| 今朝11點幾先起身…之後成個下晝都好頹咁…搞過下d project咁囉… 不知不覺又4.幾，出去補習啦~ 第一次由屋企出發，其實車費同由中大出發一樣咁滯~ 補完返荃灣順便問人拎番借左n年o既windows XP碟…遲d裝落新機度~ 返到屋企繼續怒搞份project，做到近5點，簡直人都癲… |
| 今日入左屯門唱K…不過最衰唔夠訓，唱緊都冇乜精神咁… 個老細又竟然等我唱唱下打黎同我講一大輪野，真係掃興… 唱左3個半鐘，跟住就返屋企啦，響巴士度訓得好舒服~ 返到屋企有兩個幾鐘時間，就走去裝新機啦~ 搞到差唔多夠鐘出門口先搞得掂部機， 但最大問題係boot唔起舊harddisk個XP，都幾麻煩呀~ 夜晚出城大開首長會，又係傾賤唱果d野， 不過傾傾下講到話賤唱好難搞得成，然後提出搞千人宴， 傾完一輪又發覺唔夠人手搞，最終咩都搞唔到… 咁搞法好灰o者…傾咁耐個結論竟然係咁… 最後傾o既竟然係點樣同faculty d人講… 因為之前同左佢講話會搞賤唱，而家結果又搞成咁… 我地傾到canteen閂門都未傾完，結果一路行一路繼續傾， 仲企左響又一城度慢慢傾，成10點幾先返到屋企… 跟住又搞一輪ocamp野，然後就開始搞份project… 今晚癲架…做到我成6點，天都光哂啦… |
| 訓左4個鐘又要起身，因為晏晝要返中大開ocamp會… 補寫完日記、寫完議程、食埋晏，都夠鐘返去啦… 今次響文質堂開會…因為有個部員話果度有間會議室可以開會… 但去到先發覺間房鎖左唔入得，結果淨係響大堂傾…好彩都有開到冷氣~ 傾左差唔多兩個鐘…跟住等補習，諗住去賤build hea下， 點知撞到幾個CE同學，失驚無神就比佢地捉左去做gym… 我見橫掂都冇乜野做，咪去玩陣囉~ 不過我本身已經又眼訓又累，玩左半個鐘已經頂唔順， 返lab歎陣冷氣，跟住就去補習啦… 補完習去沙田，今晚細O組聚去食飯~不過唔係好多人黎左…得幾個CE組仔… 去諗食咩都諗左幾耐下…最後去左雪國，都食左我幾廿蚊… 食飽之後諗住去睇《明日之後》，不過得10點場，睇完都冇車返屋企啦… 結果hea左好耐都諗唔到仲可以做d乜，結果都要宣佈散水… 返到屋企先至9.幾，難得得閒呀~終於可以搞下部新機啦~ |
| 今日難得咩都唔使做，很好~梗係要訓番夠本先~ 點半鐘先食飯，睇都市閒情，又係禮拜五果個唱歌做戲比賽， 嘩，好心d人唔好走出黎獻世啦…你五音不全都唔緊要呀， 仲要入歌都入錯左，《下一站天后》咋喎，枉佢仲話唱K時去練… 都唔明點解呢個節目可以keep到咁耐，真係睇到我噴飯… 之後又搞下部新機，又搞下ocamp d野，咁就hea左個下晝… 跟住出城大開會…有個好無聊o既創舉…我連續四日去又一城啦… 今次係ocamp大會，最後都有近廿人去左o既， 呢次傾d野感覺上好d啦，總算好似上番個軌道… 食埋飯差唔多9點就返屋企啦，今晚都幾渣攤下~ |
| 今朝最堂一堂返中學補習啦…都好耐冇返過，之前都唔得閒，冇計啦~ 嘩，今次F.3得四丁友返左去，其他人話唔記得返去喎，是但囉… 有個o靚仔唔知點解懶係同我熟咁，成日係咁攬頭攬頸，真係滴哂汗… 今日除左講左一陣maths之外都冇做過d乜，真係一次比一次頹，算吧啦… anyway，今日終於出糧啦~6堂即係6舊水…之後補習同intern又出糧，正~ 仲無啦啦有隻大頭狗公仔當紀念品，仲有校長請食飯，都幾so~ 等緊校長就落左1樓，見到班F.5響度搞緊mock放榜，好似幾好玩~ 行行下撞到個熟miss，即刻坐低吹下水先啦~ 除左傾近況，miss今日都講左樣野幾發人深省… 佢問「你心目中認為一個成功o既大學生應該係點樣架呢?」 讀左一年大學啦，真係從來冇諗過呢個問題喎又… 唔通做齊大學生必做果五件事(上莊住宿拍拖讀書兼職)就叫成功? 我都幾乎做齊啦…但我完全唔覺得自己成功喎又… 我自己諗，讀得又玩得，可以不斷向住自己目標進發，咁咪成功囉… 不過響大學一年，我似乎只係見到兩種人， 一種人係怒玩活動唔讀書，一種係怒讀書唔玩， miss問有冇見過U裡面有d成功人士值得我參考? 講真我又遇唔到… 唔係話我睇唔起身邊d人…但可能係我自己太忙太累啦… 就算身邊有勁人我都留意唔到，讀書勁就大把，那又如何呢… 講起上黎，我都好耐冇試過諗，或者同人傾d好深入、好認真o既話題啦… 哈，我仲以為，入到U會好多時間諗呢d野架添… 點知情況仲衰過中學，大家好似變成一係淨係識得玩，一係淨係識得讀書o既空殼， 大家都唔知，或者冇諗過自己搞緊乜，讀緊乜，玩緊乜，做緊乜… 反而淨係識得埋怨呢樣埋怨果樣，令我諗起甘迺迪果句： "Don't ask what the country can do for you; ask what you can do for the country." (將country改做中大/書院/學院/dept/系會…啦) 哈哈，發完up風啦，大家係咪睇到滴哂汗呢~(雖然唔知幾多人會睇) 講番今日啦…話說同miss吹完水之後就等埋個mock放榜完左先， 跟住同校長去飲茶囉…咦，乜間酒樓又改左名啦，真係神不知鬼不覺… 又同個校友會P傾個會d野，又係講冇乜人有心去搞個會囉… 算吧啦，我都睇化哂，呢個現象全世界都係咁架啦… 我諗緊有心搞野o既人(例如我)，到底仲有冇存在價值架呢… 飲完茶都2點啦，返到屋企又可以盡情渣攤，渣到夜晚，實在太爽啦~ 期間都係約過下開會囉…輔導部又多左幾個人(即係大組長)，約開會又麻煩d啦… 仲有一樣野係…訓晏覺！我都唔知幾耐冇訓過晏覺啦…不過今日訓好少咋… |
| 補習個細路就黎考試啦，所以今個禮拜開始要加堂，禮拜日朝早都要去補~ 禮拜六日都要早起身，都ok辛苦，不過為左搵兩餐，冇計啦… 今次講EPA，聽日測成幾廿版，每一版都要用中文講番，又解番d vocab， 兩個鐘不停咁講，口水都乾哂…補左兩個幾月，今次最唔頹啦… 今日又出糧啦，差唔多可以填番買電腦筆數啦~ 出到廳見到有個人同個家長傾緊野，原來係個細仔又搵多左個人幫佢補… 我一見到果個人就覺得好似響邊度見過咁，但諗極都諗唔到係邊度… 一齊走果陣傾左兩句，先醒起原來係之前一齊take PE排球…都幾有緣呀~ 之前上PE都冇乜點同佢講過野，今日講o既比以前咁多堂PE加埋o既仲多… 補完買埋飯返屋企，都成2點啦…原定下晝繼續搞project， 點知打比老細時佢都未訓哂，結果4點幾先開始做野，不過都做得好頹下呀… 夜晚同阿媽去唱k，well，我一個禮拜之內唱左3次啦~後日又去唱，死未！ 睇怕唱埋後日果次之後，都有一段時間唔會再去唱k啦… 唱到成10點幾返去，繼續趕工and趕工，聽日2點dead野， 不過今晚捱唔到啦，4點訓左，訓幾粒鐘幾朝繼續… |
| 訓左6個鐘，10點鐘就起身，繼續搞個project…晏晝2點deadline… 今朝屋企冇水，但冇人記得，結果冇儲到水，但又要煮飯食… 結果用左成桶清涼蒸餾水黎煮飯…我都係第一次食咁樣煮出黎o既飯… 食完飯繼續趕工，結果都係叫做勉強搞得到，未試過趕得咁緊要呀！ dead完仲要繼續debug，仲話要加新野，真係人都癲… 之後老細show個件野比個客睇，總算可以抖番陣先啦… 今日其餘時間都係渣攤，仲有閒情無啦啦走去細味隻nin9 2 5ive， 出左隻碟咁耐，而家先發覺原來裡面幾多歌都幾好聽喎~ 仲有時間打下mini game，終於可以過下d頹廢生活啦，哈~ 不過都總算有時間執好ocamp d野啦，之前擺到成床都係，超亂… 嗯…突然想再做d有意義d野…呢排好似唔係賺錢就使錢… 不過我d節目已經咁豐富啦(未計玩)，都應該冇乜時間做其他野啦… 原本話想學車、進修等等…而家我都唔敢搞住，廢事再搞忙自己啦… 其實我又玩大細O，又有份實習，應該滿足了吧? |
| 今朝又去唱K啦，呢次係同網友去唱，之前見到檯面有張coupon，咪用埋佢囉~ 不過要指明去旺角創興neway唱…冇所謂啦~唱4個幾鐘都係26蚊一個人，抵啦~ 唱完陪佢地行下商場睇下suit同袋，順便攝下時間等去補習… 其實我都想買袋…仲要買衫買褲，不過都冇睇o岩啦，遲d先算啦~ 考試期越黎越近，睇黎黎緊d補習都唔會再頹架啦… 今日係怒補geog，因為聽日測驗，兩個鐘都係咁講果幾課書… 最刺激係下個禮拜開始考試，要日日去補，我都唔知我抽唔抽到咁多時間… 不過如果抽到就真係唔錯，起碼可以搵番d快錢~ 夜晚去city開ocamp輔導部會，因為有部員蕩失路，所以遲左開始… 今次約埋幾個大組長黎開，都係講番佢地o既職責咁囉… 又搞到canteen閂門都未傾完，出到出面再坐低繼續傾，9.幾先散水… 返到屋企就怒搞ocamp野啦…要將d輔導員分組呀…都搞左成晚呀… 嗯…唔知點解響我勁忙o既時候，突然有d好耐冇聯絡o既中同搵我吹水呢… |
| 終於有人同我睇《明日之後》啦~今日有中同約我去睇，太好啦~ 今次係入東涌睇早場，所以都ok早就要起身… 原本預左唔少時間今朝要問老細野，點知佢又唔得閒，激死我… 咦，乜原來家陣睇早場咁平架，我都好耐冇睇過早場啦~ 套戲之前聽落去d意見都係好壞參半咁，我自己就覺得好鬼正喇~ 話哂都係講氣象野喎…d特技同個故事我都覺得幾好丫~ 睇完個個去左toilet，廁所隔離係匯豐，順便過去睇下戶口有幾多錢， 突然發覺無啦啦唔見左幾千蚊，即刻嚇到我死死下… 明明呢排都冇噤機，點解d錢不翼而飛…驚左一輪，先諗番起我之前買左電腦… 跟住去food court食午飯/下午茶，同埋怒吹水… 今次竟然主要係傾愛情問題，估唔到我地幾個都有咁多野發表… 其中有個同學成年都冇乜同佢傾過計，估唔到入左U一年成個人好似唔同哂咁… 令我又諗番起我小學果陣…浪費左唔少時間…都真係幾遺憾架… 不過都過左咁耐啦，而家最緊要係識得珍惜身邊o既所有野o者~ 而家…我都覺幾幸福呀~至少我都知身邊唔少朋友都幾重視我啦~ 不知不覺竟然吹左成3粒鐘，之後就去city開系會… 好驚今次唔夠人開呀，結果o岩o岩好夠法定人數，都算好彩… 開完會發覺把聲竟然拆哂咁，我就算講野大聲左d，都唔使咁誇張呀? 食完飯返屋企啦，今晚終於搵到老細，未來幾日都要開工啦~ |
| 今朝成11點先起身，hea左陣就開工啦~ 不過今日都做得好頹呀，都未到狀態… 3點幾就出去返中大一趟，原因竟然只係簽幾個名… 純粹係為左書院sponsor系會o既申請文件…唉…幾百蚊，有總好過冇o既… 跟住就順便去補習啦…嘩，今次先知個細路d maths好唔掂… 下個禮拜就考試，真係要嚴重地同佢惡補下啦… 食完出旺角，今晚老細請食飯，順便出糧~ 今次有3個人食，另一個都係幫個老細做野，不過唔係電腦果d野… 去稻香打邊爐，難得唔使等好耐就有位~ 老細唔知點解發左癲咁怒嗌野食，3個人都擺到成檯野食，飽到七彩… 期間佢地講左好多男人之間o既話題，仲越講越激… 睇黎我都冇辦法做到佢地果種人架啦…雖然佢地講d野我都接受到… 吹吹下吹到成11點先埋單走人，跟住去銀行過數啦~ 嗯…同我預算o既數目差唔多啦~終於cover哂買電腦條數啦~yeah~ 今晚返到屋企終於可以咩都唔使理，好好咁渣下攤啦~ |
| 嘩~今日又係全日吽響屋企開工啦，起身都11點， 差唔多1點開工，直踩到10點幾先至休息，雖然期間都一直懶洋洋咁… 都冇咩野發生啦，係晏晝有樣野好搞笑囉… 話說有個人打黎問我係咪參加左個java game比賽，我話係丫， 我幾個月之前的確係同幾個同學報左名，但最後因為太忙，結果咩都冇交到… 但呢個電話竟然係打黎通知我領獎，話恭喜我拎左冠軍！ 我已經講清楚話我冇交到任何野，但佢仲叫我抄低幾時去邊度拎獎… 最搞笑係我要問佢到底我寫左隻咩game出黎，佢又答到我果下先抵死… 我收左線之後正想話比我d同學聽呢單笑話，冇幾耐佢就打番黎話搞錯左~ |
| 今日都係好頹好頹…頹埋呢日就連續一個禮拜怒補習啦~到時就刺激… 難得冇節目又唔使開工，朝早就咩都唔做咁渣攤啦~ 晏晝返左中大in大O輔導員，都有一段時間冇返過去啦，好似好多地方都維修緊… 之前in人就in得多，今日終於比人in番轉頭啦…都有少少緊張添~ 呢度o既interview同我地果d型式好唔同，係幾個大組長一齊in幾個輔導員， 似傾計多過似面試…成個過程都係似傾計，不過期間我唔算講得多野… 最弊係要幾個人一齊諗個搞笑故事出黎，考急才呢d我個腦就一片空白架啦， 不過個輔導部部主係我中同，應該都唔會比人foul卦~哈~ 走果陣miss左校巴，又要行落去啦…突然間個天曬到死，好彩唔算太熱… 自己一個慢慢行落去，沿途諗起好多呢幾個月響中大唔同地方發生過o既野… 跟住過左海去阿爸度拎d野，之後先返屋企，夜晚繼續渣攤~ 嗯…我開始懷疑我係咪唔應該一晚訓8個鐘啦…今日成日都好眼訓… |
| 朝早又去補習啦…補完去到候車站o岩o岩miss左架專車，下一班要等半個鐘， 諗住搭小巴走算啦，點知都要等三四個字，仲要響太陽下曝曬… 如果係等專車，就可以響冷氣房歎報紙慢慢等啦… 返到屋企食完晏，以為要開工，點知老細成日都冇搵過我，結果又係頹頹的過… 望住出面個天色咁好，勁想去游水，於是乎真係去左游水！ 無啦啦就同阿姨兩個落樓下個泳池游，我都應該成年冇去過呢度游啦~ 嗯…自從上年last一堂PE之後就未游過水啦， 第一次真正學過游水之後去游水，感覺都幾好呀~ 不過唔知點解超凍…明明今日都應該有廿幾三十度… 游左大半個鐘，就因為太凍頂唔順而走啦… 夜晚渣左個漂亮o既攤，仲以為今日真係咩都唔使做， 結果老細12.幾先打黎搵我，又做野做到差唔多兩點啦… |
| 全日都係做野…起身冇耐打比老細，又話要搞番n年前做做下停左o既project， 我都用左唔少時間黎recall番之前做過d乜，好彩摷到張以前寫開o既notes… 原本諗住今日都可以幾輕鬆咁做，點知突然殺左份舊project，結果時間又趕番啦… 今日又要補習呢…之前諗住順便去銀行，之前出糧張支票寫漏野要加番… 估唔到果度咁熱鬧，等左成半個鐘先搞掂，結果遲哂到啦，不過唔緊要啦~ 聽日考中文喎，但個細路話中文都要補，唔係喇話? 結果呢兩個鐘都係用左黎睇聽日考果5課書… 後日英文+EPA，上學期佢仲要唔合格，聽日補習就刺激喇… 今晚繼續係開工，都唔明點解個老細可以咁長氣，咁多野講… 等到頸都長，終於等到14號啦…咩日子? 電話截數囉… 呢個月唔知點解發哂癲…半個月已經用左超過1000分鐘… 唯有淨番呢半個月死慳死抵，只係用左300分鐘，突左一兩分鐘咋~ |
| 今日又出去唱K啦~唱之前竟然走左去M記食早餐… 原本唔打算食，橫掂都係k lunch，餓都唔餓得幾耐o者~ 不過見到人地有得食，自己就忍唔住，結果買左個麥芝蛋飽，都唔錯丫~ 仲有久違o既薯餅，好懷念呀~一食就令我諗起唔知form幾o既冬天~ (爆瘡?唔理啦…我有幾可食薯餅o者? 應該話…我有幾可去M記o者…) 唱K就冇咩特別，係早cut歌囉又，仲有好多gap歌都未唱… 唱完仲有成3個鐘先補習，都唔知點消耗d時間好… 去到戲院話想睇《野蠻師姐》，但我睇得1粒鐘就要走，結果都冇睇到… 周圍逛左陣就返荃灣…結果去左飛髮~橫掂我呢幾日都要飛架啦~ 飛完仲勁無聊咁行左陣三聯，成功消耗哂呢幾個鐘~ 補習…用左接近兩個鐘，一次過讀哂近百版EPA書o既重點， 唔知個細路有冇可能吸收到呢…淨番三個字溫英文，都溫到d野o既~ 今晚唔知點解d時間過得超快，突然之間就好夜… 唉…最麻煩係系會諗住join科大踢波，但竟然冇人報名， 打電話又一個二個都唔聽電話，都浪費左我唔少時間… |
| 今日繼續工作同埋補習啦…都冇咩野好講…係一日之內教左3個幾鐘maths囉… 同補習個細路又講左兩個鐘，但期間佢成日掛住吹水， 結果教唔哂添，唯有等佢自己執生囉… 夜晚就教細佬amaths，佢聽日考啦，仲話好唔掂，我點都要幫佢一把架啦… 不過我原本應承今日成日都教佢，結果成日都要做野， 唯有夾硬抽個幾鐘時間極速同佢溫下啦…都係祝佢聽日好運啦… |
| 今日繼續工作同埋補習啦…都冇咩野好講… 嘩死啦…呢排好鬼悶喎…日記頹到第一句可以照copy添…撞鬼… 最衰比呢兩樣工作頂鬼住左，搞到忙又唔算忙，但玩又好似冇時間咁… 不過算啦…補習都補多三兩堂就完，份intern就唔知做到幾耐啦… 總之賺夠錢…之後去玩就玩得盡情d啦~ 而家最緊要諗下有咩想暑假玩，盡快要玩埋佢啦~ 一到7月就比一堆camp填滿哂個時間表，都好難抽時間玩其他野啦… |
| 颱風法妮黛襲港33周年，618水災32周年， TD618襲港4周年，同埋我部舊機壞左3周年…(照抄上年的) 哈~好無聊呀可…不過呢個日子真係好易記… 今日終於唔係淨係工作同補習啦~好野~雖然兩樣今日都要做… 不過做野就好少o者~執左兩個bug仔就夠~ 可能因為今日係禮拜五啦，個細路今日好頹好頹… 成日掛住訓覺睇報紙，都唔係太留心聽我講野… 算啦…禮拜日都要繼續講，到時佢唔敢再頹卦… 補完習等兩個鐘先響中大開ocamp會，隔左咁耐都唔知做乜好… 你話如果而家仲住緊宿，會係幾咁美妙呢~返宿訓陣都好丫~ 結果係上左lab玩icq兼歎下冷氣，仲要逆走小橋流水上去… 不過我老啦…行完之後對腳都軟哂咁… 今日個所謂大會都真係好「大」下…一張圓檯都差唔多夠坐哂… 開完會8.半，cc can都夠鐘接last order，好彩未收哂檔… 結果以優惠價買左好大碟飯，以後去cc can食晚飯都趁佢就收檔先好去~ 返到屋企10.幾，之後o既時間完全唔使做野，用哂黎渣攤，太幸福喇實在~ well…呢幾日o既日記應該係白寫架啦…事關domain過左期… 呢番話我都唔知同邊個講o既…是但啦… 我一早比錢renew左架喇，希望拿拿臨搞掂啦… |
| 今日咩都唔使做，好爽呀~可以暫時放低一切煩惱，感覺實在太好喇~ 不過遺憾o既就係冇節目…今日天氣咁好… 大部份時間都吽響屋企度過…算啦…休息下都好… 5點左右出佐敦…同阿媽去報團啦~7月尾去泰國~ 報團之前去左永安掃野食，d台灣美食似乎幾吸引喎~ 報完團去左睇眼鏡…我都差唔多係時候換啦~ 好耐冇驗過眼，又深左d啦…不過都唔緊要啦~ 我記得以前驗眼，好驚會深好多架… 以前真係深得好快…都驚有日會深到盲左架…哈哈~ 驗完眼就揀鏡框…我而家副框都用左幾年，係時候換埋佢啦… 我o既形象顧問(即係我細佬)強烈建議我戴膠框，我咪試下囉~ 不過我都似乎未太習慣，試左好多款都冇一款話好鍾意添… 冇計啦…我有8年冇戴過膠框，一時間都好難會睇得順眼… 揀左好耐先揀到一款，希望到時大家慢慢睇得順眼啦~ 同埋都唔好意思…揀眼鏡揀到要大家等咁耐… 搞掂都成8點，即刻去食飯啦…特登去左間酒樓，應該係幾好食卦~ 不過要響條街等位…仲要等成個鐘…有彩有帶本《中大四十年》~ 等到9點幾終於有得食啦~都幾正喎…不枉我地等左咁耐… 食飽飽飛亡命van返屋企啦…今晚繼續係渣攤，爽呀！ |
| 朝早又去補習啦，今次已經係尾二一次啦，就黎又有糧出啦~哈~ 補完有網友搵我食飯同試新DC，不過最衰勁耐先有車出又一城，累佢等好耐添… 食完飯出左附近一個公園試機，室內同室外簡直係天淵之別， 氣溫起碼相差十幾度…原來出左酷熱天氣警告，唔怪得啦… 玩左陣即刻返入去，仲去百佳逛左陣，仲試食左d牛扒同芝士蛋糕，都唔錯~ 之後返屋企，hea陣老細就打黎講黎緊o既工作… 今次一講就講左兩個幾鐘，簡直係折磨… 佢講果d又唔係全部都係廢話，大部份都係有用， 但一次過講哂就真係[才羅]我命…仲辛苦過聽書… 講左個半鐘我都開始訓著咁滯，佢一收線我即刻訓番覺先… 夜晚落樓下食飯，話哂今日都係父親節嘛…雖然對我黎講都係無意義… 點知酒樓有冷氣壞左，雖然又唔壞得哂，但原來都已經有唔少影響… 首先自己今晚胃口差左，d waiter服務態度又比以前差左d… 最刺激係某張檯有個男人突然發老脾，推lum哂檯上d野， 仲亂嗌一通，比佢d親人拉離現場先至平息件事… 食完去左阿姨度整部電腦，話print野好耐先print到出黎喎… 我都唔知點解，唯有跟疑難排解果d方法做啦… 搞左好耐，結果總算快番啦，跟住先返屋企~ (不過第日聽番話部printer結果都係慢番…算吧啦…) 今晚成晚都係d閃電同埋幾個夜鬼陪住我做野~ |
| 訓左3個鐘就起身出荃灣，純粹為左簽個名…又係搞系會資助d野… 跟住即刻返屋企繼續訓…12點幾先繼續起身… 今日其餘時間都係開工，效率好慢呀…成日都係做得果少少野… |
| 今朝一早起身去補習…終於到左最後一堂啦~ 嘩…訓得5個鐘，超辛苦…響地鐵度全程都訓哂… 今堂補o既科目都好滴汗下：compu同PE theory，冇錯，係PE… compu都還好d，雖然我F.1冇讀過compu，但都總唔會難到我o既… 但PE…我讀咁多年書都冇讀過theory，仲要得番幾個字， 果d英文我完全唔識點解，真係有本字典都冇用，結果都由佢自生自滅吧啦… 不過算啦，都最後一堂…出糧啦，yeah~~~ 返屋企hea左陣就落樓下飲茶，話哂今日都係端午節… 飲完返屋企即刻撻上床，訓左兩個幾鐘，超眼訓呀… 不過起左身好似仲辛苦，簡直日夜癲倒咁，吽左成個鐘先好番d… 夜晚繼續開工啦，原來我又做快左，可以拖慢d黎做啦~ |
| 晨咁早就起身啦，今日要返中大…因為聽日dept有個活動要搞，今日要返去brief下… 食左個麵就出門口，返到去時間o岩o岩好，但竟然已經係最早到， 你話我有咩辦法唔養成遲到o既習慣丫… dept上個禮拜先突然搵人幫手做helper，但CS搵到七八個，CE竟然得我一個… 聽完跟住做下d零碎野，又同班蒲緊lab o既CE人吹下水，跟住就返屋企啦… 6點幾又再出過去，約左中同去買船飛…過兩個禮拜同佢地去澳門~ 話說幾耐之前已經傾過話想去，不過果陣爆忙，今次再約…死都搵兩日出黎癲啦~ 去到南豐果堆旅行社就逐間去拎d單張黎價格，揀埋住邊間酒店， 點知揀左間最平去問，佢話未有7月o既價格，起碼過兩日先買到… 不過我地都唔算白行一趟o既…因為都已經約埋一齊食飯~ 首先行過圖書館就睇下有冇介紹澳門遊o既書先… 結果只係搵到一本，而且仲要大部份篇幅都係介紹香港… 跟住去愉景新城food court食飯，一人一碟飯之餘仲要加KCF同一碟[食送]，好飽~ 食飽仲坐響度怒吹水，一吹就吹左兩個鐘，打哂烊先走… 返到屋企11點幾，又做野啦，聽朝晨早又要起身，但都搞到3點先訓… |
| 訓左4個鐘又起身啦，今日要返中大幫手dept搞o既jupus o day… 唔知點解一年會搞咁多次呢d活動，不過今次就專係for jupas揀左CS/CE o既人黎睇囉… 朝早我係負責響火車站帶d人上車，仲要跟埋車上賤build， 首先就梗係睇下有幾多女仔先啦，我地而家估緊下年CE會唔會有女仔… 今日都幾多人黎喎，保守估計都有150人…梗係啦，有免費午餐食喎… 兜左幾轉終於載哂d人上去啦，我都上賤build睇下個briefing啦… 結果比人拉左去影相，但係我都好耐冇影過相啦，都影得幾差下… 個briefing都幾搞笑，個個professor都講到天花龍鳳，尤其是條片… 回想番我未入大學之前，都有憧憬過一個好理想o既大學生活… 雖然而家又唔係話好差，不過再聽番呢d briefing就真係覺得好搞笑~ 聽完briefing就到Q&A，都幾多人問問題架喎，搞到我好鬼肚餓… 去到12.半終於有得食啦，就帶班人行小橋流水去CC staff can食… 今餐真係盞鬼咯…我讀左中大咁耐都係第一次去呢間食咋，好靚o既一間酒樓~ d野食雖然唔見得特別好食，但係都幾掂下架啦… 食飯同下晝o既活動都係分組進行，食飯就同其中半組一齊食~ 期間就好似個組爸咁係咁介紹中大d野，簡直當左今日係ocamp咁… 同檯仲有個問題少女怒問野，不過佢已經一早揀定CS… 臨走果陣仲有兩個男仔含情默默咁對望，然後一齊入左廁所之後失左蹤… 我要特登走入廁所搵佢地，不過都搵唔到，由佢啦… 之後搭返車上賤build，開始個lab tour… 仲以為又係以前open day果d行貨，點知完全唔同，簡直耳目一新~ 有d地方我都未參觀過添呀…唔怪之得定個時間咁耐啦… 結果成個活動嚴重overrun左，去到4點幾先睇哂d野， 原本有個counselling環節(俗稱睇醫生)都取消埋啦… 之後仲要book房準備開會同搞活動，但係極多阻滯… 去左呢度話要去第度book，跟住去左果度又話間房做緊工程， 再唔係又話d房夜晚唔開，一係就間房太細，結果跑黎跑去都係咩都book唔到… 跟住就返屋企啦，今日行左成日，真係超累呀… 食完飯突然好多激氣野出現，搞到成個人都好躁添… 首先個無線電話突然壞鬼左，舊電一駁落個電話度就罄到差d著火… 跟住有個大組長又呻冇組媽，仲要即刻比個佢…我臨時臨急點嘔個女仔比佢呀… 之後老細又打黎話勁多野做錯，結果成晚都要爆忙咁寫d code， 做到3點都做得七七八八先一野攤上床訓… |
| 今日唔理三七廿一，訓盡佢先起身！訓到12點先起身，爽呀~ 不過跟住又要做野，怒debug，仲話趕時間， 晏都冇得我食，餓到成兩點幾先食第一餐… 之後繼續趕工，做到5點先收得…跟住搞埋d ocamp野就返中大開會啦… 哎呀…連續3日返中大啦…一係就唔返，一返就返得咁密o既… 開完會又諗住好似上個禮拜咁執d[食送]尾黎食， 點知今日晏得滯，個檔都收埋，冇得食…結果開完出左沙田食囉… 又話有間上海野好似幾唔錯，點知竟然唔識路，兜左好耐都去唔到… 結果都係去左KFC食…食完返到去10點幾啦… 夜晚又要繼續做野，不過係dum住黎做，做到場波踢完為止囉~ |
| 今日同中同去班主任cluhbouse，今次係第三次啦~上次去已經係成年之前啦… 朝早本來仲約埋睇《木馬屠城》，不過我實在太需要睡眠啦，所以都冇去到… 起身上網食飯，都已經夠鐘出門口啦… 青山公路竟然十年難得一見咁塞車，搞到遲左幾分鐘添… 不過都仲要等多陣先齊人，然後就搭49X入沙田啦~ 期間發現原來呢個網真係幾多人睇架喎，個個都問我個網做咩死左… 去到打比班主任，要響巴士站等一陣先，一路等果陣簡直熱到想死… 入到clubhouse有得玩羽毛球同壁球，原本冇人帶波同拍，好彩阿sir借到~ 因為有幾個同學夜晚先到，所以個場同時間個個都有份打， 我都差唔多non-stop咁打，好耐未試過咁體力勞動啦~不過都好爽~ 玩完之後就去左幫手買野啦，之前果兩次都冇幫過手，都冇乜經驗添… 不過原來大昌d野真係幾平，買左兩大箱野食+8pack飲品都唔使400蚊~ 跟住就捧住d野返燒烤場啦，然後就吹住水、影下相等開餐~ 嘩，今餐真係食到好飽，再加埋兩罐啤酒，搞到個肚漲哂，仲比人話肥左添… 今次除左玩之外，仲有另一個任務，就係同另一個阿sir farewell… 佢同我地班都幾熟架，不過就黎去澳洲移民啦… 佢今日都黎埋，所以我地都準備到禮物送比佢~ 送禮物果陣…以前成班都好團結o既感覺又返黎啦~ 之後就返荃灣，再一齊食埋糖水先走，返到屋企都過12點啦… 今日真係好正~好耐冇試過咁多中同一齊玩啦~ 雖然離開中學已經年幾，但大家感情始終都冇乜點變，幾好丫~ 希望以後年年都有d咁o既機會再聚埋一齊玩啦~ |
| 今日同網友去廈門灣游水，之前都掙扎緊去唔去好架，不過最後都係決定去囉… 執好野就拿拿臨出發啦，搭車去沙田再入西貢，已經消耗左個半鐘時間… 跟住去間茶餐廳食飯，再補給完就搭船入廈門灣啦~ 今次係我第二次去呢個號稱全港最靚o既泳灘－廈門灣(又稱半月灣)啦~ 上次已經介紹過呢度，今次唔再多講啦~ 去到換完衫，竟然蕩失路…搵左好耐先搵到自己個地盤… 曬左陣太陽先落水，不過實在熱得很…坐一陣都已經出哂汗… 哈哈！今次係真正學識游水之後第一次去海灘游水，游去浮台當然係easy job啦~ 不過有點兒無聊o既係去左兩次都係自己一個游去，個個都唔識游水喎… 其餘時間唔係曬太陽就係去淺水地方玩囉~ 游完4.幾就排隊沖身，個弱雞花曬沖極都沖唔走d沙，唉~ 跟住換衫又hea一輪就走啦…搭車又搭船，用左成2個鐘先返到荃灣… 夜晚去食元氣，行去到見到條龍打哂蛇餅， 好彩去到已經有專人排到一半，太好啦~ 今次簡直狀態大勇，一口氣已經食左n碟，好飽、好幸福呀~ 夜晚持續渣攤，放左兩日假，聽日繼續開工啦，加油~~ |
| 今日全日都好鬼渣攤呀…梗係啦~玩左兩日，要抖下啦~ 原本今日應該係開工o既，不過老細之前兩日飛走左， 但架機delay左，今日先返到香港，所以我就繼續放假，yeah~ 夜晚就出左去大O輔聚(輔導員聚會)啦，第一次去，好緊張~ 無聊一提，今日已經係連續第六日搭車去沙田啦… 去到除左大組長係中同之外，其他個個人都唔識… 原本個大組仲有三個中同，不過其中兩個唔黎，仲有一個夜d先到… 不過冇乜所謂啦，識下新朋友嘛~ 等齊人就去扒王食，大組長請食飯，太好啦~ 不過都唔好意思食太貴o既，都係幾廿蚊一個餐算啦~ 個大組裡面有一堆伯宿宿生會莊員，佢地本身都好熟下架啦… 幸好我都搭得下訕o既，呢班輔導員都幾好玩丫~希望快d混熟佢地啦~ 大家食完仲吹水吹到成11點先散band~ 返到屋企…仲要教細佬compu，佢聽日考，祝佢好運啦… |
| 呀！今日好鬼頹廢呀…好似訓得太多啦… 成日都足不出戶吽響屋企開工，仲要唔知點解一直都頭痛… 最慘係今日比件蒲公英搞到又焗又熱，屯門成37度添呀…救命… |
| 呀！今日仲頹廢過噚日呀…成日都足不出戶吽響屋企開工… 好彩冇再頭痛，亦都冇好似噚日咁焗咁熱啦… 不過今日有樣野值得一提，就係屋企終於有得睇亞視啦！！ 唔好笑…廳果部電視真係幾年冇得睇亞視啦…無線都收得好差… 話說幾年前裝過有線寬頻之後，電視接收就越黎越差，結果咩台都收唔好… 但今日有人黎整天線(之前都已經整過幾次)，終於搞掂個問題啦！ 簡直要整個亞視啟播儀式呀，實在太興奮喇~(雖然我不嬲連無線都勁少睇…) 仲要發現多幾個唔知乜野台，電視好多野睇呀~ |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |