4月1日

今日又係考英文，考埋listening同作文~
又係9.3先返去報到，不過一返到去即刻要爆石，又要啪丸以防萬一…
今次考之前D DJ冇上次考中化o個陣咁有趣…
一路聽有D倦意…不過到真係考o個陣就梗係冇啦…
今年多左個section，多左時間準備囉…
不過咁都未必代表一定高分，我諗我都算係咁囉…

跟住有兩個半鐘lunch time，我地幾個去左吉野家，
諗番起陸運會o個晚…都係坐同一個位，
不過o個陣勁熱鬧，今日就冷清好多…
o個陣傾到唔知時間，今日完全唔知點hEA…
食完一路坐響度傾計，講完一個話題：「咦? 過左5分鐘咋…」
結果都幾辛苦先hEA到成個鐘…
但最尾D時間反而就得太「吻」，返到去差D遲到…

晏晝考作文，我揀左一條話如果畀你揀想留響香港定去外國，
諗都唔諗就作左香港，最尾仲好感性咁寫左句(當然係英文寫)：
「雖然而家香港經歷好多困難，但而家唔係諗離唔離開o既時候，
　反而我地應該合力解決面前o既所有困境，
　因為香港始終係我地o既家－大家都響獅子山下長大。」
我差D就想譯埋首「獅子山下」出黎架喇:P

搭村巴，撞到上次話o個個阿媽個friend個仔，
佢話見D百佳惠康個個癲哂咁掃貨，
返到麗城果然見到D師奶一袋二袋咁捧野走…
上到屋企，只見電視話「並無打算將香港列為疫埠」，
都知到大事不妙，上網先知原來有人玩野…

雖然話今日係愚人節，但呢個玩笑實在開得太大喇…
香港人已經畀個肺炎搞到人心惶惶，
而家再嚇一嚇，市面即刻瘋狂哂…
我覺得呢個時勢拎呢D玩笑黎玩好冇人性囉…
o個個人仲要得14歲…好彩差佬好快就拉到佢，
希望佢得到應得o既教訓，知道邊D野應該做邊D唔應該囉…

除左話疫埠單野最大單之外，今日上網都見到有唔同大小謠言，
話會炸左淘大E座又有，特首同阿松宣佈請辭都有…
班人放假冇野做就搵呢D野黎玩，真係冇品…影衰哂其他青少年…
仲有班師奶…聽到消息就瘋狂掃貨，
「點解你又出黎掃貨o既?」「我都唔知點解呀…見人地掃我咪掃囉…」
都唔知好嬲定好笑…

夜晚突然有震撼o既消息，張國榮去世…
因為有上面單野，所以我都係聽收音機先敢confirm…
無啦啦又多一單唔開心o既新聞，真係黎得太突然…
不過我對佢認識都唔係咁多，平時都冇特別留意佢，
所以就算話係突發…都冇羅文o個次咁感觸囉…況且佢今次係自殺…

4月2日

仲有兩日就正式AL之戰(之前o個D都只不過係序幕…)，
第一場係physics，呢兩日都會全力進攻呢科，
今日係重溫番五年做過o既pastpaper，
雖然就咁齋睇solution，但都唔係好夠時間…
一路睇到夜晚11.先叫做睇完…
我發覺physics D卷呢…好似越黎越深咁，
違反大部份科目o既定律…唔知咁樣著唔著數呢?

4月3日

physics之戰最後倒數，今日當然係盡地一煲…
基本上成日唔係食飯、睇新聞就係溫書，
成副精力都放哂響physics度啦，所以冇咩其他野好講喇~
希望聽日掂啦~

呢兩日非典型個人數開始減少啦~希望繼續跌落去啦~
近日不斷傳出外國叫D人唔好黎香港、
香港人去到外國又要點隔離呢類新聞…
勁有被歧視o既感覺囉…好難想像淘大D人點樣過…
如果事件再拖落去就真係好弊…

4月4日

終於等到考physics o既日子喇，今日首次去非荃灣區o既試場應考，
搭地鐵過兩個站再行條樓梯就到林護，幾乎快過返何中~
去到只見成堆人聚哂響一個類似canteen o既地方，
嗯…轉左試場D人唔同哂，突然好似好多人見過咁，
有舊同學啦、summer camp D人啦、
電腦奧林匹克D人啦，連隔離屋o既都有…

講返個試啦，第一份感覺上唔難囉，
數字答案大部份都幾肯定，寫字o個D就普通囉…
最衰係我明明睇住隻錶仲有1分鐘，o岩o岩改緊D野，
竟然話夠鐘喎! 冇左兩分喎! 真係想去投訴呀!
(我諗我唔會睇錯錶卦…)

之後過左附近美心食飯，然後繼續進行下半場…
MC頭幾條mechan已經被嚇窒…用左10分鐘都仲未掀頁…
好彩之後越黎越淺番，essay就有幾分完全亂up囉…
整體上我覺得paper 1做得好D囉，不過D同學就話呢份難…唔知呢…

返到屋企終於可以暫時放下一切，抖返晚喇~
不過唔知點解成晚都仲係同人探討physics問題…
之後又講pure問題…突然發覺我已經忘記哂咁滯…
所以聽日要開始努力喇~仲有10日咋~

4月5日

今日係清明，不過我唔去拜山咯…
一來廢事出去D多人地方惹到D咩病返黎啦…
二來我今日都想開始溫番D pure~
下晝落去飲茶返上黎就成疊notes重新睇一次喇…
不過半個月冇理過pure，之後被physics沖昏頭腦，
而家突然對pure變得好陌生…

但係o岩o岩先打完一場仗，今日都冇乜mood溫…
黎緊幾日要加把勁喇~

4月6日

繼續溫番pure，今日主攻algebra~

夜晚出奧海城食飯，好耐未黎過啦~
上次黎係黎呢度睇世界杯，好懷念呀~
不過之前黎都係食完野就走，今日就周圍逛下~
其實係阿媽佢地搵間舖頭所以黎左呢度，
去到間舖又等左好耐…好彩附近有電視打發下時間~
晚飯又係去美食廣場，食番上次黎o個碗拉麵~
我發覺我越黎越鍾意食拉麵啦~~

響商場度無意中聽到播「眼前一亮」midi，
一聽就令我諗番起之前o既singcon…
跟住過多陣仲播埋「最後的歌」…係爭「明年今日」未播…

嘩…我發覺我溫書溫左咁多日，個人開始退化喇…
出門口為左趕村巴要9米9咁跑，跑完喘氣喘左幾個字…
行完商場返屋企…竟然好似以前行完山咁…腳痺…
睇黎我考完試之後都要做番多D運動喇…
講開呢…我呢兩日無聊…已經計劃好考完試o既節目…
．edwardfung.com
．weather.com.hk
．7B Grad Web
．7B Grad VCD
．hkspeed
．舊生會
．夾波
．進修電腦
．學日文
．玩！

4月7日

依然係pure~是日主攻calculus~

出面依然係斷斷續續咁落住雨，
不過呢排又唔使出街…都冇咩點理…
但溫溫下悶悶地望下出面~又諗起D打風落雨o既日子~
過多幾日都唔落暴雨就會打破最遲出黃雨o既紀錄…
不過暫時最好都係破落去啦…總之考試唔落雨就得喇~

4月8日

今日做番pure 00 pastpaper，題題都識做，幾好呀~
不過有好幾題唔小心，D正負號調轉左之類囉…
嗯~而家algebra基本上都冇問題喇，
係爭calculus仲要花D時間去操下~

下晝上網突然見到話有「狂風雷暴」，冇耐出埋雷暴警告，
跟住開始行雷閃電，好耐未試過有呢種feel喇~
夜晚仲出埋黃雨…噚日先話唔出幾日就破紀錄…
即刻又要搞wic D野，D bug突然一次過出現哂…
搞左一段時間先掂，好彩今晚冇乜野做~

4月9日

繼續pure 00 pastpaper，今日做paper 2~
今次我覺得做得比平時進步呀，都叫做克服到calculus啦~
呢兩日做卷做得幾順利，做完都懶得繼續溫書，
所以今晚都好得閒咁~不過千祈唔可以放鬆…聽日再繼續刨…

西北太平洋出現左今日第二個熱帶氣旋(第一個都唔記得幾時出現)，
如無意外應該係叫做「鯨魚」…
不過佢仲響幾千公里咁遠，都冇乜可能影響到香港…
但係噚日無啦啦都可以出個黃雨，令人有d遐想~
而且有預報話佢會一直接近，如果真係過埋黎，
就可能打破最早出3號風球o既紀錄~~
(好似講得有D夾硬黎…詳情睇噚日日記啦)

4月10日

根據時間表，今日唔使做pastpaper，所以勁得閒~
突然無聊得滯，去左sosick.org(即係list哂全港sars地點個網)，
根據D地點畫左個地圖出黎…都整左個幾鐘…
不過今日都花左幾多時間黎溫pure架~但都好似溫到冇咩冇溫…
其實要記o既已經記得，pastpaper做左4年都一直進步緊~
同埋我初初只係諗住呢科要C…依家諗…其實A都有可能喎~
但係我又好似幾懶咁…唔知呢?
都冇所謂啦…鬆番日，之後未來幾日谷番盡佢啦~~~

收到考評局的信，話physics實驗考試提早一星期考，
因為非典型停課令到原本考試o既日子開左學，變左唔夠試場用…
連AL都要因為非典型而改期，的確係非典型…

4月11日

今日做最後一年pure pastpaper，亦都係傳說中最難之一o既01年，
(我手頭上冇02年呀…聽聞仲難…咁03年……唔好呀~~)
第一題已經畀佢嚇窒左，之後兩三題後面都漏空…
到section B又出現揀題危機，即係揀左一題做左少少又唔識做，
結果題題都做左D出黎，最後都唔知要邊題好…
睇返答案，喂…好多應該都識做個喎…
我諗係證明左一樣野…越係覺得難就越以為自己唔識做，
結果唔敢計落去，最後唔難都變難…
所以千祈唔好凝住今年份卷難呀! 03年好淺~03年好淺~

4月12日

今日做埋傳說中o既01年o既paper 2，呢份paper本身已經弱，
再加埋係01年…結果今次又再陷入揀題危機之中…
又係D應該識做o既題目唔知點解突然唔識做，
同埋D時間又唔多夠咁…呀…點解會咁架? 仲有兩日咋!
嗯…決定聽日要地獄式溫書! 我要pure A!!!

4月13日

pure最後衝刺!! 3吋厚notes+超級notes+5年pastpaper!
溫完出黎個成個人幾乎崩潰! 胃口都冇埋!
好在今晚個鹽焗雞套餐幾好食~先至補充到足夠o既力量!
而且呢個鹽焗雞…令我諗返起以前石圍角間大家樂~
o個間有鹽焗雞脾飯食架~其他大家樂唔見有架~
以前低form lunch成日都去o個度食…可惜都執左幾年咯…

嗯…我發覺我原來整整一個禮拜冇出過門口…
我而家先知出面部[車立]貼左膠紙…
跟住望下張准考證…嘩! 原來考完physics已經9日!
即係我呢九日都只係坐響書檯對住D pure…諗番都幾驚…
不過我考完pure仲要對住applied 14日…死未…

4月14日

等左10日，終於到考pure o既日子喇~
最初話今日會有雷雨，我最驚就係重蹈兩年前考amaths o既覆轍…
o個日係一個黃色暴雨o既早上…
就算我拎埋遮都搞到成條褲濕哂…
響呢個環境下，根本就好難集中精神計數…
好彩今日一D雨都冇，仲出太陽!

今日個試場係李炳，48X直達! (係貴左D囉…)
入到hall，檯面舖滿答題簿，有6本咁多…(佢派多左本)
淨係寫考生編號o個D都已經寫到人都癲…
paper 1真係淺番哂~起碼比起01,02年淺~
唔識做o既冇做pastpaper o個陣咁多囉…

收完卷要等D監考員封好哂D卷先放我地走，
因為有勁多答題簿，所以hEA左3個字先有得走，
D人唔知點解咁趕…一開咪D人就衝哂出去…
其實都幾多時間食lunch丫…

我地幾個仲走左落去石圍角…而且揀左M記…
我都兩個幾月冇食過咯…試下個新新口味囉~
食完搭返小巴上去，都仲有3個字先入得去，幾優閒~

paper 2都算唔難囉…不過係深過之前o個份囉…
係畫graph o個條真係攞命…睇落都唔覺咁難畫…
不過兩份卷夾埋都算幾滿意囉…比我想像中好囉~~

考完呢份卷，有半班人就考哂AL喇~
於是大家就一齊出黎飲杯野慶祝下~
雖然我都仲有一科applied，但都湊下熱鬧囉~
由於時間充裕，所以決定行落荃灣，
都行左半個鐘先落到綠楊…
一去到突然見到勁多同學，一時間唔係好慣添~

去到間野要出門口呆等…等D人搬檯…
之後就16人一齊迫哂響一張檯度，真係勁熱鬧…
成班人有講有笑，不知不覺就一個鐘，
要趕住返屋企食飯，唯有提早失陪…

今晚終於都可以鬆返下喇，
但聽日就開始溫返applied咯…都成個月冇掂過…

4月15日

噚晚點幾鐘先訓，所以今日訓到10.幾先起身…好耐未試過咁晏…
嘩…一起身就腰酸背痛…梗係噚日行得太多路定喇…
同埋寫左咁多野，隻手都幾[支力]…

今日開始溫applied喇，不過o岩o岩先考完pure，
加上仲有13日先考，所以今日都真係溫得幾hEA，
淨係溫prob & stat都溫唔哂~明日再續~

4月16日

今日繼續溫applied，溫番兩課numeral analysis，
再睇番份mock卷，o個陣覺得超難，而家睇番…都冇想像中咁難…
我係覺得我一直都太輕視applied囉…
明明可以拎到唔錯o既分數，但最後個結果都係麻麻…
所以未來o既日子要好好努力啦~唔可以衰畀阿sir睇!

中午時份無啦啦冇水…事前都冇貼過通告…
結果毫無準備之下過左一個冇水用o既下晝…
跟住見下面勁多人排隊…原來係輪水…我地都輪左桶番黎…
原來係樓下爆水管，搞到停車場都浸埋…
好彩6.幾就有返水，但到夜晚再爆過…
到11.半先有番，如果唔係今日唔使旨意沖涼…

4月17日

原本下個星期考o既physics practical，
因為學校提早放復活假而提前舉行，今日就到我考喇~
個試場響荔景，係咁多試場之間最遠o既一間…
之前睇完地圖之後決定搭巴士去，而且係從未搭過o既一架，
去到巴士站等左3個字先有車，一路等o個陣都幾驚…

上到去仲有3個字先夠鐘，不過我已經差唔多係最遲到o個個…
原來去到要企響門口呆等，好熱呀…
入到waiting room吽左幾個字先有得做~
為左預防sars，做每個實驗之前都要用梘液洗手~

第一個實驗係mechan，吊住個膠板轉轉轉搵period，
應該就冇乜問題o既，不過成日跌左把間尺…唔好扣分架嘛?
之後係駁circuit度voltage，都幾簡單…淨低唔少時間…
最後一個係最驚o既CRO，初初駁好D野，一D反應都冇，勁驚…
睇清楚D，原來個power supply未開掣…
結果三個實驗總算無驚無險咁完成~

考完嘗試行去葵芳搭地鐵返去，
初初睇地圖唔知有冇路行去，結果原來行一個字就到…
返到去之後上陣網就落去飲茶，
然後繼續applied~今日係differential equation~
原來呢個topic我覺得幾難…
不過經過pure o既煎熬，而家應該好好多啦~

4月18日

今日係復活長假第一日，不過對於我黎講冇咩意義，
因為我一直都放緊假啦…而且今年真係完全冇節日氣氛…

晏晝又落去飲茶囉~然後就溫mechan~溫溫下又訓著左…
聽日開始pastpaper攻勢咯…努力啦~

4月19日

今日開始做番applied pastpaper，由99年開始番~
朝早晨早起左身應該溫下書o既，
不過又懶啦~hEA下hEA下咁就浪費左一個上晝…

勁耐冇做過applied數，一做起黎完全唔記得點做咁滯，
頭兩題幾乎完全漏空…好彩一路做就順番哂，
睇黎再做埋o個兩年就冇問題啦~
不過applied最大問題唔係唔識，而係唔小心，
因為要A就要8X分…有一題唔識都唔使望…

4月20日

今日係applied 99 paper 2，比噚日順利好多喇~
而且兩個鐘就計哂…犀利呀~
結果…section A全對，section B錯一半!
原來我有唔少prob & stat o既概念好錯下…
聽日唔使做pastpaper就慢慢研究下啦~

晏晝剪頭髮啦~好似未試過咁多個月冇剪~
天氣熱啦…再唔剪就好辛苦…
不過個髮型都係一樣啦…
其實我一直都想改，不過唔知咩髮型o岩我，
暫時我諗都係不變應萬變啦~

夜晚出去酒樓食飯~食得好飽呀~
而且好似好耐都未試過食一餐咁正~
聽日仲有BBQ添呀~

4月21日

嘩…今朝差唔多6.突然喉嚨痛到醒左…
勁想咳…又冇痰…竟然諗過自己會唔會有非典…
好彩起左身就冇事啦…

颱風鯨魚進入東經125度，wic熱帶氣旋版本今日正式啟動!
一朝起身就忙住寫program…加上今日唔知醒，遲左起身，
所以朝早一直都冇時間溫書…好彩今日唔使做pastpaper~

晏晝又落去飲茶(好似最近飲左好多次…)，
之後返上去就溫返下書咁啦~
然後過一陣又過去阿姨度BBQ…復活節節目卦~
今日上到去幾大風喎…燒燒下都覺得凍…
食完返到去10.幾…睇下鯨魚又傾下計咁…咁就一點…

夜晚討論左一個既簡單又複雜o既問題…都關於applied的…
「小明的父母有兩個孩子，已知小明係男，
問兩個孩子都係男仔的機會係幾多?」
其實呢個係一條簡單不過的機會率題目，
不過響一個forum度竟然引起13版o既討論，而且有好幾個答案…
我就算識做都可以同人討論勁耐…
由此可見，越簡單o既題目就越易被人忽略、誤解，
大家一直吸收大量知識，但如果唔作多D思考，
淨係乜都亂咁背一餐，咁學幾多野都冇用…
所以我諗溫applied o個陣…計到條數之後都應該問下自己，
點解我會咁計? 呢堆式代表乜野? 我諗咁樣應該可以溫得更好~

好耐未試過拎住部相對乜都影一餐~
我覺得咁多相之中，下面呢張最靚~

4月22日

繼續applied pastpaper，今日係00年paper 1，
大致上OK啦，冇咩特別…不過同A仲有一段距離~

下午收到消息話本座有人感染到sars，最初只係口耳相傳，
但係下晝陸續有confirm o既消息…
em..我呢排出親門口都有做預防措施…應該冇問題卦~
嘩…不過萬一touchwood咩o既話…都要等我考完applied先呀…
以我mock咁o既衰樣黎計分都唔知會有咩成績…

收到中大info eng寄黎話可以interview，
其實只要jupas有揀過呢科佢都會畀你in…等我仲揀到1st choice…
不過收到信又好似淆淆地…始終呢個唔係我真正o既第一志願…
但係點都唔好浪費呢個機會啦~
同埋佢in o既野都可以話係我o既強項，冇問題啦~

4月23日

嘩…今日唔知咩事…好頭痛…唔會係溫書溫得太多呀?
朝早都唔算好痛，食完飯準備做pastpaper就開始痛…
做左半條已經頂唔順，攤左響張床度抖下，
之後斷斷續續咁做落去，做到夜晚先完…
響咁o既情況下做o既卷就一定唔慌好得去邊啦，
D careless mistakes爆哂出黎…浪費左份卷啦…
嗯~聽日又冇pp要做…我應該溫番熟佢定係抖一日先好呢?

4月24日

今日仲有少少頭痛咁啦…不過冇噚日咁勁囉…都溫到書~
下晝落左去飲茶囉…當係輕鬆下又好乜都好啦~
呢度一變左肺炎大廈呢…大家即刻加強消毒工作，
樓下整左張消毒地毯，有唔少人響屋企門口都整番張，
同埋周圍都係漂白水味，完全係高度戒備囉~
唔知係咪因為咁呢…最加上就黎考applied啦…
所以呢兩日個人都好似好緊張咁…可能係引致頭痛o既原因…
呀!! sars快D同我走呀! 我要唱K! 我要唱K! 我要唱K! …

4月25日

今日做applied 01年…做埋呢份就完成所有pastpaper喇~
做就做得幾快~又係兩個鐘做完三個鐘o既卷…
不過快就唔代表做得好…D唔係prove o既野就錯漏百出…
得番兩日啦~睇怕都做唔到D乜架喇…希望到時有多D時間check下卷囉…

嘩…今日一個二個突然post勁多minigame上班網…
我都忍唔住玩左陣添…唔好引誘我住啦…

「下午11時天文台錄得氣溫27度…」yeah~冷氣季節展開了~
原來今年比上年遲左兩日開始…

4月26日

今朝幾難得早起身都唔覺得眼訓，成朝眼光光唔知做咩好，
突然好多時間用，不過書又溫過哂，都係hea左佢算~

最後一日做pastpaper喇~暑假已經響不遠處喇~
做埋噚日o個份o既paper 2，都幾順利呀，
今次係B part做得好d囉…最衰A part冇solution…
同埋今次早左50分鐘完成，唔錯~
希望後日可以keep到咁o既水準啦~最緊要係小心D~

夜晚電視做叮噹喎~橫掂得閒就睇下啦~
以前呢我係超級叮噹迷黎架，屋企仲keep住6X本漫畫~
不過個人成熟左，就好似冇咁覺得好睇…
同埋我都係鍾意以前D名囉，親切好多~

4月27日

暑假前最後一日啦~全力備戰applied~
都係睇哂成疊notes然後刨番D pastpaper答案咁啦…
非常之鬆動o既一日~晏晝仲睇左陣鬼片…(晏晝睇我都有少少畀佢嚇親…)

今晚叫pizza食~呢排完全冇catalog寄黎，
order之前要先打去問D餐有咩食，仲要玩速記…
之後落order，講完地址，佢即刻話「你要落樓下拎喎」，
住響肺炎大廈就要畀人歧視，可惡!
都未試過叫外賣速遞都要捧住咁多野上樓…
等左成個鐘終於有得食喇，原來有個新o既咯咯雞pizza我都唔知添…
隻新pizza都幾好味呀~不過竟然得我一個食…
嘩…好耐未試過咁飽…

聽日…最後之戰！努力呀~~

4月28日

終於最後一日喇! 等呢日等到頸都長呀!
今朝食完早餐要做多樣野…量體溫! 36.4度，正常!
跟住出地鐵站，約左成班人一齊搭巴士過青衣~
因為applied全港得千幾人考，荃葵區得一間試場，
所以我地全班都係去同一個試場~

青衣…嘩…好似好耐未黎過咁…
一個曾經好熟悉…今日變成一個陌生o既地方…
去到試場，D人堆哂響學校門口，原來唔畀入…
結果等到4個半字先開門…大家即刻衝入廁所…

等大家去哂廁所，又要填健康申報表，又要check大家係咪戴哂罩，
結果個試係遲左6分鐘開始o既…
之前一聽個主考官講野已經覺得佢唔掂喇…
D人入得1/5已經開始講野，又唔畀夠時間寫資料，
最尾仲早左半分鐘times up…好彩下晝換左另一個…

第一份卷比想像中難啦…冇pastpaper做得咁順利…
跟住成班去左間茶餐廳食飯，然後繼續下半場…
臨入hall去個toilet先…嘩…都未見過一個廁所可以咁熱鬧…
paper 2就淺番囉…而且破記錄…做完仲有個幾鐘…
響度慢慢check卷…仲可以做多題long q(因為原本有題有part唔識做)…
跟住周圍左望右望…見到有個考生流鼻血…

4.半，times up, put down your pen....
AL終於考完啦~~yeah~~~~~
咦…其實戴左6個鐘口罩…都仲頂得順喎~
跟住又係成班一齊慶祝啦~又係同兩個禮拜前個地點一樣~

夜晚可以盡情上網啦~不過其實之前都已經上得唔少…
今晚都冇乜特別網想上…係download返近兩個月D歌黎聽囉…
未來兩日休息下先~暑假大計遲D先開始~

4月29日

第一日放假~梗係要抖下先~
所以基本上成日都係對住部腦…漫無目的咁上下網…
首要任務係搵番張靚靚wallpaper~因為之前o個張係用黎remind我溫書…
晚飯前突然有網友打黎叫我去睇戲…咦…我都好耐未睇過咯喎好似…
諗諗下…戲院都應該冇乜人去架啦…應該都唔算危險…好啦…

嗯…個網友原來係超級電影迷(我都係今日先知)，
佢介紹話金鐘同太古兩間戲院係最好，
結果今次就選擇去太古o個間…遠就遠D…唔理啦~
幾年冇去過太古城…裝修又已經唔同哂~
揀左場特務戇J…買左飛仲有成個鐘先做，結果一路吹水黎打發時間~

呢間戲院果然唔係浪得虛名…D位又正，音響又靚~
套戲就幾搞笑啦~係短左D囉我覺得…
同埋比我想像中多人入場呀…都有廿幾卅個…
睇完拿拿臨搭地鐵返屋企…廢事miss尾班車…

4月30日

訓左6個鐘就要起身，因為今朝一早要起身同姨媽過海，
去佢office幫佢搞下電腦野，雖然好多task，
但都幾易搞掂o既~結果整左兩個幾鐘囉~仲有酬勞添~~
跟住返屋企飲茶…響地鐵訓到成隻豬咁…

返到屋企上陣網就訓陣覺先…然後就開始暑期大計~
第一樣梗係搞下呢個網先啦~首先係整個新flash先~
不過用左成晚都未整哂…因為期間講左兩個幾長o既電話…
其中一個係叫我下個禮拜返hkspeed…朝9晚5啦…救命…
然後其他工作又接踵而來，又要搞grad VCD啦，
遲D又要搞番舊生會，仲有D網等住我整…

2001 6 7 8 9 10 11 12 月

2002 1 2 3 4 5 6 7 8 9 10 11 12 月

2003 1 2 3 4 5 6 7 8 9 10 11 12 月

2004 1 2 3 4 5 6 7 8 9 10 11 12 月

2005 1 2 3 4 5 6 7 8 9 10 11 12 月

2006 1 2 3 4 5 6 7 8 9 10 11 12 月

2007 1 2 3 4 5 6 7 8 9 10 11 12 月

2001						6	7	8	9	10	11	12	月
2002	1	2	3	4	5	6	7	8	9	10	11	12	月
2003	1	2	3	4	5	6	7	8	9	10	11	12	月
2004	1	2	3	4	5	6	7	8	9	10	11	12	月
2005	1	2	3	4	5	6	7	8	9	10	11	12	月
2006	1	2	3	4	5	6	7	8	9	10	11	12	月
2007	1	2	3	4	5	6	7	8	9	10	11	12	月