7月1日

話說今日決定左同同學去遊行…既然去得銅鑼灣，
又知道今日v-mix轉neway，諗住即刻試下去唱下啦…
去到見到的確D招牌變哂做neway，而且大門都開住…
點知入到去個staff第一句：「你黎返工架?」
然後過一陣先話「d野未準備好，請你去第間啦」…
結果過左附近greenbox唱囉…橫掂點都要食飯先…

唱完1點…落到樓下已經見到大堆黑衫人行緊去維園…
等埋另一個同學黎到，然後去百佳入貨，
跟住就開始入維園…但迫到入去發覺係祈禱會，於是走番出黎…
然後發覺學術界係響圖書館果邊，行過去囉…
原來係響個球場度集合，但曬得黎又未有人入去，
結果係去左圖書館涼冷氣…攤抖左半粒鐘左右啦…

落番去個球場開始聚左D人，咪跟住入去囉…
然後班唔知乜野中學生聯盟開始嗌口號，
我地開始跟住嗌囉~(我地都仲應該係中學生丫?)
到3.果陣個球場已經塞滿人，斷估都有萬幾人…
但係遲遲都未出發到，唔知發生咩事…
結果係企左成兩個鐘…4.3開始出發！

行左幾個字…但轉左個彎已經被迫停低…原來係細路出大路…
一直迫出到大路，先知道乜野叫做墟冚！完全見唔到龍尾！
空中仲有幾架直升機盤旋，真係咁大個仔都未見過呢D場面…
唔知點解條人龍一直行得勁慢，成6點幾都竟然仲響銅鑼灣…
出到軒尼斯道…全部行車線封哂…先知今次遊行真係唔小野…

沿途真係好情緒高漲~尤其是聽到話遊行有幾多十萬人果陣…
同埋見到四方八面都係無窮無盡o既黑衫人，
仲有沿途企滿天橋支持遊行人士o既人…個感覺真係好正~

去到灣仔終於順番哂喇，一直行到去中環先塞番D…
跟住廣播話由於太多人所以終點tun前左…
其實係可以行番上政府總部o既，不過有排，所以都放棄左…
結果係7.9左右去到終點，全程行左3個半鐘！

跟住搭番地鐵返荃灣晚飯，但沿途一直冇位坐，
直到8.半去到間高級法國餐廳先有得坐…足足6個鐘冇坐過呀…
咦…乜D晚飯咁貴架…叫左個燒味飯套飯，都幾豐富o既又…
食飽就返屋企沖涼上網訓覺啦…已經唔想做其他野…

夜晚睇新聞…真係未試過睇新聞都可以咁感動…50萬人喎…
如果冇去現場都好難感受到…我唔識形容喇…
不過當然希望冇需要再咁多人出去遊行啦…

7月2日

由於公司office搬緊，所以暫時放大假…都係繼續grad VCD…
但因為太耐冇郁過d野，都唔多熟手咁，所以進展都麻麻…
嗯…除此之外今日都冇乜做過野添好似…當係休息下啦…

晏晝出左去借野畀網友，然後一個鐘之後又要開舊生會，
但又唔想響條街四圍lan，結果返左屋企，然後上左陣網又出過去…
今次個會得4個人開，真係慘淡…不過都傾到D野o既…

仲有兩日放榜喇，突然好似殺到埋身咁…開始緊張起黎喇…

7月3日

放榜最後倒數！心情越黎越緊張…尤其是食飯果陣…
為左減低緊張，所以我今日一直做其他野黎分散精神…
其實都係搞grad VCD…冇咩特別啦…

今日好熱呀！屋企最高度到48度，唔係講笑…(最衰相機借左畀人)
晏晝阿媽等人去游水…搞到我都好想去添…
不過我前日遊行果陣揹住個袋6個鐘以上…仲要袋住兩支水…
搞到膊頭勁痛囉…如果唔係一定去游呀…

夜晚搞埋D野，就出發去同學屋企，準備一齊渡過放榜前夕…
去之前順便入一入海濱拎番之前借左畀人D野…
跟住仲慢慢行上去，上到去都差唔多11點…
一入到去就開始鋤D，鋤到2.幾去左seven食宵夜…
今晚天朗氣清，望出去見到個天好多星呀~
荃灣都睇到咁多星…真係幾難得~

去到食左個魚翅撈飯…食完之後hea下咁，
唔覺唔覺都3.幾，報紙都已經送到…
此時大家o既心情都冇乜特別，睇黎未天光都未識驚…

返到去就開始另一個遊戲…truth or dare…
大家唔係自爆情史就係做埋哂D變態野，
一玩就玩左個幾鐘，唔經唔覺個天已經開始光…

7月4日

個天一光個人就越黎越緊張，然後開電視做香港早晨，
第一句就係：「今日高考放榜…如果考得唔好都唔使氣餒…」
呢個時間講呢D真係只會令人更加緊張…
其實有唔少人已經頂唔住訓左陣，不過我都係行行企企睇下電視咁…

到7.大家就出發，去M記食個早餐先…
不過我真係食唔落，完全緊張到冇哂胃口…
大家食飽飽就戰戰兢兢咁行入學校，然後直上art room門口…
今年個放榜撞正其他form marks checking，唯有響呢度放榜…

大家企響門口度等，已經完全緊張到極點…
但我呢個時候竟然仲要同人影相…為左grad VCD…
到8.正終於可以入去啦…只見幾十張[木凳]擺埋一齊，
個場面好奇怪囉…然後大家就坐定定等派野…

一輪宣佈之後就順班號拎成績單，我拎到手果陣完全唔敢睇，
但見到其他同學見到個成績個反應…令我覺得好驚囉…
過左成分鐘終於敢揭開黎睇，一望，呆左一呆，唔知應該畀咩反應…
其實個成績比我想像o既理想囉…但係一直都唔識笑…
跟住打電話畀親朋戚友囉…
然後到八卦時間，同同學交換成績睇囉…
咦…睇黎我o既成績都算幾好喎…
不過見到有D同學好似唔多滿意D成績，真係幾令人擔心…
總之希望大家都升到鍾意o既大學，讀到鍾意o既科囉…
至於勁人方面…我地班有兩個3A囉…恭喜哂~

跟住大家都留響art room吹下水，然後我地幾個差唔多10.就走囉…
去左M記諗住又食早餐喎，但最後都係冇人食到…去到齋坐…
之後就搭地鐵出旺角…約左網友唱K…
好耐冇同網友唱過K啦…但可惜今日把聲拆哂…因為通頂?
同埋超眼訓囉，冇歌唱果陣完全係訓著左…
期間都仲有其他網友打黎問成績囉…都已經唔知講左幾多次…

6個人唱4粒鐘，都可以話係多得滯…
唱完陪佢地去信和兜左個圈，就返屋企上網訓覺…
夜晚都係冇乜野做過，休息下啦…

今日個成績…真係算幾滿意架喇…有條A仲想點喎…
但中文D係比較意料之外囉…仲要作文E…唔係卦…
仲有我覺得英文oral應該好過中文，但結果係前者E後者C…
不過算啦，中英文都唔係咁重要…
但係而家中大同科大o既compu eng都入到，我就要作決定囉…
我到目前為止都仲未諗到到底想入邊間…聽日就要改choice喇…

7月5日

通頂之後果日自然係大昏迷…1.幾先捨得起身…
一起身唔知點解又腰酸背痛…激死人啦…
個人一[支力]就乜都唔想做咁，今日總括黎講都冇乜野做過…

夜晚出去奧海城食飯…慶祝AL報捷！
話說曾幾何時黎呢度…見到一間意大利餐廳好似幾正…
而且唔算好貴…於是話如果AL考得好就黎呢度食~
嗯…平時自己覺得好易行o既路…
原來對於一個行動不便o既人黎講係咁漫長…
同阿婆出去…竟然要個幾鐘先由荃灣去到奧運…真係誇張…

講番呢餐，真係幾豐富架~最初驚唔o岩口味，結果係完全冇問題~
食飽飽就決定飛的返去…快幾多…
嗯…唔知點解返到去勁肚痛左一陣…飽得滯?

今晚7點至聽晚7點係jupas改choice時間，
但我到而家都仲未諗到中大同科大應該點樣取捨…
從來都未試過做一個咁難o既決定…話哂都影響未來3年o既生活…

2:25，決定了中大。希望唔會後悔。

7月6日

決定左中大之後，一訓上床就勾起哂響科大o既美好回憶…
其實揀中大定科大…就好似阿媽同女友一齊跌落水問你救邊個咁…
雖然我可能愛女友多D，但係道德上又應該救阿媽先…
邊個比喻邊間U…我諗唔使多講啦…

起身之後發覺對手仍然幾[支力]下，但冇耐阿姨上黎叫我去游水…
我見出面藍天白雲，最後都係走左落去游~
樓下個泳池…好耐冇去過啦~原來都仲有唔少人去捧場…
游左一個鐘…其實都仲游得郁o既…不過要清場…

上去沖番個身就買飯食…然後下晝繼續緩慢地進行grad VCD工作…
然後4.半就要出門口…今晚同阿媽及其朋友去釣墨魚~
去到鑽石山轉巴士入西貢…然後見果度起左個公園仔(幾時o既事?)，
大家就好似遊客咁勁影相…順便等隻船到…(咁我地的確係遊客)
行到去個碼頭…非常繁忙…我地又早到左…等左半個鐘先有船…

上到船冇耐就上左船頂吹下海風，勁舒服~
之後落番去填飽個肚，然後就開始釣…
經過之前三次釣墨魚一條墨魚都釣唔到o既失敗經歷之後，
我今次決定誓要釣到起碼一條！！
但係好可惜…最後成隻船都釣唔到一條…唔知搞乜…
最後一行十幾人都空手而回…再食埋宵夜先返去…

兩個禮拜之後又去釣墨魚…到時一定唔可以咁失敗啦…
同埋希望到時天氣一樣咁好囉~
今晚又唔熱、又天晴…見到好多星星呀~真係浪漫死呀~

7月7日

禮拜一，仍然係停職留薪，仍然係吽響屋企，仍然係grad VCD…
不過今日進度可以話唔錯，我可以做o既都完成左8899喇，yeah~~
淨低o既時間…做過D乜呢下?

好似係用左唔少時間去講個氣象迷聚會…
今日終於截止啦…最後一刻剛剛好廿人報名…真係有驚無險…
不過又真係驚D人甩底…而家真係甩一個都死得…
同埋次次搞聚會都唔知點解要拗一大輪…幾時呀…去邊呀…
次次都講到自己好氣餒…唔想搞落去…
但係次次都係繼續搞落去…係咁loop…唔知為乜…
都係果句…希望今次可以搞得好好睇睇囉…

7月8日

今日終於暫時放下grad VCD工作，輕鬆一下~
不過都唔算係完全休息，因為wic討論區又要整野，
再加上呢排和記唔知做乜好慢…所以都冇乜時間做其他野…
同埋都要抽一個鐘出黎睇amazing race囉~

晏晝其實係出左去…同阿媽食飯、買新袋、
入埋釣墨魚條數同埋還書…一次過做哂幾樣野~
平時揹開個袋爛左啦…迫不得已要再買過…

無啦啦網友約我聽日去廈門灣，無啦啦office又要我聽日返工…
最後我決定係請假…係咪好衰呢…禮拜四補「返」囉…
同埋夜晚先知原來有班同學又係聽日去廈門灣…乜咁o岩呀…
不過其實講開都幾悲…除左響班網之外都冇人會約我出去…
暫時諗到唯一o既理由係…佢地覺得我好忙卦…(雖然我的確幾忙)

7月9日

今日失驚無神去廈門灣，陽光與海灘一日遊！
唔知點解突然好期待…搞到訓得唔好添囉…(好似細路仔咁)
朝早起身上陣網就執野，然後就出發去沙田~
食完吉野家就搭車去西貢…沿途暈到七彩…走果陣一定唔搭呢條線…

去到西貢入百佳補一補給，然後未行到碼頭已經有人賣船飛…
嘩…原來要成廿蚊來回…無啦啦又多筆使費添…
跟住行去碼頭隻船已經就黎開，就拿拿聲上船啦~
隻船開果陣我覺得勁有渡假feel囉~仲要船上面有D外國遊客咁~
(諗起n年前去印尼…要搭船去乜野「白痴夢幻島」…都差唔多feel)
正當我拎部相機想影野果陣，我發覺裡面冇電…

坐左幾個字就去到呢個號稱全港最靚o既泳灘－廈門灣(又稱半月灣)！
果然係名不虛傳，椰林樹影、水清沙幼！係人比較多左D囉…
落去沙灘搵好位之後就聽到有班人嗌我…原來班同學就坐響隔離…
換完衫之後就即刻急不及待落水啦~實在太舒服喇~
游左冇幾耐就走左上浮台…唔知點解今次又咁鬼大膽…
之後又被同學呃左過去一次…然後仲有一次係成班人坐浮床過去…
但係上去果陣畀個浮台刮到損哂，最後要由急救浮床運番上岸醫治…
上左急救站個人同我消毒左就話可以繼續游…咁神奇?

今日有少少尷尬o既係同網友去但撞o岩同學又同一日去，
結果係同網友一齊o既時候同學就突然彈出黎，反之亦然…
不過都冇乜所謂啦…大家一齊黎玩o者都係~
我地1.幾黎到，我游到4.幾都仲想繼續，
但原來班網友已經排隊沖身…唯有好唔捨得咁離開囉…

搞掂埋D野就坐番船轉巴士轉地鐵再轉村巴，返到去剛好開飯時間~
成晚好似做過o既一樣野就係雷達圖動畫…工作效率咁慢o既?
嗯…聽日又要開始繼續工作喇，放左咁耐假…要加番兩把勁先得！

今日真係好正呀~但係意猶未盡囉…
一定要搵機會再黎呢度玩番夠本！(但係最好唔好係假日)

7月10日

朝早起身一上網就見人勁響度講交通意外，原來發生左單大野…
結果係成朝都掛住睇呢單新聞…(其實我都冇諗過朝早做乜…)
食完晏睇埋午間新聞就返工喇…都好似有成半個月冇返…

去到觀塘果邊失驚無神落場雨，好彩有帶遮…(但臨走差D唔記得拎)
今日又要更新桌球網D野喇，搞掂之後都唔知仲有咩好做，
結果都係上網、上網、上網…hea到放工為止…

夜晚繼續grad VCD工作，希望聽日放假搞埋D手尾…盡快出爐啦~

7月11日

今日o既日記我諗都好短下…因為今日成日都係只係搞grad VCD…
游水後遺症今日爆發…所以工作進度都頗慢下…
但係grad VCD總算大致完成!!! 終於可以搞其他野喇~~

嗚嗚…今日o既新聞好慘呀…仲慘過噚日…
見到D小朋友同埋校長喊哂個樣…我都差D喊埋出黎…
真係未試過睇新聞睇得咁激動…

7月12日

今日係非官方班會單車同樂日，好難得要早起…
但係我估計時間錯誤…又遲到添…
睇黎我要調整一下我o既時間觀念…唔可以再遲到！

其實去到大圍都仲有人未到…有時都好難怪哂我…
條路線同以往o既都係一樣：大圍→大尾督→大圍
今次有8個人去，所以冇可能好似上次咁快…
而且今次又多小意外(我架車個brake又有問題…)，
12.幾先去到大埔，而且因為有神秘任務，所以要響果度食飯…

次次去親大埔都會盪失路，呢句到而家都仲成立緊…
不過今次好彩只係響個分叉路停留左一陣…
(但其實兩條路都去到同一個地方)
今次又去左個天橋底食飯，因為唔知邊度可以睇住D單車…
食完野仲有生日蛋糕食~因為今日有同學生日~
(神秘任務即係去買蛋糕…)

食飽就繼續去大尾督，難得禮拜六都咁靜，諗諗好好享受下，
但係太陽又曬得交關(反而朝早落過場小雨)，又冇風，都唔多enjoy…
3.半回程，一切大致順利，冇咩特別啦~
返到屋企即刻勁飲水，而且仲有冷氣開放，沖埋個靚涼，舒服哂~

今晚除左搞少少grad VCD野之外就冇咩好做，都係上下網…
暫時都唔想做其他野住，休息下先啦~

7月13日

今日原本係同網友去海灘，最後大家都淆哂，
加上噚日踩完單車都[支力]，咪順便響屋企抖下囉~
o岩o岩叫做搞掂grad VCD，但又未想開新project，
所以成個晏晝都係漫無目的咁上網~

夜晚出銅鑼灣…去番早排想去但未開o既CEO Neway~
嗯…一切都同v-mix冇乜分別咁囉…除左D歌…
一開始唔知點解勁冇聲…係食完野再唱多兩下先開到聲…
唱左成4粒鐘…差唔多啦~但睇黎都唔平…又nuts又生果…

嗯~呢排天朗氣清，成日有機會見到好多星，
所以突然對觀星o既興趣都大左~(我不嬲都有D興趣架)
夜晚返到屋企就勁睇太空館網頁果D天文知識，
做定D功課先嘛~不過睇到有D頭暈添…
如無意外禮拜五就可以去觀下喇~

7月14日

下晝返office做野，之前話擱置左o既project而家又要繼續做…
希望今次係黎真架啦…再擱置我就真係死畀你睇…
不過成半個月冇跟過個project，好多野都唔記得添…
仲話要開始業務運作，搞到頭都大埋…今日都做唔到幾多野…

夜晚搞搞wic野…好快就過左一晚…冇咩好寫啦

7月15日

是日係屋企工作日，以緩慢o既速度繼續project，
因為要等同事send D資料過黎先可以繼續做，所以又提早收工…
(打緊日記果陣先發覺我又唔記得logout個記錄工作時數系統)
未來一兩日放住假先…去玩一玩順便等資料…

啊…炎炎夏日竟然傷風了…都唔算嚴重，但係打乞嗤頻密左囉…
九成畀細佬傳染…唔係怪佢…但佢一中招我都好難避免…萬試萬靈…

7月16日

今日失驚無神第二擊，赤柱陽光與海灘一日遊！
以為冇人出去食晏，所以自己響屋企食，
點知一開飯就個個問我做咩仲未到…
跟住臨出門口個個又打黎，結果遲哂出門口…

去到中環搭巴士入去，沿途不斷有巴士驚魂…(其實都係自己嚇自己)
入到赤柱入一入貨就出海灘~去到已經見有個網友曬緊太陽…
換衫落水…嘩~好凍！同埋好拮腳！
相比起廈門灣果D水清沙幼…赤柱即刻downgrade哂…算啦…
今次游左兩次去浮台，但係比廈門灣果次吃力好多…
我以為係我自己體力問題，其實係呢度個浮台比廈門灣果個遠成倍…
諗諗下…真係要買番個夠度數o既潛水鏡先得…
而家我游果隻「昂頭蛙式」聽講話勁吃力個喎…

上到岸畀班網友玩，又搵沙埋左我，又塞沙入泳褲，
簡直無所不用其極…係後者比較難接受囉…搞到我尷尷尬尬咁…
次次去到海灘都係覺得時間好快，同埋勁唔捨得走…
我仲浸緊水其他人又已經沖緊身，最後都hea到5.先走…
搭番巴士返中環…沿途遇到前面撞車，塞死哂…
坐左個幾鐘先出到去…結果7.幾先返到屋企…

同上個禮拜比較o既話，都係覺得上次正D~起碼地方好好多~
同埋今次唔夠熱囉…太陽又成日畀雲遮住…
仲有之前D傷都叫o岩o岩好番，今次又畀石仔搞到傷哂…
沖涼果陣仲痛到要單腳企，救命呀…

嘩…返屋企途中響小巴隱約聽到單大新聞，上到去第一件事睇詳情…
食完飯同人傾緊單野，點知又爆多單辭職，真係突然…
兩個辭左好多人都應該會開心，不過再辭多一兩個就真係天下大亂…
希望呢堆政治野快D解決啦…最緊要搵番合適人選頂果兩個位先囉…

7月17日

噚晚畀個同事打黎話有urgent野要做，要今朝9.半返office，
但係講完個電話都點幾…結果又係唔夠訓…
返到去已經係office hour，但係竟然要摸門釘！
原來個個同事都有各自o既理由而遲返…等我企左響門口幾個字…

今次個urgent task係搬個leoboard…leoboard本身已經夠煩，
呢個仲要係一個cookies o既討論區，D內容多到不能想像，
淨係download都已經成個鐘，唯有上下chatroom打發時間…
跟住upload先死，話要4日先upload哂…嚇得我…
最後要上server搞先得，但係呢個時候已經1.幾，唯有買飯食先…

唉…仲話約左同學2.荃灣，唯有tun遲一個鐘…
急急食完飯再繼續搞，但係upload哂都係不斷error 500，
搞到2.幾都未搞掂，為避免遲到唯有返去繼續搞…
咁o岩有個同事要搬一堆野去旺角，我就義務幫下手啦…
捧住部勁重o既機上的士(呢D當然公司入公司數啦)，
然後就搭地鐵返去…去到荃灣結果都要遲幾個字…

今次係約左個同學影番D grad VCD相，順便聚一聚「舊」…
佢因為被拔左去港大讀醫，所以幾個月以黎一直冇機會見面…
影相之餘梗係講下大家近況啦…然後又講下DC野…
傾左個幾鐘…被急call搞番公司D野，唯有走先…

返到去發覺有堆file未download，於是又花左大堆時間搞…
然後想upload果陣發現堆file竟然已經畀人upload左，激死…
我又約左人7.開舊生會會議，但係夠鐘都未搞得掂，
結果又要放棄工作先，最終都係要遲到…

開會果陣一路諗緊單工作，都集中唔到精神聽人講野添…
今次都唔少野傾，兩個鐘先開完，然後先返去食飯…
食完已經差唔多10點，但係話12點之前一定要搞掂，
呢個時候我已經諗唔到咩方法解決，開始進入放棄階段…
加上想印野但部printer又short左係咁印符號，心情跌到最低點…

到11.幾有網友話想幫下手，結果搞搞下真係有D進展，
然後一齊逐步咁搞，最後響1.半宣佈完成！
再執埋D手尾，沖埋涼，2.半先至訓得…
一個urgent task竟然做足我成日，真係諗都諗唔到…
原本噚日諗住下晝全日放假，結果被全盤打亂…
仲要聽日已經係氣象迷聚會，好彩冇乜特別野要做…

7月18日

今朝訓到11.幾先起身，然後上完網就開始日記補寫工作，
但係竟然寫到午飯之後先寫完…然後搞番d grad VCD野，
跟住噚日單野完全仲未執好手尾，話有D地方post唔到野…
結果又要搞一輪…搞完已經差唔多夠鐘出門口…

今日係第11次氣象迷聚會，以釣墨魚形式進行，
呢次最麻煩係佢話要夠廿個人先可以上船，多一個少一個都唔得，
所以人數方面一定唔可以有錯…(結果船果邊根本冇人點名囉…)
去到尖沙咀集合都係得一個人，不過時間尚早…
然後陸續人齊，但最後黎果個竟然係我細佬…

齊人之後去碼頭搵船，搵到又要等佢慢慢泊岸，都浪費左幾個字…
上到船冇耐就上左去吹風睇景影相，撞o岩magic hour真係靚到爆~
天黑就落番去拆野食，然後見隻船慢慢駛去個避風塘，
原來話隻船要加水…而家先黎加…係咪蝦細佬先?…

加完就繼續行…去到大廟灣停低就開始釣，釣唔到誓不罷休！
今次盞大光燈好光，真係見到D墨魚游黎游去，
但係竟然得個睇字，一直都冇辦法釣到佢地上黎…
反而係垃圾周圍飄，大家都釣到唔少上黎…
過左幾耐下終於有人釣到墨魚，最後係得佢一個釣到3條！
我自己5次釣墨魚收鑊0條…睇黎我短期內唔會再參與呢種活動…

回程收錢之餘又上船頂吹水，但係又變左被「強暴」時間…
好彩o既係今次冇人影相，而且成班都係熟人…
返到尖沙咀就係大合照時間…但係影相都可以影幾個字…
跟住成班人再去M記飲野…返到屋企12.幾囉…
聽日7.半要返石圍角…舊生會足球比賽…

今次聚會我自己覺得係近幾次之中最成功一次囉~
收錢方面又冇問題，大家又玩得幾開心(我覺得)，
我自己都玩得幾開心~放棄左以後唔搞聚會o既念頭喇~

7月19日

今日係舊生會足球比賽，6.10就要起身…AL之後都未試過咁早…
上到石圍角就入惠康等埋主席一齊買野…
又要格價又要自己搵貨(個經理乜都懶理)，買左半粒鐘先買完…
返到學校又要幫手推車，上面又檯又[木凳]，推到D野跌哂…

今次有7隊報名，得4個鐘黎打，所以時間比較緊迫，
加上得5個幹事做野，所以工作都比較繁忙…
我自己就又要計分又要影相仲要執波…仲要處理附近D昆蟲…
今日已經唔算好熱同好曬，不過坐響度幾粒鐘都出哂汗…

最後順利12點完成所有比賽，成個過程都幾順利，太好喇~
執埋D野都已經差唔多1點…原本諗住2點做facial，
但係我未食飯而且想返屋企沖個涼先，所以又要tun一粒鐘…

返到屋企沖完涼食完飯仲有時間淨…上一上網先…
然後過銅鑼灣進行第4次facial…
做完有個網友打黎問我試唔試下做盲人按摩，
佢自己成日做又成日介紹我去做，
而且我個膊頭都幾需要搵人按下，咪去試下囉…

個按摩係響西九龍中心…美食廣場隔離，
而且係開放式…周圍人來人往…搞到我勁想淆添…
不過最後都係放膽一試！我可以肯定全場最細係我囉…
一坐低個盲人師傅就開始計時，然後就開始按…
呢種係穴位按摩，所以係咁壓落去D穴位，壓到差唔多成個人彈起！
半個鐘轉眼過去，按完個膊頭果然鬆左唔少，唔錯~

跟住仲話去睇戲，而且指定要靚聲戲院，結果去左東薈城…
失驚無神就搭左地鐵去東涌，買完飛就去食飯，
然後周圍行黎行去hea時間，9.半先有場…
今次係睇《未來戰士》，原來又係人類電腦大戰，
不過最緊要都係D特技，的確係幾正~

睇完11.幾，返到屋企都係12.3，突然覺得交通好方便~
返到黎就開始密切留意住天鵝，因為隨時掛波…
但係唔知點解做完D野竟然已經3.，乜D時間過得咁快…

7月20日

風季第一擊：天鵝！7點被嘈醒左，原來1號已經出左個幾鐘…
繼續訓到10點…極唔願意之下起身…
禮拜日冇節目…自自然然就係成日響屋企追下風，
但係成個下晝出左3次門口…首先係買飯食，跟住去book羽毛球場，
最後去左阿姨度幫手整電視，咁就一個下晝…

夜晚出荃灣廣場打邊爐，不過為左等特價時段，要一直捱肚餓…
9.鐘去到都仲勁多人等緊位，特價真係魅力沒法擋~
等左幾個字終於入得，即刻勁剔野食，
最後o岩o岩好食得哂D野，而且仲飽哂，真係perfect~

食完慢慢行番去小巴站，然後呆等幾個字先有車，
返到屋企又係12點，已經連續三晚夜返屋企…
然後仲要繼續處理天鵝D野，今晚又勁夜先訓…
臨訓我望望塊鏡，嘩…個黑眼圈…嚇死人喇…

7月21日

今日繼續瘋狂追風日…大半日對住部電腦…
其實主要都係響chatroom打躉，同埋改下D script咁，
然後下晝4.幾先有人打黎叫我開工，咁先不至令我虛渡一日…
但係server又慢…我又懶…搞到夜晚先搞得掂…

然後又過左阿姨度整電視…噚日整到佢地冇得睇錄影帶…
原來要駁錄影機竟然係要tune去某個台…真係奇怪…
搞掂就返去啦…冇幾耐就接電話，話wic要採取臨時應變措施，
雖然已經落左波，但係入個網o既人不跌反升，
仲要係咁破人次紀錄，server嚴重頂唔順…
結果改黎改去先至好番少少，全日人次係平日幾倍！
但係呢個時間已經冇乜心情慶祝…反而想趕走D人…
直到點幾鐘個server先至順番…但係另一個風又黎緊…冇眼睇…

7月22日

風季第二擊：伊布都！4.特登起一起身就係為左搞佢幅路徑圖…
然後繼續訓…訓到10.幾先起身…
之後成日都係搞wic d野，主要都係採取災難應變措施，
因為實在太多人入，server成日都進入危殆狀態…

夜晚去左阿姨度食飯，係正宗西餐，燒羊扒！
不過要等到8.半先有得食…冇所謂啦~真係有酒店級水準！
食完睇埋最後一集amazing race就又幫手搞下電視D野，
搞到10.幾先走…即刻趕番去…因為一號波已經出左成兩粒鐘…
夜晚原本諗住早D訓，但係為左個熱帶氣旋預測比賽結果，
搞左成個幾鐘，結果都係勁夜訓…

7月23日

起身上陣網睇下伊布都同搞下個網D野，就急急腳出門口去飲茶…
樓下間茶樓有排未開，而家仲要搭車出去先飲到…
食飽之後過銀行入下數，嘩，戶口勁多進帳呀！
包括之前釣墨魚收番D錢，同埋上年遊船河D錢，哇~
但要入幾十張銀紙…都用左幾個字…

搞掂返屋企就繼續睇個風，過多陣又要出門口…
今日係網友羽毛球團…又會咁好彩係今日…
去到地鐵站已經感到D風幾勁，之後仲爆大雨，真係好有打風feel~
齊人就行過愉景新城，之後因為盪失路而搞到成身濕哂…

今次book兩粒鐘，6個人打，差唔多啦~
第一次同網友打波，大家D水準都差唔多啦…
打完又唔算好[支力]，但隻手扭親…

返到去仍然繼續睇個風，都冇咩特別好講喇…
一打風都係會忽略哂其他野…都係快黎快去好喇…
server仍然陷於癱瘓，呢樣真係唔多想見到…
仲要計人次個counter short埋，
淨係知道出8號果一個鐘都起碼3000人入左去…

7月24日

朝早6點起身就睇睇伊布都最新情況~
都係一直都keep住響二百幾公里掠過…仲話會落波…
跟住諗住冇乜野就繼續訓，但係訓唔著…7點又再起番身…
之後大致上都係chatroom時間，到10點先再訓番兩粒鐘…
完全係極度頹廢的生活…

下晝…冇咩野做啦…主要都係休息下…
噚日打完羽毛球個人都仲[支力]…已經冇乜心機做其他野…
跟住5點幾見冇野做又再訓過…不過係訓左半粒鐘o者…

夜晚細佬番左黎就開始要忙，因為grad VCD要佢幫手燒碟…
佢之前去左camp未燒到，所以搞到而家先燒得…
但係燒完先發覺有問題，再燒都有問題，
如是者成屋o既碟都燒哂，而且時間都跟住不斷燃燒，
去到3.幾都未搞得掂，真係悲哀…

7月25日

連續打完兩個風，今日終於回復正常o既生活…
噚晚搞隻grad VCD搞到勁夜訓，今日就自然晏起身…
補寫完日記又夠鐘食晏…都仲係頗頹廢下…

食完晏已經2.幾…然後就要出荃豐買野，
因為噚日已經燒哂D碟，要即刻補番貨…
而且我仲想買mouse pad同埋支咪，順便買埋~
同埋今次仲可以用梗D散銀…個散紙包滿到就黎爆…

返到去燒埋隻碟，同埋裝埋D野就要再出門口寄果兩隻碟…
去到先發覺我抄左公司地址但冇抄公司名…
但郵局又差唔多閂門，唯有用僅餘o既記憶寫低…
(最後發覺我係記錯左…不過應該唔會寄失卦…)

夜晚又要出門口…舊生會會議…
去到見到一堆陌生面孔…原來佢地係幫手搞校慶晚會…
今次個會都算開得幾長，因為個晚會都好多野搞…(但我應該出席唔到)
傾到9.幾先散會…勁肚餓…即刻趕番屋企食飯…

沒有了grad VCD，沒有了天鵝同伊布都，
但係唔知點解仲好似好多野做咁囉…結果都係好夜訓…
奇怪係朝早又成日覺得冇野做咁…

7月26日

朝早上陣網就要出門口…grad VCD拎出去整要入數…
首先係去匯款提款…然後去搵間唔知乜銀行…
我一直記住係「大河道」，亦都記得果度有間唔知乜銀行…
但係去到先赫然發現呢間唔知乜銀行唔係我想要果間…
跟住再周圍搵間正確o既銀行，但行哂成條大河道都唔見…
最後過埋銀行閂門時間，仲要屋企煮好飯…唯有返去…白行一趟…
返到去上網睇返…果間銀行響「沙咀道」…激死…

晏晝想搞下公司野，搞搞下突然「啪」一聲熄左機…
唔知邊度跳左fuse…但部機又開唔番…唯有睇雜誌hea時間…
之後再等都唔得…原來係插蘇個掣熄左佢開番就得…
公司d野搞左個下晝就搞掂啦~夜晚都係搞下D濕碎野…

7月27日

今日同阿媽踩單車…不過要等佢放工，點半先響荃灣出發~
去到大圍仲要等佢地食埋晏(我自己響屋企食左)，
最後係差唔多3點先去租車…未試過咁晏…

可能今次人少…講價失敗…比平時仲要貴五蚊…
今日都係跟番平時條路線踩，睇下可以去到幾遠就調頭…
去到划艇會個橋底…竟然派風扇~正~之前我果部借左畀細佬整壞左…
最後用左兩個鐘時間去到大埔~已經比我想像中好喇~
大抖一輪之後就回程…6.半返到大圍~成績唔錯~

跟住搭一個站火車去新城市食飯同買褲…去camp d衫褲洗唔切…
返歸之後就開始籌備下個網友camp…後日就係啦…
仲要無啦啦變左我主辦…都唔知到時有乜做添…

7月28日

今日原本係搬office同埋我最後一日返工o既日子，
但係直至今朝都未有人叫我返工…打去就叫我等電話…
等到10.幾先話畀我知冇野要做…激死我啦…
今朝成班網友去何文田踢/睇波，我原本都諗住去湊下熱鬧，
但係一路諗一路睇點去…搞得黎已經冇時間…唯有放棄吧啦~

食完飯發覺自己冇乜世藝…其他野又唔想搞…
過隔離房見到有隻eason新碟，拎左隻VCD過黎睇…
睇到首《猜情尋》…表面上好簡單o既MV…只係一路行樓梯…
但係唔知點解好大感觸…而家一路聽住首歌一路打日記都一路想喊…
不過呢排太少野可以令我感觸…成個人麻木左…
而家睇完隻MV再睇番D歌詞…真係覺得好正~

之後再睇埋段成個鐘咁長o既eason訪問，成功hea左我唔少時間~
但睇完之後赫然發覺自己有樣野唔記得左做…入grad VCD錢…
前兩日去錯銀行…今日要再去多次…
果間銀行真係唔似銀行…全部counter都係卓越理財果d咁…
搞掂條數就趕番班村巴返去…半個鐘就搞掂件task~

夜晚冇咩特別，都係執野準備去camp，聽日就開始連環去camp…
嗯…原本諗住8月之前做完o既野都做唔到…有D遺憾囉…

7月29日

一年一度網友camp今日正式展開！三日兩夜貝澳之旅！
朝早上陣網就出發，去東涌食午飯，跟住等齊人就入百佳入貨~
買左400蚊野，畀完錢個銀包o岩o岩好冇哂錢…
搞掂就捧哂d野去巴士站，唔使幾耐就有車~

去到貝澳就搵番條小徑入渡假屋，行行下先發覺落車落早左個站…
兩年前班會旅行都係黎呢度，所以對於呢度o既環境都唔陌生~
不過果次黎呢度係黃雨…今次曬到出哂汗…
去到拎左房、執好野，就開始進行活動：鋤d…鋤左成兩粒鐘…
跟住冇乜世藝…我就出去周圍行下…順便睇下租單車o既價…
一路行都勾番起兩年前camp o既回憶…原來果陣都做過唔少野~

返黎之後有另外幾個人黎到，佢地買埋我地唔記得帶o既UNO，
隨即就開始久違o既UNO冚綿胎！一玩就玩左個幾鐘！
玩完之後大家都餓…就上天台準備開始BBQ喇…
準備透爐果陣先發覺之前買漏左好多野…
報紙要搵出前一丁個盒黎取代，紙碟同叉要落樓下士多買…

D炭我唔小心放左去冷氣房，結果拎上天台就濕哂，
所以透爐都用左唔少時間，差唔多9點先可以開始食…
一開始就畀人瘋狂咁燒哂D丸…都有點兒無奈…
不過咁多野食，都總算食得飽o既~
食完有幾個落番去玩，淨番幾個就留響天台繼續吹水~

今晚天氣勁好，簡直係滿天繁星，仲見到流星添呀~
之後索性熄哂燈觀星，真係好多流星呀~
睇到成4點先落番去…跟住沖完涼再hea多陣就訓覺…

↓呢張係31號影o既…因為今日都冇影過相…

7月30日

9點幾醒左，跟住都訓唔著，起身就睇下電視等食早餐…
等大家醒哂煮完野食都已經係brunch時間…今餐食腸仔炒蛋公仔麵~
食飽就睇下電視，hea到差唔多兩點就出海灘玩~
行到差唔多到個灘果陣先發覺唔記得拎沙灘蓆…
結果要走返入屋拎…一來一回用左幾個字…好無奈…

貝澳海灘有兩個特色，一個係d沙係黑色，同埋就係個slope好細，
由岸邊走到深水o既地方都有排行~
而且差唔多成個浮波範圍都可以企到囉…
不過呢個灘最好係完全冇石仔，唔使整損對腳啦~
但係最弊係唔知點解有時水面會浮起D糞狀物…嘔…

游左個幾鐘d人就返哂上岸，我都唯有沖身走啦…
返到去又有幾個人黎左，開始熱鬧起黎啦~
玩左陣UNO又再有人黎到，要出去迎接，
但係佢地行左第二條路，又再白行一趟…
跟住唔知點樣就hea到晚飯時間~

今晚晚餐又係腸仔炒蛋公仔麵，食飽飽就行下坐下睇下電視，
跟住入左間房班人就響度玩掟被，掟到爆左燈座，燈膽都甩埋出黎，
結果呢間房就只可以用黎做睡房，唯有出去睇人繼續打機囉…
去到兩點有深宵靚湯飲，三點又有牛+豬扒食，正~
跟住hea到3.幾終於睡魔急call，不支倒地…

↓呢張都係31號影o既…因為今日亦都冇影過相…

7月31日

只係訓左一粒鐘就醒左，一路睇人玩biohazard，都唔想再訓番…
跟住吽下吽下發覺已經天光，就出去影下相同睇下日出…
5.幾踢住拖響郊外呼吸住新鮮o既空氣，感覺實在太舒服~
不過今日個景麻麻靚o者，而且等極都冇日出…
返到去冇耐就到香港早晨時間，睇見個開場白就令我諗起放榜果日…

成晚好似得3個人通到頂，一個係咁打機，兩個就係咁影相，
去到7點幾大家都仲訓緊，我睇睇下電視都頂唔順，
響個麻雀檯度洽著左，不過都只係斷斷續續咁訓…
等到10點幾大家終於陸續起身，有早餐食啦~
今餐終於唔係公仔麵喇…係腸仔炒蛋米粉！
食飽飽就要收錢執野交房走人…3日2夜之旅正式結束！

行去巴士站等車返東涌，響烈日暴曬下，
D汗一滴一滴咁流落地，冇中暑已經算好彩…
等左半粒鐘終於有架吉車黎左，架車行兩個站已經full哂…
我響架車度話咁快就訓著左，o岩o岩到總站先醒…
然後轉地鐵返屋企…即刻開罐汽水飲，同埋沖涼！
跟住梗係急不及待上網…然後大訓特訓！

今次呢個網友camp算唔錯啦，起碼天氣非常之好，
而且總共有14個人參加，完全超乎我想像之外呀~
不過有度唔係咁好就係有D人乜都呻一餐囉…
去camp都係為左玩咋嘛…成日嫌呢樣嫌果樣…留響屋企好過啦…
休息返兩日就再有班會camp，希望到時可以玩得再開心d啦~

2001 6 7 8 9 10 11 12 月

2002 1 2 3 4 5 6 7 8 9 10 11 12 月

2003 1 2 3 4 5 6 7 8 9 10 11 12 月

2004 1 2 3 4 5 6 7 8 9 10 11 12 月

2005 1 2 3 4 5 6 7 8 9 10 11 12 月

2006 1 2 3 4 5 6 7 8 9 10 11 12 月

2007 1 2 3 4 5 6 7 8 9 10 11 12 月

2001						6	7	8	9	10	11	12	月
2002	1	2	3	4	5	6	7	8	9	10	11	12	月
2003	1	2	3	4	5	6	7	8	9	10	11	12	月
2004	1	2	3	4	5	6	7	8	9	10	11	12	月
2005	1	2	3	4	5	6	7	8	9	10	11	12	月
2006	1	2	3	4	5	6	7	8	9	10	11	12	月
2007	1	2	3	4	5	6	7	8	9	10	11	12	月