| 19歲喇~多謝哂今日所有同我講過生日快樂o既朋友~ 真係未試過有咁多人同我講生日快樂~ 最估唔到係有組爸同組mate特登打電話黎同我講，真係多謝哂~ 今年有咩生日願望呢? 似乎都冇乜時間同心機諗… 我諗而家係希望搞好兩個莊囉… 同埋過一個有意義同充實o既year 1生活啦~ 朝早要返中大開系會，好耐未主持過會議， (上次應該係compu club仲做緊chair果陣…) 同埋都未試過咁多人一齊開會，所以都唔係好知點hold… 期間竟然有生日蛋糕食，真係多謝哂班莊員同我慶祝~ 但係都當然難逃被con之劫啦…我都一早預左… 個會開左兩個半鐘都未傾哂d野，夠鐘食飯就唯有散會先， 之後又有語精…我原本唔諗住上，不過下晝冇節目就去坐下啦… 但係都幾悶下…break果陣決定過賤build寫java算… 寫到差唔多夠鐘就返荃灣落樓下，同屋企人食飯慶祝~ 跟住出九龍灣睇戲，去到先發覺冇場， 走左去荷里活，但又要等午夜場…結果都係等到成12.先睇… 今次睇《處男有喜》，都幾好笑，但亦都好三級… 睇完地鐵冇哂，要坐小巴去旺角再飛返屋企… 今日生日都幾充實下呀，同埋都幾開心~ 不過美中不足係…唔可以同佢一齊慶祝生日添… 識左七年，今年都好似係第一次唔係一齊過咋… |
| 今朝約左網友去唱K…當係補祝生日卦… 但係噚晚唔知點解寫完日記之後都唔想訓，hea到4.先訓， 結果今朝就唔知醒…集合時間先起身… 唯有叫佢地唱住先，然後即刻出發… 但係去到竟然唔知碇，響尖咀都唔識路…搵左陣先入到去… 成兩個月冇唱過K喇…今日終於可以唱番夠本喇~ 一開始就整首應景o既《十八相送》，但係嚴重走音… 今日5個人唱足5個鐘，乜都唱夠啦~真係爽~ 出到去4.幾，班人諗住睇三級片(豪情)， 但係我6.幾又要返荃灣食飯，所以都係決定返屋企訓陣… 今晚出去食韓燒~呢幾日都幾好口福~ 食飽飽就返中大…繼續做功課喇… 呢個禮拜都好多功課dead呀…要努力喇… |
| 冇游水堂o既第一個禮拜一，終於可以訓返夠本喇~ 不過都要早d起身去洗衫…但係晾完衫竟然miss左轉堂校巴， 遲左十分鐘先去到上堂… 食完飯再賤標繼續寫java，上完英文堂返黎繼續寫， 終於響食晚飯之前做完份功課，好野~ 夜晚都唔係好得閒，要做書通功課，寫兩篇野， 都寫到成1.先寫完，不過d進度都比想像中快o既… 期間都落左去食野，係一個叫做「月食」o既宿舍活動， 類似自助餐啦，但係d食具就自備，多謝同房借野畀我用~ 基本上呢個活動都係鬥搶，一開始班人就衝埋去， 一黎就掃走哂d正野，我只係食到幾啖飯… 不過免費都算啦…下次要提早排隊同埋要狼死d先得~ 今日晏晝呢…同上年系會P傾開我上兩個莊o既問題， 佢好擔心我又做P又上電台莊會應付唔黎， 尤其是下個sem又多功課系會又多野搞，是但一方面頹做就唔好… 但係我實在太貪心…系會P同電台莊都唔想放棄… 到底我點樣先可以說服到人我有能力應付到呢… 定還是我真係應該放棄電台莊呢… |
| 今日上堂都冇咩特別…係做完lab之後有個細O組聚， 去coffee con歎tea…之後就返宿上陣網， 然後落去sit個UC開放日宣傳部會議… 我今次唔係籌委喇…但係應承左幫手整網頁，所以都黎sit下… 嗯…趁呢排唔係太多野做就快d搞掂佢啦~ 夜晚同ce soc莊員傾到莊員關係o既問題， 原來佢諗呢個莊o既問題仲諗得深入過我… 雖然仲有排都未上莊，但係都要開始搞搞莊員之間o既關係囉… 而家個個d性格都好唔同，要佢地互相接受都唔易… 真係想快d搞下莊員之間o既聯誼活動~ |
| 落信和上完堂之後，要等幾個字先有車上番本部， 冇野做之下去左打乒乓波…d人成日打但我一直都冇打到， 今次終於有機會喇…其實本身都唔多想獻醜， 不過最後都係去左打…好彩班人都唔係勁我好多， 我起碼半年冇打過，打得都比我想像中好~ 冇游水堂o既第一個禮拜三…去左賤build做功課… 其他堂都冇咩事發生，係最後一堂英文堂終於好過d喇… 睇左條片教人present技巧，低B得黎幾有趣，而且都學到d野~ 跟住去買個飯就落番CC開會…校園電台緊急會議… 原來係因為噚晚第一次試做節目，發覺有好多問題出現左， 所以要傾下睇下點樣做好d個節目，都傾左兩粒鐘… 期間都講過話諗住quit莊o既問題，其實佢地都唔想我quit， 但係又好驚諮詢果陣畀人怒插…而家諗緊改做subcom算囉… 散會之後仲同人傾過電台莊其他莊員o既問題… 原來裡面個別莊員同其他人唔係咁夾…噚晚仲出現左不愉快事件… 不過其實呢個莊整體都幾好玩o既，搞到我勁唔想quit囉… 講講下又講到自己個ce soc…勁唔明點解CE人睇落咁頹囉… |
| 今日派返兩份midterm…好緊張呀… 第一份賤數同我expect o既分數一樣，冇咩好講啦…繼續努力囉… 跟住另外一科…之前個個都睇好我，點知就衰左… check左卷都竟然錯埋d低能野…有題做漏一部份冇左十分… 總之下次就唔好發夢喇…響題目間低哂要做o既野先… 原本禮拜四係幾得閒o既，但係突然多左個半鐘補課， 所以輕鬆極都有限…5.半仲要連續上到7點先落堂， 不過神奇地冇訓到，可能係因為個prof怒飛slide囉… 食完飯返宿上網同埋上網…做下資料搜集…關於CE soc囉都係… 嘩…人地CS開會開到癲哂，我地CE就簡單好多， 到底係我地效率高定係人地太認真呢… |
| 朝早上完第一堂即刻去lab，狂做java功課， 最終都趕得切組聚之前交到，又係ceg第一個交，yeah~ 之後書通係講關於音樂…都幾有趣，又係唔需要訓~ 跟住就集齊班中同，一齊返中學幫手做jupas o既sharing~ 諗諗下都有成個半月冇返過中學喇~ 原來學校入口已經改番做原本個位…之前曾經搬左… 去到順便拎番AL張cert…我初初仲以為冇cert拎o既添… 上到去原來得十幾個F.7…人數比我預期中少好多… 首先又係自介一番，跟住吹下讀d乜果d囉… 但係原來d人比較擔心係點樣考好AL…我都冇乜idea添… 傾到5.幾，班F.7就趕住返屋企，之後我地仲響度不斷吹水， 落到樓下見到miss阿sir又吹幾個字，傾到7點先離開學校~ 之後決定一齊去打邊爐，但係行左半個鐘先去到… 任叫任食真係太爽，我地一次過就嗌左十碟肥牛， 但係勁耐都未黎，食到大家飽左一半又突然黎左一堆肥牛， 食到我超飽…差唔多頂到d野食上喉嚨… 成11點先埋單，今餐真係食得非常盡興~ 跟住成班人行下企下，成12點先返到屋企… 返到去一開水喉發覺冇水…原來係出面爆左水喉… 等我仲擔心成班涼冇得沖面都冇得洗… 好彩過左陣又有番水，嚇得我… 沖完涼睇左陣雜誌…仲係飽得好辛苦，網都廢事上就訓左咯… |
| 原本今日網友諗住一齊去踩單車，但係咁唔好彩落雨… 成個朝早都係傾呢件事…最後都係決定搏一搏… 食完午飯就出發，一路搭車d雨都係越落越大， 最後當然係放棄左…去到大圍就坐低傾下做咩好… 結果一傾就傾左成個鐘…都好耐未試過咁頹廢… 決定去淘大打桌球，又有機會探訪下細個成日去o既地方喇~ 響三個人都勁唔識打o既情況下，打左個半鐘先至勉強完左一局… 之後仲響商場度hea下，然後就過海去太古城睇戲… 今次係睇萬眾期待o既matrix，梗係要去d正戲院~ 憑住我僅餘o既記憶，都尚算明白個故事講乜… 套戲點精彩法就唔使講啦~不過係咪仲會有第4集?! 睇完都成10點，跟住仲過觀塘打邊爐…又係連續兩日… 呢間野有啤酒任飲，食食下就畀班未夠秤o既網友狂隊， 響極飽o既情況下隊左幾杯，辛苦到不得了… 跟住搭飛速紅van返荃灣，去到福來村就落車行返屋企， 但係一落車就見架車極速向麗城方向駛去… 返到屋企已經點半，又係沖完涼即刻訓… |
| 朝早起身補寫日記，之後落去買飯食， 然後漫無目的咁上網，跟住出左去飛髮， 剪到個頭都唔係短左好多咁，不過個髮型又有d轉變啦… 返到屋企hea左陣又出去食晚飯喇…好一個頹廢o既禮拜日… 食完去左買衫買褲準備迎接未來幾日o既清涼天氣~ 之後走去揀手機…係超級生日禮物o既其中一份~ 晏晝上網已經睇定部6610，周圍格價都係同一個價錢， 但係間間都冇得分期，最後去左間sunday， 仲要搞一大輪野先買到，搞到今晚11點先返到宿… 嗯…部陪左我兩年半o既6210即將就要告別喇~ 叉好舊電之後，後日就有新機用喇，好野~ |
| 今日又要一早起身洗衫…一出到去已經覺得涼左好多… 洗完訓左陣又再起身晾衫，搞掂d野剛好夠鐘換衫出門口… 日頭冇咩特別啦…放學之後去canteen開系會囉… 今次終於諗到個莊名喇…叫做「CEG+」/「CE之家」， 未必係一個最好o既名…但係既然大家都鍾意，就用呢個啦~ 開到9點左右，比我想像中早啦~ 跟住成班人仲響出面踢毽，踢左幾個字先散水… 講開又講我真係要練下踢毽先得…因為呢個活動係「系技」… 之後返到上宿竟然發覺上唔到網…成晚怒connect都唔得， 功課又冇乜點做到，淨係掛住玩部新電話，浪費左一晚添好似… 期間有網友特登上黎中大…就係為左收購部舊電話… 一落到去即刻覺得超凍，成個人都震哂… 但係都傾左一陣計，真係凍到野都講唔到咁滯… |
| 今朝又比噚日凍多截喇…仲要上早堂，真係勁唔想起身… 跟住幾堂空堂諗住怒做功課，不過實在太麻煩，進度緩慢中… 之後去烽火台影班相，係3年o既CEG人分別影完再黎個大合照， 不過其實人數都唔係好多，我地班都唔多齊人，year 1仲得廿個… 嗯咦…原來我地冇分書院影…就咁一班影兩張就算… 食完飯又響賤build hea左陣，跟住又係做lab， 原本今次有鴻圖狀志諗住早d做哂之後去歎tea， 點知今次做果陣錯埋d白痴野，夠鐘都做唔哂，tea冇得食啦… 做完返lab，跟住成晚都係上網同做功課啦~ |
| 今日只係上左三堂…因為有堂調左， 上完兩堂之後有成四個鐘時間渣攤， 食完飯之後去左賤build做lab， 結果做足三個鐘，d時間真係過得充實… 呢排真係幾得閒，夜晚都係勁上網，再做下d功課咁… 正當我夜晚覺得凍凍地，晚飯又唔係太飽之際， 突然有宿生會莊員送d免費奶茶餅乾過黎，即刻覺得勁幸福~ 飲杯暖暖奶茶當堂成個人暖哂，再加上餅乾填飽個肚，實在太滿足~ 仲諗住今晚早d訓，點知點幾鐘同人研究d功課， 研究完仲煲左陣粥，搞到成3點先訓添… 不過都冇所謂o既…我都好耐冇同人煲過… |
| 朝早上完堂賤數，大家得閒冇野做又去去踢毽， 今次我決定黎個特訓，一踢就踢左大半個鐘， d技術比一開始果陣好好多喇~不過都要繼續練習… 不過似乎今日踢得太激，夜晚對腳抽住痛… 上完堂大通諗住買件檸檬批歎下跟住上tuto， 點知畀人召左落去睇波，compu eng今日踢超聯… 首次踏足嶺南場，果陣草味令我諗起陸運會~ 結果我地贏2:0，原來我地踢波都唔差呀~ 之後上左賤build打機…其實係教人做lab… hea左兩粒鐘先去食飯返宿~ (前兩日上唔到FTP…寫左日記都擺唔到上網… 而家只係用第二個方法connect上部server copy d日記上去…) |
| 噚日睇波走左堂tuto，今朝要補番，要早番一粒鐘起身… 上完堂去賤build交功課同埋hea，之後組聚去飲茶~ 今日個書通完全係上至天文下至地理都講哂， 講講下又不知不覺訓左著…期間唔知講左幾多範o既野… 跟住又過賤build交返份之前交漏左o既功課， 但係去到竟然發覺份功課唔見左…明明朝早仲響度… 懷疑係同朝早交果份疊埋左…希望係啦…我唔想再做多次呀… 之後上UC報名參加個「夜訓」…即係夜晚行山訓練卦… 跟住就返宿hea…直到有人急call我落coffee con開會傾project野… 傾完又要返UC開個夜訓briefing，但係去到竟然發覺冇人， 打去問下原來係改左期，白行左一趟添… 返宿上陣網就落番賤build…去sit個system eng o既咨詢大會… 遲d我地CE soc又有呢d大會…今晚趁得閒就去偷下師啦… 嘩…原來d人真係會問埋哂d刁鑽問題…真係唔易搞… 坐左成粒鐘…之後順便上去探下d做緊lab o既同學， 跟住就返宿洗衫同上網喇… |
| 今日走左去某中學…同該校o既校長會談… 話說上個月UC院慶，我地咪拍左套宣傳片… 有人借左套校服畀人著黎扮美少女， 點知竟然畀果間學校d人話套片影響該校聲譽… 其實件事到而家已經解決左，不過果個校長話想雙方溝通一下， 於是就出現左今日o既會談… 咁當然就唔係得我一個去會談啦…仲有兩個相關人士一齊去o既… 去到間學校o既校務處見到個校長，就一齊入左間會議室… 首先個校長一輪咀講左個situation，跟住就了解下我地整片d野… 最後傾左1粒鐘左右，個會談就響和諧o既氣氛之下結束… 當初拍條片出黎真係諗唔到會發生呢d咁o既野， 仲要院慶已經完左成個月先黎個咁o既會談… 不過呢次事件都畀到我一個好好o既經驗… 下次搞呢d野之前真係要小心d喇… 離開間學校之後我地就去搵節目，行左去又一城搵唔到有咩好食， 於是搭左地鐵去旺角…逛左陣街之後決定去唱K~ 去到發覺竟然係tea(當時只係1點)，但係又未食飯， 而且要等半個鐘先有位，所以去左M記食件包先… 今次係第一次同大學o既同學唱K，不過我冇諗到係同佢地~ 唱到要自己嗌埋單先走…而且得3個人唱，夠哂喉啦~ 跟住返屋企食晚飯啦~又有兩個禮拜冇返過屋企食喇~ 夜d又有網友約我出荃灣食宵，我淨係食左個碗仔翅… 之後仲去公園食雪糕…hea到12.幾先返屋企… |
| 朝早落左樓下飲茶，跟住返屋企訓左陣覺， 然後上左陣網就返宿做個英文project o既powerpoint， 但係效率奇差…成個下晝先做得幾版… 跟住出返九龍食晚飯，今餐食蘇杭菜， 除左個別員工服務態度極有問題之外，d野食基本上都唔錯o既~ 食飽就返宿繼續搞個project喇，總算整左十幾張slide出黎… |
| 似乎呢排我o既心情都會畀天氣影響到… 今日成日都天陰…仲落住微雨…心情好似都沉重左d咁… 原本今日約左班莊員去食宵，不過呢個又唔去，果個又唔去， 結果竟然搞唔成…估唔到想食左宵都咁難約…都幾失望… 今日上最後一次第11堂做lab喇…應該以後都冇機會上啦… 同人食完個tea就上去準備，都已經係早左幾個字， 但係上到去已經勁多人響度，而且冇機用… 吽左幾個字先有機用，不過最後有冇機用其實冇關係… dem完個lab就去食飯…順便同外副傾下莊d野， 講講下佢竟然話唔想做…唔通真係個個都唔想上莊? 返到宿就趕份英文project，總算完成左個powerpoint… 對住兩個渣哂攤o既partner…都真係幾辛苦… 呢個sem仲有兩個禮拜就完左…睇黎呢兩個禮拜將會幾忙… 又要做英文project，又有4份功課等住交， 其中一份java功課係寫隻踩地雷出黎，睇黎都有排寫… 上個禮拜唔見左果份功課…今日搵返喇… 原來有同學借左黎睇…之前部計數機又係咁樣以為唔見左… |
| 噚晚太夜訓，一早去上堂早堂簡直係行屍走肉… 仲要今日成堂都講返上個禮拜講過o既野…好後悔上左呢堂… 上完之後行屍走肉咁去左賤build， 教完人做lab就自己砌java，一個上晝轉眼就過左… 今日係最後一堂做lab喇，雖然下個sem都仲要做… 原本今次我同個partner都要早走，所以做得勁趕… 期間熔緊d鐵，突然一個唔小心飛左d碎片落隻手度， 即刻激痛…搵水沖完發覺個位黑左一粒…希望冇事啦… 要早走係因為英文course要搵個阿sir做counselling… 但係去到竟然發現佢唔響度…白行一趟添又… 結果係兩個都唔使早走…安心咁做埋個lab佢喇… 做完返宿怒做功課…總算差唔多做完一樣喇… 仲有好多份等住我做呀~聽晚又唔多得閒做… |
| 今日英文堂要present個project，晏晝想搵d時間黎rehearsal， 不過最後都係冇時間，結果都係要自由發揮… 轉眼就去到第十堂…3個人要present廿分鐘野，都唔係簡單… 結果都OK啦，仲overrun左少少…個阿sir話我地有進步… 不過最後佢無啦啦同我地講唔好意思， 話佢一上堂果陣發爛渣(咁佢的確係黑左面)… 最後仲同我地握手…我地即刻滴哂汗囉… 食完飯之後返宿上陣網，跟住就去個briefing， 係講禮拜六參加o既「夜訓」活動… 原來佢係分左幾組黎玩遊戲，我地果組d人唔見哂， 得個莊員同埋大陸黎exchange o既…可以練下d普通話喇… 同埋係因為唔見人o既關係…我竟然被選左做組長… 睇黎呢個活動都將會幾刺激，幾多野玩… 但係要準備勁多野…都唔知去邊度搵d野返黎… 完左個briefing就極速跑落賤build，因為系會搞糖水會… 我因為嚴重遲到…畀人勁催…用左7分鐘時間跑左落去… 上到去只見班人響度鋤緊d…我就梗係整番杯西米露先啦~ 大家玩完之後我就響lab繼續做java， 隻踩地雷完成得8899喇…但係竟然發現CS有人已經交左！ 仲諗住今次實可以第一個交添…認真飲恨… 最後都搞到成1點先返宿…做得咁趕都冇用啦… |
| 而家每個禮拜四都變成運動日…上個禮拜怒踢毽， 今日就怒打乒乓波，而且一打就打左成個鐘， 打到大汗dup細汗，仲要個身成陣味… 轉眼間今日係尾二一堂上中國文明o既大通喇， 上上下堂仲要做課檢…諗諗下其實讀呢個course都幾幸福丫… 話就話自己抄notes係辛苦d…但係乜野功課都冇， 個professor有料得黎講野又夠搞笑，呢兩分都抵賺丫~ 今晚仲以為好得閒，點知發覺冇乜時間用… 首先係講左好多個電話啦…成晚個電話都要擺響自己張檯度… 跟住又掛住同人ICQ啦~簡直成晚傾唔停~ 而且仲可以同個今日先add…某同學o既女友傾左陣計，都幾奇怪~ 仲要洗衫呢…竟然用哂d洗衣粉…要去問其他人借… 啊…連續幾晚都係3點先訓添…聽晚一定要好好訓番夠本喇~ |
| 今日組聚真係超失敗，一個二個都話唔得閒， 約得3個人去，仲要一個遲到，十足十第一日開學飯咁… 出到去聽到有人響度唱歌唱到勁大聲， 原來係何韻詩黎左中大獻唱，於是企響度睇到上書通先走~ 呢次書通講哲學與人生，完全比到我充足睡眠o既機會~ 放學之後同幾個一齊去「夜訓」o既中同一齊出沙田掃貨， 買番d野準備聽日o既活動…一開始係純粹行下街， 行左個幾鐘先真正買野，期間仲落左KFC食tea(我當左係晚餐…)， 跟住先上百佳買埋水果d野，捧埋d野返宿都8.幾… 上陣網之後諗住過賤build sit下CS個諮詢大會， 但係有同學叫我去lab傾d野，最後都冇sit到… 原來係傾關於CE soc新莊同舊莊之間o既問題… 我都冇諗到件事可以搞到咁嚴重添… 希望可以盡早搞掂大家o既關係啦… 響lab一路傾一路教做功課，結果傾到11.半先走， 第一次夜媽媽自己一個人行小橋流水… 返到屋企沖完涼，執好聽日「夜訓」o既野， 就即刻訓醒，準備聽晚通宵行山之旅… |
| 今日就係「夜訓」o既大日子，所謂「夜訓」其實即係「響夜晚訓練」~ 咁所以一定就要有充足睡眠…朝早訓到11點先起身… 食完飯再執好野，就出發返宿再拎埋噚日買落o既野… 上到宿距離集合時間淨番20分鐘，但係一路執先發現個袋唔夠位… 我噚日借到個睡袋黎用，但係原來佢佔左好大空間… 結果用盡九牛二虎之力先至塞哂d野入去…爭d miss左校巴… 集合哂齊人之後就搭巴士去馬鞍山，跟住就有d導師出現左， 原來每組都有兩個導師跟住行，都幾照顧周到喎~ 跟住就派今晚o既晚餐…然後約略講解下就開始出發喇… 去到個亭首先玩d超頹o既ice-breaking game， 之後教下地圖同指南針點用就真正開始行喇… 每行一段路都要搵個人做leader，講下點樣行先o岩， 但係沿途勁多分叉路，要行o岩路都唔係咁容易架… 仲要行行下就開始天黑，估唔到電筒咁快要出動… 行左近3個鐘，終於去到目的地，一個勁多牛屎o既營地… 跟住落黎o既活動係「原野烹飪」，首先要做o既就係執柴， 然後就批皮準備生火，雖然係用打火機，不過要攤著都唔易… 而且要怒加柴入去先得，我大大話話都執左十幾次柴… 跟住整野食仲騎哩，批左個橙出黎食左d肉，裡面要黎燉蛋… 除此之外，晚餐仲有未熟o既薯仔同埋提子包， 加埋用把批過柴o既萬用刀…挖出黎食o既竹筒飯…真係別有一番風味… 執好d垃圾之後就玩下一個遊戲，係黑夜定向， 兩個人拎住支電筒走去搵checkpoint，都幾刺激好玩~ 等埋其他組返哂黎之後就玩solo walk， 即係一個人自己行一段路，仲要係唔拎電筒果隻… 唔知點解雖然視線範圍之內完全見唔到人， 但係完全都冇驚o既感覺，仲覺得好悠遊自在~ 最後就去到一個草地玩「野外獨處」， 即係每個人各自響一個見唔到人o既地方吽幾粒鐘… 我就打手機裡面隻game，打到悶就食d野訓… 嗯…帶左個睡袋黎真係超正~暖到不得了…但係唔係好訓得著… 突然望見成個天都係星，個感覺好正~ 不知不覺間就進入夢鄉… |
| 突然之間畀人叫醒，原來又要出發喇…我訓左一個鐘咋… 一離開個睡袋即刻勁凍，要笠番件褸保暖… 大家矇矇矓矓咁拎住支電筒行，目的地係上某座山睇日出~ 今次又係要分段搵leader帶路，周圍黑媽媽真係仲難搵… 我做leader果段仲要畀個地圖fake左，停左勁耐先搵到checkpoint… 結果由2.半行到6點，終於去到最後一個checkpoint喇， 大家坐低hea左陣，直到個天都光哂先行上座山… 今日唔知點解d能見度極低，加上又多雲，梗係乜野都見唔到啦… 最後影左幾張大合照就落番山啦，沿途都幾驚碌落山… 跟住再行多個幾鐘落斜，先至去到清水灣道終點… 期間雖然係落斜，對腳都[支力]到想死… 最後大家坐低檢討一下成個活動，呢個「夜訓」活動正式完結喇~~ 估唔到呢個活動可以學到咁多野呢…例如d原野烹飪o既技巧… 同埋節目都好豐富呀，簡直係玩唔停，好正呀~ 仲有識到幾個組mate囉…有一個原來係住埋同一層宿呢… 搭返車返麗城，首先係落左去飲茶， 然後就係歷史性時刻…第一次去投票！ 一開始已經諗好投邊個，所以都冇乜特別感覺啦… 但係之前都唔係好清楚投票個步驟，所以都耐左少少… 跟住返屋企補寫返d日記，再上下網，執下野咁， 然後訓左幾個鐘晏覺，再食完晚飯就返宿喇… 做下功課上下網又3點喇…仲想今晚又早d訓添… |
| 今日都係幾特別o既一日，第一次響中大食足五餐， 第一次同一日逆走小橋流水兩次，第一次響中大見到咁多星… 食完午飯打陣乒乓波之後諗住搭車上賤build， 但係竟然滿座…結果就逆走小橋流水…估唔到行完山之後果日都要行… 晏晝上完英文之後去左食tea，跟住過賤build上陣網， 仲以為堂programming唔使quiz，但原來仲有一次，好彩冇miss到… quiz完就落CC準備傾聽晚校園電台直播節目~ 今次我有份做主持呀~聽晚9點正播呀~ 但係去到吽左幾個字都入唔到去，d人o既電話打極都唔通， 原來佢地落左樓下coffee shop食野，電話就冇哂電… 我都係第一次黎呢間coffee shop，仲買左件超貴o既panini(?)， 因為之後都冇機會食飯…貴都要食啦…不過都幾好食o既~ 食完之後就開始傾個題目…原本係諗住講玩人/被玩趣事， 但係發覺冇乜貨(原來我都冇乜點畀人玩o既趣事)， 最後傾傾下個題目變左「親親大自然」… 都應該幾多野講下架，希望聽晚節目順利啦~~ 傾完哂野都已經成1點，然後過左隔離房仲有人摟傾計， 一傾就半個鐘，跟住先慢慢行番宿…又係逆走小橋流水… 小弟身為一位男士又點可以由得一個女仔捧住d重野返shaw呢? 兩個一路傾野一路慢慢行，用左半粒鐘先去到shaw… 沿途望下個天見到滿天繁星，估唔到中大都見到咁多呢~ 結果我2點半返到湯宿，沖完涼，食個杯麵，搞埋d野， 3.半都未訓到…聽朝8.半早堂… |
| 今朝勁辛苦…又唔夠訓，又要上早堂，勁行屍走肉feel… 食完晏一齊去上最後一堂programming…我已經好耐冇上過果堂… 不過個professor仍然死性不改…如果仲有下堂我都唔會再上… 跟住又係最後一次做lab，結果搞到今日好似last day咁， 拎住部DC怒影，幾堂就影左幾十張相，勁好玩~ 今次個lab其實淨係要dem件project畀d tutor睇， 明明上次都冇問題，點知今次唔知點解有故障， 仲整爆哂人地d摩打…check左兩個鐘最後發現駁多左條線… 一條線就浪費左我地咁多時間，真係超無奈… dem完仲要答問題，幾驚唔識答…好彩我要答d野超頹~ 搞掂哂d野就落番CC，準備今晚校園電台直播！ 去到差唔多6點啦…距離直播時間仲有3個鐘… 首先拎住份稿試下傾一傾，total傾左兩次啦， 之後已經差唔多夠鐘，就放鬆心情準備節目喇~ 話就話放鬆，其實臨開始果兩分鐘真係緊張到震哂囉… 不過好彩開始之後都傾得唔錯，除左一個環節underrun左少少， 好彩都完全冇dead air，比我想像中好好多喇~ 嗯…雖然只係一個鐘o既節目，但係原來真係唔易做囉… 由噚晚開始傾野到個節目完之間呢廿幾個鐘，都體會到幾多野~ 唉~最衰做左CE soc P冇上到電台莊，如果唔係仲可以學到多d野~ 之後返到宿10.幾，諗住今晚有好多時間可以用， 但係發覺對住部電腦…d時間真係可以消耗得極快… 跟住又同組爸…即係CE soc現莊莊員傾左半粒鐘電話… 嗯…原來好多野係可以響自己想像之外囉… 之前好多唔明白同疑惑o既地方…都開始領略到喇… |
| 最後一堂陸續有黎喇，有3堂都係今日有last堂， 不過朝早堂circuit就冇咩特別，跟住另外一堂就教埋d奇怪野… 係最後英文堂就有雪糕大會，每人一件免費雪糕，正~ 跟住返宿做功課，然後8.幾同網友出去食飯… 首先又兜左個圈，跟住搭巴士去禾輋大排檔食， d野食都唔錯，食完又隊左幾罐先返去~ 返到宿都已經過12點，好彩d功課都應該做得切o既~ |
| 今日最後一日上堂喇…聽日淨係上月會同書通~ 食完午飯又走左去踢毽，今次幾多人踢， 仲踢到隻毽上瓦遮頭，搞左好耐先執得返，不過都幾搞笑~ 夜晚食完飯去左開個「聯合日」宣傳部會議，我唔知點解做左部員… 呢個活動係包括個開放日同個camp，係對外開放o既活動黎架~ 其實我主要負責整個網頁，未來呢個禮拜都要努力整喇~ 開會期間有堆三文治擺響度免費任食，好似話係院長茶敘淨低… 雖然我已經食飽飯…但都唔知點解忍唔住怒食，真係好正~ 返到宿，退番d之前夜訓o既按金，期間見到堆人響hall門口排隊， 原來每個月一次o既「月食」又黎喇…我完全唔記得左添… 但係我冇準備之餘又勁想去toilet，所以都冇理到… 不過去完返黎竟然見到個同房拎左大堆野食返黎， 有炒麵、曲奇、薯片、仲有pizza！大家都食到超飽~ 今晚有咁多免費野食，實在太有口福喇~早知唔食晚飯啦~~ 夜晚做完功課(今個禮拜dead果d)，終於可以輕鬆返晚喇~ 話咁快就過左一個sem，係時候回顧一下喇~ 雖然話時間過得好快，但係呢3個月真係發生過好多野… open day…住宿…游水…做lab…院慶…上莊…校園電台… 檸檬批…食宵…響lab打機…踢毽…乒乓波…happy con…夜訓… 每一樣都帶畀我一d難忘o既回憶…呢個sem真係超正~~~ 不過聽講CE人year 2就會爆忙，所以要好好珍惜埋下個sem喇~ |
| 今朝11點先起身，因為原本堂lecture已經教哂書，唔使上~ 但係反而要去上月會，不過響UC上，行兩分鐘就到… 月會題目係關於無線PDA，係d交流計劃d學生present， 雖然成個talk都係用英文講，但係都OK有趣o既~ 完左之後趕去UC Can食飯準備跟住上last堂書通… 去到唔知點解果度變左中學生飯堂，差d搵唔到位… 今堂書通講環保，仲講到話呢堂可能係最有啟發性o既一堂， 結果完全覺得佢講廢話，但係又衰在訓極都訓唔著… 完左之後成組大O一齊影番幾張合照， 準備send畀仲響日本讀緊書o既組媽~ 跟住過賤build諗住交功課，但係最後都入左lab， 都係上下網溫少少書咁囉，一搞就搞左兩個鐘… 之後返宿開始掂下個英文project，禮拜一dead喇… 然後就返屋企…落樓下打邊爐…正！ 響屋企訓番晚，聽日又要返中大趕埋份project喇… |
| 響屋企食完午飯，就搭車返宿趕project喇… 進度比我想像中好，幾個鐘就整夠十版出黎~ 跟住有網友黎探訪，仲劫埋我部機，成11點先走… 之後執埋個project，仲想開始做lab report，不過都做唔到幾多… 嗯…考試期開始，日記又開始一段起，兩段止喇… 16號先考完所有試，努力啦~之後就大玩特玩喇~~ |
| 今日都係冇咩特別野做呀…大部份時間都係吽響宿， 做個lab report囉…效率好慢呀…幾個鐘先做完一個unit， 仲有成5個unit，雖然話十幾號先dead o者，都唔係要咁搞法呀? 做做下都唔想做，渣哂攤，咁就一個下午喇… 夜晚出返荃灣…去新開果間green box唱K~ 響宿出發之前落賤build諗住印英文project…聽日dead… 點知去到login左先醒起我未upload個file…勁白痴… 唯有聽朝再去過印囉…當我咁o岩經過賤build囉… 一路行，沿途見到好多人著哂畢業袍影相呀~ 到時同d親朋戚友一齊黎中大影相，一定好感動~ 雖然好似未有耐先畢業，但係其實兩年好快就過， 話咁快就已經一個sem啦，都唔係咁捨得呀~ 講番唱K先，我差唔多成日都冇講過野， 所以一開始勁唱唔到歌，後尾先好番D… 呢度畀10蚊就可以任叫d晚餐黎食，我本身唔係好肚餓， 但係竟然最後食左四個半晚餐，食完都唔係好飽… 唱到成10點就搭車返宿，繼續搞個project喇(雖然都搞唔到幾多)… |
| 2001 | 6 | 7 | 8 | 9 | 10 | 11 | 12 | 月 | |||||
| 2002 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2003 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2004 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2005 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2006 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |
| 2007 | 1 | 2 | 3 | 4 | 5 | 6 | 7 | 8 | 9 | 10 | 11 | 12 | 月 |