| 今日係我第二次賣旗，好早就起身出門口， 呢次打算嘗試四圍走，首先響屋企樓下都賣左幾支， 跟住搭車出地鐵站繼續賣，由於人流唔錯， 所以都逗留左好耐，直至好多人都買哂或者拒絕買旗， 就再移師陣地去住宅區附近，D人剛剛出門口都未買旗… 最後慢慢行去荃灣廣場附近交貨，一路行都搵到人買~ 呢次有番經驗，所以技巧成熟左，雖然仍遭到好多人拒絕， 但今次成績都算唔錯，不過D銀仔重得滯，拎到我手都震埋，夜晚就勁痛… 而且今日都好熱下，成身都濕哂，搞掂之後去荃灣廣場坐左陣先走~ 賣完旗就仲有豐富節目，首先網友陪我出深水[土步]買駁電腦的線同lan card， 線就好快買到，但lan card行左商場成個圈都決定唔到買邊款， 太多選擇其實真係唔係咁好，最終求其買個平平地算… 買完野就搭地鐵去旺角陪網友睇DC，其間睇到我o個部已經跌到<$1000… 睇完就搭地鐵去灣仔睇個旅遊展，去到灣仔已經勁頸渴， 就用賣旗得番黎的M記免費贈券拎左杯可樂同件包， 可樂好快飲哂但個包就冇胃口食…最後都要暴殄天物… 個旅遊展比我想像中規模大，參觀人數亦都比我想像中多， 不過當然冇書展o個D咁誇啦，所以都行得好順， 亦都拎左唔少有用的資料返黎，不過我諗我都唔會點改個旅遊計劃喇， 如果要interview先慢慢刨熟D資料都未遲~ 行完個展對腳已經[支力]到唔郁得，就索性坐響地抖番陣， 坐坐下都坐到5.半，就分道揚鑣各自歸家了… 經過今日賣旗+市區半日遊之後，手又痛，腳又痹，仲衰過行完山/踩完單車… 不過由聽日開始就要閉關準備考試了，可以好好休養啦… 唔經唔覺，今日已經係呢個網開幕一周年， 亦即係話我已經寫左一年o既日記喇，可以keep到一年我都覺得自己幾好野， 希望未來一年可以寫得更好，更多人睇呢個日記啦~ |
| 朝早完成份phy的超級notes，跟住就落樓飲茶， 之後原本打算溫書準備考試，突然心血來潮走去駁機， 結果搞搞下用成兩個鐘先搞得掂，但上上下條線鬆左， 再整一大輪都未整得返好，整到食完飯都未得… 雖然我都唔係真係趕住上網，但我又唔想整唔好搞到心掛掛， 最後都係整唔到…結果成晚都冇溫過乜野… 夜晚order pizza食，諗住試個新o既八爪魚kawaii批， 結果等左成兩個鐘先送到黎，餓到不得了… 嗯…呢個批又係同twin pizza差唔多咁味，都冇乜話好唔好食… 不過個批冇乜人幫襯，今餐一人獨食五件了~ |
| 返到學校先記得今日係校內賣旗日，前日先賣完隻手都仲好痛… 拿拿臨拎個旗袋去向D同學賣，不過個個都話唔知有件咁o既事， 跟住宣佈又冇講，所以我都唔敢向唔識o既人賣…以為我呃錢… 最後賣得o個幾張，仲要畀阿Sir話左兩句… 上緊堂先記得今日最後兩堂係英文測驗， 不過英文根本都冇野可以溫，所以都冇乜所謂… 測之前個小息走左落去搵阿Sir，跑返上課室都未夠鐘， 但阿Sir已經企左響度，29個同學坐哂響度準備寫名… 唯有即刻拿拿聲收埋D野，極速準備個測驗… 今次份卷都幾淺，我用一半時間已經完成(早知唔使咁趕上去…) check左次卷之後就矇矇矓矓咁進入夢鄉，一訓就訓左幾個字~ 不過其實臨尾個個都已經訓哂， 阿Sir夠鐘都話「Time is up, stop sleeping...」 返到屋企見到亂七八糟先記得今日有人黎整浴缸… 因為個浴缸塞住哂，花曬又壞壞地，所以決定換企缸… 為左拆個浴缸出黎，D師傅要係咁鑽係咁鑽， 嘈到不得了唔在講，仲要成間屋震哂，隔離房D公仔都震跌落黎… 今晚沖涼要移去另一個廁所，原來o個個廁所好有酒店feel~ 食完午飯繼續試下駁番兩部機，不過又搞左好耐都搞唔掂， 真係好沮喪…有冇人可以救下我呀…? 搞唔掂就走去溫書，然後訓左成個鐘晏覺… 夜晚開始applied o既超級notes喇~ |
| 中六最後一堂空堂，都係以溫書黎度過… 其餘跟住幾堂都冇乜野發生，係不斷講考試D野， 大家就慢慢咁進入左考試狀態喇，我都要繼續畀心機喇~ 今日係六四事件十三周年，不過對我黎講就冇咩意義… 反而中國踢世界盃就比較留意，下晝睇住個網上即時更新， 佢最抵死係哥斯達黎加入第二球o個陣佢當左係中國入， 見到個比數1:1都諗住中國有番D料，原來係搞錯左… 夜晚溫好哂pure喇，applied超級notes都接近完成，進度大致良好~ |
| 今日有六堂空堂，頭兩堂阿sir畀我地溫書，跟住兩堂miss冇返， 之後兩堂phy堂阿sir就做實驗，跟住就自由活動… 結果我都基本上係用黎溫書，係中間捉左盤棋， 溫書期間我份超級notes畀眾人發現了，結果就傳到成班都知… 響大家o既壓力底下，結果我都係要公開哂自己o既心血… 不過是但啦，阿sir話全班考試平均分夠高就請哂我地食飯， 咁我都想大家一齊考好D o既，而家又唔係好競爭激烈… 最後兩堂係PE堂，第一堂係太極考試，嘩，我都有「B-」喎~ 第二堂基本上係自由活動，我臨落堂打左個網球飛左出學校外面， 要拿拿聲跑出去執，兜左好遠先去到，但搵極都搵唔到個波， 最後都係無功而回…趕返學校後熱到成身汗… 下晝開完interact club最後一次會， 去一間成日經過但從未去過食野o既麵檔食左個牛腩麵，嗯，都幾好食~ 跟住返去完成所有超級notes o既工作啦~~就繼續搞返駁機事宜… 搞左一輪終於搞掂啦！正當好興奮地準備上網之際， 發現竟然駁唔到和記…即係兩部機都上唔到網… 最後要斷左駁另一部機條線先上得返網…真係唔知點先可以兩部一齊上… |
| 諗住南海件低壓區已經增強為熱帶低氣壓， 朝早起身即開電視，乜都冇不特止，仲要根本未upgrade… 但呢個低壓區響朝早為本港帶來幾陣驟雨， 我平時日日都帶遮偏偏今日就冇帶， 一落車就照頭淋，急步行番學校都搞到個身幾濕下… 不知不覺間就已經到左中六o既最後一日， 話咁快就已經過左十個月，真係快樂不知時日過啊~ 原本諗住最後一日都有D野搞下，不過結果變成最悶的一日， 頭四堂都係溫書時間，今日我坐最尾一個位， 溫溫下就順勢挨埋牆訓著了… 然後phy堂係MC Quiz…事前有同學得到哂D問題同非官方答案， 我都「唔小心地」睇過份卷一次，不過答案就廢事記喇， 反正我都想睇下自己實力如何(但其實都要考完試先睇到…) 加埋最後兩堂中文，就代表中六生涯正式結束~~ 跟住我地就同個下年直入大學o既9A同學搞左個超小型farewell (其實連埋我都係得3個人而已)， 食完就再返學校同miss傾左一陣先返去， 返到去屋企鋪哂報紙，似乎個廁所越搞越大陣象… 今晚開始全力準備考試喇~ 希望final可以考得好好睇睇啦~ |
| 今日係staff development，所以放假~ 噚晚太夜訓，結果今日11.幾先起身， 午飯後就開始溫applied喇~ 不過全年o既syllabus好似都唔算好多， 慢慢黎溫都響一日內溫得哂，於是下晝無無聊聊咁睇下網頁， 又心血來潮咁搞搞wic，希望考完試可以盡快開新版本啦~ |
| 9.幾被廁所裝修的聲音嘈醒…唯有起身跟住上下網， 見今日幾得閒就寫下readme，相信日內有得睇喇… 下晝同夜晚繼續溫下applied，相信都溫得幾熟喇~ 食完飯上網睇下萬眾期待o既中國對巴西賽事， 雖然只係睇文字版本，但係都好刺激， 可惜都係冇奇蹟出現…不過唔係8:0咁誇張已經算唔錯喇… |
| 考試前夕，當然係吽響屋企溫書啦~ 朝早打算提早起身預備下，不過似乎早得滯，成日都昏昏欲睡… 食完午飯下定決心做兩份夾埋長達五小時的past paper， 初頭都做得好地地，不過跟住就開始唔識，慢慢就變成直接睇答案算數… 晏晝突然出現近期罕見o既滂沱大雨，心想呢次黃雨都應該有著落喇卦… 不過呢場雨落左半粒鐘已經停左，不過都好，廢事心散溫唔到書… 嗯…今日都寫到六行出黎，唔錯~ |
| 今朝落雨終於記得拎返把遮喇，不過D雨時大時細， 一大就大得非常交關，過緊馬路時聽到後面有人嗌「痴線咩?咁都唔出紅雨…」 不過事實上o個刻真係好大下，出現輕微水浸，我對鞋都裝哂水… 不過都未夠個同學誇張…濕到要買過對襪黎著… 今日考applied，雨勢就十足十會考amaths o個陣咁， 最驚好似會考咁畀條濕左o既褲影響自己表現… 好彩坐風扇位，好快就吹乾哂… 兩份卷夾埋五粒鐘，真係唔易捱… 第一份卷似乎幾難下，不過後尾o個卷算係好番少少， 但唔知點解個個都話第二份難D呢… 落到樓下見到班衫已經準備好，即刻拎番自己o個件黎著~ 嘩，真係好型下喎…真係期待班會活動時全班一齊著~ |
| 「轟隆!!!」一下極響的雷聲，就將我嘈醒了… 望下個鐘…五點幾…繼續訓…但接二連三的雷聲令我不能再入睡… 「鈴~~~」鬧鐘不知不覺間響起，出面天色都好黑， 即刻拎個電話去打，「天文台在上午6時25分發出 黃色暴雨警告…」，冇紅雨都好o既…今日唔返盞遲D要補考… 朝早雨勢都幾大下，又係對襪濕哂… 今日係響hall考，諗住開冷氣應該冇咁辛苦喇卦? 點知對襪一直都唔乾，畀冷氣吹到腳板凍僵哂… 仲要越黎越凍，好彩冇冷親… 今日考英文，首先係作文，lap下見到一題寫住「cyber」，即作！ 跟住係practical skill，見到title係「information tenology」， 真係開正我o個瓣，見到都忍唔住偷笑~ 兩份卷都大概有五分鐘時間淨，都算唔錯… 不過咁極速寫成千個英文字出黎…真係寫到手軟喇… 考完被召左出去，原來係miss推薦我去和記做暑期工， 全校搵兩個去做咋…梗係唔可以錯過機會… 不過都要睇下撞唔撞期先…7月29-8月9…剛好冇野做！ 再睇睇詳情…雖然得$1200，但又有野學又有得實習… 對我黎講已經唔錯喇，就決定參加~~ 但又要寫個人簡介…睇黎要遴選…暫時都唔知係咪真係有得做呢… |
| 今朝已經冇大雨，但原來對鞋一直濕左都仲未乾， 結果對襪仍然係濕o既…好辛苦… 今日考中文，又係響hall度考，返到學校極期待入去歎冷氣， 不過考完一份卷我已經急不及待走出去…實在太凍… 總共要考三份卷，考到最尾o個份已經好眼訓… 吹完水淨番成半個鐘，大家仍然係咁加紙猛咁寫， 我唯有夾埋加多幾句落去，寫完就不知不覺訓著… 一醒就全身發冷，考完即刻趕住走…好彩冇冷親… 聽日冇野考，可以休息一下，不過禮拜五要考pure， 都未可以鬆懈住啊…下晝訓左陣覺就開始溫書喇~ |
| 今日冇野考，所以放假一日，全日留響屋企溫書。 朝早9.已經起左身，上左陣網就開始溫埋D pure， 下晝就睇下D exercise同對番上學期份卷， 傻架…D方法咁刁鑽…唔冇數王級程度都相信好難會諗到點做… 不過點都好啦，希望聽日醒醒定定， 唔好咁緊張，唔好想去toilet，唔好重蹈上學期o既覆轍喇~~ 嗯，今日冇乜野講就講下廁所… 話說個廁所進行工程至今已經有10日， 而家都差唔多完工喇，簡直係耳目一新~ 下個禮拜一就有得用喇，屆時將會有剪綵儀式~~ 而家開始有D唔捨得另一個廁所喇…用左10日已經有感情… |
| 噚晚緊張到訓唔著…朝早好晏訓… 返到學校緊張程度不斷上升，為免做做下數時人有三急， 所以臨打鐘前先行去清一清先… 三個鐘o既考試轉眼就開始，不過淨係派答題紙都派左五分鐘… 為左不負眾望，今次pure我非合格不可！ 因為壓力咁大，加上我又冇乜信心， 所以我o既緊張指數一路繼續上升，導致大腸o既蠕動不斷加速， 做左十幾分鐘已經想去toilet，但又唔想浪費時間， 唯有死忍難忍，忍到成個人震哂… 等左幾分鐘又忍唔住，決定舉手投降…不過miss見唔到… 我唯有再死忍難忍，忍到數都做唔到… 等左幾分鐘又忍唔住…今次miss見到喇，一支箭衝左出去… 極速搞掂之後就衝返去繼續做… 轉眼間就已經過左三粒鐘，成個人已經吽哂， 不過今日o既節目只係過左一半，食完飯之後仲有下半場… 三個鐘又轉眼過去，收卷o個下即刻鬆哂~~ 不過經過六個鐘o既煎熬，我已經完全呆哂… 返到屋企就鬆一鬆，上網上足成晚~ |
| 今日係端午節…朝早拜下神…睇下龍舟咁…同過往差唔多… 下晝就開始溫physics…最後一科都要繼續努力喇~ 夜晚就過阿姨度BBQ~上次去已經係上年中秋o既事… 朝早到傍晚都只係食左隻雞脾，今晚可以慢慢歎番餐喇~ 食到飽飽都已經10.幾…再睇下電視咁， 返到屋企已經11.半…好耐未試過咁夜~ |
| 今日父親節，不過係見唔到父親o既… 成個朝早都係上網，然後下晝就一路睇電視一路溫physics~ 夜晚又落街食飯…悶悶o既禮拜日… |
| 買左新遮帶唔記得袋左佢，朝早一陣驟雨都搞到我幾狼狽… 考試進入第二星期~~其實已經係最後一個星期~~ 今日又係考英文，不過唔係好多野寫， 但係噚晚又訓唔著，今日好眼訓… 第一份卷做完check下卷時洽著，第二份listening又差D訓著… 結果返到屋企食完飯就溫下又訓下咁… 好喇，聽日就係最後一科，過埋科physics就可以盡情咁輕鬆下喇~~ |
| 今日係一個好值得紀念的日子， 包括係颱風法妮黛襲港31周年，618水災30周年， TD618襲港2周年，同埋我部舊機壞左1周年， 不過係冇特別紀念活動o既… 今日亦都係最後一日考試~~ 其實仲有兩日，不過唔使溫o既，所以搞掂埋呢科就可以鬆哂~~ 今日係physics，對於我黎講呢科響3科AL之中排中間， 不過勁多式要背，最衰阿sir又唔畀…記到我死咁滯… 兩份卷都只係兩個鐘，不過一開始又好緊張…好彩冇刺激到大腸蠕動… 話咁快就完左兩份卷，亦即係考試完左喇~~yeah!!一身鬆哂~~ 考完試當然要出去鬆下啦…所以噚日已經搵左網友去行下… 不過放學o個陣我同成堆同學一齊行落去， 但佢地成班走去wet，我就自己走返屋企先…好似好離群添… 嗯…下次同學們有咩節目記住call下我呀… 返屋企食完飯就出尖沙咀會合個網友， 基本上都只係四圍hea，去左九龍公園同海旁影下相咁， 又行哂成條加拿芬道搵間傳聞好正的墨魚丸(最後都搵唔到-_-)， 跟住仲過埋海行左陣…然後返到屋企www完就開飯…時間掌握得唔錯~ 差D唔記得聽日仲要返去考中文listening… 不過好彩可以遲兩個鐘起身~ |
| 今日考中文listening，10.先開考，可以訓晏D~ 不過成日驚死唔知醒，隔半個鐘就醒左， 訓多兩個鐘其實都係形同虛設… 原來個試只係考40分鐘，話咁快就考完喇， 下晝約左網友出旺角唱K，於是考完就即刻搭地鐵去喇… 初初以為我實要遲到，點知又係第一個去到… 今日唱左三個鐘，扮女仔聲又唱到把聲沙哂… 不過其他人唱到企哂起黎跳舞，我真係冇佢地咁激… 唱完四圍行下先歸家…順便視察下D渡假屋資料~ 雖然個toilet仲未剪綵，但係個企缸已經裝左， 今晚就先沖為快，都唔錯丫，如果裝好哂D野就perfect喇~ 廣告：彩色電視特價$300，有意請向我聯絡。 |
| 今日放假，約左班網友去又一城踩冰，上左陣網就餓住個肚出門口了。 響地鐵上已經諗住要遲到一兩分鐘咁， 點知去到石硤尾站突然不斷有廣播(約左響九龍塘站等)： 「本班列車將稍為延遲，不便之處，敬請原諒」 「由於訊號系統出現故障，本班列車將稍遲開出」 「由於藍田站至北角站之訊號系統出現故障，列車服務稍為延遲」 結果等左十分鐘架車先開，當然就遲哂啦…不過都唔係最遲… 去到又一城首先係食飯，淨係等位都搞左好耐，食完都已經近兩點… 食飯總共有9個人，但其實去踩o既只得3個，仲要擾攘好耐先入得… 我仲諗住禮拜四應該冇乜人，點知都幾多人下， 不過好在個場夠大，今次都踩得幾爽下，係衰在成日甩鞋帶… 踩完再周圍逛左陣先歸家，返到去已經[支力]到即刻訓左落床… 經過17日o既工程之後，廁所維修工程終於完成， 由於屋企冇綵帶，所以係進行唔到剪綵儀式o既… 係就真係好靚，不過個花曬好似扑爛左， 一開制D水就亂咁射…都幾狼狽下… 好喇，考埋聽日就乜都考哂，跟住有五日假放~~ |
| 最後一日考試了，今日係考physics實驗， 事前被編到第二組，所以9.先返到學校， 然後就即上圖書館歎一歎冷氣先~ 跟住移上bio lab作最後準備(已經好耐冇入過~)， 出面原本陽光普照，突然滂沱大雨，好似有D不祥預兆… 去到phy lab，見到一個個箱放哂響度排哂陣咁， 到呢個時間先開始識驚… 首先係一個度一粒「啤令」D長闊高咁， 畀張紙你，要你度下個「螺距」…完全係考驗IQ o既時候… 然後就畀兩支針你度下D lens o既focal length， 完全都唔知點度，求其寫D答案算… 最後係畀個circuit你度下時間咁，叫做最簡單… 用左一個鐘終於完成三個實驗， 亦都代表住今年所有考試完成~~~ 不過係冇任何慶祝活動o既，出面熱成咁我寧願歸家喇… 返到去繼續wic~越做越順喇~希望盡早推出(已經講左好耐)… 食飽飯去鄰近的網友家睇波， 呢場巴西對英格蘭都唔應該錯過o既，所以點都要睇~ 有汽水飲，有冷氣歎，都唔錯~不過氣氛都唔算好好… 今晚部機畀左細佬用，我都順便抖一抖， 不過響屋企似乎除左電腦之外已經冇咩好做… 對住電視機個少年包青天…悶到我要響屋企四圍走… 好彩畀我搵到本壹周刊…咁就消磨到成晚喇~真係優閒~ 雖然優閒下都好，但希望盡快兩部機上到網，咁就唔使爭機用… 好，聽日係連續五日假期，第一日係休息~~ 今日係二姨生日，響度講聲生日快樂~~~~ |
| 今日約好左阿姨上黎教佢打倉頡，朝早起身洗好面就準備迎接… 其實我自己都唔係好熟倉頡，我都只係盡量教… 不過好彩點拆碼o個D尚算記得，都叫做教到D basic野啦~ 教左個幾鐘就教完，跟住就繼續wic時間~ 原本見踩完冰對腳仲有少少痛，諗住今日吽響屋企算數， 不過下晝網友問我出去唔去睇波，我諗出面睇波氣氛唔錯， 而且又想睇下塞內加爾，所以決定睇夜晚o個場~ 諗住完左晏晝場波先約，不過最後要打埋十二碼， 結果時間勁"吻"水，5.8先約好時間地點，要響6.3前出到奧海城， 於是即刻飛奔出去，雖然搭小巴時有D阻滯， 不過都好彩轉東涌線唔使等，結果6.1就到達~ 然後係晚飯時間，去到個foodcourt先知佢6.半就閂門， 即係我要極速食飯，結果我用左5分鐘就食完一大碗拉麵， 再加兩隻餃子同飲完杯可樂…破哂個人紀錄…真係好佩服自己~ 食完就行去平時新聞成日影o個個「西九龍某商場外」， 距離開波仲有成個鐘已經好多人響o個度， 我地set好張蓆就一路鋤D一路等… 突然一陣歡呼聲，原來畫面已經去到比賽現場~ 幾分鐘之後比賽就開始，嘩嘩聲不絕，多人睇氣氛果然唔同哂！ 上半場完左之後大家都忍唔住要起身…對腳已經好[支力]… 順便交一交水費…不過廁所大排長龍… 下半場就轉眼開始，轉眼又結束，結果0:0，仲要打加時… 不過打左幾分鐘就完，咁都畀土耳其贏到… 完左場就排住隊走…仲要被迫拎埋張蓆返屋企… |
| 連續五日會網友，今日終於都要抖抖喇~ 朝早又係上陣網，下晝就同細佬同阿媽同佢D fd一齊去龍鼓灘BBQ~ 首先係響荃灣巴士總站集合，個個話要等冷氣巴， 結果過左幾架都係冇冷氣，最後終於死死氣咁上左架冇冷氣… 上到就坐上層最前o個行，希望可以度出更高風速~ 上一次去屯門公路係2個幾月前的事，當時係度到78.4km/hr o既~ 今次就仲犀利，最高陣風為84.2km/hr，係九號風球o既程度， 吹到頭髮亂了不特止，直情呼吸都好困難… 轉眼就去到屯門市中心，買左少少野之後就轉左架接駁巴士向龍鼓灘進發~ 原本天色一直良好，但架車一開就開始落雨，仲突然變得勁大， 犀利到漏水入巴士裡面(o個架係冷氣巴)，跟住我打個電話去天文台問下， 佢話「天晴炎熱，但有幾陣局部地區性驟雨及狂風雷暴」， 真係局部得咁誇張，遠處仲係藍天白雲，呢邊就落到hur hur聲… (我返到屋企check返，果然係屯門區最大雨，有黃雨咁款…) 轉眼又去到龍鼓灘，八個人得一把遮，結果大家都冒雨跑向燒烤場算數… 呢個係一個私人燒烤場，好彩有個蓬擋下雨，如果唔係一把遮真係唔知點燒… 不過個蓬又漏水又剩，搞左半個鐘先有得坐下… 呢度好在$60就可以任食，又唔使自己買野透爐，一坐低就可以開始燒~ 原本都燒得幾自在，不過突然不斷有蜜蜂出現，嚇到我走夾唔抖… 盡快填飽個肚就離開現場避一避…(蜜蜂係我第二最驚o既野) 行出去見到有個沙灘就去散下步，咁o岩係日落時間，就順便影下相~ 呢個沙灘咁污糟但都竟然有人游水…我就坐低都唔敢喇… 來回行哂成個沙灘，打算等日落o個刻，不過又係落落下畀雲遮住… 出左個沙灘已經半個鐘，原本諗住返去再燒D野黎食， 擰轉頭一望，嘩！成個天紅哂~靚到絕~再影多幾張相先走… 結果返到去大家已經執包伏走喇…不過橫掂都已經飽… 食飽飽仲有餘興節目…唱K~~ 返到荃灣都已經9點，結果可以唱到12點， 不過大家燒完野食似乎都比較聲沙，我都唔係好唱到… 唱完行去小巴站已經冇車，唯有飛的返去， 上到車個司機就不斷發言： 「唉…我真係蠢喇，人蠢冇藥醫喇…我阿哥一個月搵到六七萬… 我係成家之中最蠢o個個…書又讀唔成，中學都冇讀就搵野做… 初初做工廠都搵到下食…之後諗住學返門手藝搵食…就[才查]下的士囉… 原本都幾好搵架…一個月有萬幾蚊…o個陣時呀萬幾蚊唔錯架喇… 而家就得返o個七八千蚊…唉…真係慘…」 乜個司機咁多感慨…不過都已經車到樓下…都廢事搭訕喇… |
| 今日冇乜野做，基本上都係坐響部電腦前面… 原本打算同同學睇戲，不過又冇約到，我諗我應該主動返D… 不過今日咁熱，成33度，加上噚日行完沙灘對腳又[支力]， 所以都係留返響屋企上網算數… 之前有網友話想上黎幫我搞下部機同埋還返D野畀我， 我見今日得閒就call左佢上黎喇~~ 不過部機似乎越搞越亂…不過今日咁熱都走過黎… 我都要響度衷心咁講聲多謝~ 嗯…個旅遊計劃睇黎都冇行喇…佢話禮拜五interview， 到而家都未收到任何通知…我諗都死左條心佢好喇… |
| 今日天氣預測：天晴酷熱，最高氣溫33度…最佳節目就梗係去游水啦！ 所以今日就約左網友(係，又係網友呀，點解成日都約唔到同學呢…) 去赤柱暢泳！原本打算去泳池去，皆因我去海灘游都冇乜經驗， 但一直都傾唔掂去邊個泳池(有個住香港仔，死未)， 結果就決定去海灘…根據我o既記憶，我去海灘不幾十次， 不過去黎係為左游水o既呢…似乎只有一次…十年前左右啦… 一朝早就出發…又小巴又地鐵又巴士…用左個半鐘都終於黎到赤柱~ 不過竟然係第一個到…於是去買定太陽油先~ 等齊人就去M記填飽個肚先，已經好耐未去過M記喇… 好耐未享受過黑椒漢堡同shake X2薯條…正呀！ 食飽飽就去赤柱正灘喇…咦?原來F.3去旅行已經黎過呢度… 入更衣室先…嗯…在眾目睽睽下更衣都係第一次…泳池都話有格可入… 換完之後就踢拖行出去喇…嘩！D沙好熱！ 搽埋太陽油就落水喇~~ 去泳池游同海灘游…最大分別係冇池邊…一游得深就冇得「man」， 所以最初都驚驚地，唔敢游開去…而且自己都未真正咁游過海灘， 都係響淺水處練一練先…不過見到個網友游到個浮台度曬太陽咁正， 我又想挑戰下自己，結果嘗試慢慢游過去… 最初都唔夠膽去，不過游游下發覺自己已經係介乎岸邊同浮台之間， 唯有死命游過去…去到個浮台已經[支力]到即刻趴響度… 諗住響浮台上曬陣太陽先至返過去，點知個浮台long下long下， 搞到我暈浪咁款…手腳又酸軟…幾驚游唔返上岸… 最後都鼓起勇氣游返過去，嘩！真係唔敢再試喇… 上岸抖左陣又繼續落水，今次主要係"嬉水"成份較多， 結果游到4.幾，大家都傷左，而且都好[支力]下，唯有撤退… 總結今日成績，畀我游到過浮台我已經覺得自己好勁喇~ 曬左3個幾鐘，都唔算曬得好勁，不過岸附近o既海底有勁多石仔， 經常都kick到差D趴響度，結果搞到手腳都出現損傷… 同埋訓左響浮台半個鐘，而家好似坐完船咁，成個人暈暈地咁… |
| 朝早起身…周身都痛…首先係膊頭、四肢同面部曬傷… 跟住手手腳腳都畀沙灘上o既石仔擦損哂，最後係游水導致肌肉酸痛， 結果成個人散哂咁滯…諗住今日都係吽響屋企休息下算喇… 不過突然有個電話殺到，叫我禮拜五去interview， 即係代表歐洲之旅終於向前邁進一步喇，好野~~~~~!! 於是即刻全力準備個interview，摷返自己個plan重溫哂D景點， 希望到時可以有最佳表現，等我可以夢境成真啦~~~ 下晝去出席舊生會會議…已經成個月冇開個會喇，有D唔慣… 之前做過咩又唔記得哂…搞到有D亂… 過去一星期都係吃喝玩樂，睇黎今日開始要回復工作狀態喇~ 放左五日假，聽日終於都要返學喇…希望聽日派卷D分數可以好好睇睇啦~ |
| 今日係派卷大日子，首先報告一下小弟下學期成績先： 首先第一科係英文，阿Sir一開始就講野講左半粒鐘…頓時想訓… 跟住四份卷一次過派哂，最差係作文， 原本諗住個題目o岩我作，點知離哂題…咁都pass到已經偷笑… 其餘都算OK，不過略比上學期退步… 跟住到physics，雖然大部分同學都視為極難的一科， 但竟然係我最掂o個科，分數係三科AL之冠，名次方面都應該唔錯， 今次考試都keep到測驗個standard，係MC方面有待改善~ 然後黎番個小息先，急急忙忙咁搵各個miss阿sir校長校工， 可惜阿sir同校長都見緊人，唯有搵miss同校工先， 搵校工係為左摷返個舊生會借學生會o既計分牌… 之前我做經手人結果考完試後先驚覺唔見左… 校工指住兩個籮叫我慢慢搵，結果搵勻都唔見… 諗住又要賠返個計分牌畀學生會， 突然學生會D人話我知原來佢地拎左去用… 小息過後速上課室，跟住黎個applied， 呢科個分數都普普通通，同我expect的差唔多~ 名次方面仍然係響中間，睇黎都好難再有突破喇… 跟住中化又一次過派四份卷，listening奇差， 其餘都OK，不過上學期幾高分下，而家勁退步… 最尾一科pure，係我認為最難o個科， 目標係全年合格(上學期衰左)，所以考試前都幾畀心機溫~~ miss首先頒發各個獎項，最高分獎完全係熱門人選， 不過最佳進步獎o既結果就幾令人意外o既， 因為我係其中一名得獎者… 睇返個分數，都算滿意啦…我唔對自己要求太高… 總結黎講，三科AL都略有進步， 不過平均分因為中化o既大退步而拉低左， 不過都叫滿意自己成績喇~下年繼續努力~~ check哂卷之後搞左一輪中化project分組， 經過一輪包剪dup決戰，終於可以做到「天文地理」，好野~ 跟住成班人同miss企響度傾左好耐計之後就一齊去食飯， 然後去打羽毛球打左一陣，跟住就搭地鐵出旺角… (點解有D咁o既行程呢…太難解釋，成匹布咁長) 去旺角係約左個網友…諗住去book網友camp的渡假屋， 不過等極佢都未到，反而其他冇約的網友就相繼出現… 結果最初約個網友最遲出現…遲哂大到… 然後去信和問哂價就搵間較好o既黎租， 跟住順便睇睇遊船河資料，為舊生會活動作準備~ 然後就成班人響旺角四圍行，去左間韓燒視察環境， 準備舉辦氣象迷聚會，結果就訂埋檯… 呢筆錢加上去camp筆錢，搞到要去[才禁]機… 跟住又去睇各種電子器材，最後行到成7點… 夜晚繼續刨旅遊書，為聽晚o既interview作好準備~ 好快就知道歐洲之旅能否達成喇，祝自己好運啦~~~ |
| 朝早要返學校進行central marks checking， 上課時間係8:00-8:40…簡直係史上最短o既返學時間， 好似往年咁派左紙條之後就冇乜野做， 大家響課室度慢慢hea到打鐘… 放左學之後阿sir見我得閒就叫我幫佢打D野， 結果為左打三行字都搞左半個鐘… 10.左右返到屋企…都冇乜野好做，都係漫無目的咁上網… 原本打算同網友唱K，不過夜晚又要去interview， 都係留返響屋企收拾心情同埋作最後準備好過… 下晝出一出地鐵站拎D舊生會物品畀人之後就全力準備夜晚個面試， 多得阿姨指點，最後終於諗到用咩方法打動到D評判喇~ 諗番起五月時為左呢份旅遊計劃出過o既力，諗諗下我自己都想喊… 傾完都已經係6.，食完飯之後就搭車出銅鑼灣喇… 響車上面越黎越緊張，心裡面一直盤算住面對唔同問題時應該點答… 去到時代廣場就入toilet執一執個樣，跟住就行去主辦機構o個度… 上到去望下隻錶，早左15分鐘…個職員就叫我去第二間房坐下先… 呢間房裝修得好優雅，不過好暗，又擺左幾張檯，好似要審犯咁… 不過其實唔係響呢間房面試架…等左幾分鐘就被召去另一間房， 只見有張大檯坐住一男兩女，我就坐響主席位， 然後三個人就拎住我份plan響度好似傾計咁in我喇… 我基本上都將之前諗到o既野全部爆哂出黎喇， 不過令評判感動的句子就冇機會講出黎… 基本上我覺得自己表現都算ok，係唔算太淡定囉… 不過佢最尾o個兩句就幾令人沮喪： 「無論你贏定輸都好，都希望你後日返黎睇下結果」 「就算輸左呢，我地都會有獎品送番畀你架」 不過點都好，盡左力就算喇，希望後日有好消息通知大家啦~~ 面試完之後諗住順便過sogo探下阿爸， 不過裝完修之後都唔知佢個counter搬左去邊， 結果都係白行一趟，唯有回家吧… |
| 今日進行電腦用品採購大行動，需要買printer同harddisk， 原因係printer壞左同harddisk太舊… 中午約左同學一齊去深水[土步]午飯後就去黃金同高登， 經過一輪格價之後，終於都買哂兩樣野， 然後捧住兩舊野返屋企，準備裝野喇… 不過返到去冇耐就有網友打黎約我出去睇波， 於是裝左部printer就再出發了…留響屋企都唔夠半粒鐘… 今次又係去奧海城睇，首先去百佳買D飲品， 跟住就出去霸位了…吽左響度個半鐘，終於開場喇~ 呢次真係精彩過上次好多，11秒就入波… 睇完先入去食晚飯，今次又係食番上次個餐， 不過終於可以慢慢品嚐啦~ 夜晚進行XP安裝大行動，用左兩小時終於都搞掂一切， 跟住仲要裝呢樣o個樣，寫呢篇野時已經係1.幾， 所以今日日記簡單左D… |
| 噚日極忙，而家補寫返12.過後的情節… 話說12.時仍然係裝緊XP，趁裝緊時就去www先， 然後番到黎已經搞掂，隨即就上到網，yeah~~ 跟住再試下隔離部機，都上到網，可以脫離爭機用時代喇，好野!!! 但都仲未忙完，仲要印野，但又剛剛買左新printer， 於是又要裝左一輪先可以印…結果搞到2.幾先熄機… 上到床，腦海不斷呈現知道旅遊計劃結果後o既反應， 越諗就越緊張，結果就當然係訓唔著… 3.幾要落床睇下雜誌睇左半粒鐘先至矇矇矓矓地訓著… 朝早又矇矇矓矓咁醒左，望一望鬧鐘，9.半， 10.鐘要回校準備舊生會足球比賽決賽，遲到一分鐘罰一蚊， 梗係即刻彈起身…以7分鐘時間梳洗換衫出門口，結果都仲早左兩分鐘~ 響學校搞左一輪之後就搬野過隔離球場，嘩，好熱！ 拎個溫度計出黎度下，51度！極變態… 雖然我只係坐響度睇，但都已經出哂汗，真係難為踢波o個班人… 而且紫外線強度屬於極高，兩隻手又被曬紅了… 今次決賽只係打三場，但都有少許問題出現， 之後主席仲要走先，而且要我主持大局， 好彩跟住都冇乜野發生，結果搞到差唔多3.先完… 執番好哂D野之後大家就各散東西， 我到呢個時候仲未食午飯，就去M記填飽個肚先， 好耐都未試過自己一個人響街食飯，次次都會覺得好寂寞… 食飽就搭地鐵出銅鑼灣，出席旅遊計劃比賽頒獎禮， 列車一路接近目的地，緊張指數就一直上升， 平時響地鐵內一定訓著，今次就變得坐立不安… 出左地鐵站就撞到一樣有參加呢個比賽o既同班同學， 跟住就一齊上去等待宣佈結果了… 上番呢個兩日前去過o既地方，心情都仍然係好緊張， 只見房內擺左15張椅，即係代表中獎機會係1/5(佢有三個名額)… 前面就有張檯，放左一疊信封，我仲響度諗會唔會係每人派個信封， 然後裡面就有張咭寫住「恭喜您」或者「唔好意思」… 不過估下估下冇咩意思，都係耐心等佢公佈好過… 等齊人之後就公佈結果，原來呢個比賽只有40人參加， 11人可以面試，心諗中獎機會又提高了… 跟住就話首先公佈「順利完成呢個過程o既8位參加者名單」， 我都未了解清楚呢個係乜野名單，就已經被召左個名出去， 不過佢既然話有8位…即係輸左啦… 我最初諗住知道結果後會傷心到喊，不過事實上都冇乜話唔開心， 最後公佈三個得獎者名單，佢地分別係： ．去倫敦同巴黎三個禮拜進行藝術考察o既準大學生、 ．去尼泊爾同西藏o既大學生 ．去台灣o既四人女子組合 睇黎我都真係未夠佢地專業，算係輸得心服口服啦… 雖然花左咁多心機落去都係得個吉，但總算得到唔少經驗啦… 大家坐響度傾左一陣計之後就開始慢慢散水(其實我都唔係好搭到訕)， 跟住就搭車番屋企，沿途一直向家人通知壞消息… 返到屋企樓下都差唔多開波，就拿拿聲買個飯盒返去一路食一路睇喇~ 原本打算決賽約人一齊睇熱鬧下，不過成日都冇機會上網， 最後都變左自己一個人響屋企睇… 雖然可以舒舒服服咁睇，不過都硬係唔夠feel… 不過睇到最尾頒獎o個度都還有些少感動… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |