11月12日 |
| 終於進位啦~ 今日係二十歲o既大日子，祝自己生日快樂先~ 多謝哂咁多位用電話、SMS、ICQ或者行動黎同我講生日快樂o既朋友~ 今日係好平淡o既日子，仲要怒做功課同midterm，不過都過得唔錯o既~ 朝早要埋首溫midterm，下晝考果科都冇乜信心… 份卷好似好頹…不過d野全部記唔入腦，都係吹出黎o既多… 一考完班人就準備con我，不過見有professor響度，都con唔成… 跟住兩堂走左，去lab繼續做功課…之後tuto先去拎番之前份midterm卷… yr1第一個midterm…都叫做考得唔錯啦~繼續努力~ 拎完卷終於都難逃被con一劫，好似係今個sem第一次正式被con… 跟住去book gym搞soc d野，點知行勻NA/UC都book唔到，激死… 之後又繼續去lab鋤功課…直到近9點先出左沙田慶祝生日~好開心呀~ 食完飯都係繼續件project，又係做到3.半先走… 臨到12點果刻，又再被班莊員lift con， 不過con完有生日蛋糕食，多謝哂呀~ 但係睇真d…蠟燭下面果舊竟然係一盒龜苓膏… 呢件生日蛋「膏」真係夠哂別出心裁，虧佢地諗得出~ 除左件蛋「膏」之外，當然仲要多謝哂有送生日禮物比我o既朋友，好感動呀~ 哈~今年唔記得講願望添…其實又係冇時間諗… 身邊所有人都身體健康、開開心心，其實都好夠啦~ 雖然都係好老土~ 同埋希望同所有朋友o既關係都可以更加好啦~ 大中同又好、網友又好，呢一年都好似少左理你地咁， 今年希望可以多番d時間同班friend去玩啦~ 當然唔少得就係希望………唔講啦~~ |
| 好耐冇上過logic啦，原本諗住訓覺，不過好彩起到身~ 之後返宿繼續做project，但進度極慢… 下晝logic tuto派番份midterm，都幾滿意呀~ 跟住去搞book球場d野就去補習啦… 今晚又要溫書，又要做project，都唔知邊樣先好… 死亡之sem果然係死亡之sem，想做下其他野都冇可能… |
| 出左考試時間表，嘩…由8號考到23號，個聖誕假咪短哂? 唔制… 今日係呢個sem最後一科midterm啦，噚日先開始溫，今日梗係要怒鋤… 可惜份卷爆難，勁多唔知點做，個個做完都媽媽聲…咪大家一齊炒囉… 完哂midterm就繼續去lab煲個project，星期五dead，仲有三四成未做… 除左期間叫左pizza食之外，其餘時間都係對住部電腦… 做左咁耐…都好似唔係做左好多野…好多問題都唔知點解決… 一路望住個天慢慢光，成班人做到7點幾先返宿， 一返到宿就咩都唔諗撻落床訓啦… 入左U咁耐，終於第一次為左做功課而通頂啦…估計今晚都要… |
| 訓左五個幾鐘，點半鐘又要起身啦…沖個涼，食個麵，跟住就落去準備個lab quiz… 個quiz因為係open notes，所以之前咩都冇準備過…而且都冇時間… 1個鐘9個字之內要寫到隻過三關出黎，我都算幾好彩， 部機run得幾順，而且d bonus都做到唔少~ 跟住就上lab繼續通頂做project之旅， 期間成班人嗌左pizza食，一個人$35咋，抵啦~ 今晚個lab真係勁熱鬧，個個都埋頭苦幹，真係幾狀觀~ |
| 呢一日幾乎全日24小時都係響lab渡過…真係幾難捱o既一日… 時間過得好快，做下做下咁就過左一晚…周圍o既人仍然埋頭苦幹中… 大家都倒數住12點o既deadline時間，希望盡最後努力做完個project… 我同個partner捱左兩晚，都總算捱得住，淨係朝早輪流洽左陣… 其餘時間都係怒寫project，好彩一直都有d進展， 做到下晝都終於可以放鬆下，出去食個飯先…十幾個鐘冇野落肚啦… 食完飯繼續返去搏殺，距離deadline時間越黎越近， 開始有d midterm/比賽feel咁，有d驚臨到最後個program先炒… 後尾都係做唔哂想做o既部份，不過總算完成左大半，算係無憾啦~ 我地都係距離deadline十分鐘先交到份功課，都算係有驚無險… 之後我地叫埋宵夜食，食完點幾鐘先返宿，都有3X個鐘冇返過去啦… 呢份project真係令我地深深體會到讀CE o既真正滋味係點… 做完一份，另一份就接住黎，根本就冇可能抽到時間做… 回想返呢兩個禮拜，一有時間都係落lab做project， 今個禮拜更加堂都冇乜點上，晚晚至少做到4點，仲要通多兩晚先搞掂… 希望呢份已經係yr 2最甘o既功課啦…如果唔係…救命… 不過雖然我地咁忙，但係成班人一齊響lab做野， 一路有傾有講有玩有笑，其實都幾開心o既~ 但係忽略哂其他野又真係唔想…呢兩日真係完全冇理到其他野… 組聚…返中學…莊務…一切野都冇辦法理會到… 之後幾日終於可以暫時脫離d非人生活啦…但黎緊又再有幾份project… |
| 雖然噚晚dead左project，但hea下hea下都搞到4點幾先訓， 不過今朝8點幾就要起身補習，好辛苦呀… 仲要遲左十分鐘起身，搞到趕唔到校巴， 正打算怒奔落火車站，赫然發現一架富貴巴經過， 諗都唔諗就上左車，我搭富貴巴o既第一次就咁獻出左… 今日補習真係勁眼訓，試過企響度訓著左… 個細路又唔拎哂d功課返屋企做，真係激死… 最抵死就係佢今日係咁介紹佢曾經遇過o既gap人，都真係幾gap下… 補完習出旺角，約左中同食飯~ 間唔中出黎短聚下都唔錯呀~ 之後就同個莊員拎d籃球衫返中大，今日又有e-league打… 今日除左CE有份打之外，我地仲要hold場， 可惜搵唔到莊員幫手，好彩有幾個yr 1肯幫，唔該哂… 原本約左網友今晚BBQ，但要做野都冇辦法，唯有遲到啦… 今晚好難得同班網友BBQ，大家都好耐冇聚過啦~ 城門水塘都去過好多次，但咁夜咁黑都好似係第一次… 今次BBQ都幾順利呀，聖誕大家出黎再玩過啦~~ 燒到十點幾就返屋企啦…今晚要怒訓！ |
| 今日真係大昏迷…訓左十幾個鐘，3點幾先起身… 起左身都仲係渾渾噩噩，成個下晝都係上網睇下雜誌咁… 夜晚出蕉葉食飯，幾年冇去過啦，勁飽… 之後返宿…本來話今晚冇得上網，以為會悶死， 點知原來已經搞掂左，好野~ |
| 今日終於上哂d堂啦，真係勁耐冇上過堂咁… 不過一日上足6堂就真係唔多慣…但仲有時間上堂就真係要珍惜下啦~ 今晚唔使趕功課，不過都要做其他功課，都做到點幾鐘先返宿呀… |
| 噚晚太夜訓…搞到今朝走左logic添… 睇到d notes覺得今堂應該幾有趣架…可惜… 起身之後就去OC飲茶聚，之後就返lab做野~ 補習tun左聽日，今日就乖乖地去上堂啦~ 晚飯後去做lab，但完全唔知自己做緊乜… 份spec已經唔清唔楚…就算問完人都唔知其實自己做緊乜… 咁就搞左兩個幾鐘，真係滴哂汗… 做完又上lab做另一份功課，執左好耐先執好手尾… 之後去左女工食宵，食完又返lab，不過今次唔係做功課， 而係幫人做project…有BA人要寫個網上購物，搵左我地幾個請槍… 不過時間實在唔夠，唯有勁頹咁比個冇得互動o既版面比佢， 一路整一路都覺得好好笑…唔知會dem成點…都唔理啦~哈~ |
| 很平淡o既一日…上完堂返lab做功課， 之後又上堂，之後出去補習， 食埋飯就返宿繼續做功課，好耐冇試過咁早返宿啦~ 摸左份功課幾個鐘都唔知點做，放棄了… 都係決定做番份database project，努力呀~~~ |
| 今日兩堂tuto派左兩份卷，兩份都算滿意o既~ 嗯…呢輪好似著緊左d成績，唔知算唔算係好事呢~ 晏晝做功課，不過一直都唔知點做，盲摸摸搞左幾個鐘… faculty今日搞左個seminar，我之前已經去過開會傾過d野， 我除左去聽之外，仲幫手做埋helper負責遞咪… 初初都唔知會有幾多人去聽，但最後竟然座無虛席，勁呀… 個seminar講game，我覺得都幾有趣，同埋好多野講， 最後overrun到Q&A時間都冇埋，即係我咩都唔使做… 完左仲有茶點食，食左件三文治，ok啦~ 食完晚飯繼續做份功課…初頭諗住呢份功課12點之前都應該搞掂， 點知dum左好耐都唔知點做，再夜d問到人先知要做d乜， 一路做竟然做到5點先返宿…期間仲叫埋宵黎食~ 哎呀…冇諗到今晚無啦啦又通左頂咁滯，不過今晚都幾過癮o既~ |
| 今朝洗埋衫6點幾先訓，訓5粒鐘就要彈起身去組聚… 之前趕功課搞到連續兩個禮拜去唔到組聚，今次點都要去啦… 今次d仔女自己約，都算唔少人啦~ 送左佢地上書通就去lab做野，首先係搵tutor問關於database份project… 噚日n顧草蘆都搵佢唔到，今日都係唔見人，最後用左電話… 我初初睇份spec以為可以就咁寫PHP唔寫java，但問完tutor先知原來java係基本要求… 等我前幾日仲快快手寫定PHP d野，結果唯有暫時擱置，怒煲java先啦… 都唔明點解要寫兩個功能上完全一樣o既system，激死… 之後sit院務會，點解今年好似開得咁密咁o既… 連續幾日唔夠訓，好彩今次都頂得住，起碼都有個激辯可以聽下~ 開完就去lab做功課，做到夠鐘就出去，今晚睇周杰倫演唱會！ 去food court食飽就入場，好多觀眾呀~~ 今次係第二次睇jay o既concert，兩次都好正呀~9成歌都識唱呀~ 不過唔知點解呢次一路聽一路百感交集… 睇完去火炭食埋宵先返宿…返到去開始煲java！ |
| 又係禮拜六晨早去補習，差d就唔知醒… 今次怒補maths，唔知係咪神志不清，一開始講到好亂… 補完返荃灣食晏…之後返屋企怒做database project！ 煲左成晚，總算係有d進度啦，哈哈~ |
| 又係例牌訓到勁晏先起身…一個禮拜難得一次可以lur下床，幾幸福~ 今日出荃灣報旅行團，聖誕同中同去星馬玩~ 雖然唔算多人去，雖然團費貴左d，但都唔緊要啦~ 比完錢就一齊去飲杯野，吹下水先散~ 今晚出左佐敦食飯，之後返中大繼續怒鋤java！ |
| 今日d堂都上足，唔錯呀~未來呢兩個禮拜就好難講啦… 有功課今日dead，大家成日都好努力咁趕埋佢，好彩我算早做… 我自己呢一有時間就煲database份project，做左成晚，進度麻麻… 夜晚去左sit系會新莊o既會…嗯…大家開會都係嘻嘻哈哈… 我都唔太記得我地當時開會係點啦，我諗點都認真d卦… 真係唔知佢地會點樣搞支莊…希望可以繼續幫到佢地啦~ 今晚天氣開始轉涼啦~大家記得著多件衫~ 冬天就黎到啦，估唔到咁快就一年，更加估唔到呢一年發生咁多事… |
| 今日又走左堂logic啦…不過唔係因為唔知醒， 而係CS有人約左我去搵professor傾野…雖然都只係幾分鐘o既事… 跟住繼續做個project，做到食晏為止… 之後上logic tuto，死啦，好多堂lecture冇上，唔太明講乜添… 成堂都響度睇notes怒諗，先叫做追番d，不過大通都唔到我理住啦… 補完習又返lab怒鋤份project，結果做到成5點都終於做到9成幾， 聽日開始做第二份project啦，努力… |
| 今日淨係上左堂tuto，其餘時間都係怒鋤份project，之前目標係要今日之內做好！ 本來仲諗住晏晝執下手尾就清得哂，但結果成個下晝都未做哂… 之後去e-league幫手hold場，都係計分同揭分牌… 今次要做兩場比賽，其中後面果場勁刺激，加上我個腦實哂，搞到成日做錯野添… 之後返lab…終於做好個project！仲有php部份，佔得個course o既0.幾%，唔做啦… 做左另一份星期五dead o既功課，個lab就做好，但份report真係唔知點寫… 跟住出左去食d野，望上個天，今晚好多星星呀~ 得閒要學下觀星先~ 食完返lab開始研究新一份OS功課，上一份做左兩個禮拜，通左兩晚頂先勉強做完… 今次呢份聽講仲難過上一份，但呢份deadline係下星期五…奇蹟會出現嗎? |
| 今朝的早堂又再放棄了，起左身就落去上tuto… 之後去lab打算做聽日交o既report，結果毫無進展… 出去食左個tea就買埋水落去嶺南場…CE踢最後一場超聯了… 只可惜走左校巴，要拎住8支水怒奔落去，都幾辛苦… 估唔到最後一場，CE終於有進帳，結果2:1贏左，勁呀~ 下個sem仲有e-league，希望大家都打得好d啦~ 之後大家返宿休息，我去左lab hea，然後就一齊去NA can食飯~ 今餐好正呀，廿蚊有九[食送]一湯，食左三碗飯，好滿足呀~ 成班CE佬食飯都可以有響屋企食飯o既感覺，好幸福呀~ 跟住落lab繼續做份report，唔知點解工作效率極低， 做左成晚都冇進展，結果無啦啦都做到好夜先訓… |
| 一早要起身上月會，等齊d仔女就入去慢慢充電… 個題目明明係「香港文學」，點解隱約聽到好似變左「明報月刊史」? 之後唔夠時間去canteen食飯，第一次去女工食晏，都勉強夠飽o既~ 跟住去左搵dept head，今朝一早無啦啦有電話打黎話要約傾野喎… 話說之前我地上堂，同個professor呻其他course辛苦(佢個course最得閒)， 佢就建議我地做個調查，佢幫我地將o既苦況反映比dept聽， 結果今個阿head就同我同CS個P傾番呢件事… 得出黎o既回覆係，dept希望可以train到我地成為tough d o既人材， 所以都預左我地要捱，不過就叫左其他professor放鬆d功課deadline， 事實上而家最甘果兩份project都delay左一個禮拜，如果唔係真係會死人… dept今次做野都幾快，希望可以減低d人對個major o既不滿啦~ 其實阿head講o既野都有佢道理o既…而家唔train自己，點同人競爭… 不過講真捱完呢幾年，係咪真係會令個人競爭力大左，咁就真係個疑問… 搵完dept head就搞埋份report，唔知點解突然覺得好無助， 唔知點先可以做好份report，結果都係頹做完就算… 跟住去dem lab，超頹，拿拿臨dem完就準備dem另一份功課， 係之前兩個禮拜+兩晚通頂得出黎o既成果，所以特別緊張… 今次又好似上次咁，dem之前周圍八下料先， 結果搞到好遲先dem，補習都要tun遲一個鐘… 最後我地個分都唔係好滿意，但都要無奈接受… 唯有希望下一份功課可以做得好d啦… 不過之後聽番，有人用左其他人做果份功課黎dem， 結果拎到滿分，呢樣野就真係幾令人洩氣， 如果咁都可以滿分，做兩個禮拜功課黎為乜? 希望下次d tutor醒水啦，唔係都冇乜心機做下一份… dem完就極速趕去補習，好彩都趕得切… 補完就去又一城pageone睇書怒hea…等之後約人食飯… 食完返到屋企都11點啦，好耐未試過禮拜六唔使補習啦，yeah~ 唔知點解返屋企途中發哂冷，好辛苦…返到屋企又乜事都冇啦… 講起又一城睇書，我睇果本都幾頂癮， 叫做「點解男人鍾意講大話，女人鍾意喊?」(類似啦) 講左好多男女之間會遇到o既問題，哈哈，又好似幾中point喎~ 竟然有個衝動想買本書($8x)落黎添~ 其實如果得閒，真係想多d去pageone hea下，好多書都好想睇~ |
| 唔知係咪個人老化左…今日無啦啦個人都好累… 已經晏晝1點先起身，都係唔夠訓咁… 成日都係對住電腦，冇乜建樹… 但又唔想出門口(而且出去都冇野做)，響屋企休養生息下啦~ |
| 噚晚發覺自己已經完全習慣左夜訓，兩點幾已經冇野做，但係都唔想訓， 結果hea下hea下都搞到4.半先訓…今日又係成2點先起身… 響屋企都係懶洋洋咁…做左陣功課囉… 之後教細佬做compu project，crossword puzzle， 份spec出左幾個月都完全未做過，11月尾dead… 照計我細佬應該都幾醒，但好多野都好似幾唔明咁，點會咁架~ 我又唔想自己寫哂d野，淨係guide住佢做， 搞到兩個幾鐘先做得d頹野出黎，如果整埋graphics就真係有排… 今晚試新野，去左別府食，最正都係地獄拉麵， 不過辣到味蕾麻痺…食其他野好似冇咁好味… 最後都係覺得和民好d，起碼多d野食o岩心水~ 食完就返宿啦，今日又拎多幾件冬天衫返去啦~~ 夜晚11.幾先落lab做野，新一份功課又要開始了~~ |
| 啊…今日勁眼訓呀…上親咩堂都係怒訓…救命呀… 果份database project，本來今日dead但delay左，不過今日交都有10% bonus， 所以今日食完晏就即刻趕去lab，為呢10%作最後衝刺… 原本都已經搞掂哂咁滯，但突然又睇到newsgroup話有野要改， 於是極速改番好佢，再執靚個user manual，都總算做到第二組交~ 上完堂都係做OS份功課，做左7個鐘左右啦…今晚進展唔錯o既都~ |
| 今日下定決心一定要去上大通！足足一個月冇上過啦… 結果較左鬧鐘，醒左，響張床lur左半個鐘先起到身… 上左3個字堂，放左兩個字break，之後繼續上堂又不敵睡魔啦… 今堂最後三個字用黎做課檢…結果有聽到書o既都係得幾個字… 哎呀…點解會咁失敗…我好想精神奕奕咁聽書呀… 晏晝兩堂空堂都用黎做OS功課，進度緩慢… 之後補習，兩個鐘都用黎做maths練習，做黎做去都係果d，都ok悶… 今晚出左沙田食飯，食完行左陣又返lab繼續OS… 做左5粒鐘，進度都比較慢，不過都算係過得去啦~ |
| 本來今朝要去洗衫，但竟然唔知醒…而家洗衫都冇時間，撞鬼… 上完堂tuto…其餘時間都係響lab鋤OS份project… 淨係期間去左睇e-league…CE有份打八強，勁呀~ 今次比上次睇精彩好多~不過可惜入唔到四強…但已經算唔錯啦~ 之後買埋飯繼續返lab做project，今日進度好慢呀… 做到5.幾先返宿，跟住先洗衫…沖完涼食完杯麵，天都光哂啦~ |
| 今日又係project日…晏晝一點起身上左堂tuto， 跟住就一直吽響lab…做左十幾個鐘，總算有d進展啦~ 6點先返宿，沿途望住個天慢慢光… 踏出賤build果陣個天都仲幾黑，返到宿就已經光哂… |
| 起身沖涼之後去組聚，食完飯就繼續去lab做野… 問左tutor好多好多野，原來好多野都要再諗過， 加上突如其來o既莊務，搞到頭都大埋… 之後補習，好似連續兩個禮拜都淨係補maths啦… 晚飯之後繼續去lab，又做到5.幾先返宿啦~ |
| 今朝訓覺時，天已經光哂… 到我起身果陣，太陽已經落山了… 雖然只係訓左9個鐘，唔算太多，不過都係覺得今日時間好短… 做左陣功課就返屋企，夜晚都係做功課… 無啦啦有套《麥兜菠蘿油王子》VCD，即刻拎黎睇~ 係有少少失望，感覺上第一集充實好多… 而且真係好多位都不明所以…果然係好難明… 係之後上網睇番d影評先比較明白d道理… 其實如果真係明到佢講乜，呢套野都應該好有意思~ 今晚同網友吹水，又講到功課問題… 其實到底要做咁多功課，呢樣野係o岩定係錯? 同學覺得做咁多功課，好辛苦，浪費時間，兼顧唔到； dept覺得你要提升競爭力，要train得你tough d… 大家睇法唔同，有冇辦法令大家都滿意? 不過我而家想講o既都唔係呢d… 上年今日，我o既日記回顧緊我大學o既第一個sem… 我o既「預言」當然冇錯，CE人year 2的確係爆忙… 雖然有心理準備，但有時都會有d不知所措… 內心成日責備自己，呢排為左做功課而放棄左莊務， 放棄左朋友，放棄左好多野，我都唔想，但我控制唔到… 唔做功課? 又冇理由丫…但一日到黑都做功課，其實又為乜呢… 雖然做o既野係自己興趣，雖然有時成班friend一齊做又幾開心， 但講真，我真係好羨慕其他系o既同學o既大學生活… 莊務呢家野尤其是令我覺得無助… 我真係唔想放棄，我真係唔想搞到個soc頹左… 但我唔知我可以做得d乜…我要向我lab partner負責呀！ 不過就算我真係放棄自己d功課，我都唔知可以再為個soc做d乜… 老實講，我真係唔好意思叫一直努力趕功課o既莊員做野… 佢地唔自發做莊務的話，我都唔想夾硬踢佢地做啦… 還好CE人都深明year 2之苦，會體諒下我地… 唯有望唔會比左個壞榜樣比下莊啦… 仲有呢排成日都會想做多d有意義o既野，例如搞活動呀甚至做義工之類， 不過自己o既圈子都唔覺有人會做呢d野，我係咪要跳出而家呢個框框呢? 但係…我又未做完功課，堂又走哂，final就到，跳乜鬼丫~ |
| 今日又係瘋狂訓覺日，噚晚5點半先訓，今日5點半先起身， 起身之後上陣網都差唔多係時候食晚飯啦… 今晚出左朗豪坊食飯，行下新商場嘛~ 呢度都有唔少野食架，不過實在太肚餓，求其去左間麵檔食~ 之後兜一兜個商場，個感覺係好多人同埋…成個商場都三尖八角… 跟住去滿記食埋甜品就返中大啦~有機會要黎呢度間UA睇戲~ 返到去見未有野做，去左睇獎門人！做左咁多集我都係第一次睇咋… 不過都係睇左一節就做完，真係可惜… 之後11.幾又再落lab，又係5.幾先返宿， 又係天光哂都未訓，快d過埋呢個禮拜佢啦~ |
| 朝早又昏迷不起…12.9先起身…匆匆起身食個麵就落去上堂啦~ 訓左5個幾鐘，難得今日上果幾堂都冇訓過，值得慶賀~ 今晚繼續做埋果份OS功課，預計今晚完成！ 不過都繼續遇到d阻滯，有d bug de左幾個鐘都唔知發生咩事… 最後做到3點幾，終於叫做完成啦，簡直係壯舉呀，yeah~ 不過黎緊仲有三份功課，繼續努力啦~ |
| 不知不覺到左11月最後一日，我二字頭o既第一個月就咁虛耗左比d功課… 今朝有幸起到身上大通，最後一堂啦，唔係唔上呀? 今次算訓得好少架喇，雖然都唔係太聽得明d謬誤… 但係最後竟然冇放過水，唔知考試會點添… 落左堂即刻趕返宿訓覺，訓到半個鐘都好丫… 之後食完個麵就匆匆落去上堂，不過得4個CE同學響度…連埋自己… 好彩今次professor肯放水，呢堂都唔算枉過~ 然後最後一堂大通tuto，總算無驚無險渡過了~ 跟住補習，終於唔使再面對住d maths啦，好野~ 今晚去左泰源食飯，咦? 乜今次好似冇乜胃口咁…唔通食厭左?! 之後就返中大做lab，一份頹得黎又唔知要做乜o既lab， 幸得高人指點，唔使好耐就搞掂啦，仲爭report要等source~ 做完呢個就執番份OS功課d野，不過今日進度緩慢， 所以少少野都執左兩個幾鐘，之後返到宿怒鋤埋份report， 聽日可以安心開始另一樣功課啦… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |