年月 日　
3月4日

3月1日

話咁快到3月啦~今日有個好耐冇見o既同事返黎，就係admin姐姐啦~
間公司都係要呢位同事返黎先有人齊o既感覺呢~
聽晚就係annual dinner，今日就有遊戲抽籤分組環節，
我地組最多男仔，唔知有冇著數呢~
仲公佈左聽日會頒發3個大獎，我肯定OT獎冇我份先啦…

至於工作方面，大部份時間都係空閒，眼訓到爆…
4點幾終於有份job要做，雖然只係d簡單野，但都好似如獲至寶啦…
唉…有時諗下…恨做野恨成咁，係咪都算折墮呢…

3月2日

今日de左d好麻煩o既bug，搞左好耐整掂一個又黎另一個，
食完晏都未搞掂個bug就去左上堂，又係上個禮拜上果d…
唔知點解今堂上到勁眼訓，今次反而寧願出返去debug…

之後就係萬眾期待o既annual dinner，一眾人放工就去會展隔離間酒店~
上場係自助餐，真係純粹食野咩活動都冇果隻…
我地幾個竟然係全場最早到，不過都等人開始拎野食先出發…
呢度d野食都唔錯o既，係爭在冇冷盤果d乜腸物腸囉…
今晚可以攜眷出席，除左d一pair pair，仲有幾位小朋友，都幾得意~
我就主要都係食野啦，間中行行企企吹兩咀，氣氛算不錯啦~

之後就下場，去K場頒獎玩遊戲…
結果連d咩冇遲到獎同身體健康獎都冇，車~
之後玩遊戲，我地果組d人最頹，結果又係空手而回，唉…
贏左果組每人現金600幾蚊啊，唉…
跟住歌都冇唱就走，只因累到死，聽日又要返工…
雖然咩都冇得拎走，但今日都算玩得幾開心o既~
最衰都係聽日要返工…

3月4日

今朝飲完茶出左去又一城睇《英女皇》，都不錯啦~
不過我諗要對政治有返d興趣先會真係覺得好戲…
夜晚去左我公司…樓上o既R66食自助餐，都係第一次去…
360旋轉餐廳o既景觀當然係冇得頂啦~影左好多正相…
d野食都唔錯啦，最正係成堆刺身任拎~

3月5日

又返工啦，果然係一忙就會勁忙，今日終於忙返啦，yeah~
有兩份大job響手，人都特別醒神，哈哈~
今日有免費午餐食，皆因上個星期有人贏錢~
近排公司生意似乎有返d起色啦，
見到reception一大堆report sample，應該都有d指標作用…
夜晚放工趕返屋企，因為今晚隻狗要剪毛…

3月7日

朝早搭地鐵，頭幾個站已經好慢，去到荔景深感不妙，即刻跳車~
雖然冇位坐，但起碼肯定唔會遲到又唔使趕餐死嘛…
今日KO左份job，本來expect 13號做起，足足早左成個禮拜，哈哈~
就咁睇落個job好似好煩，不過其實都係手板眼見工夫，
最後都拿拿聲搞掂左…

之後hea左半個鐘等食晏，精神狀態即時急跌，幸好只係半個鐘…
食完飯返黎又有新job，應該唔會又兩日做哂卦今次…
臨放工debug失敗，終於有日OT到6點半過後啦…

3月9日

呢兩日都係忙份大job，之前好少做account野，做d野幾新鮮啦~
上晝sit左陣堂，其他時間都係埋首工作啦，時間過得好快~
去左間好遠o既茶餐廳食晏，20蚊有3樣野食同野飲，唔錯~
下晝公司無啦啦有浸天拿水味，臭到個舍都要掩鼻…
原來係隔離office裝修緊，臭足幾個鐘…好辛苦呀…

3月12日

休息左兩日，又要繼續努力工作啦~
今日依然job不離手，份大job做得七七八八，
另外間中又黎幾份細job，不知不覺就6點鐘…
繼上個禮拜天拿水驚魂之後，今日公司又出現怪味水…
我飲果陣以為自己條利有事，做咩飲到口淡淡咁…
之後發覺其他同事都覺d水有事…都唔知係咪比天拿水污染…

3月13日

今日又係忙到爆…個大job聽日dead，仲有一大個point未搞掂…
但仲有各式各樣o既bug要de，都唔知點解d bug一次過上…
其他組o既同事就話好得閒，我唔知點解永遠同佢地調轉o既呢…
到佢地好忙果陣，我就好鬼得閒…真係風水輪流轉…

下晝仲要上堂，一黎就突擊測驗，d題目勁唔識…
仲要即場對卷，結果19分得6分，幸好都唔係最低果個…
之後上堂…好似響度dum波鐘咁dum到成6點…好眼訓呀…
跟住繼續趕工啦，今日久違o既長OT，7點半先走，wow~

3月14日

今朝終於清哂份大job，可喜可賀…即刻就開其他新job做喇…
聽日要幫個客執data，今日就準備下先…
仲要將佢個excel d data入落我地個system度…
但差唔多收工先收到個excel file，跟住係咁執呀執，
搞左兩個鐘都未搞掂，結果成8點半先走…勁呀…
我地成組人都仲有幾個未走…
我就飛van仔返去啦，勁刺激…

3月15日

今日成日都係幫個客執data，但中途好多阻滯…
首先第一步就係要send file去果部server，但搞極都唔知知send…
臨到中午先有同事開到個ftp server…
食完飯發覺駁唔到過去，要個客果邊搵人搞…
但果邊d人竟然去哂食飯，成4點先返到公司…
跟住幫佢將d excel資料放入我地個system度，
又發覺有d data錯左放唔到，又執左一輪先得…
結果今日又差唔多8點先走，但今日都只係做左一半工夫…

3月16日

今日繼續噚日o既執data工作…
本來諗住今日應該快手好多，但今次輪到網路出現問題…
駁左n次都駁唔到去客果邊，d data又有d錯要執返好，
結果都4,5點先搞掂哂d野…但今日總算可以早走啦~

3月17日

今日又要返半晝啦…其實今日都ok忙，唔少bug要de…
臨放工仲要幫手update program去客度，成點半鐘先走…
之後就入左將軍澳，今日上同事屋企玩~
第一個節目係碌ling，我都好耐好耐冇碌過啦…
成績都算係咁啦~跟住又睇左人地篤波一陣…

然後就到戲肉…wii大戰！我都係第一次玩呢部野咋…
果然好正…哈哈~真係間屋再細d都唔玩得…
不過暫時都未有衝動買住o既，係都應該買左NDS先啦…
玩左兩粒鐘大家先捨得收手，之後就去北角食飯…
去左街市食大排檔，17人圍住一檯，勁熱鬧~
食飽飽都歸家啦，今日o既聚會都唔錯~

3月20日

今日又開始得閒返啦…本來噚日搶左隔離同事份job黎做，
但今日都已經做得七七八八，淨返d point要聽日問同事…
臨放工就開始hea，hea到夠鐘差唔多想走，比個同事截住…
要幫手check野…check到成7點就要趕住走…因為今晚有約…

今晚約左幾個網友食飯，去旺角樓上cafe…
本來去左一間，但d人周圍煲煙，我地坐左陣冇叫野食就走左…
去左另一間，空氣清新d，地方舒服d，唔錯~
今晚主要都係吹水吹水同吹水…吹足兩粒鐘~

3月23日

呢兩日冇大job響手，不過都keep住幾忙…
噚日一返工就有幾份job響個tray度，不過都係好快搞掂…
至於今日就有一份大job，而且勁麻煩…
結果OT到近8點先走，今個月應該有得爆喇卦…

放工即趕返屋企啦，好似平時咁衝過馬路…
點知過到去，見兩個差人啤住我，嚇到即刻調頭走…
附近又有幾個差人徘徊，我心諗捉亂過馬路使唔使咁大陣仗…
去到地鐵站先醒起，其實係今晚煲呔響修頓搞造勢晚會o者…

3月24日

今日去青松拜阿婆，話說「拜新山」要響清明之前，就擇左今日去…
12點幾出發，一行人先入屯門食個晏…
入到去突然落雨，幾個人冇帶遮，要跑去附近整兩把頂住先…
食飽就行去青松觀啦…拜完呢度拜果度…都搞左兩個鐘…
見到「終於丙戌年…」果行，又諗起我畢業禮果日…
返到屋企都6點幾啦…

3月28日

今日搭地鐵，遇著左右兩邊各有個阿叉，之後仲坐埋一齊，
跟住就開始問我中文…問我thank you同sorry點講…
佢地好認真咁練，但講極都講唔正，都幾有趣…

返工方面，呢排都仲keep住忙，大job就冇乜，
但有好多細job要de，而且都要搞一輪先搞得掂…
臨放工收到個勁麻煩bug，搞到今晚又8點先走…今個月爆硬OT…

3月29日

今日終於清哂所有job，臨到食lunch仲開始hea起上黎，
早知噚晚唔使開2粒鐘OT…都估唔到噚日個問題咁快搞掂左…
lunch之後見technical同事好忙咁幫其他同事整機，
原來係好多機中左毒，要逐部掃左佢…估唔到d機上唔到網都會出事…
連我部機都不能倖免…不過都係你唔講我都唔覺…

跟住有個network drive死左，好多同事都做唔到野…
結果大家一齊hea下hea下，還好有免費蛋撻雞批贈下興…
都好耐冇試過呢種員工福利啦~

20016789101112月
2002123456789101112月
2003123456789101112月
2004123456789101112月
2005123456789101112月
2006123456789101112月
2007123456789101112月