5月8日 |
| 今日係我o既17歲半生日，梗係要放假大肆慶祝~ 首先下晝落樓下飲茶，跟住約左同學去游水~ 去到城門谷門口…驟眼望下以為冇乜人， 點知行埋先見到打哂蛇餅，塊顯示板寫住入面有700幾人… 跟住個職員話要等兩個鐘先入到場… 為左唔好浪費時間，就決定改去北葵涌游， 行左幾個字終於去到，嘩，呢度極少人， 出到個池就知道原來設施同人數係成正比… 呢度只有一個訓練池同一個主池… 平時戴眼鏡去游都冇事，點知今次無啦啦畀救生員話叫我除低， 搞到全程都矇查查…好彩冇撞到野… 唔知係咪因為以前去D嬉水池可以嬉下水， 今次就真係去游o既關係…游左半個鐘已經好[支力]， 嘗試多次一次過游哂成個直池都係失敗… 而且又經常扭親手腳，臨尾仲因為唔夠力游搞到狂吞池水… 游左約兩個半鐘，已經[支力]死， 就搭車返屋企抖陣，然後再落樓下大家樂食飯… 夜晚同D應屆會考生傾會考D野…不知不覺間傾到過哂時， 搞到自己功課都做唔切添… |
| 最後一日冬令時間表，過左呢日之後就可以勁早返屋企食飯喇~ 朝早點名時間o個20分鐘就用左黎調位， 雖然我已經冇做班長好耐，但我仍然係「座位顧問」， 次次調親位都係搵我黎搞… 今日又破最高氣溫紀錄，差0.1度就足30度， 所以我都搵盡機會歎冷氣~ 小息入staff rm搵miss順便傾下計傾到夠鐘上堂… 跟住lunch去M記試新新口味食完仲坐多幾個字… 講開又講…個牛扒疊蛋飽都幾得意，再有機會的話我都會再食~ 嗯…聽日會考第一日，學校要借試場， 所以有一日假放，夜晚就懶懶閒咁乜都冇做~ 順便都祝各位要會考o既朋友考試順利啦~ |
| 今日係會考o既第一日，原本就應該唔關我事o既， 不過因為今日係考英文，成間學校要借出用黎做試場， 所以放假一天~~好耐未試過唔較鬧鐘起身喇， 不過都只係訓到10.半… 起身冇耐有電話打黎，話阿婆o既病唔係我地當初想像咁嚴重， 咁都好彩…等我地噚晚仲為左件事諗咁耐… 日頭都冇咩搞作，淨係掛住同人傾下今日份試題， 好似我都有份考咁… 下晝約左同學去蕙荃打羽毛球， 計落都應該已經有好幾年冇去過o個度… 嘩，去到一個正式o既羽毛球好似會打得勁D咁， 起碼好過響學校個covered playground…成日撞頂… 初頭打左半個鐘已經超[支力]，後尾走多兩個人黎打雙打， 最後打完兩個鐘又唔覺好[支力]，不過隻手起左枕… 打完之後去左醫院又再去探下阿婆，竟然聽錯層數… 好彩走去到問下個護士，如果唔係戇居居咁搵勻全層都似… |
| 為左準備寫份去旅行plan(詳情請睇此日記) 所以食完午飯後就過左海聽一個旅遊講座， 不過去到竟然全場爆滿，搞到要企響度聽… 我初頭諗住可以了解一下去邊度旅行好同埋有咩要注意… 點知個講座原來係旅行社宣傳時間， 經常強調即場報名減幾多，每餐飯又有幾多[食送]一湯咁… 不過都總算拎到D資料，但都係未決定到去邊… 聽完講座就搭地鐵返荃灣準備舊生會例會， 去到等左好耐先得一個人黎左， 我仲以為做咩個個都遲哂到， 點知主席打黎，原來改左地點我唔記得左… 唔怪得冇人(另一個黎左o既都係唔記得)… 初頭諗住係一路食晚飯一路開會，所以屋企冇煮我飯， 點知個會開左半個鐘就開完，唯有同其中兩個幹事一齊食飯… 去到間麵檔食左個牛腩麵…食食下發現麵裡面有條繩… 好彩直至截稿前都仲未有咩身體不適… 食完去等車返屋企，等左一陣都未到，原來miss左一班， 後面突然有個中年男子不斷同我搭訕： 「X你老X，而家咁夜邊有人去睇樓架， 好心就駛走D睇樓車啦！你話係唔係喇?!」 「em..係啦…」(點頭) 「X你老X丫，乜架車咁耐都未黎o既， 上一班車個司機成日都早走o既，你話係咪離譜?!」 「係啦…」(點頭) 就響呢個時間我突然諗起警訊o個D街頭行騙案片段， 於是下意識咁用手噤實D銀包、電話… 「真係X你丫，好心董建華就唔好連任啦， 中央任命佢都可以唔做o既o者?你話係咪啦?!」 「係…係…」(點頭) 「你知唔知以前荃灣間八佰伴響邊?係咪荃灣廣場?」 「o個間係吉之島…」 「啊係喎…o個度係吉之島…唔該哂喎可！」 最後一班車就響呢個時間到達，上左車之後， 又聽到中年男子同某師奶搭訕：「哎呀…呢隻奶粉唔好架……」 |
| 今日英文堂要抽number逐個行出班房面前講oral， 諗住出黎講野都有返咁上下經驗就應該冇乜問題， 不過仲未到我時緊張度都不斷上升， 到我真係出黎講都係幾窒下囉… 放學左又要留響石圍角食飯，跟住返學校開會， 然後"hea"左好耐四點半返到屋企， 上左陣網就走去訓晏覺， 食完飯想寫下情信但又唔寫得幾多隻字… 嗯…呢排都冇乜野做，到底我應該寫下網頁好丫， 定係溫下書好呢? 近幾日都冇乜野做咁~ |
| last兩堂PE堂又係打波，雖然我同個個同學都傾得埋， 不過就係打親波就永遠搵唔到一個長期partner， 唔通成班30人裡面都真係冇人可以同我做到知心朋友? 響「大致天晴，氣溫30度，紫外線指數11.6，強度屬於極高」 o既情況下上PE堂都咪話唔辛苦，不過打打下波， 突然見到有條彩虹，仲要係圍住個太陽成270度， 真係勁壯觀，好想即刻影低佢，無奈相機響課室度… 跟住都已經忘記哂炎熱o既天氣，掛住望住條彩虹~ 可惜佢成日畀舊彩虹邊的雨雲遮住，仲有消散o既跡象… 一落堂就即刻換衫跑上去拎相機，好彩條彩虹仲響度~ 放左學就飛的去同學屋企幫手搞電腦D野， 之前買左個麵同壽司上去食(唔知今日使左幾多錢)~ 跟住就一直搞到5點幾，搞掂就返屋企趕住溫applied， 不過成晚都唔係溫得好熟咁囉…仲係未到狀態… |
| 朝早終於都有返D雨，而且雨勢都唔細下， 如果可以再落大D就好啦~ 成日返學都冇乜野發生過，無驚無險就夠鐘放學， 今日歷史性可以1.3放學即刻返屋企食飯~ 下晝好得閒咁上網，可惜係咁畀人屈我請食飯..-_- 之後就繼續溫埋D applied，但溫溫下又訓著，真係冇心機溫… 訓醒又拎本atlas出黎研究下歐洲之旅o既路線， 暫時諗住英國→法國→瑞士→意大利→奧地利→德國→…… 我諗而家都差唔多時候計劃行程喇… 夜晚想溫書但又掛住睇電視，死喇，呢排要追劇集，點算… 好彩下個禮拜播包青天，實唔使追啦~ |
| 一起身又出黃雨，不過出面一滴雨都冇… 其實都諗過下如果有紅雨就唔錯，可以抖返日~ 不過事實上所有暴雨警告響上堂前已經取消左… 英文堂派返D之前做o既project， 我地o個組有Best Language大獎， 不過其實都係多得D組員，老實講我今次都唔係付出太多… 獎品係全組Melty Kiss一盒，我要用成個筆袋裝住， 但拎返屋企已經溶左D，果係並非浪得虛名… 今日測applied，表現都唔錯卦， 冇乜人prove到o既我都prove到，犀利呀~ 放左學又要留響度食飯，因為應承左幫人教dreamweaver， 其實我都唔知我點解會應承，其實我根本唔係好識用， 而且今次係用mac機，原來mac機係咁難用… 對於一個長期微軟使用者黎講真係極唔慣， 直情係要人地教番我轉頭… 不過今次都畀我學到D野，都值得o既~ 4點搞掂個dreamwever班，跟住走落去hall見到有人搞緊drama， hea下hea下搞到6點鐘先返到屋企，然後又訓晏覺… 最近又再發現同學間o既關係又好似唔係咁好， 而且情況好似擴展到全班，呢排都經常聽人講其他同學的是非， 雖然我都因為八卦而有興趣聽， 但其實我就真係唔想同學間有咁多不滿同埋怨， 我都唔知係因為以前察覺唔到定係大家上到中六先係咁… 有時為左呢D小事搞到自己有D野好難做囉， 真係希望見到大家係真心地一團和氣，而唔係咁表面囉… |
| 朝早起身上左陣網就去荃灣廣場準備睇《蜘蛛俠》， 去到我係最早o個個，結果等左半個鐘先差唔多齊人， o個陣我先明白點解套戲12.2開始但約就約11.半… 嗯…都好似已經好耐冇睇戲…呢套戲都幾好丫… 睇完之後成班人走去唱K，我就一個人走去哈X斯極速食左個餐， 然後搭地鐵去灣仔去聽個旅遊講座。 去到灣仔站個講座應該已經開始左， 我就再極速咁跑去講座o個度…但距離個站勁遠， 跑左好耐先跑到去…結果搞到身水身汗，但原來個講座都未開始… 今次個講座比上個禮拜o個個有用好多， 佢派左成疊去歐洲旅行o既資料，仲詳細介紹法國有咩地方好去， 不過個講座實在太豐富，講左兩個鐘都仲未講完， 我又要趕住返荃灣開會，所以都聽唔切佢講完就已經走左… 個會係6點鐘開始，但我6點鐘都仲響灣仔， 結果就揀左搭極速小巴返荃灣，不過都要7個字先去到… 好彩個會都仲未開完，如果唔係就真係白走一趟… 開完個會去沙X王食晚飯，個咖哩炒飯都唔錯~ |
| 今日係一年一度o既母親節，不過冇乜特別慶祝活動， 都係做番指定動作－飲茶…今日仲要一個人享受落茶樓等位o既滋味… 不過都係等左半個鐘就有位，比我預期中快~ 飲完茶返上樓做功課，然後夜晚又再落茶樓食飯… 今餐都算幾豐富下，食飽飯又繼續做功課…咁就係母親節的一日(都頗悶下) |
| 又係一個星期o既開始，通常禮拜一都係特別眼訓， 而且頭三堂係連堂phy，我諗我一定訓到唔知醒… 不過三堂竟然咁輕易過左，之後o個幾堂都冇點訓~ 第三堂派phy卷，一睇，嘩！合格呀！犀利！ 而且直到而家為之我都未發現有人高分過我，好勁呀我… 如果pure可以好似phy咁就好喇~ 放左學又試咩都唔使做，趕快返屋企食飯然後進行歐洲資料搜集， 夜晚細佬要整網頁所以我就走左出去作情信， 想臨訓幫阿爸印張野順便寫日記，點知部機被劫到12點先用得， 此時已經極其眼訓，但部機竟然連hang兩次， 印張野又印到大半停左，真係極其考驗EQ o既時候… 唔寫咁多喇，廢事寫寫下又hang機就真係煩… |
| 今日返學都冇乜特別野發生，英文堂原本唔記得帶呢樣做o個樣， 結果都畀我順利過關，放左學又即刻返屋企食飯~ 下晝成日都係計劃歐洲之旅o既行程， 用左幾個鐘先搞掂倫敦o既行程，期間發現原來倫敦D旅遊點都好早閂門， 搞到個行程趕到不得了，如果可以去的話都真係要事前操fit一下… 成日個天都係幾昏暗下，無啦啦就落一兩場雨， 黃昏時見到一舊舊黑雲飄過黎，不過始終都係吽唔出大雨… 夜晚又諗如果聽朝一開電視見到紅雨就正，可以放番日假~ 不過而家pure又教唔切書，聽日仲要補課， 如果聽日真係唔使返就實要搵多兩日黎補…盞搞… |
| 朝早鬧鐘一響，望下個天，一滴雨都冇， 走落床即開電視，未有畫面已經聽到「間中有雨」… 左上角果然只係得個白雨logo…算啦…今日都有堂空堂… 空堂見有個參加左個旅行比賽o既同學係咁響圖書館摷書， 嘩，o個位同學去西藏喎，我去歐洲咪勁「行」? 唔緊要啦，我靠資料詳盡取勝嘛，不過圖書館原來係咩資料都冇… last兩堂係pure，跟住食完飯返黎又係pure， 即係今日total上左160分鐘pure堂，真係唔[才羅]命就假， 好彩之後有得響冷氣室上堂，都算有D得著… 不過miss唔知為乜事教得超快，一日內已經教左20版， 又狂印野畀我地，完全唔知發生咩事… 今日執筆寫巴黎，睇網站時要狂譯法文，真煩… 噚日發現倫敦景點早閂門，今日發現巴黎博物館鍾意閂星期一二， 我仲咁o岩揀禮拜二去巴黎，結果寫左幾個鐘都寫唔到一日行程… |
| 今日天文台預測嚴重失準，原本話下晝雨勢有時頗大， 結果天晴到不得了，仲要上PE堂，熱到死… 望下個天，又望到個彩虹(其實中午見到o個D唔應該叫彩虹， 不過我就唔知叫乜)，上堂PE又見到，真係咁o岩… 食完飯繼續計劃旅遊行程，今日係去尼斯(講到好似真係去緊咁)， 似乎一路去D資料就越難搵，結果都係一日先寫到一日行程， 即係我大概要下個禮拜先寫哂… 某同學呢兩日都悶悶不樂，成個人吽哂， 但之前都唔覺佢有唔妥，想去關心下佢睇下佢係咪有咩事， 不過又冇機會同佢傾到(其實係唔知點同佢講好)… 某網友呢幾日都冇上過網，雖然佢考緊會考， 但之前佢都係日日上網，想打個電話睇下佢係咪有咩事， 不過又唔想阻住佢溫書(其實係唔知打去講咩好)… |
| 下晝中化測《沉淪的國土》，本書睇左成個月終於都用得著， 不過睇完D題目，發覺其實睇左同冇睇都係冇乜分別的… 結果有成題係差唔多完全冇refer本書黎做…都畀我寫到大半版紙… 放左學就係期待而久o既電腦學會o既慶功宴，今年個會淨賺幾百蚊， 結果miss就拎左呢筆錢黎請大家去pizza hut食飯， 原來八個人三百幾蚊都可以食得勁飽~ 食完某同學話去唱K，我見禮拜五都冇乜野做就跟埋去啦， 點知佢d friend又甩底又剩，結果搞到唱到7點先完… 雖然今日都唱得幾盡興，不過無啦啦就使左幾十蚊， 有D對唔住自己添… 返到屋企見到部新電腦已經進到黎，呢部機係畀細佬用o既， 我就要用返而家用部機成日hang o既機， 不過而家仲未上得網，夜晚細佬要上網就交換機黎用… 用用下發現部機真係好正，將來上到網仲可以裝webcam， 不過始終部機唔係我o既，都唔可以想點就點… 真係想快D換埋呢部機，而家呢部機個mon好暗呀… 今晚D時間唔知點解過得特別快…旅遊計劃完全寫唔到… o下? 乜而家已經一點半架拿… |
| 前一晚同同學傾ICQ傾到兩點幾，所以今朝冇較鬧鐘起身， 可惜畀個電話嘈醒左，仲要唔知個電話放左響邊… 下晝接到電話話要出地鐵站拎件banner返屋企， 準備禮拜一舊生會足球比賽用，落到樓下先落雨， 我把熟仲漏左響學校…好彩等車都有地方畀我避下雨… 返到黎繼續計劃行程，今日寫到米蘭同佛羅倫斯， 不過進展仍然緩慢…睇黎我個「超級notes計劃」都要繼續押後… 夜晚ICQ有人問我wic D野，我先醒起我原本o既五月大計 同而家已經差好遠，當初諗住豐富下呢個網， 又整好新版wic，結果而家掛住寫個旅遊計劃都已經用哂D時間… |
| 今日係佛誕，而且係阿婆生日，為左慶祝呢個咁重要的日子， 所以實行全線大飲茶，下晝同夜晚分別去兩間酒樓食飯， 首先下晝落樓下飲，跟住買左幾件衫，然後上黎繼續寫旅遊計劃， 原本諗住寫D之後溫pure，點知一寫就寫到夠鐘食飯… 然後就搭免費車去荃灣廣場o既X海，食左餐勁豐富的晚餐， 不過D服務就差左喇，但都好彩有個勁搞笑o既lego頭侍應補數~ |
| 今日係舊生會足球比賽，一早就出門口返學校… 上左車先記得我漏左野未印，不過算啦，都係返左去先算， 遲到一分鐘要罰一蚊，點都返左去先算… 諗住搵個住石圍角o既幹事幫我印左佢， 點知佢部printer又冇墨，跟住大家搵左好多人都搵唔到人幫到手… 結果要走上某個唔識的同學屋企去印… 返到球場比賽已經開始，我今日係負責做攝影， 不過成個球場咁大都唔知點影…求其影左D算數， 想影下入波o個刻但完全係好難夾o岩時間， 加上我部相機比較傻瓜，所以都係影得麻麻… 今日整體上個比賽都算run得唔錯，不過都係有D小問題或者小爭執… 加上食完午飯就開始落雨，搞到情況有D混亂， 最慘係班人拎返D野返學校竟然跌哂D筆落坑渠， 搞到要我執返佢地黎洗…返到屋企仲要發現唔見左支筆… 不過今日個比賽都總算順利完成，但六月仲要搞埋個決賽… 夜晚無啦啦雷電交加，搞到成個屋D電器閃左一閃，幾驚停電… 跟住仲出埋黃雨…見出面閃電閃得咁激， 想影下閃電o個刻但完全係好難夾o岩時間， 加上我部相機比較傻瓜，所以係一張都影唔到… |
| 今日係勁夏天feel o既一日，一早起身已經有28度， 雖然冇乜落雨，但係濕度勁高，返到學校已經成身濕哂， 跟住上堂發覺張檯都濕埋，而且噚日去完個勁多蚊o既球場， 搞到今日對手勁痕，望唔望原來成手都係紅點，嚇得我… 放學返黎繼續搞旅遊計劃，搞搞下先發現財政嚴重出現問題， 搞左一輪先砌番好條數，真係想拿拿聲寫完篇野， 仲有舊生會一堆野積住都未做，夜晚溫pure又溫唔切， 臨訓阿爸叫我幫佢打一堆野，根據過往經驗， 打呢堆野起碼都要五個鐘，睇黎份超級notes都係妄想… |
| 今日測pure，唔知點解呢科硬係冇乜心機溫， 可能因為平時上堂都聽得明，所以比較鬆懈， 但其實3科AL最差係呢科，但始終都係冇心機去溫… 結果今日都係唔識啦，加上下面又打樁(其實唔多關事)， 如果今次測驗合格就真係要還神啦… (上學期測驗我都係咁講，結果係肥到七彩…) 返到去用最快時間搞掂舊生會D濕碎野，然後寫埋旅遊計劃， 而家已經到左尾聲喇，去到最後一站德國啦，快D寫完就快D準備考試~ 夜晚部機被佔用，已經冇乜野可以做，突然又雷電交打，就拎住部機狂影， 影左成300張終於影到約30張影到閃電， 仲有張影到成條o個隻(不過o個張太矇)… 相信經常咁樣影法對訓練反應力係好有效~ |
| 頭兩堂空堂主要都係訓下覺，睇下雜誌黎度過， 之後o個個空堂畀阿sir捉住話要我幫佢執相， 話燒隻碟畀我叫我響出面等，結果o個堂就黎完都未燒好， 呢堂空堂結果就係白白咁響地下個走廊等左成堂…原本仲打算去圖書館歎冷氣… 放學之後要考oral，食完飯返學校等左勁耐先開始， 今次個題目都唔算太難，所以都算考得唔差啦， 而且好似冇咁緊張，但始終都係有D窒… 呢排都係放學返黎就寫旅遊計劃， 夜晚就畀細佬用機，但佢就次次都用到11.幾， 結果為左臨訓寫日記而搞到好夜先訓，所以返學就釣哂魚… 今晚我仲有唔少野要印，又係11.幾先用得機， 仲要想印野o個刻部printer食左支咪， 點扯都扯唔到條線出黎，結果細佬用左成個鐘先搶修完… 再印，結果係word有問題，細佬又話要用機先，唯有叫做用完摷醒我畀我印… 跟住我已經極度眼訓，就即刻走上床訓著… 響兩個鐘之內我不斷被叫醒，但唔係佢用完機，而係問我網頁點整… 最終都響2.9話我知做完喇，我走落床搞左一輪先令部printer開始印， 結果出黎o既結果係：冇墨。枉我等左咁耐… 不過只係冇黑色墨，我諗住轉哂D野做彩色就冇事啦， 點知轉哂之後部printer又發左神經，最後咩都印唔到… |
| 噚晚搞一大輪野，朝早超級眼訓，不過好彩上堂都唔係訓得好嚴重… pure堂派卷，已經有哂心理準備今次唔得架喇， 雖然都係唔掂，但結果都比我預期中好， 不過miss突然走埋黎問我呢排係咪好忙呀? 又話考試要畀心機溫書喇…F.6唔可以好似以前咁懶散喇…等等， 而且佢只係同我講，而冇同其他成績低過我o既同學講， 似乎miss對我都有一定期望，所以我聽到佢咁講之後都幾慚愧… 所以我下定決心要響final exam考好pure! 唔好衰畀miss睇! 更加唔好衰畀自己睇，要提高對自己o既要求! 經過噚晚部printer發神經同埋pure派卷之後， 今日o既心情都唔係咁好，不過噚日又約左網友晏晝去唱K， 我曾經諗過放棄唔去，響屋企吽下算， 而且上個禮拜又唱過K，又就黎考試， 但最後都係決定去啦，當散下心都好， 唱完之後第二日就真係認真準備考試啦~ 不過去o個陣都仲有少少內疚感添… 約左3點等，逾時不候，結果我遲左半分鐘， 去到一個人都冇，嚇得我，原來係個個都遲到… 結果3點半先齊人，今次係去energy，印象中係未去過， 呢度個畫面正D，服務差D，歌就…我都唔知新D定舊D， 想唱o既新歌冇得唱，但從未聽過o既新歌就大把… 結果唱到8點半，足足有五個鐘， 加上我今日不斷扮女聲，唱到把聲沙哂，完全出唔到聲… 跟住去大X樂食埋晚飯，返到屋企已經10.幾… 好耐都冇試過玩得咁盡興喇~ 不過聽日就開始收拾心情，迎接考試! 距離考試仲有17日~~ 下面係一部超舊型幻燈機，出現於今日中化堂， 仲要搵六本中文書托住先得，你話搞唔搞野? |
| 禮拜六唔較鬧鐘，但朝早畀兩個電話嘈醒左，結果11點起左身， 然之後成日都係寫旅遊計劃…終於響夜晚寫完喇！超過2400字！ 除此之外今日都冇乜野做過了…成日對住部機，對眼都好[支力]… 今日上網傾計期間，發覺無論點口語法，文字始終係取代唔到說話， 尤其是語氣呢家野，響網上係好難表達出黎的， 所以以後上網同人傾計真係要三思，以免引起誤會啦… |
| 今日係近期難得優閒o既一日~~ 10.半起身上陣網然後食個星洲炒米，然後執埋個旅遊計劃D手尾， 再搞搞個死唔斷氣o既hkspeed project， 下晝就做下功課，睇下《新紮師妹》VCD，都算幾搞笑~ 夜晚就order左KFC外賣速遞，食到好滯…希望聽日唔會爆瘡… 一個禮拜日就咁過左喇，今日出面咁好天， 如果可以出去游下水你話幾好呢? 不過算啦…都就黎考試…要收拾心情準備下啦… |
| 一上堂就有兩個好消息~第一個係前排申請個科大camp批左~~ 即係暑假第一個camp已經確實左喇~希望其他camp可以陸續落實~ 第二個係phy sir今日去左開會，有兩堂空堂…大家聽到即刻起哄… 好快就到左呢兩堂…我就掛住做功課，其他同學就掛住捉棋， 成間課室廿幾人竟然可以開五副棋黎玩，由中國/國際象棋、 波子棋到飛行棋都有，不過我都冇被引誘，順利完成一份功課~ last兩堂PE，無啦啦有個人黎睇我地上堂， 於是阿Sir就轉英文堂，我地就好搞笑咁跟住用哂英文講野… 跟住第二堂就更加玩返成年冇耍過o既太極(係咪好驚奇呢)！ 咁耐冇耍過好彩我都仲記得D… 晏晝終於唔使再為下一個目的地同埋住宿交通問題等煩惱… 於是就動工寫我份超級notes喇…轉眼已經寫到版半， 進度都算唔錯~希望今個禮拜內完成~ 唉~終於買到黑色墨喇，又搞左一輪先開始印到， 點知張紙出左少少，發現一樣好重要o既野：冇哂彩色墨… 原本幫阿爸印o既野，由上星期五搞到今日都搞唔掂， 最終搞到今日終於話「唔使印喇！」… |
| 噚晚上網上得太夜，今日都頗渾渾噩噩…頭幾堂都響訓著邊緣… 成個小息都訓著左…不過唔知點解一到phy堂就好精神~~ 最尾兩堂中文miss用哂黎解釋禮拜五個oral考試， 嘻嘻哈哈咁就落堂，時間過得真快~ 返到黎繼續開工整超級notes，如果進度良好希望聽日完成第一科~ 夜晚狂煲phy，準備後日測驗…不過今日先驚覺原來測咁多野… 比我當初以為的多左幾倍…希望溫得切… |
| 我左手拎住自己份旅遊計劃，右手拎住張地圖， 行左好耐好耐…終於到左某歐洲歷史建築物喇~ 嘩！好靚呀！正想行入去o個陣，「鈴鈴鈴鈴鈴~~~~」 一個美夢就咁被打斷喇，一起身o個下覺得有D失落… 不過我都有信心呢個夢可以成真o既…努力啦~ 發完個夢…成日都好似沉醉響個夢裡面， 成個生理時鐘變左格林威治時間… 明明應該訓覺，個生理時鐘就好似係下晝，完全訓唔著； 上緊堂o個陣，生理時鐘又較慢八個鐘，眼訓到極點… 真係想搵人救下我…點樣先可以較番o岩個鐘… 下晝同夜晚都努力溫phy… 希望聽日測驗保持到上次o既成績啦~~ |
| 頭3堂係phy測驗，食早餐同返到課室都狂背返D式， 結果都好彩背得返唔少式出黎…我諗今次都唔差卦… 跟住幾堂都冇乜野，放左學就繼續整超級notes， 終於響傍晚完成左份pure喇~~跟住就開始整phy~ 聽日考oral，所以今晚都鬆一鬆先(好似冇乜關係)， 成晚都係上網傾下計咁…冇乜建設性o既野做過… |
| 今日中文考oral，竟然被編到第一組， 所以要好似平日咁早起身返學校… 上到課室，我都差唔多係最後一個了，不過阿sir都未出現… 8點05分就正式開始，我係尾二考，所以仲要等多陣， 個題目係「一節難忘的課」，我諗左幾秒， 就決定講F.2某電腦堂的事…係咩事唔好問喇，我唔會答o既… 希望我爆哂D瘀事出黎會加D分啦…哈哈…不過我都算講得唔錯啦… 好快就到小組討論，雖然五人意見一致，但總算冇dead air， 整體黎講今次成個oral都幾滿意~ 9點鐘就放學返屋企，然後成日都係整超級notes， 一日時間已經差唔多整好成科phy，進展都唔錯~ 唉畸寶上網合約今個月到期，由於和記比唉畸寶平， 所以決定轉和記，傍晚就有人黎裝喇， 搞左成個鐘終於都裝好，又係好似上次裝唉畸寶咁， 成條線lai左落地下，不過一插即用，都算幾方便~ 而且暫時睇黎速度都算好快下~不過而家未有線駁兩部機， 所以最後決定我呢部機用住唉畸寶先，隔離房就用和記… 為左上網o既問題都搞左我唔少時間… 夜晚世界盃開鑼，我都打算睇下，最衰廳部機睇亞視壞壞地， 所以決定食完飯先入房睇…結果食食下聽到歡呼聲， 即刻轉台但淨係見到雪花…唔知發生咩事… 入房見到法國輸一球，我初初睇以為亞視打錯左… 夜晚無啦啦走左上網友屋企探訪，順便還番D野同埋借本野黎睇， 原本打算坐十分鐘就走，結果搞到成個鐘先走… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |