5月1日

18歲半生日~選擇了同家人唱K慶祝~(其實唔關事)
你可能會話：「嘩…唔係嘛? 呢個時候仲去唱K?」
不過我實在忍唔住喇~已經係3個半月…
唱K都唔係淨係我o既主意黎o既~

細佬自己去左先…佢竟然要等位…睇黎個個都忍唔住啦…
幾個月冇聽過新歌，應該成個人out哂…
不過D新歌聽下聽下…原來又識唱喎~
但係咁耐冇唱過，質素就真係麻麻喇…

仲諗住今日應該冇乜人唱K，可以坐幾耐都得…
結果今日唱得2個幾鐘…之後唔知做乜好…
最後係去左愉景新城行街…不過我係冇購物o既意欲…

夜晚好豪咁食左扒王o既神戶牛…(18歲半生日禮物?)
嘩! 果然唔係一般o既牛扒可以比擬!
D肉雖然得五成熟但係完全唔韌，D筋仲入口即溶!
而且份量仲o岩o岩好! 可惜冇帶相機…唔可以將佢永遠保留…

食飽就行返屋企…跟住就要處理一件重要事項…
話說前排班網有人提出反對大學o既拔尖計劃
(即係CE考得好就可以唔使考AL直入大學)，
經過一輪討論…我整左個簽名簿出黎諗住遲D畀傳媒同教統局之類…

今日D人開始forward出去…暫時有百零個簽名…
不過當中有唔少係搞亂檔…寫哂D相反意見落去…
其實我自己又唔係話好反對拔尖，我主要都係志在幫下大家…
不過我鍾意一不做二不休，要搞就要搞大佢囉…
但係而家個效果似乎唔係咁令人滿意…
簽名數目唔算多…而且相反意見仲佔唔少…
希望聽日個情況會好D啦…

嗯…聽日會考開始啦~各位會考生加油~~

5月2日

今日起身冇耐就落左去同阿媽飲茶~不過咁早落去冇咩好野食…
食左個油雞飯就返左上去…睇美味天王~好彩今日睇到大結局!

今日主要「工作」都係整埋呢個網主頁o既flash~算係搞掂啦~
跟住就開始學flash喇…不過出面D教學網都唔好用o既…
結果開哂D example黎睇d code…都叫做開始掌握到action script啦~
希望可以快D學識然後開始搞grad VCD啦~

晏晝ICQ有個小學同學搵我…嘩!! 七年黎第一次同小學同學有contact!
其實兩年前都搵過個小學同學…不過講左兩句就不了了之…
今次仲係一搵就搵到幾個小學同學~個個都傾左陣~好感動啊~~~
嗯…原來大家升左中學都冇乜點聯絡過…仲以為會成日搞聚會添…
不過隔左咁多年都搵得返D人，而且佢地都仲記得我…算係咁啦~

最正係搵返以前小學算係最熟o既同學，仲傾左好耐呀~
好耐都未試過傾ICQ傾得咁爽呀~係回極都回唔哂o個隻~
相隔七年…大家好似好熟…又好似好陌生…個感覺好特別…
希望有日可以搵番班小學同學出黎聚下啦~

5月3日

禮拜六都要一早起身…為左返hkspeed做下briefing…
原本係禮拜一先正式返工，不過今日有個識得o既同事返去，
所以我就同佢返去熟習下環境，了解下我o既工作之類…
九個月冇返過去，好彩都仲記得點去…
D擺設都冇乜點變過，但係同事就變哂，
而家公司係有兩個full-time工作中~
嗯…未來一段日子就要同呢兩位同事做野喇…
暫時見佢地好似幾靜…希望相處得黎啦…

基本上成朝都係睇返我D工作咁，仲要搞番個拖左兩年o既project…
其實我要做o既野都叫做做哂，但係個客仲爭公司萬幾蚊…
希望可以追得番筆數啦…我都唔想以前做過D野白廢哂…
之後搞下D野…點幾鐘先走得…

2.約左同學響荃灣開會，但我點都係遲到架喇，而且我仲未食飯…
咁o岩阿爸打黎約我食飯…但係就響銅鑼灣…食完一定遲得更緊要…
不過又咁耐冇見過阿爸…忙裡偷閒食番餐飯都冇所謂啦…
於是就由牛頭角搭地鐵去…去到都差唔多2.…細佬都響度…
入左間日式餐廳，以咁o既裝修黎講價錢算係大眾化啦~
一食完就有同學打黎催我…所以唯有急急腳失陪先…

跟住趕頭趕命咁去到地鐵站，諗住轉東涌線快D啦，
點知「下一班列車將於8分鐘後開出」，激死我啦…
仲要架車食左豬油咁…慢到嘔電…返到荃灣都3.3…
然後再索哂氣咁跑上clubhouse…冇氣喇…

今次係grad din+book+VCD聯合會議，我只係負責VCD，
所以少我一個都可以開會先…(如果唔係我點敢遲大到…)
我去到主要係講番隻VCD會點整同埋點分配人手咁囉…
同埋睇下點樣同grad book夾番…廢事撞內容…

差唔多開完會o個陣收到舊生會主席o既電話，
我又要開展舊生會o既工作啦…暫時話月尾有個郊遊活動…
佢仲話原來有個舊生sars死左…真係可惜…
之前收到呢個料都唔相信添…

開完個會又要急急腳咁搭地鐵去尖沙咀…又有網友約我睇戲…
今次係睇變種特攻…我冇睇第一集所以開頭勁唔明佢講乜…
仲要睇好耐都未搞得清邊個忠邊個奸添…我諗我都唔係好適合睇呢類戲…
不過我諗如果睇左第一集會好好多o既~

之後個網友帶我入元朗食飯…我聽到即刻「嘩」一聲…
佢除左睇戲之外…對食野都好有研究…
搭左十幾蚊巴士…8仔前幾日先增左值而家都所餘無幾…真係肉赤…
去到會合另一個網友就去左間大排檔食…此時已經係10.幾…

食完仲要食埋元朗最出名o既「B仔涼粉」喎…(我未聽過)
之前仲遊左元朗一個圈…真係行唔郁咁滯…
去到我都係叫左個西米露算…都唔錯啦…
跟住就搭返紅van返去，返到屋企點半鐘左右啦…

今日真係遊勻港九新界…除左機鐵之外地鐵乜線都搭過哂…
返到屋企真係成個人散哂咁滯…
好耐都未試過咁誇張喇，不過暫時都冇機會再咁樣喇…

5月4日

今日一起身就勁忙，因為噚日成日都冇上過網…
一上網發覺wic主頁亂哂大籠…原來天文台網頁改哂版…
結果又無啦啦多左野要做…搞左大半個鐘先搞掂…
之後要補寫日記啦…(噚日o個篇真係要唔少時間…)
仲有其他濕濕碎碎野…整到1.先叫做完成左D…跟住同阿媽落去食飯…

今日係AL之後第一個禮拜日(family day)，原本諗住搞D郊遊活動之類…
(有諗過南丫島半日遊/禮賓府開放日之旅…之類)
但落雨…咩都唔使搞啦…結果話去奧海城碌ling喎…
嘩…噚日跑黎跑去搞到勁[支力]…恐怕我連個波都拎唔起…
所以都係返屋企搞下電腦野好過…

前晚研究過flash D action script之後，今日開始正式寫下野，
暫時叫做整左少少野出黎啦~都幾有滿足感~
睇黎grad VCD D coding部份應該唔難整~

夜晚出番奧海城食飯，間野勁多人等位，好彩我去到已經有位~
呢度出名擔擔麵同小籠包喎~都幾正呀~
食完先知原來佢地而家先走去碌ling…
同佢地上去睇下啦…打左兩下咁囉…
返到佢繼續flash時間…同埋又同多兩個小學同學ICQ~

聽日返工喇…希望一切順利啦…有D緊張…

5月5日

深夜唔知幾點…畀一陣狂風雷暴嘈醒左…唔理咁多，再訓…
之後6.幾細佬起身，突然拍醒我…「紅雨呀!」
佢就興奮咯…又有假放…我呢? 返工呀…
上左陣網睇下個情況係點就再訓過…

今日係正式返hkspeed o既日子，8.半就準時起身~
頭一個禮拜可以遲半個鐘返，下個禮拜要再早D起身咯…
返到去check下email就見到有兩個task，朝早都差唔多做完…
晏晝得我一個出去食…去左大家樂…去到已經冇乜野食…

返到去冇耐有個staff打黎講解我未來o既工作…
嘩…有幾個網要整…睇黎起碼都整到下個禮拜…
結果D工作講左成個鐘先完…真係誇張…
之後就開始工作…6.準時放工~

夜晚又開始諗…到底點解我永遠都係咁忙o既呢?…
雖然總好過日日吽響屋企冇野做…但係而家又失去好多私人時間…
而家就算約人玩又好、做野又好，都要早一個禮拜約定…
呢日留畀你o既、o個日就留畀佢o既…邊日係留番畀自己架?…

…第一日返工就呻呢D野添…仲有排撐…頂住呀!!!

5月6日

第二日返工啦~繼續執下D網咁…冇咩特別…
晏晝又係自己食大家樂…不過原來有間近好多…噚日行多唔少路…
不過日日食大家樂都唔係辦法…遲D要試下其他餐廳…

今日係會考中文，亦都係我中化oral o既日子…
唔知點解考親oral就緊張…仲響office就已經緊張起黎…
5.幾就要早退…然後地鐵轉巴士去試場…去到o岩o岩好可以上課室~
之後點名啦…嘩…又撞番之前D卷坐我前面o個個…仲要編埋同一組…
佢三科AL都係響正我前面，連physics實驗都係一齊…
我諗係考試局冇乜randomize D座位編號咋卦…

今次被編去尾二o個組，又要坐響度呆等…仲要好多蚊陪你等…
大概7.8就入左prep room…裡面個負責人(?)幾有趣，
又叫我地唔好咁緊張，又話如果辛苦可以除低口罩~
短講題目：「借左朋友電話唔見左，要向佢道歉。」
say sorry點say三分鐘呀…唯有作下點解唔見左個電話囉…
不過都諗唔到多野…結果講得兩分鐘咋…扣分呀…

短講唔得，唯有希望討論掂番啦，點知個題目仲騎哩：
「中國人紅白事都係食，咁如果唔食仲可以做D乜?」
唔食野唔通成班人齋坐咩? 諗左兩分鐘張notecard都一片空白…好驚…
最尾話就咁傾下計算…不過簡單得黎都講足一分鐘…

之後個討論…唔算成功囉…有唔少dead air呀…
但我諗我算講得唔少囉…都算lead到個討論…
最衰係D非典型措施…個個都要戴罩，仲要搬到D檯變左半圓型，
結果差唔多要離開個位先聽到最尾個人講乜…少左互動…

嗯…總括黎講呢個oral唔算好滿意囉…D topic古古怪怪咁…
不過唔理啦，話哂考完呢個就真真正正完成AL!!!
但係o個度一個人都唔識…冇乜好慶祝啦…最緊要返屋企食飯先…

未來兩日放假…可以抖番下，做下其他野啦~

5月7日

今日開始一連兩日假期~(我一個禮拜只需返4日，聽日佛誕另計)
朝早成11.先捨得起身…上陣網就落左去飲茶…
番到屋企hea得就hea~再唔hea唔知幾時先有得再hea~
之後又要開展番d工作…主要都係搞番grad VCD個flash~
今日有番D進展喇…不過又諗番仲有好多工作唔記得左要做，
睇黎要放多D時間響度喇…

仲諗住放假可以做番多D其他野添，點知又掛住同人傾計，
結果成日都冇咩做左出黎…hea一日咁多啦~

呢兩日假期有項任務就係教個網友physics…之前應承左…
不過D cert問題我好多都唔知點答…真係失敗…
我又唔係話唔記得哂D野…但總之就係唔識答…唔知呢…

嗯…近排發覺某d人o既心情似乎唔係太好…
我都想花D時間開解下佢地…但其實自己都唔好得去邊…
我自己又唔係話唔開心…但好似對d野麻木左咁…
對人又係，對事都係…總之就唔係好提得起興趣咁…
或者係呢排突然面對太多野啦…考完AL，一大堆工作又即刻迫到埋身…
誇張D黎講，呢排都有D行屍走肉feel…

其實呢D係咪sars作怪? 對於我黎講都可能係…
考試之前…成日都憧憬住考完點樣癲點樣慶祝，
而家…出到街只係見到一個個口罩…根本咩都唔想慶祝了…
同埋大家都擔心左件事成兩個月，唔多唔少都積左好多壓力…
所以我成日都諗，如果有日宣佈0感染0死亡個個出哂院你話幾好?
大家聽到即刻掟走面上o既口罩，我諗呢個時候真正o既開心先會返黎…

5月8日

今日係佛誕，而且係阿婆生日，所以放假~
朝早繼續grad VCD，yeah!! 主程式今日完成!
呢下真係要讚下自己~我都估唔到可以咁快寫好~
寫完落去飲餐茶然後繼續工作，幾乎成日都奉獻左畀隻VCD了…

同埋今日又講左兩個大電話囉…硬係D工作打孖上…
一個係關於舊生會…話說我負責整o既網頁好耐冇update(因為AL)，
結果主席裝左個討論板，直情做到好似一個新o既網頁咁…
唔知點解我幾介意呢樣野…雖然我知我而家都冇太多時間搞番個網…
希望我講電話o個陣D語氣唔會重得滯囉…
至於另一個就係hkspeed，突然話要搞兩個web design，
嘩…講真我大半年冇寫過新網，真係唔知han唔handle到…希望得啦…

夜晚出尖沙咀食飯…同阿婆慶祝生日…
係「我都畀得起啦」o個個母親節套餐…
嗯…o個度D服務真係麻麻囉…搞到個個都好鼓譟，勁投訴…
不過我只係響度諗…大家咁勞氣…唔知今日做主角o個個會點諗呢…
同埋…我發覺董太有句野真係講得冇錯…

5月9日

今朝真係失敗…放完兩日假，一返工就遲到…
話說平日我不嬲都有一個電動鬧鐘同一個人肉鬧鐘叫我起身，
但我諗，我都咁大個仔，而且係去返工…電動鬧鐘都夠啦…
點知就係咁o岩呢個鬧鐘粒電噚晚飛左出黎…結果遲左成個鐘起身…
即刻趕頭趕命咁返去…結果都遲左7個字…
(點都唔飛的啦…如果飛就不如唔好返…車錢都蝕埋)

今日返到去可以話比較得閒，因為之前assign落D野都做完，
新assign o既又未開得工住(未有詳情)，所以都吞左唔少pok…
未來一個禮拜o既工作係design個桌球會o既網，
期間都要成日搵個客傾計…又可以訓練下D skill喇…
(我對同陌生人講電話最冇信心…)

今晚除左同個客傾計之外，仲同公司個staff傾左兩個鐘電話…
其實只係講左公司同wic兩件事…但係講得好detail…
一路講D長期大計，我心諗…搞掂手頭上D工作先講呢D啦…
不過都好o既，起碼知道呢兩樣野都仲有得發展落去~
公司就唔到我理得咁多架喇…一路有錢賺就好好架喇…
至於wic呢…要搞大佢唔係唔得…但一定要洗甩個人網頁呢個feel先囉…

講完電話搞埋D野都已經點幾…聽日仲去行山呀…
第一次同網友行呀…而且仲有個小學同學加入呀…
真係唔知聽日會點…又期待又緊張…

5月10日

今日同網友+1個小學同學去大帽山行山，點知今朝個電子鬧鐘又發癲，
無啦啦同我tun遲半粒鐘先響…好彩人肉鬧鐘今日有運作…
去到只係見到網友齊哂，小學同學就未見…嗯…好緊張…
等左幾分鐘就有個人走左埋黎，但戴住罩所以我認唔到…應該都係啦~
跟住去百佳入貨，然後搭小巴上城門水塘~

上到去…呼吸新鮮o既空氣啦~可以望到個小學同學o既真面目喇…
第一眼望落去…又唔係好似以前個樣…
但之後再望多幾眼…又越黎越似喎~感覺好得意~

講番個行程先，今日係由城門水塘上大帽山再落返川龍，全程15.25公里，
一開始係以極速行完城門水塘段路，上到鉛礦坳，
抖左陣就開始行變態石級，一上就上左幾百米…勁辛苦…
之後成段都舒服番D，不過個太陽間唔中都幾曬下…
去到個亭休息下食下野就再行幾段變態斜路…用左2個幾鐘就上到山頂喇!

全港第一高峰呀~真係唔係浪得虛名…簡直係大地在我腳下…
去到梗係要影下兩個雷達站啦~大帽山o既標誌~
不過最衰係今日D煙霞都幾勁…唔係好望到下面D景…

之後開始落山啦，係一大堆之字路，雖然有捷徑，但其實都快唔到幾多…
跟住一路抖下又行下咁，終於去到終點喇~行左五個幾鐘咋~
然後搭番小巴落荃灣~入M記坐下咁…就返屋企喇…

幾個月冇行過山，好彩今次都冇乜問題出現~但係真係好[支力]囉~
今日雖然係涼番D，但係有時都幾曬，所以都曬到隻手同塊面紅哂…
第一次同網友行，都幾好丫~係一開始行得太快囉…
不過最開心都係見番個小學同學囉…真係冇諗過咁快可以見番面…
我地都係上個禮拜先響ICQ搵番咋嘛…希望之後仲有機會再見面啦~

返到屋企之後第一件事梗係沖涼，之後抖下睇下新聞就食飯~
之後仲要帶住疲累o既身軀出去開舊生會…幾個月冇開過啦…
就係因為咁耐冇開過，所以勁多野要講，一開就開左3粒幾鐘，
返到屋企已經乜都唔想做，淨係想訓覺!

5月11日

母親節~不過冇咩特別節目…送左隻「心心相印」銀紙做禮物~
呢隻唔係普通o既心黎架(而且我之前唔識摺心)…真係勁難摺…

朝早補寫日記，執下相咁，跟住落樓下食飯…
上返黎訓左個大晏覺，正~好耐未試過喇~
之後又再整理下D相就又夠鐘食晚飯…乜今日D時間咁唔見使o既…

今晚又出左扒王食，不過得D母親節同高級牛扒套餐…
咁都平過上次D神戶牛o既…都唔錯啦~

行完山之後o個日都冇乜好做架喇…工作效率又低…冇乜好寫咯…
而且今日行山後遺症一直發作…行兩步都唔想…同埋對手曬到勁痛囉…

5月12日

放完兩日假之後，今日要再拖住疲累o既身軀返工喇~
今個禮拜主要工作係搞好個桌球網，
但係office又唔夠software畀我用，淨係可以寫下D html咁…
有個同事今個禮拜放假，office計埋我得兩個人，即刻靜左好多…
不過反而同個同事開始有D野講下喇~

grad VCD終於執好所有相…
6052張! 844MB! 癲呀…想像下160筒菲林咁多相…
之後就到繁重o既揀相工程…梗係唔會咁多相全部要哂啦~
不過呢樣就唔係我做喇，有同學幫手架嘛~
但係淨係send相畀人都搞左成晚…

夜晚又接到新工作，而且係嚴重urgent，
不過好彩安排到禮拜四五可以響屋企工作~
即係今個禮拜淨係返埋後日…聽日放假呀~

5月13日

今日放假，但係由朝到晚都可以話係工作緊~
首先朝早…同平日差唔多咁早起身…因為約左同學開Grad VCD會議…
其實所謂會議只係得兩個人開…而且個會係響屋企開…
主要係講下D design…layout之類囉…
不過一講到design大家就R哂頭…藝術天份呢樣野真係唔可以勉強…
諗諗下呢…如果抽到時間…我想去學下design…

開完會就會合其他同學去食飯，然後一齊出深水埗睇hardware野~
今次主要係想睇兩樣野…TV Card同印CD label o既printer…
前者梗係自用…後者係用黎整Grad VCD…所以都可以話係工作…
不過其實我都差唔多叫做陪人地睇野…
因為人地滿載而歸…自己就冇野睇o岩…

大家買完野就走啦，搭搭下地鐵突然話上同學屋企，
順便幫佢裝個hard disk，橫掂都有D時間，上囉~
嗯…呢度以前成日上黎架…但係呢幾年都冇上過…都冇乜點變呀~
其實裝hard disk根本就唔使咁多人…所以我都冇乜幫過手…
咁我之前都裝過…不過o個次係好順利…今次就有唔少問題出現…
不過大家都唔係好熟手…成日都「係卦」、「試下啦」…
好彩最後都總算裝到…但係搞到勁遲返屋企添…

夜晚呢…寫個urgent o既program出黎…都係畀hkspeed人用個囉…
呢個都算幾易寫，三兩下散手就搞掂得七七八八…聽日再續…

5月14日

今日返工…個袋重左一截…因為袋多本flash書…噚日響同學度借的…
一路響地鐵裡面勁刨，一日之內睇哂幾百頁…(雖然都飛左好多頁)
嗯…睇黎我D action script都掌握得七七八八喇~
係時候大展拳腳喇~不過都要等我有時間先…

返到office都係搞埋噚晚個program囉…
晏晝又搞下桌球網咁…都冇乜好搞…所以今日都吞左唔少pok…
不過都好o既~難得可以輕鬆下~做番D響屋企唔會做o既野…
例如睇下氣象野咁囉…以前學過D野好多都唔記得哂…
我話哂都對氣象仲有興趣丫~點都應該識多D野~

5月15日

因為要做web design，所以今日響屋企開工…終於可以訓番夠本啦~
朝早睇番D入U o既信，之前一直都未得閒睇…幾驚miss左D interview…
晏晝就正式開工喇…嘩~一個下晝就完成design，幾快~
嗯…其實我覺得個design都麻麻…都係抄番以前o個D…
不過是但啦…個客受就得~而且佢都話唔錯~
同埋呢…我一日做完兩日o既工作…
聽日咪冇野做…可以放有薪假期~正過好多打工仔~

晏晝呢…睇o個個董生個問答大會…好好笑~娛樂性好高~
不過都係倒董班人o個D對話先頂癮~
政治野我真係唔識咁多…不過都趁機吹兩野啦~
其實我真係唔明點解特首可以畀人鬧到一文不值都仲繼續做囉…
名? 佢再做落去盞搞到個名更衰… 錢? 佢唔做實可以搵更多…
真係為左服務市民? 唔好話佢D施政點樣喇…
搞到大家民怨咁勁就一定係佢o既問題啦…
如果真係換左特首…好o既就固然好啦~
唔好o既…大家都冇說話好講啦…原來香港真係冇人o岩做特首…
到時大家冇野好賴…努力工作…令經濟繁榮番~咁香港就有得救喇~~
(以上純粹吹水，與本網立場無關)

5月16日

今日繼續響屋企工作，不過因為噚日已經完成得7788，
所以朝早就已經完成哂所有工作，可以輕輕鬆鬆咁落去飲番餐茶~
晏晝主要係搞個grad VCD o既design囉~
嗯~今日個進度都幾令人滿意~

聽日搞同學之間o既踩單車活動…不過反應唔見踴躍…
我都諗過考完試大家都有各自o既野做…未必得閒去…
但係似乎D人係開始心淡囉…呢排班網討論區仲少post過AL o個陣…
之前仲話過考完之後要成班出黎勁玩…而家有D失望添…
唔知係咪又係因為非典…搞到考完之後大家都冇興趣出去玩…
而家過左一段時間…就心淡起黎…
希望之後會好D啦~

5月17日

今日同同學去踩單車，但係朝早首先要決定去定唔去，
因為預測今日落雨…一起身就上網睇番天氣情況，
原來朝早落左場雨，但係已經停左，但之後又可能再落過…
最後都係決定去囉…唔會咁唔好彩卦…

去到只係見到三個人，仲加一個遲到…真係最少人o既一次…
因為今次人少，所以可以踩得快D，
結果今日破紀錄…唔使兩個鐘已經由大圍去到大尾督!
12.幾已經去到大尾督…真係唔知做乜好…
大家就訓哂響石壆度攤抖左成半個鐘…
雖然有少少曬，但係一直有涼風吹送，都幾舒服~

之後去左間曾幾何時去過o既泰國餐廳食飯，
然後出去搵間單車舖，因為有架單車個轆出左事…
結果話要等個專家黎整，大家呆企左幾個字…
搞掂之後再踩上壩，然後就回程~

見時間尚早，去到馬場之後就去馬鞍山一轉，睇下好唔好踩，
結果一路踩都只係見到D新樓，去到一個迴旋處之後就冇咩好行，
似乎都係冇乜特別…都係返屋企睇番地圖研究下先…
之後沿路返去沙田，去到o岩o岩好6點~

今次雖然踩得幾快下，但冇以前踩咁[支力]喎，
唔知係咪因為上個禮拜有行過山呢?
同埋今次幾好彩囉…成日都冇落過雨…又唔算熱又唔係好曬…
不過呢…呢條線踩左咁多次，我都想試下轉其他路線…

返到屋企沖個涼先，然後即刻落樓下食飯，
係慶祝姨媽做成單大生意之類…
菜色就一般，不過都幾好食丫~
食完返上去…有特備節目：蠟筆小新第35期!
唔知點解…我唔係咁鍾意睇D畫工細膩o既漫畫，
都係簡簡單單，睇完笑下就算咁先o岩我~
不過呢…小新好似突然成熟左好多…以前D衰野都冇哂…

5月18日

望下個月曆，赫然發覺原來今日已經18號…
(其實冇理由唔知…不過係冇留意咁解)
原來考完AL已經大半個月…忙得黎D時間真係過得咁快…
呢幾個禮拜我到底做過D乜野?

我今日就真係乜野都冇做過喇，朝早補寫番日記，
下晝食完飯之後淨係掛住攤抖(單車後遺症)，
想整grad VCD又冇mood，想整網又唔想整，
真係hea到做新聞…然後又訓左一覺…仲訓到唔知醒…

夜晚出pizza hut~返到黎有一樣新任務…寫紀念冊…
話說有個同學響marks checking o個日畀左本紀念冊我寫，
但係一直都未有時間寫…到得閒時又唔記得寫…而家畀人催喇…
keep住本野咁耐…都真係唔好意思…呢幾日抽番D時間寫左佢先喇…

5月19日

禮拜一~又返公司喇…好似好耐冇返過咁…
朝早搞埋個好簡單o既program…執埋D手尾咁…
晏晝又搞另一個網…一堆copy & paste…
都冇時間吞pok喇今日…聽日又放假呢…

今晚原本表哥話上黎…要我教佢整D野…但係甩左底…
咁我又多番D時間可以做自己野喇…
不過最後都係hea左…係寫左幾行紀念冊咁囉…
其實都唔係好多時間架咋我…grad VCD都迫在眉睫…
同埋我想響呢個網兩周年出新版囉…而家都唔使旨意啦…

5月20日

又放假啦~咁o岩科大有個admission talk，咪約埋D同學去聽下囉…
個talk個時間又奇怪…搞到朝早冇乜時間食野就要出門口…
好耐未去過科大啦~原來D小巴裝哂車速顯示器…好得意~
入到去…嗯~又勾起一陣陣o既回憶~科大對於我黎講真係好有親切感~
不過去到就唔係回憶o既時候…因為差唔多遲到喇…好彩都趕得切…

入到去都差唔多座無虛席，等多一陣個talk就開始…
首先有幾個外藉professor講野，好耐冇聽過一連串英文…D倦意出哂…
好彩之後換左個講廣東話，又係上年o day o個個乸型…
不過講D野就唔同o個次喇…今次係著重講科大幾unique，
但係似乎都係講玩o既野多，都唔係sell個department…
嗯…不過佢都講到我有D心動呢~我始終響度中大同科大之間猶豫緊…

個talk完左出面有d project demo，好彩唔係以前見過o個d…
不過介紹o個D人仲怕醜過我地o既…原來係year 1…
跟住仲有茶點招待，我咁肚餓就梗係急不及待食番D野先啦~
其實仲有D Q&A section，不過大家似乎冇興趣…走囉…

出返九龍又要搵野食，同埋有同學又話想去深水埗睇mon，
結果去左西九龍食，之後入左黃金一陣就走~

今日開始研究grad VCD o既video部份，不過基本上都冇乜進展，
係技術上o既問題解決唔到囉…唔理喇…
跟住又要搵software黎整singcon MV，呢個係VCD重點項目黎架~
不過剪片真係一樣煩到嘔o既野，一整就成部機就hang咁款…
但係呢…我暫時只係執左兩段片仔放入去，個效果已經唔錯喇~
我覺得整完呢個MV之後睇番呢，係會感動到喊~~

5月21日

今日又到工作真空期，之前D野搞掂得七七八八，後面D野又未黎到，
結果斷斷續續咁吞左唔少pok，可以上o既網都已經上哂，悶到不得了…
5.幾左右黎左兩個舊同事，一男一女，
之前同佢地都唔多熟，所以黎到就搞到我唔多自然咁…

跟住放工成堆人一齊走，走下走下淨低我同呢兩個舊同事一齊搭地鐵，
期間兩個人鬼死咁親熱，我又唔知有乜可以同佢地講，
一直由觀塘望住佢地兩個親熱到荃灣，都真係幾無奈下…

夜晚差唔多用左整晚黎搞個singcon MV，
剪完一輪試下output條片出黎睇下得唔得，點知一搞就兩粒鐘，
又唔可以做其他野，結果都係留守左響chatroom…

舊同事甲：「喂，你D野都可以響屋企做啦，使乜返office做o者?」
　　　　　「一日$xxx?有冇刻薄D呀?」
呢兩句我諗左成晚，其實我而家一日都要用兩個鐘黎搭車，
話就話可以訓覺同睇報紙，不過兩個鐘其實都真係做到幾多野…
打去同個同事傾，未來一段日子都應該可以響屋企做o既…
不過講到話6月情況有變…同埋到時可能乜都要做下咁喎…
但係我最初只係expect做一個programmer囉…
不過又諗諗下…學多D野對自己實有好處o既…
至於人工方面…話就話唔介意…不過…唔通做左半個月先黎呻咩?
唔知呀…再做落睇下點先囉…目前都冇乜問題o既…

5月22日

今日返到公司又係冇乜野好做，差唔多係最少野做o既一日，
朝早執番D網頁o既手尾，下晝基本上都係上網、上網同埋上網，
仲有係準備wic英文版囉~咁又一日…

返到去又係執執個MV咁，同埋又響chatroom斷斷續續咁講左兩個幾鐘，
主要個話題係講下點樣分配時間…
呢排響公司就悶到死，返到屋企就超忙，真係就黎人都癲…
不過好彩聽日又可以響屋企做野喇~

5月23日

今日又響屋企開工啦~不過朝早都好似冇做過乜野咁，
搞搞下flash就出左去食飯~約左個網友一齊食~
一來係考完試見下面~二來係還番之前借過o既漫畫~三來係周圍行下~
去左沙嗲王食左七十幾蚊野…飽到不得了…

之後去左南豐睇左陣電話…我都想換呀…不過都唔急o既…
然後過左圖書館睇下有咩書好借囉~我都勁耐冇去過…
見到本《全球熱帶氣旋預報指南》，都幾得意，借番去睇下囉~
跟住散band啦~快快趣趣工作啦…我仲賺緊人工架…
嗯…講開…唔知係咪因為耐左冇見…或者返工返到個人吽左…
今日大家好似生疏左好多咁…唔知呢…

雖然出左去咁耐，但我都做左唔少野架喇~總之D錢唔係白賺架啦~
晏晝搞掂哂D野，夜晚就可以輕鬆下啦…不過似乎都唔多輕鬆…
有兩樣野要解決囉…第一樣係班網有D爭拗囉…算係搞掂左啦~
之後仲有舊生會…個郊遊活動又冇人參加…要延期…都預左…
不過…其實講真丫…咁樣o既舊生會我都真係冇乜心機再搞落去…
但係無論點都唔應該咁冇責任感o既…盡量拉下人去囉…

5月24日

噚晚同人ICQ傾到2.半先訓…都係keep住訓8個鐘啦~
朝早執舊生email，準備再宣傳過舊生會活動…
之後開始整個powerpoint，中大info eng面試之用~

我已經定左禮拜六係運動日，上個禮拜單車，再上個係行山，
今日就同網友出又一城踩冰~今年第一次踩~
上到去…排哂隊…真係未見過踩冰都要排囉…
不過佢係夠鐘先放人入去o者…其實都唔算真係好多人…

今次都keep到以前D功力，唔錯~係趴左一野囉…
但係我就老喇…之前都未試過踩冰可以踩到腰骨痛…
可能係我今次踩得太盡卦…不過都唔算好[支力]o既~
兩個鐘…時間o岩o岩好啦~但其實可以試下海濱…要揭開冇人去之謎~

原本諗住今晚出去睇西裝…grad din要著…
不過最後都係決定嘆住冷氣睇1:99~好耐冇試過睇咁耐電視~
哈~我竟然對唱歌o既節目先咁有興趣…真係估唔到…

5月25日

朝早繼續搞個powerpoint，大致上都完成啦…
基本上都係抄番JUPAS個personal statement…是但啦…
午飯過後就出發去港外線碼頭…今日係南丫島之旅~
話說阿媽幾個禮拜之前已經話想我帶佢行下南丫島，
不過一直都就唔到時間(或者受天氣影響)，
今日咁o岩舊生會活動延期，終於抽到一日時間出黎喇~

原本呢時間都幾充裕…不過有人響地鐵站盪失路…阻左唔少時間…
不過好彩都趕到3.班船去索罟灣~
上次黎呢度…咪18歲生日o個日囉~幾令人懷念~
今日又係行番上次條路線囉~老少咸宜嘛~

去到索罟灣…嘩…好多人…真係有唔少本地遊過左黎…
不過好彩上左山路就少番人…如果唔係以為自己響市區…
雖然噚日踩完冰，不過好彩條路唔難行，一路行都冇乜問題~
大概兩個鐘就去到洪聖爺灣…hea左陣先繼續起行…
之後開始有一陣陣雷聲，冇幾耐就開始落雨…而且越黎越大…
我同細佬兩個人一把遮…行左幾個字已經成身濕哂…

響最大雨o既時候終於去到間海鮮酒樓，即刻坐低食飯啦~
嗯…呢度D海鮮出名好食…同埋貴…果然係名不虛傳…
椒鹽瀨尿蝦! 辣酒煮花螺! 淨係呢兩樣已經正到不得了! 當然其他野都好好食~
不過最衰係貴夾唔太飽…返到屋企都要食番舊麵包頂肚…
食完剛好有船，話咁快咁返到屋企~首先一定要沖涼~
之後個人好眼訓…冇做過乜野就訓咯…

5月26日

假期後遺症今日完全發作! 一路行想話跨大步D對腳都好痛…
所以基本上成日都冇乜點走動…不過今日係要返工呢…
但係返去為乜呢? 唔知道…因為全日都冇人assign野畀我做…
結果係嘆冷氣啦…整wic啦…ICQ啦…總之應有盡有…
唔好話我懶呀…咁我都唔想架…好過就咁坐響度咩都唔做啦下嘛?

返到去，諗住享受美好的晚上，然後聽日同網友盡情唱K…
點知食食下飯突然收到來電，係舊生會幹事提我聽日要返學校做野…
個心簡直就好似噚日個天氣咁…由風和日麗突然變成雷雨交加…
結果期待以久的唱K活動就去唔到喇…仲要今晚要忙住搞舊生會野…

5月27日

朝早搞wic個路徑圖已經搞左成朝，然後食完晏就要返學校搞舊生會野…
話說今日係F.5 forever，我地就係返去宣傳舊生會順便踢人入會~
上次返學校已經成兩個半月前的事，真係好期待睇下學校變成點~
可能係太耐冇返過到去…去到差D入錯門口(之前個入口移左位)…
去到首先搵番舊生會主席傾返兩句，然後就出去影印會員form，
跟住要去校工室借部鍘紙機返黎將d form一開二，不過搞到勁雞手鴨腳…
期間見返D miss阿sir，可惜冇乜時間同佢地打招呼…
同埋可能太耐冇見…就算見到都有D怕醜咁…

搞掂D野就上hall，然後就要set個counter準備畀D入入會…
不過又要check form，又要整咭，個程序係點都要傾一大輪先搞掂…
之後仲要拉多幾個F.5 o既入黎幫手，真係辛苦哂…
搞掂哂D野都仲有唔少時間，可以慢慢欣賞下節目~

望住今年o既forever，就自然諗起我地兩年前果個…
o個日呢…石圍角咪有單槍擊案o既…個賊唔知匿響邊…大家都有D驚架…
不過真係好難忘，好好玩，好感動囉~
睇番而家呢個，個情況好似比較混亂…而且冇感動位…
可能考完CE同考完之後搞o既forever…大家心情都唔同啦…

到個節目break o個陣就開始有人黎入會，不過反應未如理想，
因為主席希望有100%入會…但係講真…邊有可能呢…
佢仲嗌埋其他miss阿sir，同埋自己一齊呼籲大家入會…
最後…收到50個左右啦…算係咁啦…
(但我返到屋企唔知點解淨番10張form…其他果D唔知放左響邊…驚…)
不過唔知點解我地o個屆可以咁勁…一個grad din就收到100個…

大概7點…大家落哂去BBQ果陣…我地執埋D野先終於走得…
之後仲有免費車載大家落地鐵站~唔該哂~(不過最好車埋入麗城)
夜晚又係超忙，首先同舊生會同hkspeed人夾埋傾左個幾兩個鐘電話，
跟住又要ICQ同人傾工事(當然都夾雜D閒計)，
而且wic討論區搞左單爭拗出黎，又要發表下意見…
完成呢堆工作之後…已經係2.半…好彩聽日唔使返office…

5月28日

由今日開始，我暫時都係響屋企工作，順便又可以做下自己野喇~
朝早都係補寫番日記先…再上一上網就已經夠鐘食晏…
之後做左少少公司野囉…都未assign到…跟住都係搞自己野…
今日再做下grad VCD o既design啦，時日已經無多…
睇黎要將多D時間放落隻碟度先…

咦? 之後我做過乜野呢? 好似又係處理wic討論區o既事…
夜晚呢? 好似冇做過乜野咁o既? 冇理由架…點解D時間過得咁快o既…
定係我失憶…做左乜都唔記得? 唔好嚇我…

5月29日

今日係完完全全咁放緊無薪假期，因為成日都冇人assign野畀我做…
結果就梗係做返自己野啦~畀多D假我放仲好呀~
咪繼續搞個grad VCD囉，長命工夫長命做呀…
係晏晝落左去飲茶囉…好耐未試過咁多人啦~(附近有間茶樓執左)
不過最衰係客人多左…伙記就冇多番…點做生意架…

夜晚呢…出左新都會揀西裝…因為我阿姨之前響果度睇過…
今日阿婆都出去畀下意見，所以方便D就飛左的去…
個的士佬講左句野幾精警，係關於信教的：
「D人成日話耶穌係佢阿爸，我話你都痴線o既！
　白種人點樣可以生個黃種人出黎呀?」
對於宗教野我冇乜comment，不過覺得幾好笑，故記錄之…
(不過後尾諗諗下，猶太人係屬於白種人定黃種人啊?)

講番西裝…grad din規定著西裝，所以點都要買番套…
嗯…新都會…好耐未試過仔細咁行過，同兩年前真係差天共地…
連以前返暑期工個入口都唔認得左…我響度返過兩個月架…
等埋阿姨放工就入左間野度睇…之後左試右試，
揀左件淺藍恤衫，黑褸黑褲，嗯…第一眼望落去勁怪…
而且著落去個感覺唔係好舒服…我始終都係唔慣著呢D…
不過最後都係揀好左呢套，價錢都真係幾驚人…幾多就唔講喇…

之後去左間幾高格調的西餐廳食晚飯，但個價錢又唔係好高格調，唔錯~
不過大家o既胃口都唔係好大…個個都畀哂D野我食…好飽…
食完上去阿姨度參觀下，嗯…我返暑期工時都間中黎呢度…好懷念~
(o個陣我返工果度同呢度係隔左兩層，但都係同一間公司)
hea左一陣之後就搭小巴返去啦~

成日諗住夜晚早D訓，結果都係唔得…
今晚已經盡量唔做其他野，但係又講左個個幾鐘o既電話，
跟住同個網友響ICQ探討一D心理上o既話題，
一講之下又已經2.半…真係想唔爆瘡都唔得…

5月30日

無驚無險，又到星期五~
起身冇耐就落左去飲茶，返上到已經成1點，諗住要拿拿臨開工啦，
不過要做o既野又唔清楚，打去問個同事又出左去，結果兩點幾先開工…
今日都係執番公司D script，同埋為一個六合彩網站更新番D野…
嘩…乜六合彩都可以成幾十種玩法…嗯…我更新呢D網唔算犯法架嘛?

夜晚繼續grad VCD，開始執D細節野，所以都冇乜大進展…而且冇咩好講…
開始收番同學幫手執o既相囉…原來佢地剷相都剷得幾狠…淨低都唔係好多相…
不過我都要go through哂一次D description囉…點都要盡量整得好笑D啦~

聽日有神秘任務…要早D訓啦~

5月31日

今日進行神秘任務，基於呢個任務真係好神秘，所以係咩都唔講得…
總之係夜晚先返到屋企啦…超[支力]…

成日冇上網，又有一堆事務要處理，包括公司D野，真係禮拜六都忙成咁…
其他野都冇乜好講喇…夜晚d時間真係過得快…寫到呢度先…

等呢個任務可以公開之時，我就會update番個日記喇，請拭目以待！

2001 6 7 8 9 10 11 12 月

2002 1 2 3 4 5 6 7 8 9 10 11 12 月

2003 1 2 3 4 5 6 7 8 9 10 11 12 月

2004 1 2 3 4 5 6 7 8 9 10 11 12 月

2005 1 2 3 4 5 6 7 8 9 10 11 12 月

2006 1 2 3 4 5 6 7 8 9 10 11 12 月

2007 1 2 3 4 5 6 7 8 9 10 11 12 月

2001						6	7	8	9	10	11	12	月
2002	1	2	3	4	5	6	7	8	9	10	11	12	月
2003	1	2	3	4	5	6	7	8	9	10	11	12	月
2004	1	2	3	4	5	6	7	8	9	10	11	12	月
2005	1	2	3	4	5	6	7	8	9	10	11	12	月
2006	1	2	3	4	5	6	7	8	9	10	11	12	月
2007	1	2	3	4	5	6	7	8	9	10	11	12	月