3月1日 |
3月4日 |
3月6日 |
3月10日 |
3月13日 |
3月14日 |
3月15日 |
3月16日 |
3月17日 |
3月20日 |
3月22日 |
3月23日 |
3月24日 |
3月27日 |
3月28日 |
3月29日 |
3月30日 |
| 今日對於我地班黎講係幾重要的日子， 除左有位同學同埋pure miss今日生日之外， 仲有另一位同學今日last day，大家都盡最後努力問佢問題… 到pure堂仲一齊唱生日歌…不過唱完之後上堂好悶-_- 放左學係電腦學會打字比賽…得一個冇到，算係唔錯， 個氣氛都幾唔錯下，不過如果多少少人參加就更好~ 返到屋企上左陣網就出門口過海去會展睇個concert， 睇之前首先去M記食晚飯…咁o岩晏晝又係去M記試新口味， 夜晚即刻爆哂瘡… 講返個concert，有eason+joey+twins，都坐得幾遠下， 不過D歌都算幾o岩聽，但係嫌短左少少…唔夠兩個鐘… 之後坐小巴返荃灣食埋宵夜先返屋企… |
| 成日都係搞hkspeed個project…希望今次係最後一次了… 下晝開始著手搞wic…開始搵人幫手…幾個鐘已經有唔少人申請左… 希望可以盡量抽多D時間搞好佢啦~ 夜晚睇左套「鬼眼」…悶到不得了…睇到最尾先知佢講乜… 不過有個場面超級驚嚇…隻鬼走出黎跟住「嘔~~」 嚇到我即刻走開… |
| 朝早去開舊生會例會，順便試左個板烤雞早餐~都幾好食~ 下晝返屋企上下網，溫下書咁， 夜晚出去唱K…唱左三個幾鐘唱到氣咳~ |
| 今朝集會有個電腦學會宣佈需要用到道具… 如果落雨唔使集會的話D道具就冇用了… 好彩天公造美，結果仲出左D太陽… 又拎蘋果又開閃光燈都係為左宣傳禮拜五個flash製作班， (下面o個幅就係用閃光燈影出黎o個幅…) 結果上到去見到張報名表就黎full哂…總算冇白廢心機~ lunch成班人去酒樓同去澳洲的同學farewell… 睇落好似冇乜人唔捨得佢…當然包括我… 有人叫我代表班會送禮物畀佢…我死都唔制…畀miss話我固執… 不過對住呢個人…我真係唔可以心軟… 希望佢去到o個邊忘記我好了… 放左學又再train debate…原來後日已經係喇… 諗諗下…原來只係train左短短一個月， 我D英文同演講技巧都好似進步左…就算咁唔好彩輸左都有賺啦… |
| 頭兩堂pure測驗…做完竟然有幾個字時間淨… 可惜原來第一條錯左…冇左20%… 今日好似幾得閒咁，小息lunch放學都冇乜野做， 4點就返到屋企…之後好似好多野做但轉眼間又做哂， 想搞下個網但server又出問題…成日好似冇做過野咁… |
| 今日係debate準決賽…雖然只係叫做floorspeaker， 但心情都有D緊張…放左學就準時去到geog room準備， 對方一路講我就一路抄，最後畀佢講中左我準備問的問題， 然後再可以補多一條黎問…自己表現都比我預期中好~ 經過個幾鐘頭的辯論，終於計好個分， 然後評判出黎分佈結果…首先對方係544分， 然後就話我地係6…未聽完大家都已經開心到拍哂手掌， 我都聽唔到幾分…完左之後阿Sir隨即祝賀我地同埋進行檢討… 不過原來兩個禮拜後的星期五就已經係決賽， 所以黎緊個禮拜六就已經要開始準備… |
| lunch之前都冇咩發生…食完飯之後上左compu room學flash… 聽日就教喇…但原來屋企同學校用緊唔同版本， 希望聽日主持flash班時可以執生啦… 放學之後原本約左阿Sir教佢寫網頁，不過搵勻全校都搵唔到佢， 走上走落幾十次…搵到索哂氣…最後唯有趁冇其他野做， 搵另一個阿Sir教佢upload網頁…教完返去都只係五點~ |
| 今日有三堂空堂…用左幾個字就抄哂個讀書報告… 之後淨低D時間好得閒~好耐未試過~ 中文堂要做oral presentation… 題目係「你的好友因失戀而情緒低落，試想辦法幫助他」… 呢個題目都唔知o岩唔o岩我講，不過miss話我唔夠point… 放左學教flash製作班，今次幾多人，F.1到F.4都有~ 不過F.1有D仲勁過我，高form就要講幾次先明… 一連講個幾鐘，講到我口水都乾哂… 教慢左少少，不過都冇乜其他問題啦…衰在唔記得影相… 收到debate決賽的題目係「無證兒童有權入學」， 我地又係反方…聽日已經要開始傾points… |
| 下晝返學校開會準備下下個禮拜五的debate， 今次的進度都唔錯，傾左幾個鐘都已經有唔少point~ |
| 正當各位同學忙於趕中文book report時， 我今日幾得閒下，所以晏晝就出左去唱K， 今次仲約埋上年暑假去韓國旅行時識o既團友一齊去， 七個月冇見…都冇乜點變… 一路唱就令我諗返起o個幾日韓國之旅~ 唱左三個半鐘，都唱到斷氣了， 就去食壽司(好耐冇食過了)，食左6碟，飽到不得了~ |
| 今日係911事件半周年…亦都係…算喇，都廢事提… 朝早空堂開班會，決定復活假去行山，睇黎呢個假都幾忙下~ 同埋又傾好決定整班衫，整完成班人著出黎一定好型~ 放學之後又係開會準備debate…開到5.8個字… 跟住落到樓下見到成班同學響到傾緊升學問題， 於是就傾埋一份，傾傾下就傾左半個鐘… 返到屋企已經成7點，不過個天仲未黑，越黎越有夏天feel~ |
| 朝早同同學傾好決定整班衫同行山， 之後傳name list畀大家剔去唔去，都唔少人參加， 不過個個當左張紙係討論板…係咁「留言」-_- 如果個班網個討論板唔係short左就唔使搞成咁… 放學之後好多同學響度睇D jupas野…我都趁得閒睇下… 我到而家係決定左讀compu…不過都仲未諗到讀邊間同咩科… 如果想入中大讀CS要AL有BBC…睇黎都幾[吻]水… 跟住開完會討論關於禮拜四幫手搞網頁文化分享班的事… 到而家我都未知點講好…希望到時順利啦… |
| 今日好有夏天feel…朝早落左幾場驟雨…跟住又同時出太陽， 不過仲以為會見到彩虹，結果望左成個小息都冇… 放左學好得閒，上左MMLC試下dreamweaver點用跟住就返屋企了， 不過返到去為左wic同聊天室的事同網友傾左好幾個鐘， 結果今晚都冇乜做到D乜野… |
| 上年今日係會考前最後一日返學…咁快就已經一年~ 回想起o個日…撞o岩石圍角有警員遇襲…真係刺激… 放左學幫學生會搞個網頁文化分享班， 我之前諗住唔使點準備，就咁爆肚就得， 點知D參加者又冇乜反應，問極都唔應，我都唔知點講好… 而且有少少overrun，臨尾講得勁趕… 今次都唔係咁滿意自己表現，下次要準備得充足D喇… 下面係applied教緊的calculus，今日上堂兩人一組鬥快計數， 我地班o既數王一個人一組都贏哂其他組…變態… |
| last兩堂applied有校長同埋好多miss阿Sir入黎睇我地上堂… 響咁大壓力下…阿sir不幸計錯條數…好彩我自己冇訓著… 最搞笑係打招呼o個陣…成班人同時走出走入都唔知點講… 放左學之後好難得冇野做，其實我係諗住開compu club會， 不過個個幹事都唔得閒，走落去同miss傾左一陣就返左屋企… 返到屋企收到個email…港台邀請wic網主(目前黎講即係我) 下個禮拜六上去做個關於自然災害的訪問， 我諗住呢個咁難得的機會梗係唔可以錯過， 好可惜o個日又係天文台開放日…更加要返學校面試… 真係唔知點算好… 下面係今朝phy堂的實驗…做左兩個鐘先做得一個…真失敗 |
| 成朝響度打email同埋處理成為wic staff的申請， 下晝返學校做drama rehearsal…雖然我冇份演出， 但係負責播slide，所以今日都返去綵排下… 返到學校一個熟人都冇…都幾悶下…唯有趁機會玩下波子機… 搞掂哂D slide就走…點知出面落緊微雨…跟住先發覺把遮唔見左… 呢把曾經插到我血肉橫飛的遮終於都離我而去， 既然把遮而家都爛埋就搵日買過把先… |
| 朝早去愉景新城開會…預備個英文project… 開完會仲有D時間，於是就返屋企上下網先， 等阿媽放工食埋飯就去石澳BBQ~ 去到筲箕灣首先買野食先，然後搭車去到石澳都已經五點… 雖然係天陰陰，但都好彩一直都冇落雨~ 一開始好肚餓，所以不斷燒野黎食， 不過食左兩粒鐘就已經飽哂~同時個天都已經黑哂， 我一個人走出沙灘，好黑，好靜，個感覺好free，真係好爽~ 到左8點半大家都已經食唔落，就搭車返去喇， 去到個巴士站又諗住示範用電話買汽水，點知失敗… |
| 集完會之後第一堂空堂即刻衝上去圖書館 然後用左大半堂作好篇白雪公主未來版出黎， 跟住仲有一堂就去睇下入大學D野… 放左學去左開會準備debate一陣… 跟住又開會準備禮拜四的網頁文化分享班第二堂， 今次準備充足D，應該唔會好似上次咁喇卦~~ 放學返左黎之後有電話打黎，係港台問我關於禮拜六的事， 佢話要我搵D關於地震、水災同打風的儀器資料…叫我去邊度搵… 不過原來呢個節目係上電視…咁難得的機會點都要搵夠佢啦… |
| 小息同lunch都要走上走落…要響地下同4樓來回幾次…好[支力]… 問左阿Sir禮拜六面試可唔可以改期… 結果日子改唔到…只係可以改早D… 到o個日就要面完試即刻飛的去港台…真係趕到不得了… 放左學去maths club集會，等到3點半都只係得小貓一兩隻， 原來個個畀人拉左去maths quiz，唔怪得咁少人…真係冇眼睇… 個集會響幹事仲多過會員o既情況下，終於都完左… 跟住去準備面試…話說唔知幾時報左名參加7月學校的drama做演員， 幾十人去爭12個位，真係爭到頭崩額裂… 面試要用約一分鐘時間介紹自己同埋唱首歌… 我原本諗住揀《Shall We Talk》， 不過評判話我知好多人揀呢首聽到悶哂， 臨時臨急決定改唱《獅子山下》，雖然背唔熟， 但都起碼突出少少… 我係尾二一個被面試…雖然我覺得自己表現都唔錯， 但原來主要都係搵低form的人扮細路， 所以我自己機會都睇怕極微喇… |
| 呢排課室竟然同時興起象棋同搖搖熱潮…真係搞野… 可惜o既係我兩樣都唔識… 朝早上完applied堂，副眼鏡竟然無啦啦「啪」一聲咁爛左， 成條架斷左，結果搵條橡筋箍住副眼鏡都唔掂，個樣仲好滑稽… 結果到小息要搵膠紙暫時痴住個架同埋副眼鏡先至勉強戴到… 不過睇野就睇得好唔舒服，結果PE堂都冇上到， 幫左阿Sir打份野然後行行企企就過左兩堂… lunch以interact club幹事身份上家政室幫手整曲奇餅用黎義賣… 咁大個人第一次磋麵粉，磋到痴住哂隻手，真係得人驚… 焗左出黎睇怕我自己都唔敢食返… 放左學去eng quiz的rehearsal…又係負責搞電腦的東東， 搞到成六點就返去整眼鏡… 結果等左半個鐘終於整返副新眼鏡， 如果整唔好的話聽日就要帶住副核突士啤鏡出街…真係嚇死人 |
| 日頭都冇乜特別野發生，但係放左學就超忙… 要同時去網頁文化分享班、drama綵排同debate training， 皆因聽日係english debate+quiz+drama… 首先去MMLC用左15分鐘黎教dreamweaver， 然後極速走去GP Rm讀一次debate份稿， 再入hall綵排個drama，結果排左兩次…足足用左三個鐘， 結果7點半先離開學校…好耐未試過咁夜仲響學校~ 返到屋企超[支力]，部機又畀人用緊， 沖左個涼之後就訓左個晏覺(真係好晏)， 等到成10點先食飯…然後拿拿臨搞埋聽日D野~ |
| 今日係english debate+quiz+drama… 入到hall首先就係debate決賽， 今次面對住成千人講野，都咪話唔緊張， 一開始就唔記得向chairman示意… 不過都總算順利完成問題，一問完即刻急到要衝入toilet… 然後睇到雙方的回應同總結，都幾有信心我地會贏… 跟住宣佈結果…best debater係我地呢邊， 我諗…通常呢D實會分豬肉，咁一定係隔離贏debate喇… 然後就講雙方分數…對方係千五，跟住我地係千六… 咦?贏左拿? 不過今次唔知點解冇上次咁興奮… 諗返呢兩個月黎，我D英文同膽量都應該有所進步啦~ 完左debate之後就到quiz，我係負責電腦部分， 最驚突然播播下野hang機，好彩都冇乜問題發生… 最後係drama，開始時無啦啦個畫面畀棵野遮住，真係衰… 雖然協調上仍然有少少問題，不過大家都總算做得幾好睇~ 完左學校的節目後就趕返屋企食飯然後出去hkspeed office 拎個氣象站返屋企準備聽日上港台做訪問時做道具用， 跟住返到屋企就慢慢研究個氣象站點用同埋寫好份稿， 希望聽日個訪問可以順順利利進行啦~ |
| 朝早起身見有D雨，開電視睇下…嘩！黃雨！雷暴警告！ 原來今日係黃雨推出四周年，呢個黃雨亦都破左最早發出紀錄… 準備好哂出門口去天文台開放日之際，突然發現銀包唔見左！ 搵左幾個字都搵唔到…跟住被嘈醒的細佬話我知「我幫你擺左響床頭度呀…」 出到去遲左幾分鐘，然後就一齊去大快活食早餐， 然後再等齊所有人(成十幾個)浩浩蕩蕩咁行去天文台… 今次應該係第8次去天文台…連續三年的開放日都有去到… 今年都唔係有咩特別野睇，不過都睇左個幾鐘， 最搞野係台長主動叫我地同佢合照， 跟住去到展覽館見到有個counter叫做「天氣預測總部」， 裡面有兩個科學主任企響度報天氣， 我地成班人就質疑佢地呢樣o個樣，不過佢地都算應付得黎… 質疑完畢後就出左去玩掟波，我拎住個電話黎掟都掟中兩個八號風球， 拎左三本記事簿返屋企，哈哈~ 之後就去左唱K順便食飯，但為左返學校面試，所以唱左個幾鐘就走左喇， 搭地鐵返到學校時間剛剛好，不過到左2點半仲未開始…仲要3點去到港台… 等到我越黎越心急，心裡面不斷掙扎…到底我應唔應該等呢? 個面試同上港台都好重要，最後等到2:43終於可以入去… 兩個家長教師會成員問左我一堆問題，我都總算答到… 不過我太心急，係咁掛住睇錶，成個趕住走咁款，睇黎會扣唔少分… 講左差唔多十分鐘，終於都完左個面試，即刻衝出下面截左架的士， 「香港電台唔該！盡快丫唔該！」好彩個司機都好好人， 以極速由荃灣車我去九龍塘(我見到佢間唔中都有超速)， 而且仲收少我八毫子，可惜途中有成十幾個紅燈， 結果要3:08先到達港台… 去到同partner一齊入去化妝室先，原來上鏡真係要好認真， 又要燙好件衫，又要抹哂D面油，爭在冇化妝… 搞掂好一切就入錄影廠喇…一入到首先即刻坐低綵排一次先， 然後就走去後面背熟哂份稿，可惜原本準備的稿到最後被cut到得返一半… 時間一分一秒咁接近，由於個節目係直播，所以非常緊張， 一到4:00，節目開始了，不過我地第二節先出場，如果唔係仲緊張… 過左15分鐘左右，就要埋位了，對住咁多個鏡頭， 我直情緊張到震咁滯…8、7、6、5、4、3…驚到係咁吞口水… 終於我都將成份稿完完整整咁讀完，衰在有幾隻字讀錯… 兩分鐘的訪問終於都完，真係有驚無險~ 之後再等埋個節目播完，先至離開港台，再搭車返屋企… 呢次上電視真係非常之刺激，返到屋企都仲緊張到胃痛… 做完冇耐就陸續有親朋戚友打黎話我知做成點， 佢地都話我好淡定，做得幾好，而且上鏡靚過真人… 我返到屋企，第一時間睇返餅帶，哈哈， 見到自己個樣真係覺得好搞笑，不過都總算滿意自己o既表現~ |
| 成日都落住雨咁，不過始終都落唔出大雨… 朝早成11點半先起身，午飯後又再搞個project， 又要搞一輪先搞得掂，希望最後可以收返多D啦… 搞掂個project就好優閒咁做下功課， 然後夜晚就出尖沙咀同成家人食越南菜… 初初諗住越南野會唔o岩胃口，不過食食下又幾好食~好飽~ |
| 過左個周末之後，乜都都唔記得哂… 英文堂要quiz同埋做功課都唔記得左…再加上校長又黎睇我地上堂… 不過好彩都順利渡過左，不過期間有隻類似蜜蜂o既野飛黎飛去， 搞到我分哂心…再加上今日講D英文好有問題…最好唔好畀校長見到同聽到… 第六堂有listening又唔記得左，要偷偷地開locker， lunch去debate慶功宴又唔記得帶相機去影… 真係放左兩日假就傻左… 放左學原本打算開compu club會議，不過個個又話第日測驗， 結果整下maths club D野就返屋企了~ |
| 今日成個人都渾渾噩噩咁…唔知係咪因為噚晚唔夠訓… 朝早做實驗畀人話我蠢，lunch去M記又倒瀉汽水… 夜晚沖涼成個[浪]口盅整跌左落浴缸… 放左學係maths club最後一次集會， 宣佈過都只係得八丁友黎左，真係悽慘… 自己一個坐左響課室成個鐘，悶到不得了， 坐完個集會就完左，maths club亦都就咁玩完了… 班長一職終於響今日卸任，又可以鬆一鬆喇~ 聽日亦都係復活假開始，不過呢個復活假將會勁忙… |
| 復活假第一日~去左電腦學會o既IN的家參觀活動… 朝早約左去M記食$8早餐…但個個都遲到… 去到排隊淨返4個字就冇得平…前面仲有成十個人排緊… 好彩剛剛排到8:56就買到… 去到金鐘等齊人就一齊走過去添馬艦， 入到去首先拎個耳筒，然後去到跟住噤制就會有人講解，幾得意~ 成間屋都幾得意，如果第時我間屋都可以咁hi-tech就真係唔錯~ 參觀左成個鐘之後就解散，然後所有compu club幹事 一齊去太古廣場食飯順便開會準備會刊~ 開完個會都只係1點鐘，大家諗住第一日放假冇理由咁早返屋企… 突然醒起今日係禮拜三，於是就決定去科學館參觀… 搭地鐵去到尖沙咀再行去科學館…有一堆人響門口排緊隊， 等左十分鐘條隊完全唔郁，最後決定改去對面的歷史博物館… 個展覽館實在太得好交關，以前九龍公園o個個實在冇得比~ 又有好多戲睇，又有好多展品，最後睇左足足四個鐘~ 今日行左好多路~好[支力]…聽日仲要行山…救命… |
| 今日係hiking club最後一次行山活動，地點係大嶼山， 一早就搭地鐵去東涌集合，然後就搭巴士去起點， 沿途極之大霧，能見度低到得10米，仲要係單程線， 真係同對面架車撞左都唔知咩事… 搭左成個鐘之後，終於都到左目的地， 一路行，雨勢就越黎越大，雖然我拎左遮， 但擔住把遮行山好麻煩，所以大家都寧願整濕哂個身… 原本D路已經極難行，加上天雨路滑，塊地跣到不得了， 我行行下都唔小心跣左落黎，手腳都係泥，好彩冇損到… 今次條路線都應該係最難行，隨時行行下跌左落山… 加上超級大霧，上到400幾米咁高，周圍都矇查查， 見到D霧隨風飄埋黎，感覺就好似進入仙境咁~ 由於成條路都好跣，所以要步步為營， 最後用左4個幾鐘行左兩個山頭，再加上極速落斜， 終於都到左目的地－大澳，上次黎係8個月前的事… 到左終點，已經[支力]到不得了， 就搵左間餐廳食左個炒飯，再買左樽蝦醬， 大概3點半就集合搭車返屋企了，沿途個個都訓哂… 呢次行山真係極度刺激，唔只成身濕哂，仲拗歪左把遮， 同埋整污糟哂對鞋，仲有…好[支力]， 但刺激陸續有來，聽日係班會行山pretrip… |
| 連續第二日行山…今日係準備下個禮拜一的班會行山的pretrip… 又係一早起身搭巴士去到沙田再轉車去西貢再轉車去北潭涌… 去到就由麥理浩徑第一段開始行… 雖然開始條路唔係好辛苦，但經過多日勞碌後， 已經[支力]到七彩，行得都好辛苦下… 最終用左兩個幾鐘行完第一段… 食過午飯後(其實只係一塊麵包)就繼續旅程， 雖然今日冇落雨，但塊地都幾跣下， 加埋噚日行山跣低有陰影，所以今日上山落山都勁驚… 而且今日D路根本唔係路，只係一舊舊石頭， 驚到我要成個人趴響度走上去…擰轉後面即刻腳都軟哂… 其實呢條路線幾個月前都已經行過，但唔知點解上次都冇咁驚… 行左差唔多六個鐘，終於都去到西灣， 我地五個夾份食左共值$70 o既炒飯同烏冬後， 就行去西灣亭坐街車去到西貢再轉車去沙田再轉車去荃灣… 途中決定食韓燒…由於9點半可以平D， 所以返到荃灣去左M記坐左個幾鐘… 終於捱到9點半，去到韓燒就狂食泡菜食到勁飽， 返到屋企已經係近12點，[支力]到不得了… |
| 今日同網友去城門水塘燒野食，一早就起身去買野然後去霸爐， 不過今日非常潮濕，個爐透極都唔著，搞到我好辛苦… 最終都由網友搞掂個爐… 雖然預測今日間中有雨，但好彩臨尾先落雨， 燒左幾個鐘大家就飽哂，就執野走然後落返荃灣， 跟住有人提議去唱K，但我已經冇錢，加上我都想做D功課， 就決定返屋企算了…不過又有D網友提議上我屋企… 結果就有幾個真係上左黎搞部電腦… 夜晚終於開始做功課了，不過淨係搵D功課都已經搵左成個鐘… 做做下已經好眼訓…未寫日記已經撻左上床了… |
| 半夜突然醒左…成身出哂汗，喉嚨幾唔舒服，而且有D鼻塞… 於是落床食左粒維克司同爽浪，舒服左D了，就繼續訓… 5點幾又醒左，7點幾又醒左，8點幾又再醒…唔知做咩係咁醒， 最終都係決定起身了…一落床，頭重腳輕，幾辛苦下… 之前都諗過行完兩次山又去BBQ，之後一定[支力]到趴響度， 點知就唔只趴響度咁簡單…直情成個身都唔願郁… 結果成日都只係做左D功課，其餘時間都係訓下覺咁，成個人頹哂… 唔單止喉嚨唔舒服，仲有D發冷，聽日班會行山都唔知去唔去到… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |