年月 日　

4月1日

今朝又一早出去補習，跟住都返屋企啦…
夜晚去左阿姨度食飯，今餐真係不得了，
有專程由日本買返黎o既神戶牛柳，正到冇說話好講~
真係多謝哂今晚o既招待，冇得頂呀~

4月2日

今日又去中大影相呢，起身上陣網執埋d野就返去啦~
去美心食個晏就上宿舍換袍先，嘩…著過咁多次，未試過好似今日咁熱…
今次行程係本部落CC，比上次短好多，但唔知點解都係好累…
時間都比上次快好多…又未夠鐘食飯，結果去左沙田行陣…
夜晚去左泰源食，都好耐冇去過啦，d野食依然咁正~
之後都返中大啦，買左個波波比隻倉鼠玩，好頂癮呢~

4月3日

原來話咁快就到左最後一堂psy tuto，真係快樂不知時日過~
之後去睇下有冇實驗做(個course要你做3個先可以pass)，見到有個即刻可以做…
我之前做過兩個其實都係填問卷，但今次果個就好頂癮~
入到間房，首先戴個頭盔，track你眼球活動，之後要睇篇文做閱讀理解…
下一part要你寫返之前d文章出過咩詞語，鬼記得咩…
跟住就要睇勁多字，要你噤果兩個字係咪詞語，睇左幾百個，累死…

做完實驗就上lab做野，之後見完老細去補習啦…
之後去左馬鞍山鋸扒，40蚊左右有咁多野食，算唔錯啦~
食完仲要返lab做FYP，進度都唔錯吧~
問人借左win xp碟，點知裝完上網都係咁慢，天啊…

4月4日

今日上堂，又要lur左半個鐘先起到身…
之後唔使上中文oral啦，但都要返lab做FYP啦…
跟住借左同學張lan card黎用，睇下宿上唔到網關唔關呢個事…
果然用另一張lan card就上到網，咁就折騰左我兩個禮拜…
聽日清明放假，真係唔講都唔知，不過今晚都留響中大啦…

4月5日

今日清明節，出面天氣好好啊~
不過冇出去拜山啦，成日都響宿舍做野…
成日都對住隻倉鼠…係咁響個籠爬黎爬去，好鬼活躍…
晏d過去百佳入貨啦，之前老豆比左d 50蚊coupon我，正~

4月6日

今日落去上堂，突然有人講起無聊野，但好好笑，
本來我地唔想笑，但完全失左控，笑左成堂…
之後就出去office，又有野要執啦，但原來只係好少事…
唉…仲未出糧…有冇搞錯…離譜呀…
跟住去補習…兩個細路就黎放復活假，都唔知仲有冇得補…
補完返中大食飯，之後去lab做FYP啦…

4月7日

好耐冇試過星期五冇photoday啦~
不過今日都約左人出去食飯~之後晏d都返宿…
夜晚整野食，比罐頭怒界中指，即刻標血…
去左office拎膠布，都搞左好耐先止到血…
晏d又落lab做FYP，都差唔多開始寫report啦要…

4月8日

今朝要落去見老細，仲要唔知醒，涼都冇涼就衝落去…
見完繼續留響lab做FYP啦，爭少少就做完，但果少少kick左好耐…
晏晝出銅鑼灣做facial，之後返屋企啦~
去到荃灣撞o岩爆水管，見路路不通決定由地鐵站行返屋企，
點知行到水浸位，都係要兜路先返到去…

4月9日

今日終於可以怒訓啦，好似好耐未試過啦…
晏晝起身試左個飯tastic，d人話好難食，我覺得ok呀…
之後努力做功課啦，寫好psy份功課啦，不錯~
夜晚食完飯又返lab做FYP，仲係kick住響果度…激死…

4月10日

今朝一早要落lab，一來做FYP，二來要收袍，今日還袍啦~
途中都要落去上堂短短o既psy lecture…
收齊11件袍就同人一齊捧上UC啦，累死啦…
不過其他系都係自己去還袍，點解我要咁好人呢…
估唔到佢check得咁仔細，有兩件袍有漬，
一個兜比針拮穿左都比人話有問題，有冇搞錯…
希望唔使賠錢啦…都冇乜可能查到係邊個…

之後返lab做多陣野就走啦…出去荃灣食飯~
今日係同阿婆預祝生日(都早左成個月)，難得咁齊人啊~
不過主角精神都係一般…唔知將來仲有冇機會咁齊人呢…
今晚都算係慶祝我搵到工，今餐我找數啦，最豪都係今次啦~
跟住都返中大啦，好累…

4月11日

朝早上堂，原來教哂書，淨返幾堂都係溫書…
其實可以唔使上，我去都係志在同同學吹下水啦…都冇乜機會啦…
之後中文oral present，佔40% o既口頭推介…
我推介大家參加「饑饉三十」，表現應該不過不失吧…
其他同學都差唔多，都知道左唔少野~

晏晝一直都響lab做FYP，夜晚又出左馬鞍山据扒啦~
返到宿開始睇下psy…下個禮拜quiz，到時都唔得閒溫啦…

4月12日

今日上psy，請左個藝術治療師黎講talk，
呢個題目唔算得好有趣，但起碼全程都冇訓著…
下個禮拜又要寫返篇感想，唔知又可以寫d咩…
跟住出去補習，夜晚返宿舍食啦~又溫下書先…

4月13日

上堂…食飯…去lab…都係好似平時咁過…
不過過多一個禮拜，呢種生活就要結束啦…
今日最後一次見老細，想dem個project，結果好多問題，
希望present果日唔好搞成咁啦…

4月14日

連續四日復活假開始啦~第一日梗係hea下先~
都冇乜幾可咁優閒咁吽響宿舍啦，一於訓盡佢，
煮個麵之後怒上網~不過都有溫下書呢…
夜晚出左尖東唱K，好多野食呀~
之後返屋企做FYP report啦，努力~

4月15日

今日都係放假，吽響屋企做FYP report啦~
呢幾日都唔做，過幾日quiz都做唔到幾多啦…
夜晚睇返電視版電車男，主要都係聽下d配音…都ok啦…

4月16日

今日做psy份功課啦，又係寫兩版野，都唔係做左好耐~
之後就hea下先，夜晚食完飯又要返中大做野啦…
阿婆前日入左老人院啦，呢兩日都有去睇下佢…
其實都應該係迫不得已先送入去，希望佢響度過得舒服吧~

4月17日

今日都仍然係公眾假，不過都吽響中大做FYP啦…
其實都訓到好晏先起身，之後就落lab砌埋份report，
都搞得七七八八啦，夜晚返宿溫下psy先，禮拜三quiz…

4月18日

越黎越少人上major，我見都尾二堂，都捧下場啦，雖然都係訓…
之後就到最後一堂oral堂，做左個心理測驗，我係冷靜型喎…
成組人仲寫左對對方o既印象…哈哈，人地都寫得我唔錯~
食完晏就上返lab做FYP，都執埋d手尾啦…可以做o既都應該做哂…

4月19日

今日最後一堂psy啦…仲要係quiz…朝早起身都溫多陣…
今次考哂咁多堂學過o既野，真係幾難記，不過成績都ok o既…
quiz完上堂…最後一堂都係響歡笑聲之中渡過~
今堂講壓力，不過上完堂就真係好大壓力…
上lab試試fyp個program，點知一試就出事，有件野過左期…
本來諗住今晚輕輕鬆鬆印埋份report就算…
結果搞左幾個鐘先搞掂，就咁一晚時間…唉…
做到點幾鐘，都總算搞好d野，印好個report…

4月20日

今朝一早落lab，準備交埋份FYP report啦…
又要拎去釘裝，遲多幾分鐘去都有排等…
之後去lab hea陣，搵下老細，食埋飯，就到歷史性時刻…
最後一日響中大上堂啦~真係話都冇咁快…
其實呢堂都冇咩特別，我都訓左幾耐下…哈哈~

跟住就去拍條片，準備下個禮拜FYP demo用…
之前好多唔同o既阻滯，今次總算順利拍到啦…
搞掂哂都終於可以hea下，夜晚一班人出左去沙田唱K，yeah~

4月21日

冇堂上o既第一日，響宿舍吽下先…訓到好晏先起身~
今日開始寫下present份稿啦，老細話要寫得impressive d喎…
今晚留響中大做野啦，聽日先返屋企…

4月22日

今日響中大做完d野就返屋企啦，響巴士遇到怪人…汗…
食完晚飯去左老人院睇下阿婆，終於講到野啦…
原本都仲好地地，起碼叫到我個名…但個姑娘一餵藥就慘，
無啦啦當左佢係賊，係咁大嗌「有賊呀…差人呀…」
仲想爬出床外面，結果真係要叫姑娘綁佢響張床度…天啊…
搞左個幾鐘先走得，真係唔知佢活躍好定唔活躍好…

4月23日

今日起身都係準備聽日FYP present，寫埋份稿先~
夜晚落樓下街市食飯…同埋去睇下阿婆…
噚晚咁生猛，今日就唔同哂…又變返之前咁唔講野…
不過都仲識得笑，算唔錯啦~

食完飯又返中大做野啦，rehearsal下先…
rere下就搞到點幾鐘，此時已經發出黃色暴雨…
返到宿仲變埋黑雨，真係誇張…希望聽日present順利吧~

4月24日

今日就係FYP present o既大日子啦~一朝早就落lab準備…
我地又係第一組present，都唔知係好事定唔好事…
今次present同demo都算順利卦，總算完成整個FYP啦~
而家淨返要做o既野，就係8號o既一科考試啦~
呢段時間就當放暑假架啦，輕鬆下先~

做完present返宿洗個衫，之後食埋晏又出去做野…
跟住同朋友出去又一城行陣，順便入百佳入下貨~
夜晚返宿睇返套《明日之後》先，以前都戲院睇過，再睇都係咁正~

4月25日

今日怒訓左12個鐘，下畫兩點幾先起身，爽呀~
全日都吽響宿…主要都係開工做野啦~
聽晚就grad din啦，希望有個美好回憶~

4月26日

噚日輔導處打黎，話之前借o既袍有一件有問題要罰錢，
所以今日晏晝上左UC睇左件袍咩事…結果果件應該係我o既…
的確我件袍好似唔知幾時整污糟左(肯定唔係香檳)…
聽日試下拎去乾洗啦…應該洗得甩o既…

之後就出發去CE grad din啦，今次去marco polo…
都係第一次同呢班佬食得咁豪，不過飽到谷住，好辛苦…
不過唔知點解今晚個氣氛都咁高漲，搞到sharing去唔到想去o既位…
最慘自己都冇準備過講d乜，都唔少冷場…
但總算係一個難忘o既grad din吧…
以後都應該冇機會咁多CE同學聚埋一齊了…

PS 日記留言壞左…未整返好之前唔好留比我啦~

4月27日

今日都係訓到晏一晏起身，之後出左去拎件袍去乾洗，
都ok貴，算啦…應該洗得甩卦d漬…
之後去補習，過左成個復活假終於回復正常啦…
其實都補多排唔補…但仲未搵到人頂添…

4月28日

嗯…要溫下書啦開始…呢科話易唔易，但又好似講到好簡單咁…
晏晝落lab還返d野比dept，借左兩個harddisk，兩部PDA，
再加一舊GPS，加埋都幾千蚊…好彩未追我加printquota~
之後又出去補習，一補返個細佬就嘔血…

4月29日

今日響宿舍溫書…冇咩特別…

4月30日

今日都係響宿舍溫書…冇咩特別…
之後都返屋企啦~hea返晚先~

20016789101112月
2002123456789101112月
2003123456789101112月
2004123456789101112月
2005123456789101112月
2006123456789101112月
2007123456789101112月