| 「yeah!~~~~~~」羊年就響呢堆歡呼聲中降臨~(同上個月一樣…) 果然有間舖響我地倒數完之後放氣球，迎接新一年來臨~~ 跟住阿爸阿媽陸續打黎，咁當然要講番D恭賀說話啦~ 我地用左50分鐘先行過一行，真係多人到… 然後網友打黎話叫我搵佢地，於是行到差唔多就同同學失陪先… 又話響個咩石像等，點知去到先知佢地已經行到另一面， 結果自己一個迫迫迫迫好耐先過到去… 一去到有個欄杆叫我坐上去，一坐原來係爛o既，嚴重被耍o既感覺… 跟住就話出去食宵夜，夜D再入去掃貨… 不過行到去個個食肆都迫滿人，結果行到勁遠先有間有位坐， 去到冇乜興趣食野，於是閉目養下神先~ 等大家食飽就迫返入維園，大概3.左右大家就開始掃平貨， 不過我又冇咩睇o岩…雖然D野係超平， 但買返屋企用唔著始終都係浪費… 其實我出黎都係志在感受下新年氣氛o者~ 行到4.半大家都掃夠貨，就行返出地鐵站返屋企~ 返到荃灣5.9，好彩已經有小巴搭，沖完涼6.3上床訓! 10.半起身，親戚陸續到來，今日主要都係被拜年， 係下晝過左阿姨度享用左D蘿蔔糕呀年糕等等~ 去到仲有隻狗仔玩下，真係好想養番隻寵物~ 之後返屋企又係被拜年…夜晚食完飯睇電視， 「紅星會-與沈殿霞同行」，肥姐同我係冇啦lung， 不過裡面有段講D野好似講緊我，仲中到應一應咁… (係關於乜就唔講啦) 夜晚出葵芳睇百年好合，有D情節都真係好誇張下… 不過整體黎講都幾好睇o既，起碼我噚晚訓得咁少都冇睡意~ 最好就搵日睇埋行運超人啦~聽講仲有捉智雙雄都唔錯~ 但我邊有時間睇咁多戲丫…溫書呀! |
| 起身冇耐屋企就好熱鬧，食開年飯丫嘛~ 食飽之後冇乜野做就上下網咁，然後就出去拜年~ 去到M記買左個新新口味－麥樂脆豬試下，都幾好食~ 唔知點解今日勁眼訓，上到人地屋企主要都係訓覺… 拜年拜到6.幾就出去睇煙花，搭巴士搭到去紅磡， 原本諗住走上紅磡繞道睇，但又唔知點行， 行下行下都就黎夠鐘，去到紅館門口見到個牌寫住 「只限節目參加者進入」，我地今晚就入去睇concert， 所以出示D飛就可以進入紅館範圍… 去到見到有D人已經搵好靚位企…雖然個角度窄左D， 但由低至高o既煙花都睇得清楚已經算唔錯~ 同埋今年放得低o既煙花好靚，如果去到紅磡繞道實多人到睇唔到! 8.正煙花正式開始~今次話有麥嘜的豬鼻，哈哈笑之類， 以前2002都可以變左SOS，所以今次都唔望見到乜野… 不過今次又咁好彩乜都見到哂喎，算唔錯啦~ 睇完之後急急出去搵野食，結果去左火車站食buffet… 我從未試過響一個鐘頭之後食完一個自助餐，趕到我… 要咁趕係因為個concert 9.半開始… 今次係睇左麟右李演唱會，幾好呀， 係爭在有唔少歌都未聽過囉… 因為要就放煙花，所以演唱會遲左開始遲左完，12.9先唱完… ↓送張左麟右李大特寫畀大家 |
| 赤口~都係去車公廟…朝早落樓下飲茶先， 之後搭巴士去沙田，然後慢慢迫入去… 誠心上香之後去到個「金榜題名」counter， 寫D願望響張紙度就會有個人讀出黎， 阿媽幫我寫「高考五甲」，個人讀左「高考合格」，差勁遠… 轉完風車打完鼓就走喇~又係去左附近D無牌熟食檔度食D野， 跟住搭火車去沙田食下午茶~(今日終於第一次搭新火車) 今次呢間格調唔錯喎，D野都幾好食~ 食飽就返屋企，沿途訓返餐勁o既! 夜晚冇乜野做，漫無目的咁上網， 之後有同學打黎問printer同DC野， 一傾就傾左成粒鐘，傾完成個人[支力]哂， 仲好似畀D冷風吹一吹lai野添…即刻飲杯熱茶同沖個熱水涼… 千祈唔好有事呀大佬… |
| 年初四~一切回復正常~ 起身又係訓到晏一晏都唔願起身…結果訓左10個半鐘… 可能係訓得太多，今日成日都冇乜精神咁， 睇怕聽朝都要早D起身… 午飯後開始溫pure，不過溫得好hEA! 溫溫下書好悶，走左去上網… 穿梭機單新聞突然令我燃起對太空o既興趣， 成日就響度睇關於太空o既網… 夜晚出尖沙咀睇個「全城動感耀燈輝」， 嗯…都幾精彩o既，係短左D囉… 我地睇last一場，返到屋企都成12點… |
| 朝早首先溫下physics，睇番教過又未測過o既野， 晏晝就溫pure，終於都搞掂F.6成個syllabus~ 不過…都係溫得好hEA…夜晚溫溫下書又訓著左… 我諗我應該出去呼吸下D新鮮空氣，令個人精神D~ 咁o岩聽日有班會活動，出去踩單車，正~~~ 不過千祈唔好踩完返黎[支力]到書都溫唔到啊… 成日都開住個mon，溫溫下就想上下網， 不過睇開o既網睇悶了，就咩網都睇一餐， 見到條link又噤下…睇到對眼好[支力]… |
| 今日係班會單車+打邊爐同樂日，大家約左8.出黎食早餐， 點知我8.半先訓醒，急急忙忙起身，好彩都趕得切食… 之後搭巴士去大圍租車，然後就出發喇~~ 原本行程係大圍去大埔再去大尾督然後大埔交車， 點知大埔交車要加廿蚊，結果要返去大圍交車… 雖然呢條路條都踩過好幾次，但始終去到大埔都係會蕩失路… 今次又搞左成個鐘先搵到地方食野… 去到一間商場門口準備買野食o個陣，突然發覺跌左銀包! 因為我將個銀包放左落個袋度，但又未拉好拉鍊， 可能踩踩下o個陣跌左出黎…響我驚到震o個陣， 有同學遞番個銀包畀我，原來佢見到我跌左幫我執番…真係好彩… 今次竟然咁唔小心，以後點都要袋好個銀包佢… 午膳後大家繼續往大尾督，然後又兜左個圈~ 平時去到呢度實抽筋，今次竟然冇事~ 大約4.就開始回程，2個半鐘左右就返到大圍，都幾快丫~ 不過返到大圍又有人行錯路(我以前都試過)， 要等多幾個字先走得囉~ 夜晚就返荃灣打邊爐，80蚊任飲任食冇時間限制真係幾抵， 期間仲有幫個同學預祝生日，又有生日蛋糕食啦~ 大家坐左3個幾鐘先食飽，之後發覺自己又有谷氣現象， 已經係半年黎第三次，都唔知點解會咁… 返到屋企越黎越辛苦…沖完涼就即刻訓覺! 話時話，今次已經係畢業前最後一次班會活動， 今次都幾多人參加，幾好玩丫~ 希望考完AL大家都多D約出黎啦~ |
| 夜晚唔知幾點訓醒左，發覺個肚好痛… 痛到一直都訓唔返著，如是者個天慢慢光， 仲聽到樓下有清脆o既雀仔叫聲，好一個美好o既清晨… 相比之下我就覺得仲辛苦，眼訓得黎完全訓唔到… 一直等到阿媽個鬧鐘響，然後到我個鬧鐘響… 個肚過左咁耐已經唔痛，不過成晚訓得勁少， 所以決定再訓…結果攤左響床到11個鐘… 基本上成日都冇乜精神，食完飯就溫埋D pure， 然後就做physics MC past paper，夜晚對番答案， 錯得好離譜…下次真係要溫好先做，唔係浪費左份卷… |
| 日頭都冇咩特別，都係溫下書之後做past paper， 今日進度都算唔錯啦~ 夜晚去表哥屋企拜年同埋當係參觀下咁， 入到門口好似入左工廠大廈咁， 但係上到去，D裝修又幾正喎~ 雖然間屋細細，但兩個人住…咩都夠哂啦~ 不過話就話室雅何需大，我諗有番D空間感會好D~ 之後細佬見到部PS2就打，打完一輪就出去shopping等食飯， 去到羽絨城就睇下D羽絨o岩唔o岩著，不過咁貴，冇必要買啦… 今晚又係打邊爐，9.後入去就平好多， 差唔多夠鐘就去等位，訂左檯都要等幾個字… 前晚打邊爐食到谷哂氣，今日都好驚又係咁， 所以食緊o個陣都就住就住，好彩今次冇事啦~ 食到差唔多12.先食完，之後就飛的返去… 返到屋企同人ICQ傾到3.幾… |
| 最後一日新年假，竟然訓到不省人事… 10.訓醒去個toilet，之後走上床繼續訓， 直到阿婆走入黎嗌我地先知醒，竟然已經係1點… 即刻起身洗面落去買飯食…食完所有野都已經係2.半… 之後拎埋最後一樣功課黎做(其實成個假期都係得2樣功課)~ 我之所以留番今日先做，就係因為我早D做o既話實會做得好hEA， 盞浪費D時間…留番今日趕住黎做就慳番唔少時間~ 不過一路睇雜誌一路作文…始終都係作唔完… 而且搵支塗改液都搵左半粒鐘…最終都搵唔到… 夜晚出去幾日前去過o既餐廳食buffet， 因為上次食得好趕時間，大家都意猶未盡，所以今次慢慢食~ 今次有豉椒瀨尿蝦，食到失埋聲，正! 食飽都只係8.半，不過咁都要飛的返去… 雖則有八折的宜，但又好似誇左D… 不過細佬仲有大把功課未做完，冇計啦… 返到去作埋篇文，然後就執書包準備返學， 順便清下個細袋，裡面D concert/睇戲飛尾乜都齊， 今次終於有心機清一清佢，個袋即刻少好多野~ |
| 放完假第一日返學，好似又係新一年o既開始咁， 但其實我地返多幾日學就已經考mock… 最後一次集會，天氣幾和暖，少少曬又有D風，企得好舒服~ 期間校長有野講，以為又話「新一年大家畀心機讀書」之類， 點知係宣佈死訊，有個F.2 o既同學響新年假因病去世… 雖然我完全唔識呢個人，不過聽到o個下都幾愕然， 因為我印象中7年黎都未聽過學校傳出死訊… 之後全校仲為呢位同學默哀一分鐘， 當我垂低頭…成個操場靜哂o個陣，我諗起…911… 嗯…最後一次集合的感覺估唔到都咁特別… 學校改善工程正進行得如火如荼，今日仲打樁， 一路打成間學校就震哂咁，雖然冇想像中咁大聲， 但真係震得好誇張，完全感受到咩叫做地震… 而且隔離學校都做緊工程，又發出D嘈音， 真係想快D放假畀我地響屋企專心溫書… 放左學考oral，水準比平時明顯下降左，都係緊張累事囉… 考完即刻返屋企訓，訓足個半鐘，爽呀~ |
| 原來今日先係最後一日響MMLC上堂…上次搞錯左~ 不過都冇咩特別啦，miss lock左機都冇得上網… 但係原來熄機再開就可以「unlock」， 而家先發現呢個秘密又好似太遲…算啦~ lunch之後兩堂英文有特別活動，成個F.7走左落hall， 去到見到有個不知名o既鬼佬，佢今日為大家講個talk， 係關於positive thinking，同埋提高自信同自尊之類… 嘩…呢個鬼佬雖然字正腔圓，但係講得超快， 我諗我只係聽得明1/3左右…聽聽下又訓著左… 跟住講講下又叫我地合埋眼諗下自己今日曾經諗過o既野， 突然間覺得自己去左個祈禱會咁… 個talk準備3.2完結，拎D野落荃灣影印就拿拿臨返屋企訓晏覺， 夜晚狂溫applied，準備聽日測驗~~ |
| 今日都幾平靜，冇咩特別野發生過~ 朝早測applied囉，好難得題題都識答架~ 不過最衰後尾手多，有題明明答o岩都改到錯左，唔抵啦… 晏晝最後一次聽中化listening，個個都聽到好high， 尤其是對答案o個陣，有D答案真係笑死人~~ 落堂之後成班人響度玩部即影即有相機， 仲好玩過我日日帶o既DC，笑到我肚痛~ 不過講開影相，記得F.5到呢個時候已經勁多人影相啦， 點解而家淨番幾日上堂都冇人影o既? 係咪因為平日用DC已經影得太多? 嘩，呢排唔知點解晚晚都失眠，唔知係咪因為有訓晏覺… 但係我發覺只要部電腦熄左我就會好快訓著… 不過細佬晚晚都好夜先熄機，唉唉… 但雖然係失眠，日頭上堂我發覺我幾精神喎~都唔知點解~ |
| 越黎越接近學期尾聲，同學的情緒就越黎越高漲， 一到小息lunchtime大家就好開心~ 今日焦點仍然係部即影即有相機， 如果唔係D菲林咁貴(成$4張)真係買番部黎玩都好~ 不過大家玩還玩，一上堂就成班都好靜咁溫書，真係好大對比… 放學都係訓晏覺囉…今日仲訓左兩個半鐘， 我再係咁落去可能晏晝訓得多過夜晚… |
| 今日第5堂測pure，不過都冇影響到大家影相o既興致， 淨係我部相機都已經影左百幾張，仲有幾分鐘長o既video， 仲要影到冇哂電…下個禮拜真係唔知點算~ 其實今日最主要都係PE堂o個陣影，因為今堂last一堂喇~~ 以後都冇機會成堆人迫埋響個更衣室度換衫咯~ 今日出左去城門谷打籃球，都好耐冇出過去… 嘩，我好耐冇認真咁打過籃球，所以打到雞手鴨腳咁， 結果都係斷斷續續咁打，咁就兩堂喇~ 嗯…估唔到o個度而家都咁多蚊，夜晚對腳好痕… 換完衫之後大家hEA左好耐，諗緊上唔上clubhouse度好， 然後又走返上課室掛住影相，不過最後都係冇上到去… 不過其實返到屋企都係hEA…上下網咁囉… 講番今日pure測驗，係測F.6下學期教o既野， 我覺得呢堆野都幾難，所以今次都幾努力溫~ 噚晚睇番o個陣D測驗卷，心諗：搞錯，咁簡單o既數都唔識做… 不過到今日，又係見到有幾題應該係幾簡單o既數， 但最後咪又係唔識做! 結果我諗爆頭先計到一兩題… 啊…測完o個下好失落啊…加上最近兩科測驗都唔係咁理想， 突然覺得自己蠢左咁… 跟住到lunch之後，落去上PE o個陣撞到miss， 我呻完一輪之後，佢同我講左D鼓勵o既說話， 「我睇好你架~畀心機啦~第時開間電腦公司做老細啊~」(之類啦) 嗯…miss咁睇好我，我D失落感又即刻冇哂lu… 總之就盡力啦，唔可以衰畀miss睇呀!! 今日情人節，都係冇情人啦~(哈，希望下年有啦~) 不過都收到粒朱古力，幾好丫~(印象中我情人節冇收過野喎) (如果收過o既話…sorry囉，我記性差…) 同埋夜晚竟然同個女仔講左兩粒鐘電話囉… 不過係講畢業VCD、grad book同grad din D野o者… 但係都打亂左我o既溫書時間表添… 聽日要加倍努力喇~ |
| 鬧鐘10.半響起，噤完又訓，醒返又再訓，訓完又醒，醒完又訓， 直到有個電話勁響都冇人聽先迫住起身…其實都已經成12.… 今日好晏先有飯食，食完都已經係2.， 之後就開始做pure past paper，因為噚晚乜都冇做過， 所以今日一做就做2份，做到個腦都實埋… 基本上past paper已經佔據左我成日時間，所以冇咩好寫喇… |
| 今日係家長日，不過我地今年仲未考過試， 所以冇成績表派，直情連家長都唔使見… 下晝同同學去人體奧妙展，首先約埋響荃灣食飯， 話有間食齋o既幾好食喎，我都冇乜所謂啦~ 咦，點知點解突然冇哂D時間觀念，遲大到添… 其實齋我就唔食架喇，不過見有個咖哩牛肉飯就整個黎試試啦~ 嗯，D牛肉果然係齋，係個樣比較似囉，D味就真係幾怪… 食完就一齊出發啦，去到中環廣場見到展覽中心出面大排長龍， 真係大吃一驚，估唔到到而家都仲咁多人去， 早知就聽日先去啦(聽日放假)… 不過既然都過左海就廢事縮沙啦，大家一路排就一路以鋤D黎解悶， 轉左兩個彎仲有一大個蛇餅，結果足足排左一個鐘先入到去… 個場其實唔算好大，不過都已經有勁多標本， 但係場內生o既人比死o既再多十倍以上， 所以每個標本都有大堆人圍住，好辛苦先迫到埋去睇… 首先係睇左D有玻璃圍住o既標本， 然後就到中間「可以摸得個喎!」o個D， 不過話明塑化左，基本上摸黎都冇咩意思… 結果用左兩個鐘左右睇完個展覽~ 如果唔係咁多人我覺得可以再慢慢欣賞~ 嗯，個展覽以$40學生飛黎講都算抵o既，真係大開眼界囉~ 同埋一D都唔核突囉，件件標本都乾哂… 原本諗住影多D相返屋企慢慢研究， 不過個展覽講明唔准影相，我好辛苦先偷影到幾張… 之前地鐵迫我地換個人八達通，但就送個售票機筆筒， 要親自去金鐘先有得換…見今日過海就換埋佢，個筆筒幾得意架~ 換完返屋企落樓下大家樂買左個黑椒牛扒飯， 平時食開D牛扒薄到死，今日o個D竟然有鐵板餐o個D咁厚， 用$22.5食到咁正o既餐，真係覺得好幸福~~ 今晚無啦啦心血來潮寫CGI，仲寫到server down埋… 結果都冇乜點溫書呀，聽日努力喇~ 原本諗住畀張人體奧妙相大家睇下， 不過驚大家o岩o岩食完飯，所以都係畀大家睇下條人龍算喇… 呢度大概顯示1/5條龍啦… |
| 今日係家長日翌日，放假一天~ 一起身首先係做功課，呢份功課有特殊意義架， 因為係中學裡面最後一份! 不過我都係做完先醒起… 做完功課溫applied囉，準備聽日最後一次o既測驗… 不過今日間歇性上唔到網，溫到悶o個陣就拎左本小新黎解悶… 返埋聽日同後日就讀完中學咯…好好珍惜最後兩日啦~ 不過呢排無啦啦勁爆瘡，影相o個陣要遮遮先… |
| 最後一次測驗，不過不失啦~ 測完就真係鬆一口氣了，不過唔好唔記得下個禮拜就mock… 之後last一堂英文，阿sir就講哂D考試要點出黎， 一講就講左成個鐘，之後又派野，結果淨返一個字影相… lunch之後大家就開始瘋狂影相啦， 我都不甘示弱，拎出有十幾年歷史o既古董菲林相機出黎! 我o既目標係同所有同學影合照，不過現場實在太混亂， 搵人影之餘仲要幫手影，所以都係影到十個左右… 基本上最後兩堂大部份人都已經係掛住影相， 之後仲無啦啦玩估領袖遊戲，玩到大家好high~ 放左學課室要讓出去畀人測驗，不過大家都未影夠， 落到樓下繼續影影影影影，結果我地影到4.半先走~ 今晚好難得唔使溫書，結果用左黎寫下班網咁~ 啊~聽日就係最後一日上堂啦~ 轉眼間就已經響呢間學校度讀左七年，時間真係過得好快~ 諗返第一日返學差D遲到o既情景，就好似噚日發生咁… 嗯…呢D野唔講咁多住喇，遲D寫篇readme再講~ |
| 七年中學生涯，今日終於要劃上句號了… 我仲諗住會緊張到彈起身，不過最後都要要人叫先起到… 行過綠楊就入seven買筒菲林先， 買完出黎，就黎夠鐘喇添，即刻行快兩步… 第一日返學差D遲到，結果最後一日都係差唔多… 最後一堂physics堂，阿sir竟然冇返， 不過我地都大舉殺上phy lab，目的當然係影相！ 影完大堆二人合照之後就到大合照， 平均兩個人一部相機，十幾部機都要set自拍， 然後仲要逐部機set野，度位，等大家擺pose， 所以淨係影大合照都影左成半個鐘… 之後淨低幾堂都係兩個字：「影相」！ 基本上任何組合都可以影一餐， 低form同班啦、同一個社啦、同一個月生日啦… 影完成班過埋bio lab參觀「人體奧妙展」， 成個人體模型都「可以摸得個喎」！ 大家拎哂D心肝脾肺腎出黎影相，好搞笑~ lunch成班人落酒樓食飯，又掛住同人影相， 加上唔係好夠時間食，都唔係好飽添… 食完望望錶仲有五分鐘，大家即刻飛奔返去， 一踏進校門o個下即刻鬆一口氣， 因為我7年都冇遲到冇缺席呀~~可以拎多張cert咯~ 最後兩堂首先係派卷，嗯…比想像中低囉… 唔係溫得唔熟，不過D正負號寫到亂左，冇左一堆分囉… 開心左成日，o個一刻突然失落左陣囉… 希望今次測驗可以成為我黎緊溫書o既原動力啦~ 之後又係乜都影一餐，然後又走上chem lab影相， 結果中學最後一堂就係響呢度渡過… 出返黎之後又係亂影一輪，之後又好似兩年前咁， 四圍去D平時唔去得o既地方影相… 首站係6樓天台，又有一堆機要影大合照，好曬呀！ 之後比較離譜…4樓hall頂… 我從來冇想像過可以走到上面，不過大家都幾輕易擒過去… 跟住男仔參觀女廁，女仔參觀男廁… 最後成班人落左hall度影相同hEA，都hEA左成個鐘下，好眼訓… 等到成6.鐘，學校已經人影稀疏，大家先依依不捨咁離開… 雖然係依依不捨，但係就從來都冇人喊，唔通理科人唔夠感性? 但其實我地都相信考完AL之後仲會有大把機會見面， 所以根本大家之間都冇咩值得唔捨得丫~ |
| 由今日開始，我再唔係一個中學生了…我係03年高考生! 一連兩日o既溫書假今日正式開始， (其實本來我地向校長申請成哂成個禮拜，不過校長批得兩日…) 原本噚日應該做一份past paper，結果hEA左冇做到， 今日就要做兩份…不過我發覺一日做兩份都唔係好得， 做到第二份卷o個陣都已經冇乜心機…做到唔識就睇答案… 同埋響屋企做數都係做得慢D，始終有部電腦響後面… 做多一兩年就要keep好D時間佢啦~ |
| 晏晝3個人落左樓下飲茶… 原來到兩點仲有「怡情下午茶」時段，點心粥粉麵飯全部特價， 再加上呢個時候茶樓少左好多人，的確幾怡情~ 如果下晝肚餓落黎飲下茶都唔錯喎~ 夜晚出去睇eason演唱會，已經係今個月第二次入紅館~~ 之前聽講話newsgroup度個個都話唔好睇， 可能係有個心理作用啦…初頭都係覺得普通左D… 不過後尾唱返D hit歌就正哂喇~ 有幾首都全場一齊唱呀~個feel好正呀~ 尤其是「明年今日」，一唱就諗返起singcon~ 睇完搭番地鐵返去，去到荃灣都差唔多尾班小巴， 但係要等埋細佬，搞到要睇住班小巴走左… 等左成3個字先有下一班，都好過冇o既… 跟住沖完涼再搞埋D野都兩點咯…聽日考oral呀! |
| 之前睇完eason…訓左5個幾鐘就要起身考oral了… (買左飛之後先知道係今日考…冇計啦…) 個人短講題目係勸父母買人壽保險… 弊喇，我都唔係好似壽保個詳情係點o既添…講得好勉強囉… 同埋我考完好耐先發覺我係漏左eye contact，死未… 之後小組討論個topic幾易講o既，不過對於3個文科， 搞到有point都唔夠發言時間…我諗整體上都OK o既… 仲有入到考試室突然發覺間房超凍，原來課室終於有冷氣開啦~ 不過其實今日都唔係好熱，開冷氣反而令人仲心寒… 返屋企hEA左陣又落去飲茶，之後返上去勁煲physics， 準備後日考mock…突然質咁多野落個腦度，真係人都癲… 想搵D野舒緩下…但又好似冇乜時間… 聽日都仲要繼續努力呀… |
| 繼續狂煲physics!!一日之內睇哂兩本further phy! 未試過一日睇咁多字呀~突然覺得自己識多好多野~ 不過咁睇法…睇到個腦都實哂… 今日除左溫書之外就係食飯…一日兩餐都係大家樂… 聽日開始考mock喇，努力啦~~ |
| 今日開始考mock喇~第一科係physics~ 原本今日響課室考，唔知點解搬左入hall… total兩份卷，每份三粒鐘，完全係煎熬… 中間隔住兩個幾鐘lunch time，成班走左去茶樓慢慢歎~ 下晝考MC+essay，係個中文miss監考， 但又要中英文instruction一齊講，都幾搞笑~ 不過最搞笑都係考MC都冇MC答題紙， miss要打電話落去叫人拎紙上黎，擾攘左幾個字… 嗯…我覺得今日算係咁啦… 雖然好多都答得好唔肯定，但起碼都答到D野出黎啦… 不過都幾唔夠時間咁囉… |
| 今日mock英文，我自己o既表現就應該冇問題囉， 不過份卷o既質素就認真麻麻…唔係考試局出品真係唔多掂… 希望唔會畀份卷個質素影響到個成績啦… 考完兩份卷就放學，可以返屋企食飯~ 聽日考中化，冇乜野溫，都係夜晚先上網睇下D notes， 晏晝就主要都係溫下pure先啦，雖然禮拜五先考， 但成呎厚o既notes真係驚唔夠時間溫呀… 哇，唔知點解呢兩日左邊膝頭超痛，差D落唔到床+上唔到車… 同埋唔知係咪呢排用腦過度定點囉，火山活動又轉趨頻繁， 今次最嚴重o既地方竟然係膊頭…千祈唔好拍我… |
| 今日考3份paper，全部都係中化~ 第一份作文，寫兩篇野，勁快作完， 但竟然寫信寫到最後唔記得寫「謹啟」… 第二份閱讀理解，好彩係速讀o者，時間都OK啦~ 最後係文化，基本上同o個6課書已經脫哂節， 純粹係吹水咁滯…我吹左二千字左右啦… 今日又有兩個幾鐘lunch time，成班人今次落荃灣食~ 去左間曾幾何時去過o既地方食晏， 學生優惠一碗麵$13送豆漿！ 的確好平…而且好大碗…(係個碗大only) 不過飲埋杯豆漿o岩o岩頂到肚，算係咁啦~ 朝早miss無啦啦掟左份SCMP o既 student computer scientists of the year award參加表格畀我， (我諗係譯做「本年度學生電腦科學家獎」卦) 我以前見到有呢D獎都諗過參加，不過點都應該唔會有我份啦… 但係張form親自遞到我手，我係咪都應該填左佢呢… 贏左有$10000獎過金喎…仲有新printer同scanner喎… 但係首先有個問題係張form有D地方唔知點填， 據聞打去問o既話要用英語對答… 咦?如果要interview o既話都可能係用英文… |
| 今日考physics實驗，要早10分鐘返到去， 為免遲到所以決定唔食早餐就走，不過返到去先覺得好肚餓… 但早左返去…結果都要響門口吽左幾個字先入得去… 今次三個實驗基本上都好易做，但問題要計D野又唔係好識計… 考完9.幾，都好耐未試過咁早放學~ 返到屋企第一件事係－食早餐! 之後今日都係勁谷pure，將16課o既notes全部睇一次， 簡直係壯舉…呢科不嬲都係3科之中最麻麻o既一科， 同埋我兩次考親試都緊張到要去toilet… 希望聽日生生性性啦，唔好緊張! |
| 今日考pure，又係6個鐘o既大考驗， 兩份卷都唔係好夠時間做，不過同我預期中o既差唔多啦， 最起碼應該好過上年D考試… 同埋今次終於唔使考考下去水落石出喇，慳番唔少時間~ 經過6個鐘o既長期思考之後，個頭即刻勁痛… 考完兩份卷，心情即刻輕鬆左一截， 雖然下個禮拜仲要考，但都係淨番applied， 聽日開始一連三日假期，所以今晚都可以盡情咁上網喇~ 不過望下個月曆? 仲有一個月仲AL喇， 突然好似咁快就係啦~要準備收拾心情啦~ |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |