3月1日

今個禮拜突然渣攤左好多~功課又冇乜，莊務又冇乜，
難得有時間可以鬆一口氣啦~
嗯…今日上堂都冇咩特別呀…
放學竟然好難得咁可以返宿訓晏覺，真係爽~
夜晚過左shaw can食飯…咁樣以黎都係第二次…
上次食左個唔係炒飯o既炒飯，今次終於係真正o既炒飯啦~

今晚d時間好似過得好快咁，睇左兩集《衝上雲霄》，
再寫下個「福利品售賣系統」，都已經11.幾，
然後就開始努力溫書啦…嗯…都唔知自己咩心態，
一方面又溫唔熟，另一方面又覺得用太多時間溫書係虛渡光陰…

3月2日

今朝氣溫急跌，而且一直都落住毛毛雨，搞到勁唔想起身…
9.半堂我較9點鬧鐘，lur左4個字先起到身…遲到總好過冇到o既…
之後堂賤數，d野未學過咪坐低聽下囉，嘩，得唔夠十個人有黎上堂…
係之後先慢慢多番d人…不過後段d野又學過，結果我訓哂…
食完飯上賤build…竟然走去同幾個CS人鋤d…都好耐冇鋤過啦我~

嘩…今日做lab好辛苦丫…都唔知點解做得咁慢…
一開頭都算幾順利，不過後尾又錯埋d白痴野…
做左兩個幾鐘，結果係最後一組走…
唉~勁早走又試過，估唔到有事又要勁遲走…
返到宿，嘩，好辛苦，不得了，即刻訓番夠本先~

夜晚都係怒溫聽日科midterm啦…
由完全唔識到而家識少少，都已經好安慰啦~

3月3日

今朝考midterm，特登早兩個字出門口準備…
呢科好多人都驚要retake，仲話多數retake等如tri-take…
我都當然驚啦，雖然d野大致上都識，但都唔熟呀…
入到去先知原來呢科考兩個鐘，變態呀…
不過其實做左一個鐘已經做哂，淨番一個鐘差唔多都係吽…

考完又要即刻買飯去上tuto，去到已經教緊野…
完左之後派番之前考o既midterm，派之前話個mean係50，
即係有一半人唔合格…我都好彩有6字頭…
不過唔知點解咁都要比人con…明明有好多人高分過我…

之後去搞reg soc d手續，要係咁走上走落，都幾煩…
然後過賤build打躉一陣就去上天文啦…
嘩，今日竟然無啦啦影班相，影左我個超眼訓look…
上完堂上返lab守soc房，渣攤左兩個鐘啦~

今晚都幾渣攤下…睇下《衝上雲霄》，
同埋寫埋系會個「福利品售賣系統」佢囉…
唔知點解今晚都要搞到3.幾先訓…

3月4日

朝早上完堂賤數走去year 2 class visit宣傳系會新活動CEG league，
順便派d問卷比佢地做…食完飯就要返去收返d問卷…
搞掂之後返賤build…跟住堂tuto走開都冇諗住上，
不過又出左功課，諗住去聽下有冇tips啦…
結果都冇，而且d野都已經識哂，早知唔去啦…

跟住上返lab搞下莊務，然後返宿hea陣，之後落嶺南場諗住練波…
去之前拎左suit果件裇衫落CC比我莊員洗…
因為聽講勁甩色，所以唔可以同其他衫一齊洗…
落到嶺南場…原來佢地冇場練波…
佢地只係練緊射龍門，結果我衫都冇換…
之後佢地去左個細場真係踢，但最後我都係冇換衫…
結果就響嶺南場睇左兩個鐘波…之後先買飯上本部開會…

今晚開ocamp會，上次因為要事去唔到，今次終於黎到啦…
嗯…正式做左輔導部部主啦~要承繼番我上莊個P~
今次個會其實又唔算傾左好多野，最麻煩都係諗個主題…
大家都冇乜諗過貨，要突然出貨都真係幾有難度…
暫時覺得開會個進度都係麻麻地…希望之後好d啦~

跟住過lab上陣網先返宿…期間睇到噚日midterm個分…又總算高過mean…
返到宿一連睇埋最後兩集《衝上雲霄》，終於都比我睇到大結局啦~
嘩…一次過睇哂40集都真係幾爽，好多之前唔明o既情節都總算明白番啦~
仲諗住今晚勁渣攤添，點知原來又有兩個program下個禮拜dead，
今晚都唔放過d時間，諗下點做啦…點知諗下諗下都搞到咁夜…

3月5日

今日好似幾頹下…唔知點解呢~禮拜五點都要休息下o既~
上果唯一一堂…又要派問卷…仲要特登早少少過賤build拎問卷~
唉…今日咁少人上堂o既…早知噚日賤數堂派仲好啦…
噚日出左midterm個分，有人99分，班人即刻話今日要做野…
結果因為太少人，大家淆哂底添…唯有等下個禮拜先啦…

禮拜五去coffee con幾乎已經成為指定動作~係呢日先咁易搵位~
食完之後去賤build印下notes就返宿啦~
聽日考programming final，梗係寫下program啦~
其實都係功課之一，遲早都要做…不過幾難做，
諗左好耐都冇乜頭緒，結果訓左兩個鐘晏覺…

夜晚食完飯繼續寫果份功課啦，嘩，都係冇乜進展，
搞左好耐先叫做寫好，不過都係唔accept，遲d先算啦~
唔理咁多住啦，總之聽日final加油啦~

==
順帶一提…呢排個留言系統唔知點解short short地…
d留言我要隔一排先一次過收到…各位留完請耐心等下啦…

3月6日

今日考final啦…係一個programming o既course…
噚日有同學約哂大家今朝去食早餐，結果竟然得兩個人去左…
今次又係好似上兩個禮拜咁，響lab怒寫program…
3個鐘做6條，一條都做唔到就肥呢個course！
唔知係咪因為今次係final啦，所以特別緊張d…

今次可能因為多人考，所以試機都特別耐…遲左大半個鐘先開始…
唉…今日表演似乎都幾失準，頭兩條頹野我都搞左成個幾鐘…
之後skip左兩題冇做，其餘兩題做完爆time limit，都唔知可以點…
結果去番另外一條，臨到淨番十幾分鐘先做到d野，
淨番1分鐘果陣怒submit，結果都係冇反應…最後做得兩條囉…
嗯…大部份人都係做到兩條囉…不過我都算做得慢左d…
唔知點解今日唔夠醒目啦，不過完左個course就唔諗咁多咯~

原本話考完試同CS開個會，係諗住整理番之前做果d問卷，
但因為收得唔夠多問卷，結果個會要延期…
食完飯咪返宿hea囉…想做功課又唔知點做…6點就返屋企啦~
響校巴站撞到個院慶宣傳部部員，好耐冇見啦~
一直怒吹水吹到沙田…我都估唔到有咁多野講…
雖然大部份時間都係呻CE有幾忙同幾頹…

3月7日

今朝有部3G比我玩，正~其實係我阿姨o既，擺響度等我地教佢用…
嗯…如果部野普及左，應該會幾好玩o既…不過而家冇興趣用住啦…
都玩左一段時間…然後先開始溫賤數，準備後日midterm~
之後過阿姨度幫手整電腦…整左個幾鐘都整唔到…
有冇人話到我聽…到底點樣可以幫一部英文WinME裝速成輸入法?

搞到5.幾就出銅鑼灣CEO neway唱K，唱到9.幾就返宿啦…
嗯…點解每次唱完K都要後悔o既…
今次返到去怒做lab report，做到5點都未做完，聽日先繼續…
渣攤完一個禮拜，呢個禮拜又要搏殺啦，日日都有節目，救命…

3月8日

朝早上堂超眼訓，好彩有notes溫，先至完全冇訓過~
食完飯怒打左半個鐘乒乓波，然後即刻仲要上PE，好彩都頂得住…
不過唔知點解今次打排球打到咁鬼搏命，搞到手腳都傷左…不過小事o者~
嘩，今堂比阿sir點相添，真係驚PE會唔知拎咩grade…

上埋晏晝d堂就返宿，做左少少lab report之後就要執野走，
因為今晚又要去交職，仲要出到去港大咁遠…
首先拎埋去suit去莊員房度換，因為之前拎左件衫去佢度洗…
搞掂哂d野就出發，搭巴士果陣彌敦道勁塞車，可惡…
最後竟然冇時間食野，不過好彩一去到已經有d茶點食…
去得d交職多，唔少人都已經熟口熟面啦…
一望就望到以前見過d港大、科大、城大果d人…

嗯…港大果然係港大，第一次去交職係用英文進行…
不過最勁都係典禮之後d茶點，簡直係應有盡有，食到我勁飽~
真係羨慕港大附近有咁多茶餐廳可以sponsor佢地…
食野之餘就當然唔少得要social啦，今次差唔多由頭傾到落尾…
傾到9.半先走…嘩…返宿途中[支力]到我不得了…

返到中大10.半，仲要去莊員間房拎番d野先可以返宿…
今晚仲要趕lab report，聽日又有midterm，真慘…
搞掂d野都已經成3點，書都仲未溫得熟添…

3月9日

今朝賤數midterm…特登早左兩個字去到勁刨d notes…好似溫得都唔熟咁…
嗯…份卷做個半鐘，其實都好易，除左一條個個都唔識做o既之外…
做完都淨低好多時間，覺又訓唔著，又唔想早走，竟然走去玩計數機…
臨尾淨番十分鐘先醒起可以諗下份program點做…後日dead…

晏晝做lab之前走左去搵dept head，傾關於工程師學會(HKIE)認可CE d野…
dept搵左GPA最高果幾個人…諗住叫佢地去見HKIE d人，但佢地諗住唔去…
最後dept head要親自邀請佢地去…最終響不斷遊說下成功左…
至於點解關我事…咁我當然唔係GPA最高果幾個啦…
只係純粹因為我係P，dept head話唔夠人去搵我頂上喎…而家唔使啦…

不知不覺原來已經係最後一次做lab啦，之後又係做project時間啦…
最後一個lab都總算幾順利啦，起碼幾早都可以走…
走之前仲拎走左project要做d野…要整個鐘出黎…
睇落好似幾好玩，似砌lego咁…不過似乎都幾浪費時間…

搞掂個lab就返賤build hea同寫program，之後同CS果邊開會，
即係開返上個禮拜六流左果個會…個會淨係睇d問卷都搞左個幾鐘…
食完飯就過番賤build，因為今次系會第一次搞糖水會~
不嬲我對糖水會都冇乜期望架喇，好彩其他year都有十幾廿人出現過…
問題反而係多人得滯，d糖水唔夠分…(其實係煲唔夠糖水…)

之後就係盛大o既慶祝活動，因為呢兩日都有莊員生日~
除左食蛋糕唱生日歌呢d活動之外，最重要都係兩個壽星仔X con啦~
不過一con親就我都不能倖免…我con完人又被con…累死啦…
玩完大家仲餓，結果叫埋外賣，食完都成11點…
返到宿咪怒寫program囉，寫到成4點，寫到d野架喇，
但有d問題似乎解決唔到…唔係要我重新寫過呀?

3月10日

唔知係咪因為唔夠訓呢…我發覺我呢排好鍾意賴床…
今朝有10.半堂…都lur到10.4先起身…唔遲就假啦…
嗯…今日上堂就冇咩特別啦…天文又係訓到死死下架啦~
派番d天文功課…哈~我之前冇乜點上堂都比我拎到滿分~

上完堂就去開會啦…嗯…今次效率好似麻麻地…
唔知點解拍照日d錢要傾咁耐…搞左成個鐘…
開完落CC食飯，順便去搵個所謂舊生…
話說前幾日無啦啦收到個電話，話想介紹下d畢業精品比我…
其實佢係想搵我地系會向d老鬼宣傳下佢d產品…
well，其實佢地買唔買都唔係我o既問題丫，又唔係我比錢…
不過一條電話繩都$39，未免又貴左d卦~

原來d校巴服務仲真係需要改善，諗住搭返車上去，
排隊排到開哂巷，當然係上唔到車啦…算，我等…
但估唔到佢真係夠膽死隔4個字先開下一班，等到我呆左…
跟住係上賤build…教人做prob & stat o既野…
嘩…成年冇掂過d applied野啦~好彩大部份都識做o者…

之後就返宿繼續怒寫program啦…4:04，終於做完，好野~

3月11日

今日完全冇上過堂(除左PE)！因為唯一果堂賤數今日取消左…
上完PE就返宿…洗衫、食午餐，都幾優閒…不過係超眼訓…
原本諗住訓個靚覺，之後先做野…不過最後都係即刻去左做功課…
做完仲教左人一陣stat o既野…跟住就落賤build幫手拎野落嶺南場，
準備今日系會o既大型活動－CEG league o既頭炮－足球比賽！

去到已經見到有堆CE人響度練緊波，我都去換番條褲踢兩野啦~
嘩，我諗我真係十年冇踢過波啦(其實除左PE堂之外都應該冇踢過)，
但係UC又唔夠人(比賽分書院黎玩)，我唯有加入玩下啦…
第一場UC已經有份，不過我地o岩o岩有6個人，結果我呢場冇踢到…
最終失左兩球，但係都仲有季軍戰要打，
今次我有出場啦，不過都冇乜掂過個波，是但啦~
可惜最後都係殿軍…算啦，志在參與o既o者都係~

之後仲有特別附加賽，我做守龍，輸左一球咁多啦，哈哈~
最後大家由5點玩到7點先走，成個活動總算完滿結束啦~
嗯…呢個活動係第一年搞，都有三四十人出席，比我預期中好啦~
希望之後o既CEG league活動都可以順利進行啦~

上NA can食完飯就落返賤build，拎d野返宿整「波波拱門」…
聽日係UC photo day啦，而莊員得我一個係UC住宿，
所以呢件野唯有響我間房整啦…返到去自己吹住波波先，
之後有幾個莊員黎幫手，整到11.幾先整完，
不過比上次NA photo day果個靚，都幾滿足~

搞掂呢舊野仲要繼續去賤build拎野…拎d箱同一張檯返宿…
唔好睇少張檯，兩個人捧返去都累到死下死下…
果舊「波波拱門」，再加張檯同一箱野，已經塞滿成間房，
今晚仲要有個莊員黎屈蛇，加埋間房有4個人…迫到不得了…
嗯…第一次有人黎屈蛇，借半張床比佢訓啦，
之後我繼續做野，後尾望過去，成張床都已經比佢霸左…
睇怕都要試下訓窗台係乜野滋味啦~

嘩，今晚3.幾訓，早左喎！不過…聽朝要7.半起身…

3月12日

噚晚臨訓前一踩上張床度，唔小心整醒左黎屈蛇o既莊員…
最後我都唔使訓窗台…不過就好少位訓啦…爭d訓到跌落床…
訓左4個鐘又要起身做野啦…洗完面就搬d野落樓下草地，
準備今日o既UC拍照日…唉…今朝得兩個莊員搬野，拎得勁辛苦…
好彩搬完之後都仲有d時間去食早餐…

唉…朝早人手勁唔夠，所以未開始有老鬼黎已經搞到好累…
我地仲要由賤build拎7箱…成90支香檳上UC，
用手推車搬左兩次都搞左個幾鐘…我去左一次都已經想死…
今次d野同NA果次都差唔多啦，係d野安排得唔夠…
好彩最後想要o既野都拎到囉…d野都總算順利進行…

今次我地做大搞，即係所有書院o既老鬼都會一齊切燒豬同噴香檳…
咁多人一齊玩噴香檳，場面自然更加壯觀啦…
所以我地一早做足預防措施，用垃圾袋遮住d袋…
但我竟然唔記得自己個袋擺開左，結果成個袋都比香檳蹂躪…

之後再落本部影大合照，影完烽火台再影飯煲底，搞掂哂都已經4點，
去賤build擺低d野就上返UC，暫時存放淨低d野響自己間房先啦…
今日響UC同本部之間走黎走去…搞到成身都係汗，
再加埋d香檳漬，即刻又要沖番個涼先啦…

嘩…經過噚日同今日o既體能鍛煉之後，我真係好累好累…
其實今個禮拜基本上都係超忙…每晚訓唔夠6個鐘…
不過噚日CEG league同今日拍照日都順利進行，
而且見到班老鬼都幾滿意我地支莊，一切努力總算冇白費~~

沖完涼執完野換完suit又要出去啦，又係交職呀…應該係最後一次啦…
今次又係去港大，最慘係記錯時間，要趕住去…
經過上次彌敦道怒塞車o既慘痛教訓之後，
今次決定轉地鐵去到佐敦先上巴士…不過最尾都冇早到…

嘩…呢個交職搞到個場地勁黑，加上我超眼訓，結果致辭時訓哂…
跟住social時間都廢事同人social(因為今次班人冇乜見過)，
淨係怒食野，食飽就搭車返屋企啦…沿途都係怒訓…
返到去又成身汗，不自覺地又沖多一次涼…
今晚12點就訓啦…好耐未試過咁早訓喇…
不過都唔可以訓夠本…因為聽朝要返中學補習…

3月13日

今朝又要早起身，因為要返中學同d低form補習~
不過竟然訓過龍，遲左20分鐘先起身…即刻趕返去啦…
點知返到去係第一個tutor去到…結果都係得四五個返左…
首先校長向3個form d學生介紹下我地先啦，
跟住就分番form囉，我去左F.3果邊…

其實我都冇諗過應該用咩型式補，因為校長冇比指引我地…
原本就話呢堆細路係全級排尾尾果堆人，
但係班F.3仔都好乖咁拎哂d功課出黎做，
唔識又會舉手問，比我想像中好好多呀…
轉眼就過左大半個鐘，班F.3就夠鐘走人啦…

之後過左F.1果邊，見到校友會個P同佢地玩緊遊戲…
佢仲叫我去買d野返黎做獎品，一買就買左幾十蚊…
結果淨番d時間都係玩遊戲同埋送獎品，同F.3果邊爭好遠…
到12點就散水啦，咁就賺左一舊返黎，都算幾輕鬆~

之後去間好耐冇去過o既茶餐廳食飯，嗯~好懷念中學o既生活~
食完就返屋企啦…上陣網之後就大昏迷，訓到成6點先起身…
今晚同細佬去睇羅大佑演唱會…當然唔係為左捧佢場啦…
係因為阿姨有份響果度演出，我地梗係要去支持下啦~~

唔知點解次次由尖咀行去紅館都可以蕩失路，今次都唔例外…
搞到最後又要跑過去添，好彩都夠時間食晚飯~
嗯…初初諗住個concert會睇到訓著，不過結果都唔錯丫~
起碼d燈光音響同之前去過o既演唱會都係咁有水準~
同埋d歌都OK啦，過半都聽過o既…都OK好聽o既…
至於阿姨出場果度…因為同時間太多人出場，
所以搵得好辛苦先估到其中一個人應該係佢…

仲以為呢個concert冇encore添，點知都有一首，
仲要去到11.幾先至完…返到屋企都12.9啦…
今晚我又要訓番夠本啦~~

3月14日

禮拜日又梗係訓到晏一晏先起身啦~不過今日都算早…12點就起左…
嗯…今日可以話係完全渣攤，真係諗唔出我今日做過乜野…
上過陣網囉…傾過陣電話囉…做過下功課囉…都差唔多啦~
夜晚落樓下食，5[食送]1湯，都幾好食，不過唔多夠飽…
返到中大去左教人stat…well，要教文科人呢d applied野都真係幾麻煩…
我覺得我自己講得好左架喇，不過…算啦~當係練習下同人補習啦~

3月15日

今朝堂早堂…個professor唔知飛左去邊，所以果堂取消左~
不過我都要早返…因為要落本部交天文功課…
之後就過賤build啦，原本諗住擺低d野就走，
但係見到唔少人響度，於是就留響度做野啦…
份project要開工啦~係整個鐘出黎，要插一大堆野落塊板，
然後左駁右駁砌佢出黎…淨係插d野落板都已經搞左成朝，手都痛埋…

上哂堂就返宿，捧番photo day d物資落賤build…
好彩有莊員幫手，如果唔係自己捧都幾係野…
之後繼續搞個project，又搞左唔少時間…
夜晚同個同學入左shaw…繼續教人stat囉…
教左兩個幾鐘…跟住3個一齊睇電視吹水~仲有雪糕食~
成11點先返宿…今晚又係對住個project啦…

3月16日

嘩…今日竟然無啦啦day-off左自己添…除左因為其中一堂又唔使返之外，
今朝早堂又因為起唔到身而冇上…同埋今個禮拜開始已經唔使再做lab…
但係我都要做project啦，成朝都淨係響度搞d software野…
下晝就落lab怒駁線，駁左三粒鐘，隻手繼續痛緊…

之後返宿試一試塊板，搞掂之後又落返賤build，
hea陣就出沙田啦，今晚細O組聚~好耐未聚過啦~
今次係食元氣…我第一次去食咋…竟然唔使等位，正~
雖然坐唔到迴轉位，但都好彩可以比我怒食野，
真係食得好飽~8個人夾埋食左六十幾碟野…
不過原來咁飽每人都唔使$100，算抵啦~

原本之後要出去見份工(我都唔知係咩工)，但無啦啦改左聽日，
所以食完野就返宿啦…又係對住件project啦…
基本上我今日成日都係對住件野…但搞左n個鐘都未駁哂d線，
不過都七七八八啦，聽晚再繼續啦~

3月17日

今日終於有番d堂上下啦…再唔上真係唔知自己返緊學…
不過堂天文又怒訓到死死下啦，真係唔知點解可以訓得咁爽~
之後上返宿…幫個同學搞搞個project…跟住落番賤build，
又係繼續份project…我發覺有一堆線上下左右竟然調轉哂黎駁…
結果今晚都淨係用黎調番轉d線…激死…
不過好彩最後個鐘都試到用到啦~爭少少功能就搞掂~

嗯…今晚o既晚餐係杯麵一個…呢排都真係幾頹下…
唉~唔知點解…今晚d感覺唔係咁好…唔知呢…

3月18日

今日除左上PE已經冇上過其他堂啦…
晏晝去左lab度整埋個project…終於搞掂哂啦~yeah~
期間去左賤build收香檳…嘩…又要拎千幾蚊出黎啦…
跟住返宿一陣就落左嶺南場，叫做e-league去打下氣啦~
不過睇左一陣又要走…因為要去開首長會…
今次仲同faculty o既大粒佬一齊開，超眼訓…
夜晚返到宿就寫program啦…睇落好簡單o既部份都搞左我好耐添…

今日我真係非常之唔開心，晏晝果陣…簡直喊到死左咁滯…
我已經好耐未試過喊得咁緊要啦…完全係抖唔到氣果隻…
我對唔住我屋企人…我令佢地太擔心啦…
我對唔住我d莊員…我放少左時間落莊務度…
我對唔住我自己…真係唔知點解會咁衝動…
總之今日受左好大好大o既教訓，
希望上過呢堂之後，我會懂得更多，諗得更多。

其實做人…最緊要都真係開心…
點樣先至可以開心呢…簡簡單單就夠…
以我o既性格…有d野做唔到就真係做唔到，
我已經決定左，以後唔會再勉強自己，真係，最緊要開心。
仲有，我要珍惜身邊所有人，屋企人、朋友、莊員、同學…

　一閃一閃小星星
　簡簡單單一輩子
　就從頭到尾哼一次
　忘記智商去做人都願意

夜晚事件總算解決，真係要多謝屋企人咁關心我…實在對唔住佢地…
仲要多謝幾位好朋友咁關心我，我已經冇事啦，各位唔需要擔心~
到聽日我就會重新振作，繼續做好自己本份啦~

3月19日

今日又係書院拍照日啦…唔經唔覺已經係第3個…
不過今次我唔使一朝早就去啦，仲可以去上堂添…
跟住仲要上月會，上埋呢次就唔使再上啦~
今次講文物遺跡果d野，聽落去好似幾悶，其實聽落去都OK，
不過我一早已經打算訓覺，結果都冇人阻到我訓~

好耐冇同大O組mate食飯啦~不過今次得兩個女仔一齊…
食完去賤build交功課，跟住就即刻落CC幫手搞photo day啦~
嘩…雖然成條馬路用左黎放counter，但係都係勁迫，
幾個莊員企左響波波橋前面差唔差企都冇位企…
今次我自己冇咁累啦…淨係落過火車站拎西餅…

個counter 4點鐘已經要收檔，不過CE人5點幾先影相，
所以收完counter仲要留低看住老鬼d袋…
班莊員冇乜好做…乜都玩一餐…連大聲公都唔放過…
最搞笑就係響度挑釁IE soc個P…不過純粹係玩下o者~
等到5點半就拎返d野上soc房，跟住返宿上陣網，
然後就返屋企啦~~成半個月冇食過屋企d飯啦~

3月20日

啊~~~好耐未試過渣攤成咁喇，好爽呀~
今朝除左返左中學補習之外，幾乎乜野都未做過~
嗯…補習…同上個禮拜差唔多啦，
係d細路開始活躍左…最後幾個字又好唔耐煩話要走…

晏晝訓晏覺！訓左三個鐘左右啦~
夜晚教阿姨玩部3G手機…都玩左好多功能~
well…玩玩下先知原來我部手機可以飛線…
其餘時間都係睇電視啦…好耐冇試過咁留意一單新聞啦~

3月21日

朝早落樓下飲茶…好耐未飲過啦~
跟住就同阿媽佢地去燒野食…都係好耐未燒過啦~
首先去皇室堡入貨，跟住就飛的去深水灣(唔知點解要咁樣?)…
聽講話呢度多爐，所以黎試下囉…咁又的確係幾多爐，
不過比大班菲傭進駐左，都仲有爐用o既~
嗯…呢度d景幾靚架，仲望到海洋公園~最衰冇帶相機…

今次燒左五個幾鐘，飽哂啦~今次仲有乳鴿可以燒…我都係第一次見…
最正係今日天氣都算唔錯，行下沙灘，感覺都幾舒服~
未出發之前都諗過唔去架，始終個人都幾累下…
不過去完之後…除左對腳累左d之外，個人好似精神左唔少喎~
睇黎出去呼吸下新鮮空氣真係幾好~
難得呢排比較得閒，要多d搵機會出去啦~

同埋我都好耐冇去過沙灘啦…我真係幾鍾意沙灘架~
今日我都響沙灘行左好耐好耐…雖然大部份時間都係自己行…
響沙灘…可以令我勾起好多開心o既回憶架~
可能呢排太忙啦…呢d回憶好似逐漸消失咁…
不過一去到沙灘就再呈現返出黎啦~
成個人好似突然充實左好多咁…

唉~讀左大學咁耐，我諗都可以用「庸庸碌碌」黎形容d生活…
一直都冇時間諗下自己做緊乜，以前做過乜，未來可以做d乜…
只可以盲目咁做手頭上要做o既野，嚴重d講…成個人靈魂好似唔見左咁…
估唔到行下沙灘~都可以令我諗起呢d野…
真係想搵幾日，放低手上所有工作，玩都唔玩，
比我思考下呢d睇落無聊o既問題…

講番今日，都差唔多啦，燒完野咪直接返宿囉…我都未試過咁早返去…
今晚係咁reply newsgroup，同埋整系會個問卷調查囉…
都要休息下啦…功課唔理住咯~

3月22日

兩個禮拜冇食過CC Can，今日又再重臨，突然覺得頹飯勁好食！
嗯…不知不覺…PE已經去到最尾個禮拜啦，下個禮拜就開始考試啦…
當初勁驚會肥，因為之前次次都係打得幾下…
過左咁多個禮拜之後，而家終於有返d信心啦~應該都pass卦~~

呢排真係超級渣攤，就比我好好咁休息下啦…
4.幾放學…去百佳入完貨就返宿啦~之後都冇出過去…
今日竟然用左好多時間去睇個網頁…話有個人由2036年黎到2000年左右，
然後響網上post左勁多野講關於未來，話下年美國會打內戰，
2015年會有第三次世界大戰之類…聽落都幾得人驚…
不過有幾多成值得相信呢…就真係唔敢講…
雖然個網成堆英文…但都真係幾有趣~睇左我成兩個鐘…
其餘時間都係寫下program同搞下個問卷囉…進展都係麻麻地…

3月23日

嘩…今日竟然訓到12點幾，真係刺激…d早堂又miss哂…
起身上陣網、食個麵，已經夠鐘去上堂…
今堂臨完果陣，professor話要做個project，3個人一組…
唔知點解一講完呢句，已經有兩組人想搵我同佢地part…
正當我煩緊同邊個一組果陣…突然有人打黎話又想同佢part…
我都唔知我自己幾時變得咁搶手…不過咁都幾令人煩惱…
最後唯有揀左自己最想入果組囉…
其他兩組我都想入架…但冇計啦…希望冇人介意啦…

去賤build印完notes…唔知點解突然好有興致去睇番d notes…
好似midterm之後都冇好好咁學番d野…真係要抽番d時間睇下啦~
跟住買左幾包嘉頓時時食返宿，就開始做野啦，繼續搞個問卷調查…
嘩…竟然不知不覺間就清哂d餅…話哂都有廿幾塊…
個問卷調查…都唔知點解搞咁耐…整左幾個鐘先做完…

夜晚出火炭食飯…嗯…我都未試過咁少人一齊去果度食野…
今晚係咁比人玩…又淋水又剩…不過都好開心~
估唔到個2人套餐3個人食都可以咁飽~雖然貴左少少…
返到宿…諗住寫program…不過唔知點解進度超慢…

3月24日

今朝堂早堂又冇訓…原因係我係咁刨返d notes…終於知道番之前講乜啦…
但個professor講d野就真係…半個鐘都係同一張slide，係咁VCC、VEE，天啊…
明明今日原本都唔係好眼訓，但唔知點解去親上天文都會訓到想死…
今次講黑洞，根本就勁有趣，但反而訓得仲犀利，都唔知點解…

之後去lab hea，寫埋個program先啦…總算係寫完啦…
但唔知點解個個都要勁鬥快…雖然份功課的確要鬥快…
不過諗勁耐先諗到方法快果幾秒…我都唔知有乜謂~我都係得閒先諗啦~
跟住繼續乖乖咁睇notes，仲有唔夠一個月就final，係時候追番學過d野啦~

夜晚同班CE人去食飯，除左莊員之外都係第一次，都有成廿人去，唔錯~
連續兩晚去火炭，不過兩晚d氣氛截然不同…今次熱鬧好多…
唔知點解次次食親都係果d野，但又次次都覺得咁好食~
仲突然愛上雞粥…而且可以任添果下先抵死…食到我勁飽…
等我飲埋罐可樂，個肚已經好漲，點知班人就開始隊酒…
我飲左一杯已經覺得好辛苦下，點知仲要我成支上，超辛苦…
最後都係頂唔順放棄左啦…樣衰係樣衰d…冇計啦但…

返到宿…今晚都冇乜作為…聽日咁得閒，溫下書啦去~

3月25日

話咁快，今堂PE已經係考試之前最後一堂啦…
唔知點解今次d上手下手比之前退步左，都有d擔心考試點…
之後就返宿hea，同做左少少功課咁啦~
期間收到個電話，終於比我搵到第一份補習啦~
係上網果d中介服務搵返黎，禮拜二開始補，即管睇下得唔得啦~

跟住落本部拎返d功課啦…最緊要係d lab report啦…
有一份有7成人被捉抄，我都竟然不能倖免，
唯有執執份野再交過囉…冇計啦…
之後去賤build拎返大堆功課，然後正想返宿繼續做功課之際，
比人召左去u gym練習…因為之前報左名同同學玩拉機接力賽~

所謂拉機即係拉d划艇機，我地CE都有堆同學成日玩呢家野…
我今次都係第一次去u gym間健身室，原來都幾多野玩喎~
仲以為划艇機拉下拉下好容易，原來都好多動作要跟架…
結果玩左兩個鐘，幾好玩，但玩完都幾累~

跟住去coffee con食野~嘩…好耐冇食過啦…
響果度坐左足足半個鐘梳化，真係賞心樂事~
之後去賤build開ocamp會，原本係小花園開，
不過唔夠位又落雨，結果走左去IE lab開…勁迫…
好彩今次唔係開好耐，8點幾已經完啦~

之後返宿…有兩個同學上黎坐左一輪先走，
跟住就做埋d功課，然後再執埋野啦…
執緊果陣…深感不妙…銀包不見了…
搵間房地毯式搜查一輪都搵唔到，再諗番之前…
返宿之前響百萬大道借左張學生證比人，之後趕搭校巴，
最有可能係響呢個時候跌左銀包…

既然宿都搵唔到就唯有直接落百萬大道搵，
一個人，夜媽媽，仲要落住雨，都咪話唔悽涼…
經過地毯式搜查之後都係搵唔到，唯有去保安組記低先…
跟住再即刻打電話報失返兩張提款卡…
其他野暫時唔重要，唯有返宿等消息囉…

唉…o岩o岩先話搵到份補習，轉過頭又竟然唔見銀包…
好彩呢期銀包唔算多錢，不過要補領返d野都幾麻煩…
好多人話中大唔見銀包幾大機會搵得返，望就咁望啦…
不過上個禮拜先話唔希望人地再擔心我，
估唔到今日又要令人擔心、令人失望…唉…
但今次冇太唔開心啦，係覺得麻煩o者…
仲諗住今日用d時間溫書添，結果當然冇哂時間啦…

3月26日

話咁快已經係最後一次photo day喇，今次係去shaw~
正當我去到校巴站諗住入shaw之際，突然有電話打黎，
叫我去賤build拎d紙皮箱出黎，唯有即刻改變行程囉…
去到sir run run…等左勁耐都冇shaw車…
最後都要死死氣由馮景禧行落去…累死我啦…

去到見到個counter都差唔多set好，hea左陣就落賤build，
填form申請ocamp宣傳位囉…之後就同個莊員出太和拎乳豬~
好耐冇去過太和站啦…以前黎呢個站都係為左玩電腦奧林匹克…
行左一輪先去到間酒樓…十隻乳豬分批送到~
跟住拎落去等租返黎o既van仔，一路等d途人都註足觀看…
等陣架車果陣冇野做，響度研究酒樓d野食價錢，
嘩，原來而家d酒樓做到d野食咁鬼平，真係得閒要去飲下茶先得~

出發時收到電話…話大學圖書館收到個銀包…即刻放低心頭大石啦…
返到中大放低哂d豬，就即刻落本部拎返個銀包，
結果個銀包冇野唔見到，真係好好彩~
雖然係咁，不過總算又得到個好好o既教訓啦…
真係多謝哂拎個銀包去圖書館果位人兄~

出到圖書館無啦啦比人捉左去烽火台拉機…好累呀…
拉完就返shaw，食左個我入中大咁耐以黎…最惡哽o既一餐…
之後去counter繼續打點一切啦…
last一次拍照日梗係去盡佢啦，香檳都買多好多~
結果班老鬼噴到癲哂，結果我條褲都濕哂…
最後抹野拖地都搞左成個鐘，不過今日總算順利o既~
最好彩係成日都冇乜點落雨，完左先開始有少少雨~

落本部還左個大聲公，跟住返宿訓晏覺…
夜晚溫書準備聽日midterm…仲以為冇乜野溫，
但溫溫下先發覺好多野可以睇，溫到好眼訓下…

↓十隻豬

3月27日

今朝又要midterm啦…又係埋機寫program…
特登早左兩個字返lab，想印番之前d program出黎參考，
點知部dot matrix冇料到，印左堆白紙出黎…
今次d題目一定難過上一次啦~不過第一條竟然睇錯題目…
之後用左個幾鐘黎做其中一題，最後唔知點解錯…
淨番兩題寫都冇寫過…結果做到兩題，都OK啦~

食完飯渣左陣攤，跟住同幾個莊員入shaw，
參加dept校友會o既會員大會同BBQ…
個會員大會頹過中學校友會果d好多…起碼冇人會插d莊員，
乜野都話咁快通過左…算啦…話哂人地都只係第一屆…
不過個校友會本身仲頹，全年得3個活動…今次係其中一個…

之後個BBQ…因為天氣問題而改左去shaw can食三文治，
我食左好多件呀，又有野飲，仲要全部免費添，冇得BBQ都算啦~
跟住班老鬼同我地吹水…嘩，乜傾d咁technical o既野…悶悶地添…
hea到4.幾個活動完…之後咪返宿渣陣攤~

夜晚出銅鑼灣，約左阿爸食飯…都幾個月冇見啦…
之前約埋細佬一齊食，點知電話打極都冇人聽，等左勁耐…
原來佢做facial做晏左，結果我呆等左半個鐘…
去左條「日本拉麵橫丁」，勁多拉麵舖，正~
食左個超多叉燒o既叉燒拉麵，好滿足~

之後阿爸趕住做野就走左啦，跟住細佬突然話想唱K，
但去到睇過d價錢簡直嚇窒左，起碼都要每人$140，
諗住返荃灣睇下會唔會平d啦，結果都只係平少少，唯有放棄啦…

3月28日

禮拜日，仲要天陰陰…搞到成個人都冇乜mood咁…所以都冇乜做過乜野…
又係補寫日記、上下網、食個麵咁，然後晏晝出左去飛髮囉…
跟住勁無聊咁睇左半本書…係以前F.2做閱讀報告o既書…
夜晚出荃灣唱K…遲左出去，所以都唔係唱得好耐，我都係志在填飽個肚o者~
返宿都係冇咩搞作…係要做3次天文功課囉…因為要幫中同做埋…

3月29日

今朝早堂勁多人有去上堂…好多原因都係只有一個：抄source…
今次份功課個個都話唔識做，個個都等source，以至貨源短缺，
我等左足足一堂先等到一份source出黎，怒抄完又要即刻借比人…
之後上完堂成班人又響賤build怒抄，場面之壯觀簡直無法想像…

唉…今日PE超灰…開始考試啦，首先考下手…1下半分，滿分30分，
我練習果陣狀態都仲唔錯，閒閒地都有幾十下，
點知到考果陣，兩次都勁快出界，破左全場最低紀錄，天啊……
雖然我一開始都擔心會肥，但都唔使肥得咁樣衰卦…救命…
好彩阿sir好人，點都會比我補考到pass o既…唔會次次都咁失準卦…
禮拜四仲要考我唔掂o既上手，仲要第一個考，god bless me…
考完之後成個人都頹哂、灰哂，啊………

晚飯之前都係響lab hea，同上莊個P傾左好多關於ocamp o既野…
似乎我地好多野都未傾好，得閒又要開下會啦~
夜晚有同學上黎搞左陣project d野，之後都冇咩搞作，差唔多hea左晚…
聽日第一次同人補習，努力啦~

3月30日

今朝一早就落去文化廣場，玩室內划艇接力賽…即係所謂拉機賽~
去左見有排都未開始，所以去coffee con食左個早餐囉~都幾歎…
之後hea左好耐先開始比賽，首先係混合賽，參加果d都係勁人，氣氛都幾緊張~
跟住男子分系賽，即係我地參加果個項目啦…
估唔到咁少隊伍參加，得果4隊，我地CE都佔左兩隊(夾埋仲要有7個莊員)…
我之前都未練過500米，原來拉起上黎真係好辛苦下…
最後我地果隊第4，另一隊第1，都預期之內啦~
我地呢d黑馬…都係志在玩下o既o者~都幾好玩丫~

頒獎之後就去食飯，又係coffee con~
之後走去睇大專拉機賽，有埋其他U o既人參加，
個氣氛仲激烈，睇到中大贏左之後就返lab啦~
買完d野咪去上今日唯一一堂囉…

跟住做lab要dem個project，即係個電子鐘~
佢有3個部份要做，但係又得3個tutor比分，
結果dem每個部份都要排隊等好耐，等到勁唔耐煩…
我之後要補習，所以要趕住走…但夠鐘都未dem哂3 part，
最後唯有打尖，真係唔好意思…不過如果唔係咁…可能要等多兩個鐘…

dem完project即刻趕去補習啦，呢世人第一次同人補習~
係去帝景峰同個F.1仔補全科，最後總算準時去到…
嘩，呢度真係幾豪宅下，訪客登記都麻煩過人…
上到去得個F.1仔響度，個阿媽全程都冇出現過…
個細路都幾乖呀(應該)，除左有時唔知點解出左房好耐都唔入返去…
仲有最初話補數理，結果係變全科，今次係補EPA…

兩個鐘轉眼就過啦，有d唔甘心就係補完習竟然要比錢人…
(事關佢有d村巴飛可以買，去果度會方便好多，我買左一堆)
出到去深感不妙…落大雨仲要行雷閃電…最慘係等3個字先有小巴…
落返石峽尾，諗住行過去九龍塘，結果唔識路，放棄左…
夜晚約左人食飯，但仲有成個幾鐘，又唔想返宿，
結果搭地鐵去左行又一城…去左page one睇書，幾高檔~

睇到夠鐘就搭火車返沙田…今晚去沙角村食宵~
查實我都未去過沙角村，都係睇地圖先知個位置…
結果都要摸下摸下先去到，沿路仲係咁落雨同行雷，都幾刺激…
原來呢度d野食幾平架喎，不過麻麻地好食…
果d雞粥…叫佢做湯飯會比較貼切d…

之後原本諗住搭火車返去，但雨勢突然大左，最後決定搭的士返去…
今晚都食得幾開心呀~不過如果唔係落雨就應該更好~
落的士果下真係超大雨，一落車發覺已經水浸緊，
仲要跌埋把遮，個身即刻濕哂，返到宿要即刻沖涼…
原來已經出左黃雨，唔怪之得落到狗屎咁激…

3月31日

今朝早堂勁聽唔明prof講乜，不過難得竟然全程冇訓到~
食晏又係去coffee con啦…估唔到一係就唔去，一去就成日去…
上完堂天文之後就去拎份project，係另一個course o既，同個鐘無關…
今次玩mp3機，要將個mp3程式放入去部PDA之類…
拎完堆野就入lab試啦，點知一黎就整爛左個火牛，好彩唔使賠錢…
結果玩左成個鐘，都幾好玩~不過玩完仲要寫report…

夜晚頹頹地食左個杯麵，就去開首長會…
今次唔齊人(原本話要齊人先可以開)，但今次都照傾野，
傾到差唔多9點先散會…原本諗住去city聽個briefing最後都冇去…
跟住印少少野就返宿啦…今晚怒做project report！
我o既目標係下個禮拜初之前完成兩份report~

2001 6 7 8 9 10 11 12 月

2002 1 2 3 4 5 6 7 8 9 10 11 12 月

2003 1 2 3 4 5 6 7 8 9 10 11 12 月

2004 1 2 3 4 5 6 7 8 9 10 11 12 月

2005 1 2 3 4 5 6 7 8 9 10 11 12 月

2006 1 2 3 4 5 6 7 8 9 10 11 12 月

2007 1 2 3 4 5 6 7 8 9 10 11 12 月

2001						6	7	8	9	10	11	12	月
2002	1	2	3	4	5	6	7	8	9	10	11	12	月
2003	1	2	3	4	5	6	7	8	9	10	11	12	月
2004	1	2	3	4	5	6	7	8	9	10	11	12	月
2005	1	2	3	4	5	6	7	8	9	10	11	12	月
2006	1	2	3	4	5	6	7	8	9	10	11	12	月
2007	1	2	3	4	5	6	7	8	9	10	11	12	月