| 唉…今日爆黑仔…份英文project實在激死人喇… 話說中午份project dead，我11.左右落去賤build印完， 諗住拎過去阿sir個office交啦，點知佢話要單面印， 仲話咩不嬲d文件都係單面印，鬼知咩… 邊有人咁唔環保架…上堂又唔講要單面印… 跟住仲發現拎漏左張計分紙，於是死死地氣咁行UC梯番上宿， 拎番張計分紙，再死死地氣咁行落賤build再印過d份project， 搞掂已經12.半，同一時間約左人響九龍塘… 好彩今次終於冇問題，順利交到份project… 但係夜晚發覺張計分紙都係唔記得交…極無奈… 晏晝約左阿姨去又一城買野~我o既生日禮物－mp3機呀~ 同埋順便陪佢買d禮物…公司抽獎之類卦… 食完晏首先買左套名貴拖o急，真係貴到眼都突埋… 然後過左X澤進行名牌電器大搶購，首先都係揀左部mp3機先啦~ 嗯…我之前都冇揀過邊隻機好，都係等個sales介紹啦~ 最後佢介紹左部我都覺得幾好，結果就要左呢部啦~ 比我想像中o既價錢貴左呢…唔係咁好意思添…真係多謝哂啦~~ 哈~過左成個月，都有人同我講「生日快樂」， 仲要係間舖頭o既sales…都幾搞野… 跟住仲要買埋抽獎用o既電器，有DV、DC、pocket PC、快譯通… 夾夾埋埋都起碼二萬幾…如果我有得要哂就真係超正~~ 不過冇得要都可以幫手試下d產品…玩一陣都唔錯o既~ 買完哂仲有兩舊聖誕禮物籃同埋兩個咕o臣+兩個mouse…收穫都唔錯~ 嗯…又一城果然係又一城，d sales服務態度都好過人~ 買完哂野4.幾，都係時候返宿喇…溫左陣書， 之後落去幫個細O組mate裝windows、裝office，搞上網， 嗯…住左湯宿咁耐…都係第一次過女宿果邊咋喎… 搞左好耐先上到網呢…搞掂即刻去食飯喇…好肚餓… 今晚溫下java…再做下lab report，咁又一晚喇~ |
| 今日溫我覺得最唔掂o既賤數…不過都幾晏先開始溫… 起身上陣網就去左食飯，跟住落去交番噚日唔記得交o既計分紙， 然後過百佳入一入貨就返上UC，跟住再影下相for整網頁用， 搞到點幾兩點先開始溫…之後連續幾個鐘都係對住d賤數， 再夜d先做番d lab report…咁就一日喇~ |
| 今日又係吽響宿溫書，不過我日記唔係想講呢樣， 反而想講講我溫書溫到悶，去左去上網， 噤下噤下…搵到d老鬼o既日記，由year 1寫到year 3， 我都好有興趣知道讀CEG o既人o既心路歷程係點樣， 所以我就一直由year 1睇到year 3… 一路睇…都覺得幾感觸…原來讀CEG真係會令人咁厭倦… 好似好多老鬼都覺得揀左讀compu eng係錯誤咁… 作為一個freshmen，我當然未能明白箇中o既辛酸啦， 起碼我都好enjoy呢個sem裡面…同埋咁多CEG o既人相處~ 不過如果要人不斷咁對住部電腦怒寫program， 仲要成日通頂趕功課，加上15:1 o既男女比例，其實都好辛苦… 唉~咁我就當然冇後悔過揀compu eng， 無論點講都好，我始終都係鍾意電腦呢科嘛… 暫時呢個sem讀落去都仲有少少優勢…雖然唔知持唔持續到… 但係我做得系會P…唔只要自己鍾意CEG， 仲要令其他人都鍾意呢科咁惡哽o既科目，就真係好難… 同埋仲有一樣野係關乎揀大學o既問題， 果個老鬼寫到中大係一間「鋤書大學」， 咁其實我填jupas果陣都預左係咁， 不過經歷o camp之後都覺得其實又唔係丫… 但係到左呢個考試期，見到d同學咁用功， 加上自己班同學…個個都好讀書咁，摺人又多， 又開始諗…其實係咪最後都係科大適合我多d呢… 我咁諗就當然唔係因為我唔鍾意中大啦… 始終呢幾個月都過得幾開心，點都對中大有番d感情o既~ 其實而家個情況都已經比我當初想像中好架喇… 不過如果想過d我想過o既生活，玩d我想玩o既野， 就要盡量抽離CEG，去見識下外面o既世界喇~ 無奈我又做左P…要抽到出去都有d難度… 另外睇老鬼d日記…仲講到出去做野o既問題， year 1就諗似乎係好早，但係兩年真係可以好快過… 我都要開始諗諗，到底我將來會搵份工， 日日對住部電腦，好似讀緊U果陣咁怒寫program， 定係自己開間公司搞IT…定還是…完全唔做IT? 唔講咁多喇…講得多都悶… 總之睇完d日記…諗到好多野啦… 其實係我發覺自己入到U，睇到好多人寫過o既野， 都會有好多啟發…可能咁樣先係「大學」啦… 講番今日，夜晚返屋企食飯囉…好耐未響屋企食過啦又… 返去果陣第一次用部mp3機，感覺都唔錯~~ 今餐晚飯好滿足呢~好飽、好溫暖呀~ 夜晚終於睇一次睇《衝上雲霄》…都幾好丫~ 今晚要早d訓…聽朝同阿媽去grant loan interview… |
| 其實噚晚想講o既野都未講完，不過劫得人機太耐， 所以廢事繼續打落去啦…拿拿臨寫完就訓喇… 天未光醒左，發覺勁頭痛，係o岩o岩由一個極混亂o既夢中扎醒， 裡面全部都係關乎溫書、做lab report…即係我近排做開o既野… 似乎自己比太大壓力自己喇…點樣可以舒緩一下呢… 講番頭痛先，實在係痛到訓唔到，索性出廳睇下電視算， 睇睇下又冇咁痛喇…不過一上床想再訓番就再頭痛過… 結果都係一直響廳睇電視睇到原本起身o既時間…足足吽左兩粒鐘… 之後好彩食粒藥過一陣就冇再頭痛喇… 今朝要同阿媽去grant loan interview， 去得interview都唔慌會有好消息，基本上都有心理準備了… 落街市食完早餐就去長沙灣個政府合署，去到差d遲到呢… 去到要等齊幾個家長就位，然後一齊企響身宣誓， 個過程都幾無聊同埋悶…我都差d訓著左… 跟住等左陣就入房進行詳盡o既interview， 主要都係講番申請方面o既問題…其實都係關於家庭o既問題… 總之結論就係好難先申請到囉…最後佢比時間我地考慮下， 不過出到去都係決定左下年先申請喇…今年唯有放棄啦… 雖然申請唔到…但係我覺得個interviewer都已經好好人架喇~ 搞完之後未夠11點，我同阿媽都計劃唔到去邊， 結果決定入黎中大參觀一下，我就梗係順便返宿啦~ 去到大學站見到勁多人，原來今日係畢業典禮… 上到去仲未到異性探訪時間，唯有周圍兜個圈， 順便介紹下中大附近o既景點啦~ 跟住入宿參觀下，再食埋中大馳名o既頹飯(雖然係UC can食)， 呢個極速中大之旅就完喇…阿媽有野要做要出返去呢… 送完佢落火車站之後就返上宿，繼續溫書囉… 今日進度都唔錯呀…未來兩日可以渣一渣攤喇~ 夜晚…響冷冷清清o既UC can，偶然遇到幾個中同坐埋一齊， 仲可以一齊吹成粒鐘水，感覺都幾特別呢~ |
| 今日冇咩特別呀，d major都溫完，就做下功課啦… 不過份賤數勁唔知點做，都係放棄左… 好彩另外一份就搞掂喇，最好就係份lab report都終於做完喇~ 咁之後我就可以專心溫書啦~ 不過今晚掛住打d minigame添…聽日先繼續努力啦~ |
| 今日都係冇乜野好做…又係溫下書囉…但係溫得唔多囉… 係晏晝落過U拉拎份書通notes，跟住去左NA拎部計數機囉… 果科circuit勁多complex number要計， 如果下下人手計就有排都未計到…所以都要整番部傍身先得~ 之後返宿都係慢慢研究下部機點用啦…咁多功能… 然後再溫返下d賤數就返屋企喇…但係架校巴竟然full左… 為免呆等4個字等下一班車，結果決定係行落火車站… 都唔係行左好耐o者…最後都準時返到屋企~ 啊…今次唔係拎左好多野返屋企呢… 結果冇乜野溫到，聽晚先返宿…唯有響屋企hea下啦~ |
| 今日好多時間都唔知做乜好…皆因拎得少notes返屋企溫… 朝早落左去飲茶囉…跟住返上樓上網，然後下晝諗住開始溫書啦… 不過手頭上o既野好快就溫完，基本上話熟哂又唔係好熟， 但已經唔想再研究落去，所以要不斷搵其他野黎做… 最後都係睇下電視雜誌甚至之前中大派過o既野黎hea時間… 夜晚落大家樂食一哥火鍋，久違左一年喇~ 間野o岩o岩裝修完，係幾有格調o既…但多左壓迫感囉反而… 以前好似食完一個都唔飽，今次就o岩o岩好，唔知係咪落重左本呢… 食完之後分別送埋阿婆同阿姨返屋企，夾埋都用左半個鐘… 不過好彩時間都尚早，返到宿都未夠9點… 但係唔知點解今晚d時間都好快過咁，一來又要溫書通， 二來又同人研究circuit果科，都用左唔少時間， 原本諗住12點幾訓，但結果都去到點半鐘…聽朝諗住早d起身溫書呢… 嗯…聽日正式開始考試喇，第一個sem…希望都考得好好睇睇啦~ |
| 開始考試喇…入到大學第一次考final呢~ 今日係考書通，朝早仲有大O組聚…就係一齊溫書~ 9.幾去到賤build個金魚缸(溫習室)，點知去到一個人都冇， 原來又係個個都遲到…唯有自己上陣網、睇下書先啦… 我都未試過響金魚缸逗留咁耐，不過呢度個feel其實都唔錯~ 溫(&hea)左3個鐘，就夠鐘去食晏喇，此時已經有兩人霸好位， 而且買埋生日蛋糕，皆因今日有組mate生日~ 一件大蛋糕得5個人分，肯定點食都食唔哂啦…最後都冇食到晏… 仲要借火都借幾個字，加埋唱歌、影相果d，食完蛋糕都已經夠哂鐘… 跟住就直鏟落U Gym，準備今日o既考試喇… 去到就搵返自己個位啦，基本上我都已經係最遲入果批， 坐好之後都未拎齊d野就要check卷，都幾手忙腳亂… 份卷得一個鐘作答，幾十條MC同一條問答， d MC都冇乜問題，問答都係老吹，不過唔多夠時間， 考完之後又覺得自己吹得唔係太好，不過好彩MC佔70%… 考完就返宿啦…基本上成晚都係溫聽日果科circuit，冇咩特別喇… 第一日考試就係咁樣啦，都冇乜特別感覺… 係唔太慣呢d咁formal o既考試feel囉… |
| 正式考major喇…心情比噚日緊張左d啦~ 今日響UC gym考，行幾步路就到喇… 食完飯陸續見到班同學出現喇…都好耐冇見啦~ 個gym係幾科同時一齊考，裡面除左CE人之外都見到唔少識o既人~ 份卷係兩粒鐘，初頭做得比較慢，後尾先加番速… 5揀4，有三題應該唔會錯，淨番一題砌左勁耐，最後以為做到， 點知做完先發現有part做錯哂，頂盡可以扣15分… 有唔少人都似乎做得幾好，呢份卷都係不寄厚望喇… 考完行幾步就返到宿喇，跟住成晚都係溫聽日考o既java啦… 寫個program唔係問題呀，要考先大鑊， 仲要係果個professor唔知出d咩卷…都要做幾多準備… |
| 今朝考programming，首先我要多謝一個人， 佢叫做「死仔峰」，如果唔係佢考呢份卷都幾麻煩，哈~ 一望埋落份卷度，已經覺得d題目熟口熟面， 原來呢個professor出d卷係勁翻炒， 就係因為噚晚果個人打黎…同我研究佢之前d卷研究左成晚， 噚晚研究過o既題目今日都出哂咁滯，所以都做得唔錯~ 後尾佢睇番上年份pastpaper，發覺有9成半題目係翻炒，變態… 考完之後我地兩個勁開心~噚晚用左咁多時間都總算冇白費~ 跟住食完飯就返宿…終於有時間渣下攤喇~ hea左成個鐘先開始溫書…溫溫下仲走去訓晏晝(雖然訓唔著)… 夜晚就乜都溫一餐，因為聽日考語精，求其溫下算喇… |
| 今朝考語精…個course叫做「粵語拼音與反切」， year 1焗take，唔計credit，pass左就得~ 同個同房一齊行落u gym考…一路行仲一路研究d字點讀… 份卷考就考一個鐘，不過我3個字已經搞掂， 但又要過左半個鐘先准早走，結果要吽多三個字… 出左去之後一直企響門口同人吹水，百無聊賴咁… 其實係搵人食飯…最後兩個人上左NA can食… 之後落返賤build搞埋份project就返宿溫書喇~ 溫到6點左右比人call左落U拉一齊研究下聽日果科… 然後再食埋飯就再返宿繼續搏殺… 唉…今日好多人都考完喇…響宿周圍都聽到d人勁興奮咁… 我就仲有3科要考呢…下個禮拜二先完…真係期待~ |
| 連續五日o既考試，今日終於進入尾聲喇~ 今次份卷做兩個半鐘，但係都勁唔夠時間做， 僅僅先叫做話做得哂…希望唔好唔小心做錯得太多啦~ 定好左今日開會，考完試成班莊員一齊上本部食飯先… 去到校巴站見到有車，但係竟然唔夠位， 淨番個女仔、一個病緊o既莊員同埋我呢個P…成班正一死野… 不過慢慢上去canteen…都同佢地差唔多時間去到… 食完飯過賤build諗住開會…點知班人又要趕project， 搞到成3.半先開得…仲要淨係開得一個鐘… 跟住成班人出長沙灣整莊褸…驚宣傳期著唔切，所以要早d出去整… 搭果架巴士…上車同落車都係大埔道…但都坐左好耐… 去到搵間舖頭果陣竟然發生市區蕩失路事件…sai左少少時間添… 上到間舖就揀褸，然後傾埋d細節o既野， 搞到成個幾鐘先搞掂，不過都總算有件屬於自己莊o既褸，期待中~ 之後返中大食飯，然後返宿上陣網， 夜d再拎埋本勁重o既賤數書返屋企溫… 因為聽日畢業禮…驚唔夠時間溫書呢… 出到去都幾凍…中大得14度…我仲要響u gym漏低左件褸… 不過出奇地…著得一件衫出去都仲頂得順… 仲要咁好彩…返到屋企發現又有多件褸著~ |
| 今日係畢業禮o既大日子，即係呢日先代表我正式中學畢業… 但係出奇地又冇乜特別o既感覺…或者咁遲先搞畢業禮冇咁好… 朝早都係溫下賤數先，然後落大家樂食野， 之後上返去就換返套西裝喇…都係grad din果套… 記得以前去畢業禮…見到d grad左o既人著哂西裝好型， 都好期待自己有呢一日呢~估唔到咁快就到呢日… 不過著著下套suit先醒起…我唔記得左點打呔… 但係都冇計啦…屋企都冇人…唯有出發先… 因為屋企總動員去「觀禮」，所以要飛的去… 去到d人已經坐低哂，不過原來我地d畢業生都仲有好多未到… 我坐低左先叫隔離個同學幫我打番好條呔… 然後等到3點…典禮就正式開始喇~ 望下本場刊…今年我都仲有兩個獎，不過就唔使上台喇~ 係「畢業生授憑」果陣就全部人上哂去影張相咁囉… 不過其實最後係乜野證書都冇…連果兩個獎都拎唔番… 致完辭之後又有d學生表演，今年真係非常精彩… 首先唔知點解班人今日鍾意怒拍手，咩都拍一餐… 至於d表演…頭幾個冇乜問題，淨番最後果個「現代舞」先頂癮， 我都唔係想笑佢地…但係實在又太搞笑… 真係佩服台上面唯一果個男仔…竟然肯犧牲色相… 跟住就係茶點時間，今年終於有得名正言順咁享用喇~ 不過又要周圍social下，最後都冇食到d乜… 咁耐冇見d miss阿sir同同學，梗係要吹下水影下相啦~ 但係又搞到好似冷落左屋企人添…真係唔好意思… 大家響度hea到6.幾先走，跟住就一齊食飯啦~ 原本係打算去番以前成日打邊爐果間， 不過今日竟然要等位，仲要等勁耐都等唔到… 最後要周圍再搵野食…結果係搵到沙o爹王… 不過始終都係要等位，8.半先有位坐… 食飽飽大家仲怒影相，差唔多人地打佯先走… 然後再許留山直落，十幾人差唔多迫爆間舖… 響十幾度低溫之下再食個西瓜西米露，一個字：爽！ 食完大家又例牌圍圈吹水，差唔多12點先解散~ 一路返去成個人都一路震哂…得套suit始終都係捱唔住… 嗯…happy左成日，聽日又要收拾心情溫埋最後一科major， 考埋禮拜二o既大通就可以盡情過一個冇考試壓力o既聖誕喇~~ |
| 冬天o既朝早…最唔想做o既野就係起身… 匿響張被入面真係好暖好舒服…但係一落床就好辛苦… 我發覺原來屋企係凍過宿舍好多…點解會咁架呢… 今日又係溫書啦…最後一科major…亦都係最唔熟o既賤數… 響屋企好似冇乜mood溫咁…但係又懶得返宿… hea下hea下咁就一個下晝…好彩有人打黎問數…迫下我計數囉… 都唔知我到底係咪唔鍾意計數…有咁多數都唔願做… 但又可以一直讀住d計數o既科目…都真係幾奇怪… 夜晚出pizza hut食，主要目的係為左儲單換卡… 因為荃灣執左一間，所以淨番果間就勁多人… 阿媽趁等位時間同細佬去揀新電話，淨番我自己響度等位… 等左半個鐘終於有位，但係佢地都未返，前後響度吽左成個鐘… 不過今餐都幾正~我都好耐未試過食得咁飽啦~ 食飽就返中大繼續溫書啦…不過又掛住同人icq，用左唔少時間添… 仲搞到幾夜下先訓添…希望聽日考試冇問題啦~ |
| 終於都最後一科major喇~考埋呢科賤數就輕鬆好多喇~ 今日個試場好騎哩…係sir run run o既buffer位… 之前完全想像唔到果度都可以考到試囉… 份卷唔算難囉…不過有d題目似pure卷囉… 應該識o既都識，應該唔識o既都唔識…算係咁啦~ 不過唔知點解…考親maths卷都要去洗手間…今次都唔例外… 考完即刻鬆哂~諗住搵人食飯慶祝下啦~ 不過唔知點解班人散哂…係搵到幾個囉…但佢地最後都係返屋企… 淨番兩個落左CC食…食完仲傾左陣關於莊o既野… 之後上番NA…上宿拎個soc印準備申請宣傳d野… 跟住仲響果度同人吹左陣水，成2點先返到自己宿~ 雖然聽日仲有科大通，但係晏晝先考，諗住聽日先溫~ 於是今日就決定休息下~基本上成日淨番o既時間可以話冇做過野… 係去左洗衫囉…跟住怒上網…打電話約人開會囉… 同埋係落左電視房睇《衝上雲霄》…終於有時間落去睇電視喇~ 不過話我係工作狂真係一d都冇錯…一冇野溫，又冇其他節目， 就覺得個人好空虛啦~差d仲想拎番d major黎溫…你話係咪折墮丫… 希望今個聖誕假可以充充實實、開開心心咁過啦~~ |
| 真正最後一日考試喇…今日考o既係「中國文化要義」… 食完晏先施施然開始溫，仲要一路溫一路同人icq~ 因為實在冇乜野可以溫，淨係得自己上堂抄o既notes… 溫左兩個鐘左右就去考試喇…去之前過一過賤build交d form， 順便上去睇下d pastpaper，一睇，不得了！題題都唔識答！ 都唔理得咁多啦…唯有盡量記左d野佢啦… 結果望下份卷，咦，題目問果d野我都有抄過notes架喎… 但係吹唔吹得番出黎就當然係兩回事啦… 兩個鐘之內…都叫做吹到幾版出黎o既…但都唔記好多野… 不過都唔理啦…兩個credit咋嘛呢個~ anyway，終於都考哂喇，好野~~~~ 不過又冇話點慶祝喎…成晚都係響宿icq咋… 原本一直諗今晚返唔返屋企好…最後都係決定聽日先返啦~ 今晚都係睇《衝上雲霄》啦…死啦…睇左兩集要開始追喇… 哈~傾icq果陣傾到d鼠鼠(唔知點叫)，仲睇埋d得意相， 吊哂我癮，搞到我好想買番隻玩下添~雖然我不嬲都想養架喇… 仲要原來一隻咁平，我真係完全唔知添… 不過最大問題都係屋企同埋宿有冇條件比我養… 唉…今晚打電話約人開會，都真係波折重重… 之前我已經根據大家得閒o既日子，定左3個開會日期出黎… 最麻煩都係黎緊果次會，打打下突然副會長打黎話要改日子， 於是又要再打番比之前d人…最後打到尾二果個， 竟然話果個時間撞左踢波練習，結果要再改期… 最後用左個半鐘先打完所有電話…真係超麻煩… |
| 聖誕假第一日，大部份時間都響宿舍渡過… 11.半起身…跟住怒上網…食完晏去左中同度搞下部手機， 佢部notebook可以免費send D相過去做wallpaper，正！ 我整左幅屋企影出去o既相用住先，遲d睇下仲有冇靚相用~ 跟住過左紫霞…玩下人地養o既倉鼠， 仲睇左套叮噹大長篇VCD，哈哈，勁無聊呀~ 不過都幾好睇喎…雖然發覺好多情節都唔make sense… 之後返宿上陣網，就返屋企啦~又好耐冇食過屋企d飯啦… 但係之前要去一去醫院…阿婆又入左院啦… 嗯…不過好彩都冇乜特別事…希望又快d出院啦~ 夜晚突然有網友打黎話叫我去試搭西鐵… 我見冇乜野做咪試下囉…都想睇下有幾快同埋有幾震~ 都唔知夜晚d巴士咁疏…早知行過去啦… 仲要有架想搭o既黎到竟然飛站…見到架貴車都照上啦… 去到個站…超冷清囉…d staff仲過多乘客… 嗯…架車的確係幾快，三個字已經去到天水圍， 震就一般囉…搭東鐵好似仲震d添…不過焗左少少囉… 去到屯門總站就逐個站落車睇睇… 嘩…個個站都有唔同design，幾正~於是不斷怒影相… 最後響元朗出閘…去陪人食d野囉… 之後搭番巴士返屋企，12.左右返到去啦… |
| 由今日開始我就係一個走讀生了…雖然都響宿hea左一排… 朝早返中大開會，又係例牌賤build小花園… 去到得兩個人…又係個個例牌遲到… 最後決定遲到10分鐘起每分鐘罰一蚊…希望有效啦… 今次個會算好d啦…大家都肯講d野…不過似乎都唔係咁積極… 分PIC唔少人都想揀d頹野黎搞咁…希望大家真係做野果陣認真d啦… 開到2點幾…總算傾完d野啦…跟住先去食野…餓到我丫… 食完返宿上下網，跟住又返屋企啦~ 呢次真係搬返屋企住啦…所以要執埋d野走喇… 拎番d衫褲走啦…仲要幾罐好耐之前飲淨o既汽水… 今晚終於可以優閒咁吽響屋企睇電視、睇報紙喇，正~ 聽日冇節目，應該又係吽響屋企， 好耐未試過全日都響屋企無所事事喇~ |
| 今日終於可以無所事事、漫無目的咁響屋企hea喇~ 真係好耐都冇試過啦…起碼住左宿之後都未試過… 不過晏晝都出過去o既…去接阿婆出院… 佢check過之後都冇乜野，所以好快出得院啦… 因為要拎埋架輪椅去，所以來回都要飛的… 去到要搞一大輪手續先出得院，我唔知頭唔知路就唯有齋坐啦… 響病房hea左大半個鐘，完全體會到d護士o既服務態度… 如果不幸地我要入廠o既話…我就唔忍佢地架喇… 坐坐下仲比人趕左出病房，都幾無奈… 一個人響出面又hea多幾個字先走… 飛番的返麗城跟住去食個tea，之後先返去… 然後都係上網同人傾下計咁啦~ 夜晚同番噚日冇開會o既莊員講番個會講過d乜， 估唔到一講又講左個幾鐘…不過其實都傾左好多野… 最後仲即興搞左個單車團，希望搞得成啦… 話哂都係班CEG同學o既第一次聚會… 唉~講開聖誕假o既節目，都幾多野想講， 不過我而家夠鐘出門口喇(我特登早起身補寫日記架)， 睇下今晚有冇機會講下啦… ICQ，原來真係會傾上癮的。 |
| 今朝幾早起身，因為約左人去睇無間道~ 嗯…今朝得果10度，不過冇我想像中咁凍o既… 因為就人所以今日去左九龍灣睇，冇所謂啦~ 可能天氣凍大家都唔知醒…入到去已經開左場，賣緊廣告囉… 呢套第三集影評似乎麻麻，其實我諗係大家期望過高囉… 唔明就梗係有架喇，不過冇我想像中咁嚴重囉… 基本上都係一套睇得過o既戲黎o既~ 睇完之後去食吉野，之後響淘大周圍亂逛， 其實主要係為左hea時間，晏d約左網友碌ling… 最後去到間書店睇書…都hea到唔少時間~ 跟住就搭番地鐵去美孚喇~ 今次係我第一次認真咁碌ling，之前次次都係頹打… 有個人係成日都打果隻，所以我可以好好學下野喇~ total碌左三局，都唔平呀…不過碌完幾次開始有進步啦~ 玩完之後就試搭西鐵返屋企，睇下會唔會快d同平d~ 搭車就5分鐘返到荃灣囉…不過行返屋企都要3個字… 價錢方面…比地鐵轉小巴平左一毫子咁多囉… 夜晚完全係怒睇電視，首先睇番d堆滿《衝上雲霄》o既錄影帶， 跟住就當然睇埋大結局啦，睇完仲有勁歌季選，照殺… 唉…又成日都劫唔到機…唔睇電視又有咩好做丫… ===== 今日想講番關於聖誕假節目o既野… 其實今個聖誕假基本上已經算好充實， 但係somehow我都好似未係好滿足咁… 可能係因為我之前對呢個假太大期望啦… 首先講下中同啦…似乎我以前係太著重整體o既團結， 而忽略左同個別同學o既交往…變左係同成班人都熟， 但又唔係話真係好熟果隻…至少好少有人約我出去玩啦… 即係基本上我都唔屬於班裡面任何一個圈子咁， 差唔多每次同中同出去，都只係靠班會活動或者班網聯絡… 不過呢樣野其實都好關乎歷史因素… 七年中學生活，我o既朋友圈子都唔同， 同埋呢幾年黎，我自己o既性格都一直變緊， 以前我鍾意吽響屋企上網，而家就成日都想出去… 我唔知係咪因為咁…所以一直都冇乜人約我啦… 跟住到大同…我都唔知點講好… 大家似乎只係當對方係同學o既關係，而唔係好想做朋友咁… 最起碼班莊員對於莊聚都似乎冇乜熱誠… 連莊員都係咁樣，其他同學就更加… 我又唔係話同班大同唔熟，但係大家只會響學校裡面熟， 一到放假就冇哂聯絡果隻…其實中同唔多唔少都係咁… 雖然中同有班網，大同有newsgroup，但係兩者而家都靜哂… 我自己又唔甘心同d同學o既關係淨係去到呢個地步囉… 小同就唔使講架喇，小學已經係我一生人最大o既遺憾… 不過都還好彩，我仲有一班網友同我出去癲， 基本上我都唔使慌呢個假期會悶~ 其實我而家淨番兩三日冇節目架咋…仲未計大細o組聚呢… 但係…我真係想同大中同d關係再搞好d囉… 唉~你話我係咪犯賤呢…明明唔係冇節目都要講咁多野… 其實呢堆野都係我前幾日冇乜野做諗出黎o既… 不過我係咪好懶呢…又唔做野淨係掛住玩… 但係我又真係諗唔出實際上有咩可以去做喎… 莊務? 我覺得而家搞熟班莊員先最緊要囉… 算啦~比我呢個第一次冇考試壓力o既聖誕假放肆下啦~ 痴線…無啦啦寫到咁長添…唔想睇就飛哂去啦~ 我都係純粹吹下水o既o者… |
| 朝早起身補寫日記，跟住落去飲茶， 然後繼續日記…因為噚日實在太長… 之後就搭車出去…去龍鼓灘BBQ~ 如果冇記錯…我今次應該係第三次去果度… 呢度最方便就係乜都唔使做，比左錢就即刻可以開始燒~ 今次呢個BBQ係當哂午餐同晚餐，由2點燒到8點，勁飽… 跟住搭番巴士出屯門，見到個牌寫住轉西鐵可以慳番巴士錢， 於是決定搭西鐵返去…我都估唔到我會咁捧場… 沖完涼、上陣網、睇埋新聞就去訓覺喇…都冇乜野做… |
| 今日冇節目，留響屋企渣攤~ 補寫日記、上網、睇報紙，咁就一個朝早… 食完晏，諗住睇番套VCD，不過最後都冇睇到… 今日係近期比較低沉o既一日… 首先一來屋企呢排又有d嗌霎…我都幫唔到咩手… 跟住又冇咩心機做野，基本上成日都冇做過野， 淨係諗莊員自介都諗左成個鐘…成個人吽哂… 仲有聽日o既大同踩單車面臨爛尾…呢個先最灰… 或者我係一個唔識得放假o既人… 一方面又唔搵d工作放假做下， 另一方面唔做野又覺得好冇意思咁， 即係有節目o既話都仲可以忘記下d野， 如果果日冇野做…好似今日咁…就成個人頹哂喇… 咁到底我應該係出去玩? 去搞莊務? 對住部電腦? 原來冇功課、冇考試，並唔係我想像中咁好玩的… 即係我又唔係d咁讀書o既人， 但似乎我呢個假期真係冇乜目標… 呢樣野對於我黎講都幾慘… 或者…我需要搵個人同我吹下水… 或者…我需要一班人同我出去癲番日… 或者…我需要… ===== 今日係冬至，夜晚落去食飯做節~ 幾好[食送]架都，不過今晚d氣氛奇怪左d囉… 我仲要夾住坐響兩個老人家中間… 食完返上去…用左陣電腦…傾左陣電話… 電話裡面同人傾好左…單車團延期… 最唔想見到o既野發生左…唯有希望延左之後搞得成啦… 今晚係非常難過o既一晚，唔係唔開心果隻「難過」， 係d時間真係唔知點過…冇電腦用、冇其他野可以做， 屋企人入哂房訓覺，得番我一個響廳睇電視… 仲要冇節目好睇，都比我睇左兩粒鐘… 好想有人突然打電話約我聽日出去， 但係我又從來唔會提起勇氣，去打電話約任何一個人… 我都唔知自己想點… |
| 今日原本係第一次同班大同出去玩， 不過好不幸地唔夠人去，所以延左期…結果今日又係吽響屋企… 但係今日總算冇噚日咁「難過」喇， 我決心要盡量做番d有意義o既野~ 見細佬部機有套「行運超人」VCD， 於是就拎左黎睇，咁就渡過左一個上晝~ 下晝呢…又唔係好記得做過d乜， 但係總之時間過得好快下，轉眼就黃昏， 都總算係比較充實丫~ 夜晚食完飯冇耐就出去…陪阿媽睇「真的戀愛了」… 本身我對呢套愛情喜劇冇乜特別興趣， 但係d影評講到超正，非睇不可咁…就即管睇下啦~ 睇完覺得…並唔係真係話讚嘆不絕果隻， 但係對於拍緊拖或者老公婆去睇就應該幾好o既~ 睇完返到去12.幾，諗住沖完涼就訓覺啦， 點知咁好彩比我劫到機，仲ICQ到3.半都未訓添… 嘩…今晚傾左好多野呀…傾完成個人都舒服哂~ 聽朝一於訓番夠本，準備聽晚平安夜狂歡！ |
| 噚晚太夜訓啦，所以今朝訓到成1點先起身… 跟住食左個X洲紫菜辣麵，真係辣到出煙~好爽~ 然後冇咩世藝…走去玩番隻養魚game，咁就虛耗左兩粒鐘… 今晚係平安夜，梗係要出去狂歡下啦~ 呢年已經係連續第三年平安夜同網友出去玩啦~ 過左海首先要過銅鑼灣拎d野比阿爸先…順便探一探佢啦… 跟住過番金鐘會合d網友，然後又去環球嘉年華喇~ 今次唔係玩左好多野o者，三個機動遊戲就夠~ 不過當然就唔少得件G-Force啦~真係年年玩都唔厭~ 跟住仲怒掟汽水樽，不過大家掟左幾桶圈圈都冇收鑊… 等大家都玩完所有野…都已經8.幾，去搵野食啦… 行下行下，由金鐘去到中環，先搵到間大家樂， 辛辛苦苦搵好位…竟然發覺間野淨番楊州炒飯有得賣… 結果係去左間冇位o既吉野家…成班人叫外賣然後坐出去食… 食飽又行下搵下廁所咁…咁又hea左成粒鐘… 之後諗住過老尖，打算由尖東殺到去尖西， 但係去紅磡d船又收左，最後決定係飛的過海… 好彩都冇塞到車，每人夾十幾蚊，算係咁啦… 跟住就開始慢慢迫，唔迫下又點叫聖誕丫~ 最後迫到11.幾先迫到去彌敦道… 跟住原本一齊果批個網友散水，我又唔想咁早返去住， 於是會合另一批網友，繼續搵節目~ 但係佢地又響尖東…於是要慢慢迫番過去… 去到佢地決定去元朗食糖水…都幾「有趣」o既節目… 仲要行過去九龍站搭地鐵轉西鐵…[支力]到我行屍走肉咁… 去到元朗2.幾啦…食飽飽之後班人仲打算通頂， 但係又根本諗唔到好o既節目，夾硬通左佢就無謂啦… 所以我都係決定返屋企…不過其實上到車已經係差唔多4點… 返到屋企又唔知點解唔想訓住，打完日記都5.半… 嗯…今年平安夜，老實講係冇上年咁好玩… 我發覺我有d野真係唔識點handle…真係順得哥情失嫂意… |
| 呢個聖誕節，平淡得黎都過得幾唔錯~ 相信呢次係我咁耐以黎過得最短o既一個聖誕節， 因為我一起身已經係2.半…噚晚咁早訓，點都要訓番夠本啦~ 之後果個半鐘都係混混噩噩咁過，都可以當我訓左… 直到4.半先落去買我o既早餐－叉瀨一碗~ 食飽之後上陣網就出門口，同家人去歡渡聖誕~ 首先過左海去睇棵許願樹…都係影下相就走… 跟住去左許願廊許願，咪心想事成…之類囉(略)…呵~ 然後搭小輪過尖咀…完全係做番噚晚想做但冇做到o既野… 不過坐隻船都好似走難咁，多人得佢丫… 幾經辛苦終於去到老尖，時間已經接近8點， 諗住過一過尖東睇燈飾，但又諗住9點趕番荃灣打邊爐… 結果大家行得慢…差唔多行到去尖東就要走… 跟住又飛的返去，然後又慢慢等位… 差唔多10點先有位，好彩我食早餐食得晏… 今餐飯隊左兩支，都已經唔係好行到直線添… 落到樓下竟然撞到兩個中同，佢地準備去睇金雞， 我又咁o岩想搵人睇，於是即刻就走去買飛~ 估唔到其中一個願望咁快就成真，真係心想就事成~ (哈~幾時到第二個願望都實現埋呢~) 仲有半個鐘先夠鐘，響seven同荃廣兜左個round就o岩o岩好… 冇幾耐之前我先睇過第一集，所以今次自然得心應手啦~ 套戲都幾正，尤其是回憶番今年發生過d事果陣… 不過睇睇下發哂冷，仲肚痛，都睇得有d辛苦… 睇完1.半…乜車都冇，當然係行番屋企啦~ 沖完涼、上完網、寫完日記，3:05，連續幾晚咁夜訓添… |
| 今日係大O組聚，出旺角唱K兼打邊爐~ 去到見到得兩個女仔，原來d男仔全部夜晚先黎，組爸又遲到… 最後得四個人去唱，冇咩所謂啦… 今次唱得好鬼high，乜歌都唱得一餐~ 唱左4個鐘都唔多夠喉添，不過仲要打邊爐，算啦… 去地鐵站會合番其他組mate，跟住就搵地方打邊爐… 響旺角街頭行左一輪，最後搵到間幸福樓… 呢餐真係超正，不過唔係講d野食，而係實在太多搞笑野， 淨係單waiter情緣已經笑左成晚，好正~ 食到10.幾先笑住咁散水，今晚總算早左返屋企喇… 今日boxing day，總算有份禮物收喇… 就係響日本讀緊書o既組媽特登由日本寄d禮物番黎，好感動啊~ 仲要個個組mate都有，永不落空~ 真係期待阿媽快d返黎…到時一家人齊齊整整再去玩過~ |
| 起左身之後都係上下網咁，同埋睇下日記， 回憶番03年做過o既野…原來今年都發生左幾多事… 有開心…有唔開心…不過前者一定多過後者o既~ 睇完哂日記就出去…今晚有網友燒烤同樂日~ 搭巴士去大埔，去到遲左7分鐘，但竟然一個人都冇… 原來其他人都更遲或者自己入去…早知唔使咁趕… 等夠人之後就去百佳買野，要預每人$40 budget都幾煩… 不過揀哂D特價之後發覺原來都幾多錢淨， 仲有成$100可以去街市買丸~ 去完百佳同街市就搭小巴入大尾督，途中不幸發生碌丸事件， 損失左十粒丸左右…下次記住綁實d袋喇… 今次係去左埋便個燒烤場，落左車仲要捧住d野有排行… 雖然周圍都有街燈，但今次霸到個位比較暗， 張檯都睇唔到野食，結果都要租番盞燈，點都要爆budget… 我就順便買番罐野啤啤佢…咦我幾時變左酒鬼架… 一路燒一路覺得越黎越凍，要成個人隊埋個爐度取暖… 食飽之後就上左壩度玩，記得上次上黎玩都好正~ 不過今次冇見到咁多星喇…似乎都係煙霞問題… 跟住成班人玩左堆兒童益智遊戲，好抵死~ 玩到盡興先至落番去，仲玩多陣猜皇帝先執野走… 離開大尾督都過左12.，去到大埔冇哂巴士搭， 唯有搭火車出番旺角再轉紅van返麗城~ 返到麗城就差唔多兩點啦，不過有網友住海濱， 我又唔忍心睇住佢自己行番去，於是陪佢一齊行啦~ 沿住海邊一路行一路吹水，感覺幾正~ 好似唔使幾耐就去到海濱咁，其實已經行左大半個鐘… 去到望一望隻錶，2點半，嚇死我… 即刻急急腳咁行番麗城，4個字返到去喇… 但係咁夜都竟然劫唔到機用，睇下報紙就訓左喇… |
| 今日終於返中大喇…成十日冇返過去啦… 首先梗係返宿啦…最主要要執下d野， 因為30號要quit宿，地下d野要搬走哂… 嘩…冇返十日張檯竟然舖哂麈…又要抹一輪先… 搞掂d野就落去買飯去賤build小花園食，準備之後開會… 今次個會算係咁多次以黎最齊人喇…爭一個病左黎唔到… 開完會之後一齊出去食飯，總算係勉強搞到次莊聚啦… 成班人搭火車出旺角，跟住周圍搵去邊度食… 最後去左据扒…曾幾何時都去過果間食… 食飽都未夠8點，仲諗住再搵d節目做下， 點知大家響旺角都諗唔到有咩好做，結果都係要散水… 嘩…終於有日咁早返到屋企喇… 跟住都係上下網咁…仲要執野… 未來兩日去旅行…廣東唔知邊度短線遊~ ↓間房執好後的樣子 |
| 朝早天都未光就要起身，因為今日出發北上呀~ 其實係廣東短線遊，聽晚就返屋企架喇… 5.9起身…真係勁耐未試過咁早，好彩都還起到… 執好d野仲有時間上陣網先…因為要等埋細佬起身… 之後就飛的去中港城，集合左之後先去食早餐， 跟住就上船出發去順德啦~坐2粒鐘就到~ 原本諗住聽下歌順便洽下，點知最後都訓唔著… 過哂海關就上車，發覺原來呢個係耆英團… 不過好彩個領隊同導遊都幾nice~(導遊好似大O組媽:P) 首站係去碧桂園農莊，冇錯，係五星級的家… 響廣告見到就覺得果度勁正，但係去到現場係爭d架喇… 個農莊有d農具、農作物等等，不過呢d都唔係重點， 重點係裡面有得玩越野賽車，我同細佬見到就跳左上車… 原來架車都唔易控制架，條路又崎嶇不平， 搞到一開始竟然炒車…不過都幾好玩o既~ 食完晏就入廣州，去左天河公園，d景都幾靚，影左幾多相~ 之後去唔知乜奧運體育中心，好似會展囉…但只係影下相就走… 然後係某動物園，除左好臭之外都冇咩特別， 係有得釣魚囉…我釣到一條…但跌番落水… 跟住去歎下茶，同埋食下雷沙湯丸，強烈推介！勁正~ 之後番酒店hea下，然後落下面食飯， 食飽就過隔離o既「夜間動物世界」… 一出到去，嘩！凍到出煙添呀！鼻都噴得出煙呀！ 去到首先霸位等睇個馬戲表演，講到勁架勢咁， 等左半粒鐘，結果都幾正o既，除左少少失手之外… 跟住睇左一個超頹o既上水表演之後，就去左坐火車， 響勁黑o既環境下見到勁多野生動物，感覺幾得意~ 之後買左勁多野食，食到飽一飽就返酒店喇… 去到逛左陣，仲阿細佬碌左局ling… 然後返房沖涼，寫日記訓覺啦，聽朝又早起身… |
| 一早起身，出露台望望，見到d霧景超正~ 開電視扭去無線睇下新聞，一睇就嚇到「o下」一聲… 一個梅艷芳個樣仲有下面一行「1963-2003」， 估唔到2003尾二一日都要多個人離去，真係非常可惜… 咁早起身就係為左落下面霸位食早餐， 因為聽聞話間西餐廳好正，唔早d落去驚冇位… d野食就唔錯啦，又唔係話very good果隻， 不過最正係有得睇白老虎，仲要只係一窗之隔， 一路食野一路睇住佢地行黎行去，都幾得意~ 食飽就再返上房訓多陣，跟住先退房離開~ 今日首站係去養蜂場，見到d蜜蜂飛黎飛去都驚架， 不過我諗我都算大膽左架喇，起碼都敢落車… 跟住去左個唔知乜地方，有鴕鳥表演囉… 仲有無限量鴕鳥筋湯供應，都幾好飲，飲到飽哂~ 之後就去食晏喇，真係飽到冇得再飽… 晏晝就去左個花場，我就怒影d花， 然後搭左成個鐘車，去左個絲綢廠，少悶啦， 成班人係咁shopping，我就行行企企咁… 之後就去番順德港，呢個團就正式完結喇~ 搭番船返香港，之後響隔離美食廣場食晚飯， 然後返屋企啦…不過成晚都劫唔到機，好慘… 屋企買左部新電視，今晚主要節目就係set部電視… 始終都係睇唔到亞視，真係有冇搞錯… 搞掂之後怒睇報紙就訓啦~ 總結番呢兩日行程啦~基本上都玩得好開心喎~ 雖然d團友真係幾悶，去d地方都係普普通通， 但其實只要係去旅行，我都好enjoy架喇~ 好想快d有機會同班friend一齊去旅行~去邊度都好~ |
| 一起身就聽到出面好熱鬧，原來係阿公帶左班friend上黎打牌… 食完晏之後就出去，今日係細O組聚呀~首先係去啟德碌ling… 幾經辛苦去到九龍城，竟然話間野執左，灰哂… 跟住決定改去美孚碌，即係我前排去過果間… 但係去到發覺冇位，去篤下波先囉… $75有得包房一粒鐘，幾好呀… 不過我d技術真係…最後好夾硬黎先開到齋… 之後出番去就再碌番ling，碌完就搭一個站去打邊爐… 一開始就狂食d熟食，食左一輪就飽哂… 跟住仲發現有啤酒任飲，我飲左一支已經頂唔順， 個肚頂住頂住咁，不過都仲行得走得… 食完埋單都只係9.幾，仲有排都未夠鐘倒數… 於是決定返去篤多陣波…但係我去到就要抖下，篤唔到喇… 篤完都11點，搭地鐵去奧海城倒數， 點知去到越黎越唔舒服，仲開始想嘔… 迫到出去勁多人果度，仲辛苦到要挨響組mate膊頭上面… 好快就到左倒數時間，但係我竟然連數字都嗌唔到出聲… 估唔到2003年係咁樣過去… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |