5月7日 |
| 又呆響屋企溫書啦，不過呢科graphics d野都溫唔入腦o既… 夜晚怒煲電視，好耐冇試過睇咁耐電視啦… 話時話，今日20歲半啦，呢半年我做過d咩呢… |
| 今日終於可以同成家人落去飲茶啦，yeah~ 其實樓下有間裝修靚、唔算貴、又有新奇點心o既酒樓， 都係件幸福o既事…今日試左個炸芝士豆腐，正~ 是日女廁洗手盆仲有大發現，今次真係遍地黃金… 返到屋企就怒溫書啦，呢科graphics都唔知點搞， 勁多堂冇上，仲要d notes死背，真係嗌哂救命… graphics照計應該要你好有創意，估唔到竟然咁考法… 溫溫下都頂唔順，訓到天昏地暗… 夜晚返到宿，又要怒捉蟲，一晚殺左四五隻， 仲要有隻死左響我d notes上面，離譜… 溫graphics上網搵料，比我搵到d經典舊game， 回想起以前怒打機o既日子，我終於搵到我o既童年啦… |
| 聽日就考最後一科啦，之後就可以盡情咁…做功課啦~ 今日主要都係落lab溫書，中間去左補習，冇咩特別啦… |
| year2最後一科考試啦…總算不過不失啦… 考完都冇咩點慶祝，一班人食餐飯算啦~ 跟住就返lab玩maya，簡直係寓工作於娛樂~ 可惜o既係仲有另一份功課早d dead， 但果份完全冇頭緒，無從入手，勁唔想做… 夜晚出左去食飯，其餘時間都係響lab做maya… 食完飯返去見到成班人響度玩warcraft， 睇黎我都真係要順應下潮流…得閒學下先… 嗯…考完試都未有時間plan暑假點過添… 而家睇黎都係見步行步啦… |
| 考完試第一日，但都冇乜機會比我休息…要做功課啦… 今日暫時放低maya，做另一份冇乜頭緒o既功課… 不過去到lab，得高人指點，終於知道點做啦~ 結果進度奇快，今日已經做得七七八八，勁呀~ 夜晚出左火炭食飯慶祝，好飽呀~ |
| 繼續落lab搞跳舞機，今日主要都係砌個架出黎， 做返初中果d木工野，鋸下鋸下，好累呢… 出去補完習返黎繼續鋸鋸鋸，累死我啦… 之後搞一陣maya又返宿啦，聽日繼續努力… |
| 禮拜六都要繼續開工…一開始繼續搞埋個跳舞機先… 砌埋個架就終於大功告成啦~有機會影下相比大家睇先~ 跟住即刻就搞返maya，今日開始整d人出黎… 雖則網上download左個人返黎，但想幫佢著件衫都好難… 雖然多功課，但今晚點都要返屋企啦…因為聽日母親節… 捧返堆冬天衫返去，好重呀… ↓獻醜…會再繼續執下… |
| 母親節，當然要落樓下飲返餐茶~ 好耐冇試過咁早起身飲啦，飲完即刻要返去繼續訓… 起身之後食個tea就繼續試maya野， 夜晚又落去食飯，食足兩個鐘，好豐富呢~ 之後都要返中大開工，今個禮拜我奉獻哂比maya架喇… |
| 起身、刷牙、洗面、食午餐、落lab、maya、 maya、maya、maya、maya、晚飯、百佳、 maya、maya、maya、maya、maya、maya。 翌日上午9點，上床訓覺~ |
| 好耐冇試過幾日都唔寫日記啦… 搞成咁，純粹因為通左幾晚頂… 為左整個分幾鐘o既動畫出黎，真係豁哂出去… 其實maya真係幾好玩，只可惜時間唔夠， 又冇時間學，又冇時間整靚d… 終於放暑假啦，我要去玩呀~~~ 不過而家最緊要梗係訓餐飽先… |
| 一訓就訓左17個鐘，除左BB仔果陣應該都未試過啦… 起左身都差唔多夠鐘食飯，夜晚優閒咁上下網， 開始計劃下暑假啦…但part time好似幾難搵到… 我又唔想做d唔關電腦事o既野，係咪好奄尖呢… 哎呀…我o既工作癮又開始發作啦，再唔搵野做我就癲架喇… |
| 今日又係百無聊賴，結果做左個師奶， 吽響屋企連睇9集《大長今》，睇到凌晨4點都唔想停！ 阿婆生日，夜晚出去食飯，見到眾親友談笑風生， 但最搭唔到訕o既，竟然係壽星「女」同佢先生… |
| 好耐冇參加過中同聚啦，今次終於去到啦~ 上半場去沙田睇《天國驕雄》，不嬲對呢類片冇乜大興趣， 一開始更加睇到一頭霧水，慢慢先至明返… 睇完仲有成個幾鐘先到下半場，成班佬響新城市吽左個幾鐘… 今晚去頗貴o既美式餐廳食飯，幸好有半價優惠~ 呢餐都食得幾開心，而且好飽呢~ 原來唔少同學都有玩intern呢… 之後去影貼紙相，我都未試過同咁大班中同一齊影~ 今日玩左8粒鐘，好滿足~不過唔知今年中同仲搞唔搞camp呢~ |
| 今日唔吽響屋企啦…出左去補習… 唉…而家d有錢仔，上個禮拜拎部3G電話， 今次就玩PSP，真係貪得無厭… 難得優閒，食完飯響pageone怒睇免費書， 睇哂成本有關全球各地M記o既書，都幾得意~ 之後返中大，有一半目的係為左今晚層聚~ 自從上次食pizza之後都好似冇搞過層聚， 今次比上次仲豪，有KFC、雪糕、蛋糕、西瓜… 呢個tutor真係唔話得，呢一層又難得咁玩得… 不過咁樣更加顯得我好似唔屬於呢一層咁… |
| 今朝一早起身落lab，唔係上堂唔係做功課， 而係聽下個professor介紹個暑期project… 聽講話有錢收，而且工作時間都幾flexible，所以黎聽下~ 嘩…原來都唔少同學有興趣呢… 不過講完之後又麻麻想做…得果二千蚊… 況且其實又唔係太想做hardware野，再諗諗先啦… 之後全日都吃喝玩樂…聽完野就落lab打機， 兩點幾去coffee con食我o既第一餐之後， 又上左知行篤波打winning… 跟住返宿執左陣野又出左去食韓燒… 去到都11點…仲要出埋黃雨… 玩完之後…聽日開始學php啦~ |
| 今日又訓到晏一晏…響宿睇左兩集大長今， 之後開始玩PHP啦~由宿玩到返屋企，都幾易上手~ |
| 今日鼓起左勇氣，嘗試睇醫生解決面部問題… 不過朝早竟然唔知醒…足足訓左10粒鐘… 之後要補習，補完返黎先睇… 其實都係因為阿媽做開間診所轉左個皮膚科醫生， 所以先試下去睇…但其實去到佢講o既野都係好行… 注意飲食、作息定時、減少壓力…小學都有教啦… 咁都要食3隻藥，真係誇張…希望一個禮拜之後會有成效啦… |
| 今日出去換手機啦…之前部機都已經壞壞地，唯有換過佢啦~ 其實之前部機都只係用左年半，所以今次買部唔算太貴… 終於有部可以影相o既手機啦，等我怒snapshot先~ 跟住約左網友傾d野，又要處理d人際野，唉… 夜晚同個friend聚下，順便借本php書睇~ 響荃灣兜下兜下都冇咩好做，結果走去逛apm~ 不過呢度除左收得夜之後，都唔見有咩太吸引…好多人… 最後搵間茶餐廳食埋晚飯就歸家，慢慢玩電話啦~ |
| 一早起身去左食晏，之後返屋企抖陣就出左去石澳BBQ~ 好耐冇黎過呢度啦，都一樣係咁人頭湧湧… 雖然今日陽光普照，但冇想像中咁辛苦… 夜晚仲睇到唔少星，同埋大大個月亮~ 不過唔知點解返到屋企成身散哂，好累… |
| 今朝一早出去同幾個CE佬去見工…朋友介紹… 幫佢親戚間公司寫database之類… 其實都唔應該話去見工…一去到已經講要做d咩… 仲話係urgent，估唔到突然有野要做… d錢要4個人分，即管做一個禮拜睇下點啦~ 之後去左去40蚊任食壽司，我都係第一次去， 果然係一分錢一分貨，當填飽個肚都仲得o既… 本來今晚約左幾個中同去食飯， 可惜有要事黎唔到，實在抱歉… 夜媽媽又落lab，今次唔係做功課， 而係已經開始要做database果件野… 第一次真係寫PHP，都幾易上手， 做左一晚已經做左五六成野~雖然無啦啦又通左頂… |
| 晏晝要去UCFYP個多媒體workshop， 就算今日唔使開工，都冇機會比我盡情訓覺添… 入到個workshop見到個識o既人教， 參加者都有幾個識得，其實呢個世界都唔係好大… 老實講…如果唔係為左符合FYP個要求， 我都唔會去個workshop…不過聽落都覺得算有用o既~ 跟住去補習，之後又去pageone刨一輪書先返宿~ 返到去又見飛蟻肆虐…今年情況比上年響湯宿更恐怖… 今晚開始執野啦，等我呢幾日冇野做就quit宿… |
| 今日突然hea返一日…吽響宿舍上網睇電視… 本來要開工做野，不過要等埋人先可以開始， 結果夜媽媽先落lab，去到仲要傾成兩粒鐘先可以開始做， 最後又好一個通頂，都完全冇訓過… |
| 噚晚都冇訓到…今日除左補習就係訓覺啦… |
| 今朝一早落左去見dept FYP老細，睇下要準備d乜… 佢其實即係dept head，之前已經見過唔少次… 大概知道以前呢個topic係做d咩架啦… 好似完全係做software野，但最緊要唔好要我用太多腦就得… 之後出左去同網友食飯，見返好耐冇見o既朋友啦~ 食完飯行左去旺角，逛左陣就散水… 買左條手機駁電腦o既線，之後就去左荔枝角， 去比做野個老細睇下我地通頂兩晚o既「傑作」… 個反應都好似唔錯啦，不過仲有唔少野要改… 走果陣勁大雨，一個人擔一把遮都全身濕哂… 返屋企之前去左覆診，要長期食藥…希望塊面快d好啦… 今晚返屋企休息下啦…聽日去廣州玩兩日… 今晚出左GPA…都keep到一直進步o既， 不過我估已經去左我個人極限啦… |
| 今日開展一連兩日廣州之旅啦~算係忙裡偷閒下啦~ 其實之前都冇乜點準備，係幾個禮拜前阿媽問去唔去， 於是今日拎左套衫就出去啦… 首先出老尖M記食早餐，之後就上車去皇崗， 但唔知點解一坐上張椅就覺得勁唔舒服， 結果背脊越黎越痛…旅程第一站係去金龍船食飯， 唔知係d送唔o岩胃口定背脊太痛，總之冇乜胃口食野… 幸好食過藥之後背脊慢慢好返… 食完飯就參觀景點，睇過間華林寺、 八和會館同間西關大屋，仲有一度真係非去不可… 話說年半前黎過廣州旅行，去過一度地方歎茶， 之後食左個雷沙湯丸一試難忘， 今日終於有機會再返黎呢度品嘗啦~ 一次過食左三大個，正~ 原本仲有個景點係睇植物，不過我之前都黎過， 響車度訓下好過…之後話咁快就dinner， 唔知係早得滯定又係d送唔o岩胃口，都係食唔到好多… 食飽就去個夜間動物世界，又係之前去過， 都係坐火車睇野生動物同睇馬戲， 不過上次夜晚睇動物睇得唔清楚，今次日頭就好睇好多~ 仲有馬戲都好似比上次精彩~至少今次坐得前d… 睇完都返酒店，碧桂園鳳凰城酒店， 間房好大，廁紙仲大，個企缸可以企成隊足球隊入去… 放低野之後就出去食宵，間餐廳除左服務之外其他都ok啦~ 食完返酒店兜個round就入房休息啦… |
| 響酒店食完早餐就繼續行程， 不過今日行程普普通通，有d地方都去過… 首站係以前去過o既養蜂場，行行企企飲杯野就走啦… 跟住去一個唔知咩公園，其實個環境幾靚，不過冇乜時間慢慢行… 之後食順德風味宴，最正係個鹽焗蝦，食左勁多隻~ 食完見隔離檯碟蝦差唔多冇食過，結果拎埋過黎擦埋佢~ 飯後去左絲綢廠睇野，又係去過o既呢度… 之後個行程就完左啦，係時候慢慢坐車返深圳… 跟住都仲未返香港住，難得黎到深圳梗係去dup下骨~ 基於時間所限，只係dup左一粒鐘， 不過都已經dup哂全身，好爽呀~ 之後再去食海鮮，好正~食完返香港啦，好累… 呢兩日當係散下心就唔錯o既，最正都係酒店~ 可惜有d景點都去過，下次應該去下其他地方啦… 值得慶幸係天公造美，兩日黎唯一見到落雨都響架車上面… |
| 今日quit宿啦…一早食完飯就返中大執野啦… 結果執左一部電腦、一部風扇、三袋衫同一箱雜物… 今次call左車走，原來樓下個停車場停一停都要比錢，蝕左15蚊比佢… 之後返上去想裝返部電腦，點知發覺細佬部機原本裝o既張lan卡冇左， 搞到我上唔到網，又要花錢買過張… 跟住又要返中大，因為今日約左見UCFYP個老細… 原本係就一個groupmate放工，約左夜晚見，不過最後佢都要開OT… 闖左入地理系大本營，搵左一輪先搵到老細間房… 呢位內地黎o既教授，佢講o既野我都聽得明九成o既… 佢都似乎算好人，應該幫到我地個project唔少野o既… |
| 今日咩都唔想講了…除左補習以外都冇咩做過… 宿舍結果出左…竟然又入左waiting list， 又要拎返封appeal letter出黎啦… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |