽就返屋企…之前仲要去百佳幫手捧水上樓…屋企竟然制水…
返到去仲要幫細佬搞部電腦，部機竟然搵唔到cd-rom，但我搞極都唔知點解…
之後又要搞ocamp野，又要開工，又做到天光先訓啦…

7月2日

起身冇耐就要趕住出門口，中午約左中同買澳門船飛~
今次終於有7月o既價錢啦…周圍格價之後，結果都係揀左上次揀開間酒店…
原本見到關鍵d價做到超平，就走入去問啦，
點知原本佢個價唔包船飛，即刻就變左最貴果間啦…最後去左中旅社買囉…

之後去食大家樂，個咖哩係幾好食，但食完超爆頸喝，怒飲水都仲覺得口乾…
食完返屋企搞d野又再出門口啦，今晚搞細O大輔聚，要早d返中大準備…
其實咁早係為左去dept借notebook，不過去到briefing場地視察先知果度有電腦啦…
冇所謂啦…我都要響lab做野，淨係有免費冷氣歎呢樣野已經夠哂煞食啦~
有時自己一個人靜靜地，響lab一路聽歌一路做野，都不愧係一件賞心樂事~

今晚活動分briefing同食宵兩部份，其實同原本想搞o既野好唔同，
不過實在太多限制啦，唯有盡量搞好最後定好o既野啦…
briefing其實係希望令輔導員有印象知道佢地應該做d乜，
但感覺上有d無謂，因為現場似乎冇乜人留心，自己亦都講得麻麻地，
出席人數亦都唔多，不過我似乎都係覺得唔搞又會少左d野咁囉…

之後就一齊出去食宵，呢個先至係戲肉~
好多輔導員唔去briefing淨係黎食宵，都冇所謂o既，最緊要今晚夠熱鬧~
初頭都驚今晚d人玩得唔埋，又驚佢地唔夠飽，
仲要驚over budget(今餐計落ocamp budget裡面)…
好彩一切都順利進行，大家都玩得幾開心(睇落)~budget又o岩o岩好~
不過其實我都功成身退架喇，搞完個大輔聚我都冇活動要負責啦~
希望之後ocamp o既野都順順利利進行囉~雖然而家都已經有唔少暗湧…

7月3日

成日都係頹頹廢廢的過，冇咩好講啦，直接講夜晚啦~
今晚係大O大輔聚，去元朗食飯，出發之前要噤機，結果遲到少少…
間酒樓都ok遠，所以我地大組約埋一齊去~
去到都已經幾熱鬧下啦，都有幾十人架，望埋去都有d熟人o既~
hea到7點幾就開始節目啦，氣氛都幾好呀~
佢都有briefing環節，不過好頹，幾句就講完啦，其實咁樣係咪好d呢…

玩完一輪先開始食野，好肚餓丫…不過最後都食唔飽o既…
一路食都keep住有野玩，節目豐富呀~
最後仲有片人同唱山歌等環節，簡直同ocamp一樣呀~
影埋大合照之後就走啦，不過我地大組仲食埋B仔先散水…
食完想搭巴士返去，點知過左尾班車，要搭小巴返去，返到去都點半鐘啦…

今晚真係好正呀~相比起噚晚真係相形見拙…噚晚係我搞o既都係咁話啦…
始終UC人同engine人…根本就相差好遠呀…或者比較黎都冇意思啦~
今晚都幾好呀，開始同自己大組d輔導員熟啦，希望快d越黎越熟啦…
同埋睇番其他大組，都好似係我地大組最熱鬧，最好玩，yeah~

7月4日

晏晝依舊頹廢，都已經點半鐘先起身，食完「早餐」都成3點喇…
之後繼續開工啦，仲有幾日就唔撈啦，做得幾多得幾多啦…
夜晚出尖咀唱K，因為阿媽聽到我之前講話果度有間k buffet好正，所以同佢試下~
不過我唔知點解食左幾碟已經覺得好飽，仲要肚痾，好彩都係一次o者…
唱完返屋企仲諗住要怒開工，點知都唔知要做d乜，結果d時間用哂黎hea…

呢排都幾奇怪…話就話頹廢，其實眼前又好似好多野要做…
不過又硬係冇乜衝勁去做，我都唔知點解~
但係再過多兩日，想頹廢都唔得啦，一連串節目接住黎呀…
到時日記都唔知有冇時間寫添呀…

7月5日

一係就勁耐冇去唱K，一唱就竟然連續兩日都唱…
今日係同網友唱，其實係為左順便去book渡假屋去camp…
又係明明自己已經係遲到，結果都變左第一個去到，無奈…
去到竟然撞到細O d輔導員輔聚緊，乜咁o岩呀~

唱K冇咩特別野發生呀~唱完就去book屋啦…
原本今年諗住去梅窩，不過睇完竟然話滿左…
結果又係去番貝澳，不過好似貴左少少添…
嗯…希望今年大家都會滿意個camp啦~

之後去KFC食tea，又去左機舖打陣機，
第一次玩打鼓機，勁唔o岩beat呀！仲打到隻手好痛…
跟住再打多陣其他機先走，仲要企響條街度hea…
hea左好耐大家先肯走，好一班頹廢青年呀…

跟住去拎番副新眼鏡(買左成半個月啦…)，不過勁唔慣添，
戴左唔夠一個鐘就要換番舊眼鏡…
之後買左套衫褲…遲d勁多camp…唔夠衫著呀…
搞掂就返中大開ocamp會啦…今次都ok多人喎…
仲要傾到cc can打佯都唔捨得走…成班人企哂響出面傾…
之後出左味千食，食完都10.幾啦…嘩…連續好多晚夜返屋企啦…
今晚要努力開工啦，因為聽日已經係last day…

7月6日

今日係最後一日開工啦，所以要趕番哂d工作，好辛苦呀…
一起身冇耐就已經要做野，做做做做到6點就可以休息一陣…
不過仲要搞ocamp野呢…係咁打電話…仲要用半個鐘時間tum個組mate做組媽…
鬼咩…煩左冇組媽都煩左好耐啦…不過最後都總算tum到，終於夠人啦，好野~
夜晚又繼續開工，臨尾仲要同老細解釋番哂成個system d重要野，
講到成1點都完，估唔到最尾一日都咁刺激…

不知不覺間，呢份工都做左兩個幾月啦…
諗番起見工果陣想像到o既實習，同而家真係好大分別…
仲話叫我學呢樣果樣，結果都係成日怒趕project…
學野呀…都學到唔少o既，雖然ASP我本身識，但可以感受下現實o既殘酷都好丫…
個老細都總算係個好上司黎o既，雖然平時講電話的確勁長氣…
點都好啦，過埋呢日就可以盡情去玩啦，yeah~~~

聽日去澳門玩呀~雖然我n年前去過，不過都冇哂印象，當我第一次去啦…
不過今日都竟然忙成咁，搞到plan行程又冇時間，執行李都冇時間…
寫完份日記都成4點啦…希望未來兩日玩得開心啦~

7月7日

今日同中同一連兩日去澳門玩，晨早就要起身啦…
預好哂時間出門口，可惜唔記得果陣係繁忙時間，出地鐵站都要成半個鐘…
跟住去上環啦…去到剛好距離開船15分鐘…
等多陣就有得上船，隻船都幾靚呀，一開始有少少暈，之後都慣左啦~
噚晚我都唔夠訓，所以響船就盡訓啦~剛好一個鐘就到澳門啦~

一過左關就拎番份地圖黎睇啦，然後就去第一個目的地－「盛世蓮花」~
沿途經過間m記，我早餐都未食，都忍唔住要搵d野頂肚…
睇完蓮花之後就繼續行，去左睇個觀音像…
響果度仲巧遇亞視攝製隊拍緊旅遊特輯…
之後再行左一段路，終於去到間酒店啦~
雖然只係點幾，但既然有得check-in，就擺低d野先啦~

響房hea左陣就再出發，首先去搵野食，好肚餓呀…
見到間寫住有豬扒包就入去食下啦，仲一人嗌一件…
不過冇乜味咁o既…(好似coffee con果d仲好食…)
跟住再嗌多兩碟野，都不過不失啦，但我最想講唔係呢樣…
個個侍應都渣住攤，但叫佢地拎杯水都你推我讓，
最頂癮就係叫個赤裸半身但著住圍裙o既男人果陣，
佢勁惡咁話：「你唔係諗住叫個廚師斟水比你呀?」
係佢自己由廚房走出黎渣攤…我地都只好滴汗…

食完就搭的去二龍喉公園，坐2蚊吊車上松山~
睇完燈塔果d就落山睇埋d圖書館、公園o既普通野…
然後再搭的去睇某聖堂，再行落山參觀媽閣廟，行左好多路呀…
跟住又再搭的去旅遊塔，但我去到落左的士先醒起我地冇帶飛…
我唯有搭巴士返酒店拎番…但回程果陣勁塞車，好晏先去到呀…

旅遊塔部lift都幾快上到58樓，睇哂成個澳門，正呀~
我地諗住睇埋個夜景，所以坐住慢慢等，我就順便訓陣先~
hea到7.半都終於天黑啦，雖然個景唔係特別靚，但都影左唔少相~
跟住落番塔去搵野食啦，我地根據之前某的士司機o既建議，去左某餐廳…
但去到又覺得間野又貴又冇人食，結果去左隔離果間…

一黎就嗌左幾碟葡國特色美食，正呀~
食咁多當然唔夠喉，於是一路食一路嗌，
如果佢係一次過黎哂，都堆得滿成張6人檯呀~
由葡國雞飯、炸馬介休球到芝釀吉列豬扒，碟碟都好味呀~
食左咁多都只係百二蚊，抵呀~最開心就係呢間d服務好過晏晝果間好多…
坐左2個幾鐘，我地怒叫人同我地斟水都隨傳隨到，仲同我地幾好傾~

食飽飽就搭巴士返酒店執下野啦…同埋去附近超市掃水…
之後就去葡京參觀下d賭場啦…嘩…好多人呀…
多人到想埋去d賭檯睇下做緊乜都睇唔到…
我地兜左一輪，再拉左陣老虎機，決定飛的去金沙繼續參觀~

新野果然唔同好多，裝修、環境、職員、賭客都好過葡京果邊~
我地淨係去唔同o既賭檯睇人點玩，都已經幾有娛樂性~
之後我地再去拉老虎機，拉到輸哂啦…係臨尾玩果部入廿蚊賺番15蚊…
返到酒店都2.幾啦…再輪流沖涼、玩陣UNO就訓啦~

7月8日

晨早8.幾就起身繼續行程，因為想盡量響check-out前參觀多d景點…
酒店包左兩人早餐，但我地有3個人，結果有個冇得食…
結果我地偷偷地用麵包夾住d腸同燒賣拎返上房比佢食，幾型~
食完就出發啦，但此時發現我個袋充滿住沐浴露…原來個蓋閂唔實…
結果用左好多時間去抹番乾淨d野，好核突呀…

今日第一站係澳門博物館隔離o既大炮台，都影左ok多相呀~
之後去著名o既大三巴，但竟然係維修緊，比鐵棚遮住哂…可惜呀…
然後就一次過睇哂議事亭前地附近o既一堆景點啦~
跟住趕返酒店準備check-out，但竟然搭左反方向巴士，好彩及早發現…
之後拿拿臨執野走啦，距離最後限期得番5分鐘，好險~

跟住咩住袋重野繼續行程啦，下一站係尋訪澳門特色小食~
一次過就食左雙皮燉奶、木糠布甸、潘榮記金錢餅同葡撻，件件都好正呀~
食飽飽就去買手信，都唔知買乜好添，求其買左d啦…
之後繼續行程…其實淨番今晚想睇賽狗，咪去賽狗場附近兜下囉…

首先去望廈山睇炮台(其實好多地方都有炮台…)，
跟住連附近o既溫室都唔錯過，照參觀埋…
然後落山去左黑沙環，跟住o既節目就超級頹廢…
去左m記抖陣、去機舖打陣機、去百佳入貨、再去機舖打機、再去食晚飯…
我地hea左咁耐都係為左7.半開場o既賽狗…

我地7點已經入左去，但估唔到全場座位已經爆哂，迫滿哂d自由行…
我連馬場都未入過，原來狗賽o既氣氛都咁刺激，附近d人睇到勁high…
d入場卷可以用黎投注，我地一人買左場，
結果有人買位置贏左，慳番d入場費~

睇完幾場就走啦，兩日o既澳門之旅亦都結束啦~
我地本來買10.半飛，但走去搭9.船，好彩果班船有位，如果唔係有排等…
今次隻船好舒服，完全唔暈呀~我地都安心鋤d啦~
返到荃灣再食埋糖水先返屋企，返到去都11.幾啦~

總結返呢兩日先…呢個旅程真係幾正呀~
想去o既地方去左，想食o既野亦都食左~
雖然期間遇到唔少阻滯，我都多次差d被車死，
但最後都總算順利完哂個旅程丫~希望以後有機會再玩轉其他地方啦~

7月9日

今日係高考放榜o既大日子呀！不過我都係今朝有網友打黎先醒起…
嗯…今年班網友o既成績都幾懸殊…有d值得恭喜o既就恭喜哂啦~
其他o既…希望佢地都搵到自己之後o既路向啦…

講番自己啦…噚日去完澳門，聽日又再去camp，所以今日係渣攤o既~
但其實都唔係渣得好多…訓到12點咋嘛…都要起身做下野啦…
細O呀…系會呀…都有d野要搞，咁就一個下晝啦…
呢個時候竟然仲要處理chatroom d野，希望d問題又快d解決啦…

今晚未夠6點就開飯啦，因為夜晚系會搞joint-u football，
去科大同果邊d CE人踢番場友誼賽~
哎呀…竟然預錯時間，要成村人等我，真係唔好意思…
我地剛好包哂成間小巴，唔使幾耐就去到科大啦~好耐冇去過啦~
跟住就行去足球場，hea一陣就開始啦~

我呢d淨係負責影相同支持下自己人架o者，冇咩特別…
不過我地同人地實力相差太遠啦，結果炒左n蛋…都唔想講啦…
我相信大家都盡左全力架啦，人地話哂都有自己o既足球隊…
踢完就一齊去食宵啦，但去邊食都諗左勁耐…最後去左觀塘…
食到12.幾，拿拿聲搭地鐵返去啦…不過都冇小巴架喇，又係行番屋企囉…

聽日去大O preprecamp呀，希望玩完同班輔導員更加熟絡啦~
不過我而家2.半都未執野，聽朝11.幾集合啦…

7月10日

11點就出門口，出發去兩日一夜o既大O preprecamp~
目的地係梅窩，我地大組之前約左一齊去IFC間m記食飯…不過兜左一輪先搵到間野…
第三次去梅窩camp啦，一去到即刻有種親切感~

去到間房擺低野，涼陣冷氣就去街市買野食，我純粹負責拎野o既o者~
返去換套落水裝就出沙灘同陽光玩遊戲啦~
出到沙灘先話要帶相機出黎，返房拎完成班人已經開始玩遊戲啦…
結果部相機一張相都冇影過，可惡呀…

果d mass game都係一般好玩啦，我覺得最正都係我地大組班人一齊落水玩~
有d掃興o既係天氣時晴時雨，雨起上黎都唔細下…不過咁就比我地見到個彩虹~
之後一齊跳campfire，都好耐冇跳啦，響沙灘跳幾好feel呀~
跳完就開始大雨，大家拿拿臨洗腳之後返房啦…
最頂癮係成班佬剝哂衫迫哂入個廁所度一齊沖身，仲影埋相~

之後本來係BBQ時間，不過d雨時大時細，hea左好耐先開始燒…
同場加映harry potter中文版，成班人一路燒一路睇，燒左4個鐘先收檔…

7月11日

成班人入左房吹陣水之後，大組長就叫班佬著住件唔要o既衫，準備玩遊戲…
入camp之前聽到話要準備呢件衫，都心諗到底會玩d乜…
原來係玩扯衫遊戲，逐個扯爛件衫…大家又再一次坦胸露臂啦…
跟住拉左堆床褥出廳，坐哂響上面玩遊戲，節奏係慢左d，但都幾好玩o既~

今晚唔知點解時間過得特別快，平時通頂都好似等極都未天光，
但今次我玩到天光都未有睡意，仲覺得未玩夠…
到7點幾差唔多全部人都lui低左，淨番兩三個響度吹水…
我坐埋去搭下訕啦，初頭都係傾下無聊野，
不過越傾就越正經，主要係講呢個大組出現o既問題囉…

對於我自己黎講，最大問題係同大部份人都未算熟囉…
除左有幾個係自己中同之外，其餘好多都係伯宿莊員，
佢地本身都已經好熟，要融入佢地果group就比較難…
問題其實唔算大，始終玩起上黎都幾開心，但傾計就唔多囉…
我諗我地大組響呢方面已經算好架啦，但當然應該更進一步啦~

初初都係得幾個人傾，但傾傾下越黎越多人醒左，
結果成班輔導員都圍埋哂一齊傾計，足足傾左三個鐘…
雖然大家都好眼訓，我更加完全冇訓過，但都講左好多心底話，
仲比個好多建議點樣去搞好個大組，搞好個ocamp…
相信呢個preprecamp，最有用、最深刻o既都係呢段時間啦~

傾完大組長講左一番話，講完大家都不禁訓著左…
我就去沖個涼先，跟住食個杯麵、睇下電視，然後其他人又陸續醒啦…
之後執野走，搭12點船返中環啦，一上船即刻大昏迷…
跟住一齊去太古廣場食晏，我就行屍走肉咁跟住…
食完即刻返屋企怒訓返幾粒鐘，真係有十個眼訓…
夜晚出和民食，食完買左幾件衫，準備應付黎緊o既一堆camp…

今次呢個preprecamp都好充實呀，兩日一夜真係勁唔夠喉…
雖然好似唔係好多節目，但大家都玩得幾開心呀~
同大部份人都只係第三次見面，都已經開始玩得埋啦~
加上今朝o既情深對話之後，大家距離更加拉近左好多~
希望之後d輔聚同precamp玩得更開心啦~

7月12日

晏晝返中大開細O會，3日後就到precamp啦，但都係好多野未準備好咁…
傾左兩粒鐘，總算有個形出左黎，希望果幾日搞得好好睇睇啦~
之後返屋企hea，食完飯就出旺角，老細出糧啦~
今次都有唔少呀，足以彌補我呢排龐大o既支出啦~
去間餐廳一路飲野，一路睇住老細食飯，一路聽佢吹水，
不知不覺間就10.幾，估唔到今晚都係夜返屋企添…
之後搞個domain搞左一大輪…希望個網址快d出番啦…

7月13日

今日又去唱k啦…不過大家約晏左，因為想訓晏d，結果鑄成大錯…
去到k場12點，話要一個鐘之後先有位，果陣問左佢話仲係k lunch…
跟住去附近商場行下hea下啦，轉眼就一個鐘…
點知去到竟然話時間係1點05分，轉左happy hour，
結果係冇野食又貴多廿蚊，但一場黎到冇理由唔唱，結果都好無奈咁唱左囉…

唱左成4粒鐘，最尾竟然唱到大家訓哂咁滯…
跟住趕返屋企食晚飯啦，因為跟住又趕住出去…
但返到去發覺竟然未煮好，唯有即刻食個麵又趕出去…
今晚返中學睇個籌款晚會，我地成班中同約埋一齊去捧場~
初初諗住得幾個，點知淨係我地班都有十幾人，聲勢浩大呀~

呢個晚會都搞得幾大呀，雖然drama近幾年開始都年年有，
但係搞到咁大型都係第一次咋…唔怪得咁多人返去睇啦~
drama之前係一堆綜合表演，雖然又係唱歌跆拳道果類，
但今次擺明落重本呀，樣樣都幾精彩呀~
之後drama就更加係超掂，除左劇情唔太合情理之外，
佈景、服裝果d真係華麗到極！學校幾時變得咁有錢架…
睇完個晚會，都幾proud of自己係何傳耀o既人~~

完左個show都10.幾，但我地都意猶未盡，
走左上個台度係咁影相，足足影左半個鐘呀~
之後仲一齊食糖水，食到12點先返屋企，又做夜鬼啦我…
不過今晚真係幾開心，因為見到好多人呀~
有校友會d人、miss阿sir…當然唔少得自己o既一大班中同啦~

7月14日

今日去城大開首長會，去到搵勻間canteen都唔見人…
之前明明睇清楚個icq msg話約左12點，咁咪打去問其他人囉…
竟然有個話我聽2點開，另一個就話1點開，真係滴哂汗…
不過我已經餓死啦，即刻買個飯食左先…
食食下就見到個聯絡人黎左，佢話的確係約左12點，唔知點解個個都搞錯左…
想打比其他P，點知個個電話都唔通或者冇人聽，
打左好耐先contact到，結果個個都黎唔到…
即係話我今日o既節目就係去城大食午飯，然後返屋企…

返到屋企怒訓晏覺，爽呀~因為聽日又去camp啦…
今晚難得夜晚冇節目呀…計起上黎都有成10日未試過咁free啦~
不過都要搞ocamp野呢…又要執野去camp…都搞左成晚哦…

7月15日

又黎大O輔聚啦~今日去唱角唱K，好耐未試過咁多人一齊唱啦~
雖然9個人得三粒半鐘，但我都唱左好多歌，爽呀~
唱完仲食埋糖水先返屋企，跟住就準備入camp啦~
未來幾日就係細O precamp，禮拜日先返呀~

返到中大就食晚飯先，跟住就入shaw啦，呢幾日都住國宿呀~
搞掂入宿d野大家就好自然咁拎副UNO出黎玩…
成班OC成左莊咁耐，都冇正式咁一齊玩過，到precamp終於有機會啦~
大班人玩下又開下會，轉眼就去到5點…估唔到day zero都咁激…

7月16日

咁大個仔，經歷過咁多次8號波，相信今次都應該係最難忘o既一次…
一起身第一件事就係打電話問天氣，原來已經3號波，
不過我都冇諗到會出8號，所以都冇理到…
原定今朝開左首長會，先繼續做番precamp野，
但係一洗完面就有個P走出黎話我知就黎8號…

呢個時候即刻就要決定precamp到底繼唔繼續，好快所有OC就起哂身…
傾完一輪，最後決定今日行程取消，原本晏晝入黎o既輔導員唔使入黎…
首長會亦都要延期，黎緊中大o既P就慘喇…

之後就要決定我地到底仲留唔留響宿，主要問題係果度大家都會缺糧…
原本諗住話走，大家都執定野，不過之後都係話留番響度，
有一堆人就趁出8號前去百佳入貨，我就留守響宿度…

等到8號都出左，班人終於返到，
終於可以享受到吽響宿裡面o既第一餐－頹飯盒一個…
之後成個下晝o既節目就係UNO、開會、聽收音機、食麵、渣攤…
十幾個OC就係響事前毫無準備下，響國宿2樓渡過呢個極速8號波…

夜晚終於落哂波，我地都決定淨番兩日無論如何都繼續原定o既行程，
希望到時會順順利利啦…之後大家都係繼續UNO同開會，
仲煮埋之前入左o既大堆出前一丁，食到好飽呀~
深夜開完個會仲要落去lab拎d物資返宿，好彩呢個時候已經冇哂風，得少少雨o者~
順便就上下網，順便就打埋呢日日記啦~
如果唔係都唔知仲有冇時間記低呢個經歷…

7月17日

一起身就要搞輔導員入宿d野啦…本身都冇乜問題，
係有個大組竟然預先走左去食飯果度先弊，搞到其他大組要怒等…
最衰都係溝通不足啦，我一黎就要怒做野，都講唔清楚d行程…
等緊果陣帶淨番幾個大組去間房，諗住同佢地跳下campfire先，
點知我一路怒跳其他人先跳幾下，真係無奈…

下晝係treasure hunt，即係全港周圍走果d…
好累好累…由旺角走到灣仔，行到腳都痛…
最慘係響旺角要dem nami-nami，叫極d輔導員都唔肯跳，
我仲跳到比d途人圍住哂，真係豁哂出去啦…
不過之後諗番，我有時d態度都會令d輔導員更加唔想玩d game…
希望正camp果陣自己唔再係咁啦~

返到中大仲要準備水戰，miss左班車之後行上百萬大道發覺竟然冇人…
原來全世界都遲到，結果都要返shaw之後換埋衫先落番去…
水戰都係輔導員自己玩架o者，同OC都冇乜關係…雖然我都濕唔少…
玩到12點熄燈大家就執野走啦…呢個時候響百萬大道觀星好正呢~
返到宿都係開會同埋開會，開完仲要幫手打字，6點幾先訓…超累…

7月18日

一起身就要搞輔導員quit宿d野啦…自己都要執野準備走…
晏晝o既節目係響中大玩對戰，我就響UC守counter…
今日d輔導員比噚日玩得開心、投入呢~都係件好事呀~
之後本來話落lab拎手推車幫d袋，後尾又話唔使啦，咪上陣網渣攤~
之後守埋lab o既checkpoint就完左個活動，返shaw做sharing啦…

個sharing都係比輔導員插，都預左架啦，我地都想聽下大家意見o既~
我地OC都回應左唔少，不過我廢事講野啦，我唔想反而破壞大局…
初初一直都覺得細O好多野都唔到肉，同一個普通o既細活動無異…
到左呢個環節，大家終於開始認真起黎啦…
雖然期間都有d火花，不過大家都總算係坦誠相對，總好過個個唔出聲o既…
今次輔導員比左好多意見我地，相信我地正camp可以改善好多~

之後一齊出金沙角食飯，正camp響呢度食宵，今晚去試菜啦~
呢度比火炭果d係爭好遠架啦，但場地同budget所限，冇辦法啦…
今次有成15個OC一齊食野，相信最齊人食飯都係今次啦…
不過可惜比較短左d，食食下突然冇野食，雖然我都叫做飽o既…
返到屋企都11.半啦，呢個驚險刺激o既細O precamp就完啦~

經過今次precamp，我地OC都知道自己有咩做得唔好啦…
雖然今次唔係一個成功o既camp，但更加顯示到precamp o既重要性…
最緊要呢次大家做錯o既野，正camp唔好再做，
我相信以我地o既能力，今年細O都可以搞得好正~

7月19日

噚日去完camp返黎，聽日又去camp了，所以要響今日做哂應做的事…
首先梗係訓覺，怒訓左11粒鐘，希望夠補番之前幾日同之後幾日啦~
食完晏就搞ocamp野，仲有chatroom d野，用盡成個下晝啦…
夜晚去開系會，唔好意思，遲大到，不過都唔夠人開會，算啦，照傾，
6個人都傾左ok多野，同埋都傾左ok耐，都要跟緊番黎緊d迎新活動啦~
睇得出大家都幾緊o既…大家都想同下屆d CE同學玩得開心d嘛~
夜晚繼續ocamp，同埋執野準備聽日個camp啦~

7月20日

一年一度網友camp又黎啦！已經連續第三年搞啦~今年目的地繼續係貝澳~
約埋東涌食完晏就去百佳入貨，今次入得好激下，買左500幾蚊野…
入到去拎左房擺好野，就急不及待出沙灘同陽光玩遊戲！
可惜今日陽光欠奉，還好仲有個好正o既沙灘~
正就係正在好大浪呀~玩衝浪好刺激呀~
游完水仲上岸玩泥沙，仲有掟泥沙激戰，好正~

玩完返黎就開始屋裡面o既活動啦~今次我地唔燒野食，
咁多餐都係由幾位大廚操刀，我地就有更多時間玩啦~
UNO冚綿胎當然就唔少得啦，然後都係打機打牌鋤d果d…
期間仲有集體睇電視活動…似乎大家都幾鍾意睇《棟篤神探》…
今晚玩到2.幾就訓啦~

7月21日

8點幾無啦啦醒左，起身囉…玩下呢樣又玩下果樣，d時間過得勁快…
噚晚去沙灘玩到意猶未盡，今日梗係要再去玩啦~
可惜今日天氣麻麻，係咁落雨，都3.幾先停雨，即刻成班出去啦~
今次又玩左幾粒鐘啦~不過玩玩下又落過幾陣雨，好凍呀…
夜晚繼續玩完呢樣玩果樣，都唔記得d時間點過啦…dum到4點先訓…

唔知點解去左camp之後勁鍾意洗碗，差唔多見碗就洗…
冇計啦…又想幫手煮野食，但又阻手阻腳，幫手洗下野都好丫~

7月22日

特登較9點鬧鐘起身，就係為左食早餐！仲有好多野未食呀~
不過一出黎已經見到有人打緊牌，仲有半碟凍左o既炒蛋，照食啦！
好彩之後仲陸續有野食，食到好飽呀，仲拎左兩包出前一丁打包返屋企~
玩左陣就執野走啦，呢個camp話咁快就完啦…
今次等車唔使等太耐，2點已經返到屋企啦，梗係怒上網啦~

今次呢個網友camp總算一切順利呀~除左貴左d之外應該樣樣都唔錯啦~
呢幾日時間好似過得好快咁，玩下食下野就已經3日2夜…
第三年搞都有11個人去，唔知下年仲有幾多人想玩呢~
嗯…呢兩日又要抖下啦，禮拜日去泰國呀~

晏晝一直都係對住部腦，但主要都係用黎寫日記同setup個討論板…
原本話想download個leoboard黎用，但搞左兩個鐘之後，
有人同我講話想用番我自己寫o既超簡單版本…

搞掂即刻返中大開ocamp會啦，巴士上面訓到天昏地暗…
今晚個大會都幾大下，仲有輔導員黎sit會比意見，
加上precamp完多野傾，所以破紀錄地傾左3粒幾鐘，
淪落到要11點幾先返到屋企仲要煮麵食當晚餐…

7月23日

今日o既日記竟然係唔記得寫，等到第二晚先記得…
不過梗係啦，今日都冇咩做過…去完camp都要渣攤啦…
係晏晝出左去買褲，準備黎緊連續8日旅行+precamp，
順便換埋手機殼同埋比d野人，係咁多啦~

7月24日

食完晏去左幫人整部機，其實都只係拆個dvd-rom出黎，
不過係d螺絲扭到超實，我用盡九牛二虎之力先扭得開…
之後o既節目竟然係打牌…我都係剛剛先學識番點計番咋喎…
但係我都未見過打牌竟然有人唔比自己食糊…
打到5.幾，去m記食埋個tea就返屋企啦~今日都幾優閒~

聽日就出發去泰國5天團啦~我都有3年冇搭過飛機喇，都幾期待呀~
希望呢幾日都玩得開心d啦~仲有希望返到黎，所有野都安然無恙啦~

7月25日

泰國遊記開始啦~呢一連五日裡面，
我會為大家報導下我泰國之旅o既所目所聞，慢慢欣賞啦~

今朝未夠8點就要起身，出發去機場啦…
見到領隊connie，搞好d手續就去食個超豪o既早餐~
食完dum左好耐終於到集合時間，聽完connie勁仔細o既講解就入閘上機啦~
坐窗口位，當然要怒影相啦，不過去曼谷飛2個半鐘就到啦，都好快下…
順順利利搞好d手續就上車，connie講完一輪野就到導遊阿新講啦，
講到去到第一個景點為止…

首先係去拜4面神，又多程序又多道具，不過一場黎到都要入鄉隨俗o既~
但同時又落雨，真係幾狼狽下…拜完就去附近o既商場行，
我同細佬兩個自己周圍走，都有d斬獲(我買左個袋仔)~
下一站係食飯，最正都係咖哩炒蟹，其他就普普通通…

食飽就行跳蚤市場，都幾多特色野賣呀…不過今次就冇買野啦…
之後就係泰國著名o既人妖show，去到門口就見到堆人妖同人影合照，
我地都排住隊去影啦~雖然影一影都要比$4…
擾攘左一輪終於入場啦~d佈景就殘左d，但勝在夠多；
節目就同普通歌舞劇冇乜分別，係勝在夠密~
至於d人妖…其實又冇乜特別，咪又係平時睇相見到果d…
睇完都10.幾，係時候返酒店休息啦~

7月26日

今朝激死啦…朝早落樓下食早餐，諗住等埋細佬，點知佢肚痛，
搞到遲左落去，連累埋我都比人鬧之餘，仲冇時間食早餐…
聽朝我死都唔等佢！自己落去慢慢歎好過~

今日第一站係暢遊湄南河，坐隻觀光船出去左望望右望望~
主要都係望下d佛寺同d民居啦~
最後去到間佛寺下面餵魚食麵包，之後就調頭啦…
跟住係參觀燕窩廠同皮具廠，冇咩特別啦…

之後就去夢幻樂園，呢個係全日o既精粹黎架啦~
首先去間餐廳食個自助午餐~頹得黎d野食都幾好味o既~
食飽就去雪城玩…所謂雪城即係類似以前荔園o既飄雪樂園咁，
係個零下幾度，模擬番冰天雪地o既地方…
佢只係比左件頹褸同雨靴，我仲要著短褲，梗係凍死啦~
不過都唔理咁多啦，點都周圍影下相啦~仲有雪橇玩，正啦~

玩完就出去怒玩機動遊戲啦~
由於時間有限，所以都好趕下，唯有盡量爭取時間玩多d啦~
好彩每個機動遊戲都冇人排隊(唔知點解)，所以都玩到唔少野…
玩完走左去睇蛇，首先係捉蛇表演同參觀蛇王，
跟住入間房被怒sell蛇藥，講就講到天花龍鳳，
但見到個價錢就即刻全世界嚇窒…

睇完就去食飯，當係韓燒+火鍋啦…講真都係香港果d好好多，
不過呢度勝在裝修搭夠囉，都食得飽o既…
噚晚行果個跳蚤市場好多人都話唔夠時間行，
所以今晚徇眾要求再去多晚~
我周圍去搵手信啦，可惜睇左成個鐘都冇o岩心水…
係咪我對手信要求太高呢…行完就返酒店，結束第2日行程啦~

7月27日

今日唔少時間都係用左黎坐車，可以比我怒訓啦~
今朝去左間草藥公司參觀，d人見到我塊面，
就即刻怒sell d相關產品，都幾無奈…

跟住行大型商場，但就冇買野，反而去左個類似歡樂天地o既地方，
我同細佬兩個周圍走，發現左部室內模擬過山車，
只係8蚊鋪，梗係即刻去玩啦~
入到去先知原來係「michael jackson陪你打飛機」遊戲，
真係有兩粒制比你打d飛機落黎添架~
雖然個畫面矇左d，但係都好正~8蚊真係抵到爛~

玩完之後去食晏，食就冇乜特別，最特別係間酒樓超大(有3000個位)，
d waiter要著住roller送菜，都幾型~
仲有個庭院都幾靚，食飽飯要影番幾幅相啦當然~
之後去睇珠寶廠，我對呢家野真係完全冇興趣，都係去歎杯免費咖啡好過~

下一站係「是拉差老虎樂園」，當然係黎睇老虎啦~
d老虎仔真係馴到喊，仲可以抱住黎影相，我地都有影呀~
同場加演比較荒唐o既母豬餵幼虎(and vice versa…
之後仲有大堆動物，可以餵下駱駝、小鹿、袋鼠，
仲有豬計數同賽豬show，都幾得意~
最後有釣鱷魚game，拎住支竿釣住舊雞肉，用黎引d鱷魚上釣，幾頂癮~

行完呢個老虎樂園就入芭堤雅，入到去食個泰餐先~
碗冬陰公湯都幾好飲，只係酸到乸胃…
食飽就有「一枝獨秀」show，即係所謂真人騷…
之後聽人講話去泰國一定要睇，我當然唔會錯過啦~細佬都扮夠秤入去睇…
個show o既內容呢度唔方便講咁多啦，
例如就有打鼓彈琴射乒乓波，詳情自己諗下係點啦~

睇完又係行商場，怒搵手信啦，不過又係冇乜收穫，似乎我要求太大啦…
行完就返酒店，上房放低野就落左去碌左2局ling，
之後食埋宵，寫完日記都成點，聽朝6.半morning call…

7月28日

今日我獻出左好多個第一次呀~超正呀~
朝早好早就要起身，然後坐大飛去個叫珊瑚島o既地方玩水上活動…
隻大飛係要澗水上去果隻，都行得好快下，chok下chok下都幾激~
未去到個島之前先上個平台玩降落傘，
比隻快艇釣住，個人連埋個傘就浮上半空，
轉左兩個圍之後仲玩埋片水，好正~

去到個島就玩左水底漫步、水上電單車同香蕉船，
樣樣都未玩過、樣樣都好刺激~玩哂再去游多陣水先捨得上岸，
因為呢度真係水清沙幼、椰林樹影，香港個廈門灣都比唔上呀~
響果度食埋晏之後．就搭番隻大飛回程返酒店啦…
返到去再去泳池游多陣水先上房沖涼，累死啦…

抖一抖又再出發，先去食個魚翅tea，
再去期待已久o既泰式古法按摩~
一去到就見到幾廿個按摩女郎響度恭候，
然後就一齊走入去間有幾廿張床o既房，
女仔要換睡衣，男仔就著超加大碼睡褲，勁騎哩…

搞掂就開始一對一咁按啦~全身每個地方都被徹底按摩，
淨係腳都已經按左一個鐘…按左兩個鐘終於全身都按哂，
真係成身鬆哂，好爽呀~

下一站係騎馬車同參觀蜂蜜公司，冇乜特別…
之後去間酒店食晚飯，食飽又係shopping，
今次我死都要死番d手信返黎啦…
行左一粒鐘，最後都只係買左d頹野，算啦…
跟住就返酒店啦，又係碌下ling先上房…
話咁快就到last nite，都有d唔捨得呢…

7月29日

話咁快已經到左泰國之旅o既最後一日啦…
今日得兩個行程，就係參觀個海底世界同埋佛寺，
前者同海洋公園個海洋館差唔多，都幾左幾多靚相~
後者就普普通通啦，都係d虔誠o既信徒先有野做架o者…

之後搭車返曼谷，沿途connie講左好多做領隊遇到o既有趣故事，
講完仲收埋一大堆費用，咁就用左兩個鐘…
跟住食左間唔包、但全團一齊食o既buffet，50蚊又幾抵喎~
然後搭車出機場，離開泰國返香港啦…團友就此各散東西啦…

班機都已經遲左半個鐘，返到荃灣仲要打邊爐，
食到成11.幾先返屋企，然後一上網就收到幾百封email，
再加埋睇番各大newsgroup、網頁、日記再加補打日記，
5.都未訓…聽日係大O precamp，11.要返到中大呢…

總結下個團先~今次旅行真係好正，本身已經多野玩，
領隊同導遊都幾好，仲有d團友都幾nice~
呢幾日真係玩左好多野，留低左好多好好o既回憶~
同埋最緊要係影左好多正相呢~

7月30日

今日係大O precamp第一日，訓左4粒鐘就要起身啦…
約左班輔導員響火車站美心食晏，我都係第一次響果度食…
食完上UC擺低d野就入gym睇開幕，都係同上年差唔多…
上左房之後就係大組時間，怒跳營舞啦…
今年營舞係《最緊要好玩》，都唔算難上手，
跳左兩粒鐘，好累，但都幾好玩呀~

跟住dem mass game，夜晚玩埋夜遊，都幾好玩呀~
之後返UC開E(檢討會)，即係上次細O果個sharing，
不過今次氣氛好好多啦，又難怪…大O問題少咁多…
睇得出大O班OC準備工夫多好多呢…希望細O果邊都可以做得更好啦~
開到差唔多1點先完，返宿沖涼啦~第一日都已經ok累…

之後係吹水時間，不過男女仔唔同層，大家都唔肯去對方果層，
結果男仔同女仔就隔住個電話黎吹水，都係吹埋d無聊野，
咁樣玩下玩下都搞到4.幾…

7月31日

起身梳洗過後就要換件precamp衫，我地果組果件真係型到震~
我都唔知係咪應該叫睡袍…自己睇下面張相啦~
換好就去食早餐，之後就係全港treasure hunt，首個目的地係大埔…
著住呢件野搭火車就梗係惹黎全場注目啦，不過都唔理得咁多喇…
個checkpoint去到鐵路博物館咁遠，熱死呀…

之後去旺角食晏，食完先玩checkpoint…
未食之前撞到個細路仔請我地食糖，仲跟左我地一陣，好搞鬼~
食飽繼續行程，第一次見一張貼紙相可以塞14個頭落去…
有checkpoint係響火車站口唱山歌，我地真係完全豁出去啦…

跟住去九龍公園玩埋d checkpoint，行去地鐵站時要途徑旺角鬧市，
仲要係禮拜六，真係型鬼死…沿途係咁比人問我地係做乜…
去到九公先型，比幾個鬼佬發現我地，
即刻一字排開怒影相，好似開記者會咁…

玩完就返中大，接住係大組時間，傾左陣slogan野之後就又跳舞…
跟住又開E，食完晚飯仲有片人時間同埋晚會，
晚會最high都係跳campfire啦，著住睡袍拖鞋黎跳就更加激，
但係當然又熱死啦，跳完成身濕哂呀…

梳洗一下之後即刻就出去食宵，又係金沙角，仲要同細O precamp差唔多位…
今次食宵都幾正呀，我都忍唔住搵人猜下枚啦~
同埋班人都玩得好癲下，真係嘈到拆天…
玩到2.幾終於有差佬逗，都比我想像中遲，算係咁啦…
跟住飛的返宿沖涼啦~搞掂哂d野都3.幾…
之後去吹水，但大家都好累，差唔多5.大家都返房訓啦…

2001 6 7 8 9 10 11 12 月

2002 1 2 3 4 5 6 7 8 9 10 11 12 月

2003 1 2 3 4 5 6 7 8 9 10 11 12 月

2004 1 2 3 4 5 6 7 8 9 10 11 12 月

2005 1 2 3 4 5 6 7 8 9 10 11 12 月

2006 1 2 3 4 5 6 7 8 9 10 11 12 月

2007 1 2 3 4 5 6 7 8 9 10 11 12 月

2001						6	7	8	9	10	11	12	月
2002	1	2	3	4	5	6	7	8	9	10	11	12	月
2003	1	2	3	4	5	6	7	8	9	10	11	12	月
2004	1	2	3	4	5	6	7	8	9	10	11	12	月
2005	1	2	3	4	5	6	7	8	9	10	11	12	月
2006	1	2	3	4	5	6	7	8	9	10	11	12	月
2007	1	2	3	4	5	6	7	8	9	10	11	12	月