4月1日 |
4月5日 |
4月7日 |
4月8日 |
4月9日 |
4月12日 |
4月13日 |
4月16日 |
4月17日 |
4月20日 |
4月23日 |
4月24日 |
4月27日 |
4月28日 |
| 今日係愚人節，不過我就冇畀人愚亦都冇愚人， 而係參加班會的行山活動… 雖然噚日病到死死下，但因為有另一個同學都病左去唔到， 加上今日都比噚日精神好多，而且畀左錢，所以都係決定去~ 今次有18人參加，已經比上次踩單車好… 等齊人上車去到西貢後，就一齊開始行~ 雖然身體唔係好舒服，不過都總算行到， 大家仲比預期中行快左成個鐘… 去到浪茄，食左件包之後，就攤響個沙灘度訓下晏覺， 響陽光與海灘下曬太陽真係人生一大享受， 不過問題係訓左幾個字已經曬到塊面紅哂… 大家響逗留左響浪茄個幾鐘，就繼續出發了… 我原本諗住我去到浪茄就頂唔順要返轉頭了， 不過越行就好似越精神，所以就繼續完成路程~ 最終比預定早左個幾鐘去到西貢… 不過架旅遊巴公司有問題…吽響西貢成個鐘先有車搭… 可以順利完成個旅程都真係算好彩，幾驚行行下要call車走… 不過今日個喉嚨好痕，而且勁多鼻涕， 唯有祝自己早日康復啦~ |
| 唉~今日的病情都係同噚日差唔多添…快D好返啦~ 下晝去愉景新城開會準備英文project，然後去圖書館搵資料， 跟住去影印同埋買墨，然後返屋企訓左個大晏覺… 夜晚send下email，畫下poster咁，咁又一日喇… |
| 病情好似好返D了，不過仲係冇乜精神，似乎係訓過籠了… 成日就淨係做閱讀理解… |
| 繼續完成埋D功課…同埋開始搞電腦學會第二期會刊… 份日記咁短即係代表今日冇乜野做… 不過呢種日子好快就要過去了… 聽日開始就要忙到4月尾… |
| 今日係清明~下晝落去飲完茶之後就飛的去到屯門的青松觀拜山~ 經過一輪[也母]眼攻鼻後，就搭巴士返屋企… 途中度到78.4km/hr的超強陣風，勁呀! 返到屋企上左陣網就落樓下食飯~ |
| 成日都係溫physics…準備黎緊的測驗… 不過成個假期都冇睇過D書，仲係懶懶閒咁， 開住電視黎溫…仲溫溫下訓左成個鐘… 夜晚出去食飯順便開舊生會例會… 食左個咖哩麵…都幾好食~ |
| 下晝返學校參加一個叫做「youth leadership training program」 的東東，禮拜日都要著住校服返去…有點怪相… 參加呢個course，原價$100，我報左做helper，特價係$0， 去到聽左D演講o既技巧，對我都應該會幾有用， 而且可以歎下冷氣，真係唔錯~ 聽左幾個鐘就返屋企上一陣網， 然後就過阿姨屋企享受一餐豐富o既扒餐， 食完就坐響梳化睇電視，享受最後一個復活假的晚上~ 聽日就繼續返學了，努力~ |
| 放完假，感覺簡直係耳目一新， 首先係今日開始換季，著住套短袖衫唔使打呔，爽呀~ 今日開始卸下班長一職，又可以食飯食到遲一遲先返去，正呀~ 因為F.5,7已經走哂，所以今日開始有固定課室，不過要走上3樓，慘呀… 好辛苦咁走到上去，入到課室，嘩！ 成個課室變到好似監房咁，個天花板整到鬼五馬六，好有壓迫感， 而且多左兩把風扇同兩盞燈，感覺係光猛左，不過上堂仍然受唔住睡魔引誘… 雖然天氣好熱下，但今日有3堂空堂，去library歎冷氣，真係舒服~ 不過原本諗住溫下聽日測o既physics，不過掛住傾計…都溫唔到幾多… 仲諗住放完假就應該冇乜野做，不過突然有人話我聽放學開maths club會， 今個禮拜仲要做大堆野黎準備下個禮拜的maths week… 可能係天氣熱左，個人都好似懶左，唔係好想做野添… |
| 一早就測physics，今次…合格卦… 搬到新課室，阿Sir話不如搬下D檯， 結果成班用左3分鐘搞到成個課室D位唔同哂，真係搞野~ 放左學幾經辛苦，再加埋天拿水， 先剷得走舊課室貼住塊"We are ALL 6B" Banner D膠紙… 跟住上MMLC印埋份英文project…又搞到五點正… 夜晚勁忙…又要準備maths quiz的powerpoint， 又要準備司儀稿，又要check數，忙死啦~~ |
| 嘩…朝早勁肚痾…每25分鐘就黎一次…都唔知食錯乜野… total黎左三次…搞到爭D遲到…之後成個人虛脫咁， 面青口唇白，而且腳都軟埋，仲諗住要早退… 好彩上堂o個陣就冇再黎料喇… 聽人講今日PE堂要考踢足球，我對腳仲發軟蹄…點踢… 下晝開始落雨，心中暗笑：「哈，落雨咪唔使踢囉！」 我仲諗朝早肚痾下晝應唔應該上PE… 不過食完飯情況已經好左D了，都係決定上啦… lunch食個五香肉丁麵，成塊午餐肉跌落碟湯到， 「湯」花四濺，搞到件衫好似嘔血咁…今日真係黑… 到PE堂，好可惜已經停雨了，不過阿Sir最後都係冇考踢波， 但係就考體能…幾驚做做下situp時無啦啦山泥傾瀉… 響就住就住的情況下…成績都同我預期中差唔多…都算好彩… 放左學入hall進行maths quiz綵排，今次我將會擔任司儀~ 結果搞到五點幾先至綵排完，下個禮拜一、四仲要再黎多次… 返到屋企仲要執稿…執問題…做MC真忙~ |
| 今日都冇乜特別野發生…no news is good news~ 係同學仔之間有D問題出現囉…都中六啦，都仲係咁… 相識一場，希望問題盡快解決囉… 放左學去買餅，準備禮拜六去探訪老人院時送畀老人家… 仲突然有人話我知到時我要做司儀…又要作稿…忙死啦… 返到屋企訓左個大晏覺…訓完都仲係眼訓… 夜晚繼續忙電腦D野… |
| 今日突然要印好多野，包括舊生會會刊、 maths club的數學家poster同埋聽日探訪老人院用的bingo咭， 搞到要用盡小息、lunch同放學之後印… 可惜飽受printer的折磨…印極都印唔o岩， 部機仲係咁「爆粗」，印左一張張古靈精怪的符號出黎， 結果成個小息先印得一張係冇錯，而多左十幾張算草紙… lunch再去印…先至印到十幾張紙，可惜printer已經冇哂紙… 放學加左紙，先至印好D poster同bingo，不過會刊就印唔切啦… 印哂D野，跟住就去幫手準備下個禮拜的maths week， 今日要做好一個數學IQ題o既board，又要再印多四隻字， 然後再印埋D問題同答案出黎， 點知學校又冇乜可以印到咁大張紙o既printer， 結果搞到五點先有得印，但部printer又神神地， 又再爆粗…jam紙…最終去到7點幾終於完成哂個board， 好耐未試過咁夜走…返到屋企已經開飯~ |
| 一朝早返去學校準備探訪老人中心， 等左半個鐘齊人就一齊行過去， 一去到就已經有一堆公公婆婆坐左響度， 咁我就走去佢地前面開始講野咯… 今次我係其中一位司儀，不過事前冇作稿， 原來我自己o既爆肚功力都唔係咁強… 而且唔見哂D用黎考D老人o既問題同謎語， 搞到要大家臨時搵…不過過程都總算順利， 公公婆婆們都玩得好開心~ 「探訪」左個幾鐘，活動就完左， 就返屋企繼續搞下maths quiz同電腦學會會刊D野， 夜晚見得閒就執下個袋，終於都輕返少少，唔使日日拎得咁辛苦… |
| 仲以為今日好多野做…所以原本返學校做helper都放棄了… 點知D野好快就做哂咁…下晝勁得閒，睇埋D平時唔睇o既網站… 跟住溫下書，做下功課咁，夜晚去pizza hut~ 食左個日韓twin pizza，都算幾得意，而且好飽~ |
| 起身冇耐先記得返到去要宣佈…臨時作左十分鐘先作好… 第三堂又無啦啦走火警…記得上次走火警係撞o岩生日… (同埋三樓正梯係火燭熱門地點…) 小息之後測中化，寫到手軟，應該都唔會低分卦… 放左學又去hall綵排準備maths quiz，都仲未run得好順… 夜晚同網友傾開計…發現我D hardware知識都幾貧乏下… 睇黎暑假又要進修一下喇… |
| 日頭都冇乜野發生過…有三堂空堂但都懶做野…仲走去捉棋… 放學後就係緊張刺激o既maths quiz，我原本係負責打分然後show出黎， 不過工作安排上有D混亂…結果要改埋卷… 今次唔知點解勁overrun，去到五點半先完… 到左最緊張o既公佈結果時間…結果係四社同分-_- 相信聽日o既比賽會更加精彩~ 返到屋企狂印野…發覺部printer係慢到不得了… 印左個幾鐘先印好成份電腦學會會刊囉… 仲要印maths quiz結果同班衫logo…都搞左成晚… 下面幅圖係我黎架…出自某同學手筆，準備放落班衫度… 你地話畫得似唔似? |
| 朝早miss左班車，返到學校趕到死，又要做呢樣做o個樣… 跟住第一堂又有刺激野發生，校長又黎睇我地上堂， 仲要係我地最唔明o既phy堂，阿sir係咁叫人答問題， 個個都被問到口啞啞，之後仲問埋我，好彩我都識答… 放學左又係緊張刺激o既maths quiz，今日比噚日run得順左D， 不過有少少令人失望o既係我有份出o既題目竟然完全冇人識做… 唔知係咪今日太刺激的關係，返到屋企都有D頭痛… 夜晚食完飯仲訓左半個鐘，成晚乜都冇做過咁… |
| 近排日日都咁操勞，終於都頂唔住了… 朝早起身就發現條氣成日喘住咁… 下晝發覺個頭罄罄地…結果最後兩堂PE都冇上了… 阿Sir叫我去校務處探下熱，結果係101.3度…真係有發燒， 跟住就敷左D冰，過左陣就冇咁罄，就坐低抖下， 結果訓左半個鐘… 放左學之後有maths quiz綵排，我係負責做司儀… 雖然同學同阿Sir都叫我唔好去，但我唔想錯過呢次機會… 最後都順利完成個綵排，聽日千祈唔好有咩事就得喇… 返到去即刻睇醫生(已經五年冇睇過)，原來係患左感冒， 打左支針，仲要食五粒藥，真係慘… 唉~聽日仲要測驗，都冇乜心機溫… |
| 一起身，冇發燒了…不過仍然係好[支力]下…lunch又食唔落… 放學後要做maths quiz司儀，唔知係咪因為太緊張， 今日要成日去廁所…終於都到左最緊張o既時刻， 面對住台下近千個學生，比對住幾部camera更緊張， 好彩都冇乜點出錯，除左最後報冠軍隊伍時竟然報錯左… 後尾問返同學意見，佢地只係話我太大聲… 不過miss就話我係三個司儀中講得最好o個個~呵~ 做完司儀後撞到miss，佢話順便車我返屋企， 咁o岩我又[支力]到七彩，就一口應承左… 十幾分鐘就直接響樓下落車，真係幾歎~ 唔知點解，返到屋企又再發冷，上左陣網之後就頂唔順， 攤響床上訓左兩個鐘，起身又再覺有發燒， 食完飯就乜都唔想做，淨係坐響梳化睇電視雜誌， 仲要敷住塊退熱貼…咁就過左一晚… 呢兩日個個同學見到我個樣殘哂，都好關心我， 真係非常之多謝哂大家… 不過相比之下，網友就顯得冷淡好多… 我仲以為佢地都會睇下日記然後問候下… 唔知佢地係冇睇到定係點呢… |
| 今日已經再冇發燒，不過響幾粒藥o既折騰下， 成日都冇乜胃口…食完晏個肚又嘰哩咕嚕… 下晝想做下功課啦…都係冇乜心機做… 又係訓下醒下咁…病左真係做乜都頹過人… 夜晚去新蒲崗食「日式放題」，即係任叫任食日本餐， 之前係極之期待呢餐，可惜個肚唔爭氣，而且胃口都唔係咁好， 眼見面前有豐富o既美食，都完全唔敢食，真係無福消受… 唯有狂食清湯烏冬填飽個肚…平時食親都係辣湯底…今次淡到丫… 食飽飽就搭小巴返屋企，途經龍翔道， 見到九龍o既景色咁靚，真想跳落車影返輯相~ |
| 朝早懶洋洋咁溫左陣書，準備聽日測applied， 下晝返學校做英文course的helper(詳情請看此日日記)， 響29.5度的高溫下歎左兩個鐘冷氣，真係爽~ 不過今次幫手拎住部攝錄機拍低成個過程，隻手[支力]到… 夜晚又懶洋洋咁一路睇電視一路作文… 今日已經好返哂咁滯，希望聽日返學可以完全冇事，繼續搏殺啦~ |
| 朝早7點幾o既太陽已經晒到成隻屐咁， 返到學校入staff room搵miss順便歎番陣冷氣先~ 跟住仲要集會…真係焗桑拿咁… 第四堂測applied，小息竟然緊張到胃痛… 第一題就已經唔識…嚇得我…其他幾題都算識啦…合格呀我諗? 放左學去compu room同幹事們一齊印埋D會刊封面， 印到4.9終於印哂88張封面，仲諗住再上左陣網先走， 突然醒起要寄信，即刻走去開locker， 我仲以為貼哂郵票，點知乜都冇， 跟住睇睇錶，原來已經五點，郵局閂左門，買唔到郵票， 就諗住放返D信入locker第日再寄過， 正當我響褲袋度拎抽鎖匙之際，抽鎖匙竟然跌左出黎， 仲要跌正坑渠窿入面，而且個坑渠蓋點撬都唔開， 唯有捧住成二百封信返屋企啦…仲要個袋爛埋， 結果要攬住成袋野黎行，極其狼狽… 我今日先好返哂，又輪到阿婆病， 聽聞係食左D超補o既補品，結果又暈又嘔(嚇到我…) 仲要即刻送去睇醫生，希望大家都身體健康啦… |
| 朝早一抽二lung咁捧哂D舊生會會訊返學校然後四圍派， 跟住用個特登拎返學校o既u走去坑渠邊， 一勾就成功將抽鎖匙由坑渠入面勾返出黎，好野~! 當然我拎返出黎之後即刻拎個u同鎖匙去洗啦… (唔知咩事唔該睇返前一日o既日記) 最後一堂phy實驗堂，過埋今堂就要教書，所以要好好珍惜呢堂… 不過實驗好快就做哂，吽響lab度唔知做咩好， 棋我又唔識捉，講是非又搭唔到訕，搞到我好唔入流咁添… lunch係maths club慶功宴，嗌左兩飯兩麵仲有幾籠點心， 食到差唔多夠鐘…而且超飽…多謝阿Sir! 放左學去寄左D舊生會會訊佢，又可以發揮我o既貼郵票神功喇… 兩個人半個鐘搞掂百三封信，好野！ 跟住返學校幫手釘裝埋D電腦學會會刊，轉眼又搞掂哂， 即係話電腦學會所有工作完滿結束喇，好野~ 臨訓前打個電話：「下午十一時天文台錄得氣溫二十七度…」 yes！今年第一次開冷氣，爽呀~ |
| 今日只係返得3堂，因為有3堂空堂，lunch之後就去參觀立法會… 所以今日只係揹左個袋返學，冇拎成抽notes，好輕便~ 話咁快就到lunch time，今日好難得可以走出石圍角， 結果走左落荃灣食大家樂，食飽飽就去地鐵站集合… 等齊人就成班人一齊搭地鐵去中環然後走入立法會門口… 我兩年前已經去過立法會開放日，所以對入面o既野已經唔陌生~ 擺低哂D野(相機都要放低-_-)之後就走上公眾席， 我地要坐最上面o個行，都唔係睇到好多議員… 坐低冇耐就開始，我地要戴住耳筒黎聽英文即時傳譯 (因為呢個係英文堂活動)，有D都唔係聽得好明， 就轉下中文又轉下英文…聽聽下我竟然訓著左… 「參觀」左個半鐘之後，我地就靜雞雞咁離開， 影左張大合照之後就解散…跟住睇下錶，咦?星期三乜館都免費， 於是就決定去太空館參觀，不過得兩個人去… 轉眼就去到尖沙咀，入到太空館發現裡面都開始顯得殘舊… 記得以前細細個成日去太空館，不過而家已經幾年冇去過， 而家入返實在好懷念~仲玩返以前黎親都有玩o既射laser遊戲， 咁耐冇玩都畀我「任務完成」，真係犀利~ 參觀左近一個鐘就睇哂，已經冇能力去參觀其他館，就搭地鐵返歸… 沿途同返到屋企都訓到成隻豬咁… |
| M記而家做緊promote，直接送包到學校，唔使去排隊， 於是今日就去試下，結果係冇乜人去試， 而且個價同出面冇乜分別，同埋係唔飽o既… 好快就食完個午餐，正諗緊點打發時間， 突然撞到阿sir，佢叫我搵日教佢用電腦， 我話不如而家啦，咁就打發左D時間… 教完之後又冇野做，結果都搵唔到其他野打發時間… 我發覺我一冇野做就周身唔自在咁，咁下年點算… 放左學都仍然係冇野做，簡直係百年難得一見， 剛好阿婆噚日病左入醫院，於是就去探下佢… 響學校行三個字就去到醫院，見到阿婆好似好[支力]咁， 祝佢快D好返出院啦… |
| 今日可以話係沉悶o既一日囉…乜都唔使做， 放左學仲可以準時3:10離開，3.9已經返到屋企… 悶悶地就執下相，用左成個下晝搞掂學校影D相放埋上班網… 夜晚就悠閒咁睇電視雜誌，都幾歎…不過唔係好慣… |
| 原本打算利用呢個星期六黎優閒地做下功課， 不過起身冇耐網友打黎問我去唔去踩冰， 雖然噚日跑完9分鐘隻腳有D[支力]， 不過我都想去踩下冰同見下網友， 而且我見D功課都唔趕，就應承左佢囉~ 食飽飯就出發去西九龍中心，上次黎呢度踩係9個月前o既事， 今次黎已經覺得呢度幾殘舊下… 踩踩下見到有部camera擺左響度，睇真D原來係TVB拍緊戲， 仲見到郭可盈同林文龍響度，NG左幾十次先拍完… 遲D如果有套劇叫做「打更急先鋒」，有場踩冰戲o既話， 不妨留意下我會唔會響畫面度閃過… 今次由1.半踩到5點…超[支力]…行路行到跛下跛下咁… 跟住去哈X斯食下午茶(其實係睇人食…) 然後搭地鐵返到去…撞到阿媽同阿姨， 就一齊去醫院探下阿婆…仲未知幾時可以出院… 希望早日出院啦…而家屋企冇乜生氣咁… |
| 話說前排阿Sir搵人參加一個叫做「護林大使」o既義工計劃， 某個fd就拍埋我一齊參加，今日就有個委任儀式… 所以禮拜日就要一早起身著校服出門口…去地鐵站等專車去嶺南… 點知去到發現除左本校同學之外係冇人著校服…畀阿sir玩左… 等齊人就開車，轉眼間就去到屯門o既嶺南大學， 呢間係我去過o既第六間大學，亦都係我見過最細間o既大學… 去到個hall度等左半粒鐘先齊人，total有五百幾人參加… 聽左個關於郊野公園talk之後就有個宣誓儀式， 全部人企哂起身然後讀「我，ˍˍˍ正式宣誓為護林大使…」超型~ 完哂之後就坐車返荃灣…4個字車程都訓到… 食左晏之後同個fd去三聯睇書，睇左好耐跟住就返屋企攤抖下… 夜晚去唱K唱左三粒鐘…今日唔知咩事，把聲拆哂，唱到冇氣… 失聲加上腳痛，聽日返學實殘廢都似… |
| 一醒左，發覺對腳竟然仲痛過噚日，差D落唔到床… 已經係全年最後一次集會了，不過由於行路極慢， 而且廢事走上課室，所以第一次拎埋書包去集會… 成日都唔想郁，小息同lunch都吽左響課室，極之悠閒的一日… 上個禮拜報左名參加一個唔知乜野，今日收到報名表， 參加者要寫一份proposal講自己o既旅遊計劃， 全港揀得三個出黎…揀中左就畀$16000你去旅行~ 唔知我寫去邊好呢?如果真係揀中我就真係超正…不過機會極微… 放左學去interact club開會，終於都有D野可以做下… 決定6月初又賣多次旗… 夜晚收到關於阿婆不幸的消息… 希望佢可以好似阿姨咁大步檻過啦… |
| 今日係Horizon's Day，即係延展學習日， 簡單黎講就係全校分開十幾個地點去參觀， 而我就係去土木工程署－斜坡維修地盤… 起身仲要早過平日返學，然後就搭地鐵去旺角集合… 齊人之後就分批搭的士去土木工程署， 五個人坐埋一架真係迫到…好彩好快就去到… 去到間大樓度等左陣就上去一間會議室坐低， 然後就有個人(原來係助理署長)介紹土木工程署係乜東東， 佢講得實在非常之詳細，令我有D昏昏欲睡… 講左近一個鐘就講完，跟住就搭車去一個位於常樂街o既 斜坡維修地盤，果然係斜到好易「sir落街」… 我地首先去到一個貨櫃度擺低D野，然後就戴哂頭盔，超型~ 之後就響個地盤度周圍視察…不過雖然係幾有趣， 但戴住個頭盔好似有D暈，而且勁熱(試過度到40.1度)， 行左陣已經幾辛苦下，真係佩服響地盤做野D工人… 睇左個幾鐘，整個參觀活動都終於完，不過跟住仲要返學校討論， 所以就成班拉大隊去愛民h飲茶，飲完又迫的士去地鐵站 再搭地鐵返荃灣然後走返上學校，再分組present，3點解散~ 老實講個參觀係唔知有咩用， 不過間唔中走出去見識多D野都好o既… 一走就準備去醫院睇下阿婆，點知原來已經出左院， 於是就返屋企上網等夜晚同細佬去睇許志安concert~ 臨出門口先發覺唔記得話唔返屋企食飯， 已經煮緊飯就唯有食埋先…結果趕頭趕命食完飯即衝去搭車， 最後遲左3個字先去到會展，好似都未開始… 今次個concert叫做普通好睇囉，好在有唔少嘉賓， 衰在個位勁斜，畫面又畀喇叭遮住，而且D歌又唔熟… 睇到10.幾就搭小巴返屋企…同細佬傾傾下計… 佢突然話我地唔似兄弟…我聽到即刻覺得幾愕然… 係我冇盡我做阿哥o既責任? 定係我地少溝通? 抑或問題根本唔係出響我度? |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |