| 回歸五週年…對於我黎講意義唔算好大… 不過呢日亦都代表2002年已經過左一半， 上半年都算總不過不失，下半年…過埋18歲前最後一個暑假之後 就要全力準備AL…輕鬆埋呢兩個月啦… 朝早優閒地上下網，下晝就出去同網友睇煙花， 佢地打算霸個最佳位置黎影相，所以一早就約定好哂， 買左D飲品之後就去尖沙咀海傍…去到已經有大堆攝影發燒友坐陣， 我地一行11人搵左個空位就攝入去，搞左一輪之後就開始搵野做， 又玩下UNO、啤牌，睇下報紙，影下相咁， 不知不覺間已經過左三粒鐘…天色開始黑喇， 慢慢個個就企哂響身，準備觀賞煙花喇~ 8.正，煙花就開始發放，「嘩~~」大家一開始都係咁嗌， 不過過左幾分鐘已經冇乜mood嗌喇， 今年D煙花都係同以前差唔多，唔係好多特色， 不過企到咁前睇以前都未試過，真係好震撼~~ 睇完就去食飯，不過一路行都搵唔到食肆， 結果行到去佐敦先搵到間冇乜人o既大快活， 不過佢效率奇差，間野夠鐘打佯都仲未整好哂D野食， 最後等齊大家食完返到屋企已經11.幾… |
| 試後活動今日正式開始…以前校方都會安排D活動畀我地參加， 今年就真係唔知做咩好…好彩今日有買賣舊書，我係負責幹事之一， 要係咁記低D舊書資料，搞左我兩粒鐘，間唔中出去吞下pok、行下咁， 轉眼間就11.，時間過得真係快~ 去美心食左午飯之後(兩日內已經去勻三間主要快餐店~)， 就搭地鐵去hkspeed office~都有幾個月冇去過…好彩仲記得路… 今次番去主要係睇下近期業務運作，上到去見到擺設唔同左， 仲有幾個新面孔…原來今日有成五個人響度工作，規模都唔細下… 傾下D server野之後就傾新project…之前o個單都未完又有新野做， 今次呢單睇黎仲煩…係一個fashion網站(?)，有好多濕碎野要整… 我仲話可以10號前搞掂…睇黎呢幾日都係冇乜其他節目架喇… office四部機都畀人用哂，我坐響梳化都冇乜好做，hea到3.幾就走喇， 返到去準備開始寫個project，不過淨係裝番個office都搞左兩個鐘… 今日進度大概係8%啦… |
| 今日返到學校冇乜節目，都係一直同人搭訕， 然後見到hall有個小型展覽就去睇下，其實係想歎下冷氣~ 跟住慢慢有近半班人走哂入hall，大家圍哂圈響度玩拍七同吹水… 終於都好辛苦咁捱左呢三個鐘… 約左同學放左學去唱K，不過其中一個要開會， 為左等埋佢，結果我地又要諗辦法捱多幾粒鐘… 以極慢速度食完午飯後就以極慢速度行下商場， 再以極慢速度去三聯睇書，終身都順利過左呢幾個鐘~ 原本打算去綠盒，不過勁多人，結果移左去neway， 今次唱左三個幾鐘，不過飛歌飛得好快，結果唱到冇歌好唱咁滯… 全日都冇乜野做過，諗住夜晚專心寫下份project， 不過進度仍然係頗慢，聽日放左學要趕快回家寫喇~ 細佬今日開始一連四日去廣州軍訓，屋企即刻靜哂… |
| 今日學校有排球比賽，我就當然冇份打啦，不過畀人捉左去做啦啦隊… 打左鐘就跟大隊落下面排隊，然後成班人好似去旅行咁行過去蕙荃， 跟住就搵位坐，然後就開始打氣…都係間唔中嗌下加油之類… 原本諗住可以歎下冷氣真係正，點知越黎越凍，成個身縮埋一舊… 學校只係book左個場兩粒鐘，但夠鐘都仲未打完， 我趕住回家吃飯，唔理咁多…走先喇… 下晝打算響屋企專心咁寫下份project，不過食飽飯好眼訓…訓左個晏覺， 跟住又響度搞D歌…因為部機剛剛可以出番聲，之前裝好xp後都聽唔到歌… 不過今日進度算OK啦，累積黎講係完成左40%~ 晏晝有個電話打黎搵我，原來係和記通知我可以做暑期工喇~(詳情) 即係除左歐洲之旅之外，其他暑期活動全部可以順利進行~~yeah~~ |
| 今日捧左幾本書返學校睇下賣唔賣得出，結果只係賣左本$30 o既中文書， 不過下個禮拜二都仲有得賣，即管睇下仲有冇機會~ 朝早幫手搞下買賣舊書，突然見到出面勁熱鬧， 原來係學生會搞緊活動，我自己都冇乜野可以幫到手，就出去吞下pok~ 呢個活動係畀F.4同F.6人自願參加，由於大家都冇野做，所以反應都唔錯下… 全部人分成十幾組，然後做D高難度動作，所以要有聖約翰坐陣… 最尾個動作最高難度，要搵個人企上張檯度向後跳落黎， 然後有堆人用手托住個人…我見幾得意就試下， 初初諗住冇乜難度，不過原來準備跳時係勁驚， 結果成個身曲哂，D人差D托我唔住，我仲有D骨折o既感覺… 初頭諗住吞pok吞幾個字就算，不過越玩越過癮，結果玩左個幾鐘… 不過唔緊要啦，橫掂買賣舊書o個度都已經夠人手… 玩完就幫人影下相，然後hea下咁就放學， 不過突然有人提我有個JUPAS講座，午飯時間頓失預算… 個講座首先播帶解釋下JUPAS o既運作，不過睇完都係唔明… 然後阿Sir補充番D野，跟住就有舊生講解下讀唔同科要注意o既事項… 咁我就當然去搵讀compu o既舊生啦，佢地都講得幾詳盡， 不過講完我就更加諗唔到大學揀咩科同邊間好， compu science? compu eng? 港大? 中大? 科大?…… 都係過左個暑假先諗喇… 個talk完左之後有人問我玩唔玩乘風航? 開學o個陣都已經心郁郁諗住玩，不過最後都係冇報名…有D失望咁… 估唔到突然有位淨，就即刻畀錢參加~ 不過返到屋企睇下…原來我D暑期活動已經編得太密， 7月只係淨番4日冇節目…救命呀… 下晝繼續開工寫project，今日已經累積完成左近70%， 淨番o個部分要等部server搞掂先整到，所以夜晚可以休息下， 睇下D好耐未睇過o既網站~ |
| 噚晚畀人邀請左返學校幫手搞drama D野， 所以今朝都幾早起身，上番陣網就出門了~ 首先去M記食左個奄列豬柳堡~都唔錯，但勁油… 然後準時返到學校…不過得小貓三四隻，一個二個都遲哂到… 結果負責miss係最遲o個個…等我地要吽響地下等…熱到… 不過上到hall就可以歎冷氣，正啦~ 解釋下個drama先，話說本校由上年開始搞個大型drama， 反應唔錯，於是今年繼續搞，下個禮拜二就上映喇~ 我都曾經面試做演員，不過失敗左… miss曾經聯絡我整字幕，不過最後又冇左件事… 今日都終於可以為呢個drama出番少少力… 今日o既工作係幫手整好個佈景同埋宣傳品， 我就首先幫手為棵樹補番好D色，然後就整場刊， 雖然我art都幾差，但油樹都唔係好高難度… 不過場刊就真係煩…又要[界]又要摺又要排版又要釘… 因為要整千幾份，結果成十個人整都整左成日… 期間又係去M記食…食左個咖哩雞翼餐…冇乜咖哩味…失望… 不知不覺間已經做到成7.，要趕住回家食飯，唯有失陪先~ |
| 禮拜日通常都冇乜節目，今日都唔例外， 朝早起左身之後唔知有咩好做，係咁上網直至午飯時間… 下午就搬wic…原本部舊server就黎壽終正寢喇，所以要搬去新server… 搞掂就去作文…考完試都要做功課，認真[才羅]命… 不過已經成兩個月冇做過功課，都冇乜心機做…作作下訓著左… 夜晚出長沙灣，去番7個月前去過o既幸X樓打邊爐~ 重臨舊地，真係好懷念下…隔左咁耐個鋪排都仍然係一樣， 所以要拎野食完全唔使搵，好快就填飽個肚~ 食飽左就係搭巴士走，都等左幾個字先有車，都好彩可以10.前返到屋企， 然後繼續作文…今次作得好慢…執筆寫日記時都仲爭百幾字… |
| 今日係最後一日無意義回校日，一返到課室已經見到一堆人響度玩UNO… 我都玩左好耐…玩到悶就落去行下…見到hall有個講座，就入去坐下， 係幾個bio group的同學負責講，仲要用英文…不過我都只係貪hall有冷氣~~ 個talk完左又繼續玩UNO，不知不覺中就放學喇，yeah~~ lunch全班為下年直上大學o既三位同學搞farewell， 今次訂左四檯，最後縮到得三檯~ 雖然大家都係最熟o既坐埋一齊，但呢個都已經冇乜所謂， 因為今日o既氣氛非常之好，仲有D感動場面出現~~~ 食到差唔多1.大家都飽哂，就埋單走喇~ 今日要去紅磡簽暑期工份約，順便去旺角交網友camp筆尾數~ 食完飯就直接搭地鐵出旺角先~去到竟然行錯出口，結果兜大圈… 不過唔緊要，時間仲好充裕，當係逛下街都好~ 去信和交左錢之後就搭巴士去紅磡~去到竟然行錯路，結果兜大圈… 不過唔緊要，時間仲好充裕，當係逛下街都好~ 雖然係咁行錯路，但走到上個和記人事資源部都仲有20分鐘… 諗住上到睇下得未，不過即刻畀人召返落去，叫我去行下先-_- 唯有慢慢行去M記飲杯野，再慢慢行返過去… 上到去已經見到成班人企左響度… 等左一陣，就有幾個職員帶哂我地一行20人落下一層， 然後等我地坐左陣就帶我地入左間課室度， 首先就收哂D身份證、存摺之類， 然後就叫我地填哂D個人資料同埋睇一堆守則… 跟住就派份合約，又要勁簽名… 最後就派工作詳情，竟然係響慈雲山某中學度工作… 睇黎都係幫呢間學校裝network啦… 去M記途中收到舊生會主席電話，叫我去搵下遊船河資料， 於是又要搭車走返去信和…結果問哂咁多間先走， 去到荃灣又miss左班車…返到屋企已經係6.幾… |
| 今日係學校一年一度盛事：音樂及戲劇匯演(官方名稱)， 仲係好特別咁返下晝同埋可以著便服，我地班趁呢日影班相， 所以全班(包括教我地班o既miss阿sir)著哂班衫返黎，超型~~ 表演開始之前仲有買賣舊書，要返去當值… 準時1.返到去已經見到課室人山人海，銷量一定唔錯啦~ 最後我賣到三本書，賺到百零蚊，呵呵~ 夠鐘就上返課室點名，然後排隊落hall，我地班同往常一樣坐尾二行， 弊，唔記得畀部相機細佬影相…都唔知影到乜… 唱完校歌，首先係西樂同結他演奏，然後係粵曲獻唱，勁呀！ 休息完返黎就到戲肉~籌備多月o既drama！ 一個個幾鐘o既drama真係要咁多準備工作，真係犀利~ 嗯，個drama都幾好睇丫，不過如果搵我整埋字幕就更好… 一有人唱歌就要睇場刊都幾麻煩… 完左之後就陸續散去，跟住就係影班相， 我唔知點解變成班相主管，要周圍搵同學同先生集合， 但最麻煩係drama工作人員一直響hall慶功中， 非工作人員又鼓譟，miss阿sir又嗌住要走…真係唔知顧得邊度… 跑左好多勻先搵哂咁多人，為左一張相真係辛苦到… 上年聖誕影過6B，今次著住班衫影7B， 唔知邊次靚D呢? 不過最衰今次唔齊人… |
| 今日係暑假前最後一日，亦即係結業頒獎典禮， 點左名之後就即刻落hall處理座位問題，我唔知點解被安排左兩個座位， D位又冇mark number，結果搞左一輪先可以坐低… 最後用左半個鐘所有人先坐低哂，然後好耐冇奏過o既國歌終於出場， 唱埋校歌就正式頒獎，今次破哂個人紀錄，拎左五個獎，包括： ．家教會欣賞大行動優異獎 X 2 ．好學生銀獎 ．嘉許狀 ．熱心服務獎 呢五個獎全部都係我響過去一年狂lap post得返黎o既成果， 所以比起以前拎o既獎更加有意義~(呢幾個獎以前從未拎過) 首先響同一場合內上台超過一次，而且今次仲要上四次， 真係覺得好刺激，好彩響台上面冇出醜… 不過D獎狀就搞到亂哂籠，要等頒獎禮完左之後先可以拎返o岩… 頒完獎就上課室派成績表，各科分數事前知道哂，所以都冇驚喜， 不過PE有C…勁呀！名次方面…除左phy比預期中略低之外，其他科都OK~ 整體黎講我都幾滿意今年o既表現，不過就似乎冇乜心機溫書， 暑假之後就要全力準備AL，希望到時可以加把勁~ 派完成績表冇乜野做，趁得閒就簽下送畀三位即將離別o既同學o既card， 不過都諗唔到有咩寫…唯有祝佢地畀心機讀書啦~ 落堂之後就開始勁忙，首先係要睇下有冇miss阿sir參加舊生會遊船河， 不過問左廿個都係得兩個表示有興趣，個個一聽到遊船河就耍手擰頭… 跟住就要問校長借幾個箱黎裝住哂舊生會locker D野，因為暑假要清locker… 最後就幫手執埋買賣舊書D手尾…我賣到成$90，成績算唔錯啦… 搞左個幾鐘終於完成所有事務，可以輕鬆回家食飯喇~ 之後就完成埋個project，今日deadline先搞掂… |
| 暑假第一日就輕鬆下先，約左網友出旺角唱K， 三個人三支咪唱兩個半鐘，加上點左勁多女仔歌， 簡直係唱到完全失聲，D歌全部嗌出黎… 唱完陪網友買野，途中收到細佬電話，話我部機開唔到， 於是買完野就立刻回家睇下乜事… 一開門就見到細佬成班friend響廳睇電視… 入房就見到部harddisk條電線斷左… 開機就聽到部harddisk有D怪聲… 點搞D怪聲仍然存在，唯有用住舊harddisk問下人乜事… 得到o既回覆係，部harddisk冇得救喇， 我走過隔離房，趴響張床度，一滴滴眼淚就流出黎… 到底點解會喊呢，原因如下： ．部harddisk買左12日就壞左，勁sai錢 ．影左幾個月的相同其他資料突然消失哂 ．冇問清楚人邊部harddisk好就貿貿然買左 ．平日唔keep好D野，結果買野張單同保用證都唔見左 上次喊係13個月前的事…今次打算痛快地喊一場， 不過情緒好快就平伏左…喊唔出… 食完飯之後陸續出現轉機… 原來我有backup到7月前的相…即係只係呢12日影D相消失左… 張單同保用證都搵得番… 不過我仍然對整番好部harddisk唔抱咩期望… |
| 未訓醒就有電話打黎，叫我下晝返公司… 我最初應承左人地返學校幫手搞活動， 不過噚日harddisk壞左，我獲准拎部野去整， 但而家又要改變行程，決定去左公司先再去整harddisk… 除左以上活動之外，夜晚仲有釣墨魚活動， 不過朝早覺得成個人好[支力]，食完飯後仲出現肚痾， 搞到返office都遲左…好驚夜晚會捱唔住… 我原本諗住返office只係講番個project D野就走得， 點知係要我即場寫番未完成o既script， 結果由2.幾寫到4.幾…趕唔切拎harddisk去整… 搭地鐵去鑽石山時間剛剛好~ 等齊人就搭92號往西貢，不過我地早到，吽左幾個字先可以上船… 其實呢次已經係我第二次釣墨魚，上次係隔離台氣象迷聚會， 今次就係學校bio club搞，不過差唔多變成班聚… 開船冇耐就開餐，今餐非常豐富，有生日蛋糕(有同學生日)、 西班牙海鮮Pizza、燒雞等等，食到飽飽隻船駛到去科大對開海面， 大家就開始釣墨魚~今次好快就有人釣到， 但我始終係同墨魚無緣…吽左兩粒鐘都釣唔到一條… 最終一行廿人大概釣到十條，可以整黎食，好味~~ 回程時個個都上哂船頂攤響度，可惜不能觀星… 大家無無聊聊又開始除人地隻襪… 我仲變成最大受害者…畀人「強暴」完仲影埋相…今次慘喇… 仲要今次我唔記得帶相機，淨係可以畀人玩…嗚嗚… 返到碼頭就搭極速小巴去到彩虹再轉極速小巴返荃灣， 然後一齊去食糖水，回到家時已經係12.半… |
| 朝早要拎部harddisk去整，所以9.就起左身，10.出門口去荔枝角~ 上到去…覺得間野好up dup下…我拎部野畀個職員， 佢寫左張單就叫我等電話通知…我望下牆上張紙， 上面寫住要維修六星期…咁咪即係放完暑假先整番好…? 搞掂部野就去旺角，準備wic第8次氣象迷聚會… 已經10個月冇搞過聚會，所以今次非常踴躍， 不過25個參加者全部都已經見過面，冇乜驚喜… 我早左半個鐘黎到，等左十分鐘先開始有人到， 然後陸陸續續就有人黎，由地鐵站行到創興時間剛剛好~ 今次活動形式係韓燒，我最驚就係一張超長檯坐哂咁多人， 所以book檯時叫佢安排下…不過最後竟然畀人坐左最正o既位， 要調去另一堆位…唯有將就下啦… 坐好就首先食左碟泡菜先，然後食左幾塊肉， 再食多碟泡菜就已經好飽，就開始同人搭訕… 今次聚會又衰在多小朋友，大家又響度狂影相…我都冇心情影… 不過好彩冇隔離台D人出現，如果唔係就失禮人… 除左有班人影相之外，個整體氣氛都唔錯，有一檯不斷講氣象~ 但我今次懶搞活動，如果唔係氣氛可能更好~ 大家差唔多食飽，開始收錢時，個肚就嘰哩咕嚕… 最終都係忍唔住跑去toilet，然後陸陸續續去左幾次… 結果都要勞煩其他人幫我收埋D錢…真失敗… 散band之後大家諗住搵個地方影大合照， 但我個肚又發作，唯有撤退…真係可惜… 約左舊生會幹事去佐敦book船準備遊船河活動， 我見我個肚咁樣，原本打算改第日… 但睇下個schedule…已經tun唔到時間…唯有死頂… 好彩搭地鐵期間都冇異樣…不過去左佐敦又要搵toilet… 去完toilet個幹事到左，就一齊走上去book船，好快就搞掂~ 然後就去大家樂飲杯野…我去左咁多次就黎虛脫，必須補充番D水… 而且間野隔離有toilet，方便不過~~ 跟住我要去網友甲屋企拎番D野，之後就玩下電腦咁， 結果坐左大半個鐘先依依不捨咁走… 網友甲月尾就過外國讀書，唔知仲有冇機會見面呢… 啊…噚日又痾今日又痾…聽日仲有班聚…唔知去唔去得… |
| 今日原本係非官方六乙踩單車兼五丁友晚餐聚會活動， 不過我咨詢過專業健康意見(即係我阿媽)之後， 決定唔去踩單車咯…都係響屋企休息下算… 午飯之後訓左陣晏覺，跟住落去飛髮…順便訓多陣覺… 然後就做下功課，差唔多夠鐘就出門口出席晚餐聚會~ 不過去到集合地點…只係得兩個人… 最後竟然得四個人一齊食…個個踩單車o個D都話太[支力]唔去… 等我仲著埋班衫出席…真係失望… 不過唔緊要啦，四個人食都唔錯啦~ 食完仲上左三聯睇左陣書先回家~ 今日終於都冇肚痾跡象，不過發覺隻手好[支力]， 應該係前晚釣墨魚隻手郁得太犀利… |
| 話說前排心血來潮報左名參加乘風航，今日就係上船o既大日子喇~ 一早就出發…首先買定D水同簡單午膳(手卷一個)，然後就去鐘樓集合… 主辦單位驚人遲到，結果等左成個鐘隻船先黎… 呢隻船上次睇煙花時已經見過，係一艘好有懷舊feel o既木船， 上到去首先係換衫剝鞋，跟住就由船長明哥同我地講下關於隻船o既資料， 我都順便簡介一下乘風航究竟係乜… 乘風航呢個名我好耐之前已經聽過，不過以前淨係知道係會迫人跳落水… 其實佢係一個非牟利團體，訓練參加者o既自信心、團隊精神之類… 所有上船o既人就要跟住明哥指示黎做(包括抹地)，否則會畀人掟落海… 講解完D資料之後就由教練man哥講下求生技巧， 然後教練忠哥就帶我地參觀下D設施，突然明哥號令全部人擔擔檯檯， 突然警鐘響起，要著哂救生衣，諗住可以跳落去玩下， 不過原來只係練下…轉眼隻船就去到東龍洲對開海面， 跟住就有半小時午飯時間，好快就食左件手卷，就趁時間影番夠本~~ 午飯後就一連串「訓練」活動，首先係玩鐘擺， 拎住個扶手飛出去然後轉身返上隻船， 聽落好似簡單，不過飛出去後腳下就係個海… 全部人順利玩完一次之後就提高難度，飛出去之後要放水… 雖然我都可以叫做識游水，不過跳水真係未試過，所以都咪話唔驚… 一跌落去好快就浮番上黎，因為D水勁鹹… 不過吞左啖水，D水又「也母」住對眼，都幾辛苦下… 最後係要飛出去轉埋身先放手，然後微笑之後拍兩下手…真係玩野… 落左兩次水之後就響警鐘，又即刻著哂救生衣， 跟住我地呢組就落船玩快艇，其餘幾組留番響船上唔知做乜… 上到去可以輪流試下控制下隻艇，都幾刺激下… 不過返到上船就仲刺激，只係見到個個企哂響個欄杆度行… 原來係要去第三層然後跳落去…聽落好得人驚， 但其實行上去o個下先最驚…一個唔小心就即跌落海… 上到第三層望一望個海就跳落去，成20米高都真係幾驚， 不過仲著住救生衣，即刻就浮番上黎啦，但都少不免吞左兩啖鹹水… 最後就係最刺激o既信心跳，每組輪流跳哂落水，下面冇人救， 要每組安排識游水o既人幫D唔識游水o既人上番船， 結果我被評為其中一個「幫人上船」o既人… 跟住仲要我地o個組跳先，變左我同校長同某同學係最先跳落去… 好彩我都順利浮上黎，不過人就幫唔到喇，個個都游到丫其實… 最後全船人一齊拉番個錨上船就完成所有訓練活動， 好簡單咁沖左個身就換衫，不過出番甲板要幫手抹地…-_- 然後大家輪流玩下個舵…傾下計咁…隻船好快又駛番入維港， 去到尖沙咀碼頭就輪流上船…呢個旅程就正式結束喇~ 初初諗住D活動勁得人驚，不過玩完又覺得幾好玩丫， 跳左四次水都好似唔夠喉咁，哈哈~ 我諗經過呢個乘風航之後都真係會大膽D卦… 解散之後我地一行三人行經某戲院，心血來潮就走入去睇《未來報告》， 之前聽人講幾好睇，我自己都覺得好精彩，尤其是D特技… 長得黎又唔悶，簡直高潮迭起，唔覺唔覺做左兩個幾鐘，結果又趕唔切食飯… |
| 之前報左個科大網上電腦course，今日就去科大做orientation， 一朝早起身約埋幾個去KFC食早餐…不知不覺食到過哂籠， 結果長途跋涉去到科大係遲左20分鐘… 走入去個演講廳已經去到Q&A時間…不過之前講o既野應該唔重要… 跟住就分組上lab，原來係前年科大camp時入過o既… 然後有人教大家點login部機同埋個教學system， 原來佢係要每個禮拜四必番科大，仲要番屋企聽書， 仲有兩次考試…等我以為呢個course好似D興趣班咁， 其實係同真實大學課程無異…仲要將15個禮拜o既課程縮到6個禮拜… 講完大堆資料之後就係午飯時間，行完一輪迷宮之後， 終於搵到間M記，食完就去圖書館上一陣網， 跟住下晝就開始tutorial，成班人走哂入演講廳， 個professor就開始講野…雖然係講電腦，但悶到不得了， 加上用英文進行，在場不少人士都進入夢鄉…我都訓左陣… 完左之後我話畀個professor知我12堂裡面有8堂出席唔到， 佢又問我邊間學校又叫我搵miss寫封信…都唔知做乜… 其實我當初只係當呢個活動係用黎響我得閒時充實下自己， 但佢地似乎expect我地將成個暑假獻畀呢個course， 不過我已經將呢個暑假o既節目排到密密麻麻， 搞到我突然有種想縮沙的感覺(呢個course所費不菲)… 完哂所有野之後就搭小巴去番地鐵站， 然後仲要返公司搞下project D野， 改完一大輪之後返屋企仲要改， 結果搞左成晚都未搞掂，我仲要同時搞舊生會遊船河D野， 又要執聽日camp D野，真係好耐未試過咁忙… 聽日至禮拜日我會去科大camp，我唔知寫唔寫到日記， 希望盡量寫到就寫啦…(不過今日實地試過…失敗…) |
| 今日係科大camp o既第一日，一朝早就起身開電視，竟然出左黃雨… 呢個係我第六次去camp，我印象中每次去親都係落雨， 仲有一次有黃雨，一次黑雨，點知今次都唔例外… 呢個CAMP係10個讀applied o既都有份去，我地響大窩口約齊哂之後， 就一齊搭地鐵去鑽石山然後轉巴士去科大… 噚日先去完科大，結果遲左20分鐘，今日預早左時間， 但最後都係要遲10分鐘… 去到首先要登記，拎左個folder，人名牌同兩件衫之後就 走左入個課室度放低行李，只見房內貼住group 1-12， 原來佢係要將百幾個參加者分組，但同一組就唔會有同校o既人… 放低D野之後就要即刻換左件衫，然後等埋其他人黎… 結果去到成11點先齊人，然後組爸組媽就出現， 跟住就帶我地出去坐響地下圍圈然後就玩燒炮仗遊戲， 即係順次序叫哂所有組員個名出黎，目的就係盡快令大家認哂所有人， 結果我都好快就記得哂12個組員o既名喇… 然後就入演講廳進行開幕禮，唔知點解竟然有無線黎採訪， 仲拎住部機四周影...唔知會唔會上鏡喇… 完左之後就到午飯時間，全部人一齊去LG7間canteen食中餐， 開始之前大會安排左D節目畀大家，然後D[食送]就陸續出現… 不過今餐真係非常之清茶淡飯，真係冇啖好食… 食完又玩超級無敵搵野食，跟住又全部上番演講廳聽個orientation， 即係有D professor介紹下自己個department， 不過今日介紹o個兩個department我都冇乜興趣， 加上座位非常舒適，結果好快就進入夢鄉… 完左之後就分批參觀各個department， 我就去industrial engineering & enginerring management， 首先去到一間LAB度睇住個人示範虛擬實境， 然後就再睇個自動運貨系統同部唔知咩機， 跟住就走去另一間房睇支萬用行山竹， 再去另一間房聽下有關物流o既介紹， 之後就終於可以上宿舍喇… 其實我兩年前已經去過科大camp，不過今次住o個度就遠D， 由教學大樓返宿舍需要15分鐘時間，認真[才羅]命… 放低D行李之後leader就帶大家參觀科大o既設施， 途中仲見到科大個氣象站，正呀! 行完一輪之後就到晚飯時間，然後就有個students' night節目， 大家要好似野外定向咁，根據提示去唔同check point， 然後做D變態o既task，仲要成組人拖哂手咁行… 結果跟住o個兩個幾鐘大家就瘋狂咁響科大範圍走黎走去， 其中一個task係要做掌上壓，真係[支力]到不得了… 玩完呢個遊戲之後就返房沖涼，然後就響某間房集合， 開始講鬼故同估故事時間，一講就講到3.幾， 然後組爸組媽又帶大家參觀科大景點， 一行山幾人夜媽媽行到個亭度吹水，真係搞野… 結果5.幾先返宿舍訓覺，個天已經開始光喇… |
| 差唔多8.就畀太陽曬到醒左，洗完面就落去上左陣網， 然後就去大家樂食早餐，跟住又去聽talk， 不過今日係講compu野，所以都冇咁眼訓… 跟住就上computer science個lab，睇下D電腦特技示範， 晏晝就去美心飲茶，不過今餐就正過噚日o個餐好多喇… 食飽之後就有幾個鐘o既sports activity時間， 我都諗唔到有咩好做，打算去游下水… 不過我當初見天文台預測日日都落大雨，所以都帶泳褲， 結果求其著住條短褲就去游… 去到有兩個救生員，但只係得五個人去游，真係誇張… 游左9個字就已經好[支力]，跟住就返房抖抖然後去聽個簡介會， 介紹下呢個camp o既重頭戲－火箭設計比賽， 然後我地組又集合同拎D衫去洗… 晚飯就叫[食送]食飯，叫左11碟[食送]黎食，真係好正~ 食飽之後hEA左一陣就係LG2之旅… 傳聞話當年起科大o個陣，起到LG2呢層就死左幾個人， 結果就冇再起落去，於是科大就冇LG2呢層， 只係淨番一條黑暗o既通道… 我地行入LG4某個男廁，然後就見到個女更衣室， 跟住就會去到條黑暗o既樓梯，然後大家就摸黑咁行， 結果用左幾分鐘就行左出黎，都冇乜特別… 又hEA左一陣之後就集體潛逃去西貢滿記食糖水， 分開搭幾架的士，轉眼就去到西貢， 幾廿人就迫哂響間房仔裡面，食完糖水又玩下遊戲咁， 搞到12.幾先食完，然後搭小巴返科大， 沖完涼就集合玩遊戲，不過今日竟然玩橋牌， 睇住大家玩左好耐都完全唔知點玩， 結果悶得滯…唯有失陪先…所以今晚3.幾就訓左… |
| 今日已經係科大camp o既第三日，朝早行程同噚日一樣， 不過今次係去electrical engineering個department， 去到一開始就教大家點整個火箭倒數發射系統， 其實都係好似phy D實驗咁駁下個circuit， 結果駁左兩個鐘都終於搞完… 午飯後驚覺相機冇電，要返宿舍拎番D電， 結果一來一回用左半粒鐘，真係浪費時間… 然後就去一個lab度準備砌火箭，拎左D材料之後就左度右度， 又搵個program黎模擬下支火箭點飛， 不過我都唔知大家響度搞乜，真係無奈… 搞完支火箭就hEA左陣，然後就到晚飯時間， 今晚呢個係傑出青年協會搞o既一個晚宴， 大家著得靚一靚咁去到間高級中式食府， 聽完幾個傑青致詞之後就開餐，呢餐簡直係成個camp最正o既一餐~ 食飽之後就由傑出青年協會會長同大家講talk， 我初初諗住連續兩晚唔夠訓，今次一定訓到不得了， 點知個會長講D野非常有趣，結果都不知幾精神~ 原本聽完個talk之後有個觀星活動，不過因為多雲而取消了… 跟住大家就返房開始整火箭… 不過我地組整整下又開始悶起上黎， 於是組爸組媽就教大家跳下campfire，即係一堆人圍住圈跳下舞咁， 一跳就跳到3.幾，[支力]到七彩… 但跟住仲要繼續整火箭，結果整到5.幾都終於完成兩支火箭， 可以去訓覺喇… |
| 朝早同番同噚日同一個地方食早餐， 然後就上lab為火箭倒數發射系統作最後準備， 之後返宿舍hEA左好耐之後先去食飯， 又係去返同噚日同一個地方飲茶… 大概等到3.幾就去sports hall出席個火箭設計比賽， 首先係影相時間，然後就由各組派代表出黎介紹下支火箭， 我o個組就竟然由我出去介紹，我作左個無厘頭故事出黎， 但人地就講得勁有意義，搞到我想作過D野黎講， 不過時間已經無多，唯有將準備過D稿講哂出黎， 好彩講o個陣都冇窒到… 個比賽分兩個部分，第一部分係鬥射得準， 我地o個組爭少少先中目標，真係慘… 射哂咁多支火箭之後就移到草地進行第二部分－鬥射得遠， 我地o個組都唔算射得好遠…中間位置左右啦… 個比賽去到成7.先完，然後就去食飯， 今餐有一大碟椒鹽蝦，我食左15隻，食到失聲… 食完就返宿舍換衫準備出席dancing ball… 話就話係ball，其實係disco party， 首先又係跳一輪campfire，然後就勁歌熱舞， 不過似乎大家都係唔識跳舞，都係亂咁跑，真係跑到人都癲… 個ball去到11.幾都未完，不過我地組有特備節目， 於是提早離開返宿舍，沖完涼就搭的士潛逃出科大， 呢個特備節目就係出旺角唱K~ 去到等左成半個鐘先有位，去到間房迫到… 一開始就唱到失聲，我諗係因為去ball時嗌左幾下… 期間去toilet時聽到出面有人嘔， 我諗住佢係響廁格裡面，點知洗手時發現佢響洗水盆度， 真係嘔心到死，嚇到即刻走返入房… 由2.唱到6.，已經差唔多完全出唔到聲… 一打開度門，一道勁臭o既氣味已經傳出黎， 成個地下污糟到不得了，即刻衝出去，好彩冇見到有人嘔緊… 落到去發覺已經天光，然後就搭小巴返科大， 返到宿舍都已經7.，可以訓兩個鐘… |
| 今日已經係最後一日camp，起身執埋D行李之後就去食早餐， 呢餐係最後一餐，但仲有好多coupon淨低， 大家都為左點樣用哂D coupon而感到好煩惱… 不過朝早冇乜野食，唯有叫D最貴o既野黎食… 食完就周圍去影相，然後就入演講廳出席閉幕禮， 首先係校長院長等人致詞，然後就係頒獎， 跟住仲有頒證書時間，我地組冇人出去…結果又係我出去… 最後就有大合照時間，百幾人堆埋一齊真係幾壯觀… 完左之後就有茶點時間，不過要同時招待黎睇閉幕禮o既家人， 又要搵班同學影相，仲要搵番D組員去食野，真係忙到冇時間食野… 影完相之後就一齊去cafe買Häagen-Dazs食，目的係用盡D coupon… 食完見出面有堆人排緊隊，原來係科大校長朱經武教授畫緊畫， 我都去排下隊…校長就響件衫上面寫左「祝 前程似錦」 同埋畫左隻豬… 跟住大家無無聊聊冇野做，組爸組媽就帶我地入個演講廳， 目的竟然係聽我唱歌…雖然我已經失哂聲， 但大家反應實在太熱烈，唯有唱盡佢…真係唱到人到癲… 唱完之後就約番去左參觀科大o既家人離開， 呢個五日四夜o既科大camp終於都結束喇~~ 呢次camp比我想像之中好玩得多， 雖然大會安排左好多節目，但都仲有好多自由活動時間， 所以呢五日都過得好充實~ 真係要衷心多謝組爸組媽呢幾日帶我地周圍玩~~ 同埋幾難得就係識到一班新朋友… 雖然頭兩日大家都好靜，冇乜野講， 不過到左最後都總算熟起黎，希望將來得閒可以約出黎見下面啦~ 搭巴士出番鑽石山之後就去pizza hut食左個下午茶， 之後家人打算行下商場，不過我已經[支力]到不得了， 行左陣就唯有搭車返荃灣，然後去淮揚飯店食晚飯… 食完就搭車返去，不過途中突然落暴雨， 但一行六人得兩把遮，結果個個都濕哂， 我o既科大校長朱經武教授親筆簽名仲化哂… 返到屋企上下網，搞下D相都已經11.幾， 沖完涼即刻訓覺…之前四晚夾埋訓得4粒鐘，今次可以訓番夠本啦~ |
| 訓到11.幾起身，然後開始補寫返D日記，結果寫到2.幾先寫完… 然後就開始上番科大course D lecture…好彩冇聽聽下訓著… 下晝細佬出完街返黎，講講下講到harddisk D野， 突然有個電話話我知部harddisk已經整好左， 響細佬催促之下，即刻搭車出去拎番部野然後返去裝番去， 終於食完飯就可以兩部機一齊上喇，正~~ 經過第一日o既students' night，第二日o既游水， 第三日o既campfire，第四日o既dancing ball同第五日o既"concert"之後， 成個人已經[支力]到不得了，抖左成日都未夠… |
| 朝早又要返科大聽tutorial…雖然成班同學都冇去， 但我已經去唔到D lab，如果連tutorial都唔去就真係sai錢… 所以食完飯就搭足個半鐘車為左去聽個professor講個半鐘野… 計下計下…原來呢8日內有7日踏足過科大，真係犀利~ 去完科大就要返hkspeed office，然後又搞個project， 結果hEA下hEA下…搞到8.幾先搞完， 肯定趕唔切返屋企食飯，就同班同事飛的去牛頭角食… 原來係去以前細個成日去o個條美食巷…真係勁懷念~~ 呢度個環境實在差到冇人有，不過似乎我都開始習慣了… 去到間滿記個伙記係咁ai我地入去…仲畀埋個九折同免費汽水， 我地勉為其難入左去…嗌左幾碟[食送]黎食， 真係幾好食，而且好飽…不過食左一堆炒蜆同椒鹽九肚魚之後， 個喉嚨越黎越唔舒服…聽日仲去BBQ… 食完就搭地鐵歸家…返到去仲要極速完成科大course D功課， 做得黎都已經12.幾…聽日去網友camp都仲未執野… |
| 去完科大camp抖左兩日後，今日又去個塘福兩日一夜camp， 今次係第一次同網友去camp，而且我仲係團長， 一早起身執齊野，10.幾就出發去東涌… 開頭諗住一齊食左飯先買野入塘福，點知最後得兩個人撐檯腳… 食完就去返地鐵站，等齊人就落百佳分三批行動， 分別去買燒烤用品同零食雜項，不過個個都玩野， 放哂D唔等使o既野落架車度，結果用足一個鐘先買哂所有野， 淨係零食雜項都已經買左張半米長o既單出黎… 買完野行番出去，見到出面突然滂沱大雨， 「我次次去親camp都落雨」呢句的確冇錯… 行到巴士站要極速衝過去，有遮都搞到成身濕哂… 我記得我過去一年只係去過大嶼山三次， 三次都係等巴士時落大雨，真係巧合… 等左成半個鐘先有車，此時已經陽光普照… 坐左大概半個鐘巴士終於去到塘福， 然後行過九曲十三彎o既小徑，終於去到間渡假屋~ 三房一廳800呎，設備都唔錯，同上次去貝澳都差唔多… 環境都算唔錯，不過衰在隔離有個草地，惹到成間屋都係蚊… 我為左夜晚BBQ，所以book左地下o個層， 大家去到就自然將D野放低哂，點知成半個鐘之後， 有另一批人走入黎話book左地下， 個負責人叫我畀張單佢睇下，佢指住個3字話原來我係book左三樓， 結果我地要捧哂D野上三樓，搞左幾個字… 呢個故事教訓我…下次收到D單要睇清楚所有字(包括冇意思o既數字)… 安頓哂之後大家就開始各式各樣o既活動， 打機o既打機，打牌o既打牌，鋤D o既鋤D，我就吽一陣先… 跟住我地無無聊聊就拎副UNO出黎玩?棉胎， 結果由6.幾玩到8.幾終於玩完，簡直玩到人都癲… 朝早11.幾食左碗麵…捱左9個鐘都已經好肚餓， 於是開始落去透爐，今次落完雨都算透得幾快，燒左兩張報紙就搞掂… 然後大家就拎野落黎開始燒喇~ 原本我一直都喉嚨唔舒服，不過實在太肚餓， 都唔理得咁多，結果燒到成11.先燒完… 大家燒左一陣就陸續上返去進行各項活動， 淨番幾個繼續留守爐邊，不過就唔係為左燒野食， 而係為左玩…將各種物件拎哂入個爐裡面燒， 結果玩到12.幾先玩完… |
| (續上日) 燒完野食之後，大家就上返去開始進行各項通宵活動， 我自己就玩左一陣闊別多年o既PS， 對上一次玩PS都已經係兩三年前o既事，真係勁懷念… 玩完PS就再玩?棉胎，今次都玩左成個鐘… 望下隻錶…已經4.幾，開始有D倦意， 此時我地o既大廚為大家準備左熱辣辣o既罐頭湯同出前一丁， 飲完湯食完麵之後當堂成個人醒哂~ 然後hEA左陣…望下出面原來已經天光，就計劃出去睇日出~ 當然都唔expect睇到D咩喇，都係志在影下相o者… 結果只係得三個人去，一出到馬路已經見到成班牛響度水落石出… 行左陣終於去到塘福海灘，然後就開始影相喇~ 影左一輪大家開始悶…就開始玩堆沙， 最後玩左個幾鐘先玩完，我玩到手腳浸哂水，衫褲都有沙… 返入間屋大概係7.幾，入到去好多人已經訓哂， 我地就開PS黎玩，玩玩下又拎D罐頭黎當早餐， 跟住大家陸續起身，我就冇野好做， 望住大家玩炸彈人，都洽左幾分鐘… 到左11.幾，都差唔多夠鐘退房，就陸續執野， 12.就準時check out，呢個網友camp就正式結束喇~ 今次呢個都唔可以叫做camp，兩日一夜實在太短， 希望快D有機會搞多次，起碼都要三日兩夜啦~~ 12.3去到巴士站，2.幾要去到科大上course， 由大嶼山南部去到西貢…唔預返兩個鐘都唔得， 所以見車出東涌就上車，然後轉地鐵再轉巴士， 沿途係完全進入睡眠狀態，好彩冇訓過站… 去完科大仲要返hkspeed，所以入到科大就拿拿聲交功課， 然後拿拿聲食個午餐，不過都已經搞左一粒鐘… 跟住又搭巴士轉地鐵去牛頭角，然後響office搞左一輪就歸家… 撞o岩繁忙時間冇位坐，結果企響度都訓得著， 轉車時響月台度都洽得著，爭D差錯腳…… |
| 去完兩個camp之後，身心都十分疲勞，所以今日訓番夠本， 結果12.半先起身，足足訓左12個鐘~ 今日基本上都冇乜野做，食完午飯就悠閒咁睇下雜誌， 同為天文台新增o既青衣同石崗氣象站改番D script， 仲有上下科大course D lecture，咁就過左個晏晝… 夜晚開始處理舊生會遊船河問題，發覺原來聽日開會但又冇人知道， 於是要打哂電話畀D幹事，然後仲要煩少人參加o既問題… 距離舉行日期淨番8日，但參加人數只係得十分一… 諗諗下…發覺自己甩哂D post之後就開始冇乜責任感， 呢個遊船河話哂我都係主辦者之一，但好似一直都冇做過D乜野咁， 尤其是響宣傳方面，大家係咁催我打電話我都冇打… 雖則我呢個幾禮拜都真係好忙，但相比返學o個陣都已經懶散左好多… 而家只係希望可以盡快揍夠人數，順利搞好個遊船河… |
| 今日同網友去尖沙咀唱K，約左其中一個響樓下等， 我自己遲左五分鐘，點知o個個網友仲遲…打電話又唔通，唯有出發先… 去到尖沙咀又遲左五分鐘，點知一個都未到，原來一個二個都遲到… 最後得一個到左…唯有唱住先… 自從上個禮拜開始個喉嚨已經開始唔妥，諗住噚日好番D， 點知依然係唱唔出聲，連男仔歌都唱唔掂，真係辛苦… 不過今日反而可以唱到4粒鐘咁耐…真係玩野… 唱完冇乜野做，5.半先夠鐘返荃灣開會， 於是大家無無聊聊咁由尖沙咀行去旺角， 然後入信和行左陣，去到D租渡假屋鋪頭又叫我入去問價， 佢地諗住下個月尾又搞網友camp，真係密得咁誇… 行完一輪就夠鐘返荃灣，去某M記出席舊生會會議， 今次集中討論遊船河事項… 去到見到D飯真係好想食，無奈屋企都差唔多夠鐘開飯… 夜晚無無聊聊望下月曆，原來呢個暑假已經過左1/3， 呢1/3都算過得好充實，又去左兩個camp， 不過就冇乜理過D功課…睇黎跟住o個1/3都開始要畀D心機喇… |
| 阿爸唔知點樣得到兩張MIIB免費戲飛，於是今日就同網友出去睇， 為左遷就番大家，決定響JP銅鑼灣睇~ (搭地鐵時在金鐘→灣仔首次見到隧道動畫廣告… 覺得好得意…最衰畀人遮住…) 會合後首先係去渣甸坊食晏…食勻成條街終於決定去某間上海野食， 我食左個牛腩麵(似乎同上海冇乜關係)，都幾好食~ 食完就去拎飛，然後仲有D時間，就兜左個商場一圈，再睇下電視， 跟住先入場…呢間戲院好闊，好彩唔係坐側邊位… 講下套戲先，我係冇睇上一集o既，估唔到原來係科幻成咁， 成套戲都係外星人…不過都真係幾好笑， 係衰在短得滯(連埋廣告都唔夠個半鐘)… 都係覺得未來報告好D…不過今次免費已經算好正啦~ 睇完戲都只係3.幾，然後6.半先夠鐘去葵芳食飯， 又冇理由返屋企，唯有周圍hEA… 首先行左陣百老匯，然後去皇室堡電腦商場， 跟住去埋HMV同百佳…100% window shopping… 除左響百佳買左盒墨魚丸黎食之外… ($5有3粒半真係幾抵…同埋幾好食) 食完就夠鐘同網友道別，然後搭地鐵去葵芳幸福樓打邊爐， 今次唔係任拎任食，而係任寫任食，唔使成日走去拎野食都唔錯o既… 結果又係同往常一樣狂擦牛肉同烏冬…勁飽… 食飽就搭小巴歸家啦…有M-Channel睇…睇到唔捨得落車… 返到屋企上網上到11.幾，然後瘋狂做功課，終於搞掂個閱讀理解… 聽日開始一連兩星期o既和記暑期工， 有人覺得人工太un，亦都有人覺得[才羅]個經驗學D野都好， anyway…我都希望呢兩個禮拜可以做得開開心心啦~ |
| 今日係第一日返暑期工，晨咁早就起身， 食完早餐就搭地鐵去黃大仙轉小巴去工作地點－聖文德書院~ 其實唔搭小巴仲好…轉兩個彎已經去到… 入到間學校四圍都已經有箭咀帶人入去MMLC， 去到明明仲有5分鐘時間，但已經點緊名… 點我名出到去除左拎工作證之外，仲獲得和記間尺一把… 點哂名之後就開始講書，每人拎住份ppt handout， 然後個engineer就係咁講D networking知識， 初初我諗住我都識架啦，點知一開始講就好深入下， 仲有位同學(即係同事)係咁舉手問D我完全不明所以o既問題， 我先知我D networking知識原來係咁貧乏… 雖然係咁講都幾辛苦下，不過講講下就有break， 仲有汽水橙汁任飲，都幾歎丫~ 講到12.左右就夠鐘食飯，今日阿sir請食飯喎~~ 不過出面勁大雨，同事們又冇帶夠遮，結果借遮都借左幾個字… 然後一行40人就冒雨行去就近o既敘福樓飲茶… 一開始幾驚成檯人戇居居無言咁食完餐晏， 好彩幾位和記本身D staff坐過黎，都有D計傾~ 食完就行返去間學校，然後就分組，準備黎緊幾日做project… 原來今個禮拜幾乎唔使返工咁滯，只係做資料搜集， 到禮拜五下晝先返學校做返個present… 分左組就黎個自我介紹，今次又要好似科大camp咁， 極速認識哂D組員，不過呢次一組得5個人o者… 跟住所有人就逐個企響身介紹自己，當然成40個同事就冇可能認到啦… 然後就分組參觀間學校o既server room，其實仲簡陋過本校， D server只係就咁擺響staff room隔離… 跟住就上番去「討論」，其實大家響度打機就真… 最後hEA到4.幾，大會宣佈放工！不過大家可以繼續傾下個project… 就響呢個時候突然有人召集科大course參加者， 原來同事當中都有幾個都參加左逢二四就要返科大o個個course， 於是就傾左一陣…傾傾下見自己o個組D人已經走哂，我都唯有走啦… 去到地鐵月台撞番個同組升F.5 o既同事，沿途都有傾有講，幾好丫~ 舊生會遊船河最新情況：校長個電話仍然係接唔通， 阿sir個電話就打得通，最初佢應承左， 後尾又打番黎話唔得，真係玩野… 然後email仍然冇收到申請表格…真慘… 今晚從阿媽手上接過一封阿爸寫畀我同細佬的信… 睇完之後，失望就當然有了…不過就冇覺得唔開心， 倒覺得好似有件事情解決左，個心反而安樂左… 而家最重要係希望財政方面冇問題啦… |
| 今日理應係要返暑期工，不過原來唔使日日返， 呢幾日要做資料搜集，準備禮拜五present， 於是今日就約左同組o既幾位同事去中央圖書館搵料… 朝早起身遲左半個鐘起身，不過都仲趕得切上返個網， 然後食埋早餐睇埋報紙先換衫，突然望下個鐘， 約左11.，而家已經10.半！我都唔知點解自己計錯哂D時間， 唯有即刻換衫出門口搭小巴搭荃灣線轉東涌線轉港島線… 去到已經係11.4…不過仍有人未到，唯有出發先… 今次係第二次黎中央，上次黎係半年前o既事~ 一入到去就直上9樓參考圖書館，然後開始搵資料~ 我係負責搵ADSL o既資料，搵完就要抄低，準備返屋企整powerpoint… 大家搵齊料之後就移去附近M記繼續傾野順便食晏， 傾到2.幾就解散各自返屋企~ 返到屋企o個幾個鐘都係上下網聽下歌咁， 諗住功課project留番夜晚先做，點知一到夜晚時間就唔夠用， 又掛住睇烈火，結果功課都冇乜點做到…又要拖多日喇… |
| 今日繼續去中央圖書館做project，不過禮拜三下晝先開， 所以響屋企食埋飯先出發…今次冇預錯時間啦… 今日係一齊整powerpoint，所以要搵人拎notebook， 不過此人要遲到，所以我地去到圖書館唯有吽陣先… 等齊人就開工，最初搞個上網搞極都唔掂，幾驚做唔到野… 不過原來係個插頭有問題，換左佢就可以做野喇… 響圖書館做project其實都好辛苦下，完全唔可以講野咁制， 連搬下張[木凳]都會畀人鬧，基本上我都只係睇住其他同事做… 結果做到3.幾終於搞掂，大家畀個冷氣吹左兩粒鐘，已經飢寒交迫， 於是就一齊行去食個下午茶，去左間介乎茶餐廳同快餐店的物體， 我又叫左個牛腩麵黎食，都幾正~ 其間有和記職員打黎問呢組工作進度，佢話個present會畀分， 然後出番張cert畀我地，叫我地認真D黎做， 睇黎呢兩日都要好好準備一下份稿… 返到屋企開始認真執起筆黎做功課了，都差唔多完成一樣， 不過太耐冇寫過字，似乎速度慢左…同埋D英文都運用得唔係咁好… 夜晚同舊生會幹事傾下遊船河件事，一開始都冇乜野， 然而我越說越激動，都唔知點解D人點解咁唔踴躍， 睇黎最後可能真係要搵埋D親朋戚友隔離鄰舍參加… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |