年月 日　

10月1日

10月啦~國慶啦~不過都同我冇乜關係…
今朝起身食個麵準備去補習，點知個阿媽打黎問我做咩今日補…
我本來噚日補，但千人宴嘛…同個細路講今日補，佢都冇問題…
個阿媽仲話咩禮拜六日係休息日…ok that's fine…做下自己野囉…
點知轉個頭又打黎話個仔下個禮拜測驗，叫我盡快黎…well…

計返校巴時間出門口，行左一陣深感不妙，
唔記得今日公眾假期，時間表唔同左…要等多兩個字先有車…
不過其實仲好，有十一苑車，勁近呀~
好彩有呢個站咋…去三四苑上車實上唔到車…勁多人…

補完習返屋企hea陣，就出愉景食飯，慶祝阿公生日~
我黎之前勁肚餓，今餐當然係盡興而歸啦~
咁o岩隔離就係婚宴o既門口，我地都順便祝賀下對新人…

10月2日

今日怒訓啦…點幾鐘先起身…
之後本來都幾多野要做，但都冇樣做得好…
夜晚返宿，仲要捧住部主機，好重呀…
因為有同學睇中左我細佬部舊電腦，結果要拎返去中大…

返宿hea一hea就上左UC果邊睇下拍片…
本來唔係我負責，但d負責人都唔響度，結果竟然變成我做…
但hea一大輪先開始，期間執下塊banner design啦…
仲以為之前拍片工作都幾順利，點知原來好多野都未傾，
差唔多12點先開始拍…幸好今晚都唔算拍好耐…
之後要開始剪片啦，努力吧…

10月3日

噚晚做野做到5點幾，一訓就已經決定今朝走早堂…
之後晏晝d堂都冇訓到覺，抵返哂啦~
今晚本來要開始剪片，結果放棄左做功課，
但d帶遲遲都唔到，最後決定出去食飯先~

今日無啦啦有網友約食飯，諗住吹下水都好~
哇~原來咁即興都約到6個人出黎，勁呀~
去左間好普通o既餐廳，個麵都幾好食~
之後hea一陣，去左打鼓，爭d冇得打…

玩完返到中大，都仲未有得剪片…
最後到2點幾先拎到d帶…well…聽日繼續啦…

10月4日

今日上完兩堂之後就去左剪片…不過阻滯重重，做左好耐先有d起色…
其實都冇咩好寫…第一次留響UC學生會室咁耐…寫日記果陣都仲做緊…
差唔多15個鐘…都未夠以前響lab咁耐o既…
間房由兩個人…變成好多個人…最後又淨返我一個…
又天光到天黑…就黎又天光啦…令我諗起果陣畫maya…

10月5日

6點半先訓…只係走左一堂，算好好了…
上tuto極速教maya，雖然好急，但都好過冇…
上個sem做功課都冇人教，盲摸摸咁做…浪費哂d時間…
跟住準備見FYP老細…其實我今個禮拜冇做到d乜…
之前果組比老細「省」…幸好我地冇乜事…
唔知點解佢好鍾意同我地亂吹一通，但次次都係講果d野…

之後補完習乖乖地返lab做功課了…禮拜五dead啦…
本來要開院慶會，但都唯有放棄啦…
其實我都唔知點handle時間好，全部野都撞鬼哂…
最大問題都係唔好意思掟低d功課比哂partner做，
之前兩日我都頹左了…

10月6日

今日繼續落lab做功課，總算叫做完啦…
期間又去coffee con食tea，呢排真係食得唔少~
之後補習…補少一個都算，仲要無啦啦比人訓話，
個老豆用電話叫我…唔好比個仔補習時傾電話…
講真佢幾乎未見過佢傾電話，真係莫名其妙…

補完習，唔知做乜好，本來好似好多野做，
最後決定咩都唔做，做下自己野算啦…

10月7日

今朝落左去本部幫手做院慶宣傳…今日都幾多人幫手呀…
不過大部份都唔係熟人，冇咁好玩…希望之後好d啦~
最好玩係撞到shawlane班人囉…又成功包圍佢地~

之後落lab準備dem功課，估唔到頹成咁…
等上FYP…響lab做功課…唔想計數呀…
跟住上UC聽人present…第一組終於開始了…
個題目好怪雞，結果Q&A時間引起大量「討論」…
弊啦…似乎呢幾組都有插人o既傾向…我地仲係last果組…

跟住又去補習啦，唉…我都唔想拖咁多日…冇辦法…
補習終於可以返屋企食餐住家飯啦~yo~

10月8日

今日休息一天…去左唱K~
d新歌勁唔識唱…所以夜晚都要怒download返d歌…
夜晚好鬼眼訓…訓左個幾鐘「晏」覺…好頹廢~

10月9日

禮拜日又怒訓啦~3點先食第一餐…
但轉個頭又食下一餐啦…出左旺角食pizza…
其實係中學校友會個P搵我去傾莊…
去到爭d以為自己去錯地方…十個有九個都唔識…
唉~自己做果兩屆都冇人黎，我係咪應該去呢其實…

講真我事前冇乜準備，可以講o既都唔係太多…
不過我相信一個莊要搞得成功，淨係靠一兩個人一定唔得囉…
上左兩年莊…其實都經歷左幾多野…識左唔少人…
但我有冇因為搞舊生會而成長過呢…

之後同阿媽去食飯就返中大啦…又要做院慶野啦~
終於出newsgroup啦，我o既傑作終於有得出街啦~唔知反應點呢…
可惜之後有野做要早走，好多野都幫唔到手添…

10月10日

訓左五個鐘…都撐住去上早堂…目的只有一個…搵source…
又係一堆明條問題問乜，但唔知用乜野方法答o既題目…
估唔到year 3仲有咁樣一排過抄source的景象…

晏晝想落去搵地理系o既tutor問下FYP d野，點知摸門釘，
本來摸門釘呢樣野都經常發生，但如果係要來回賤build同CC，
就真係唔係一件好受o既事…同埋都幾熱下…

聽日重陽放假，但今晚唔返去啦…
夜晚主要都係hea下，未來幾日又要發奮啦…

10月11日

今日重陽節假期，但都晨咁早起身，唔係為左拜山，
而係做FYP d野…又落去CC搵個tutor…
噚日不幸摸門釘，今日仲衰，成幢野鎖鬼左…
好彩最後問到人後門密碼，但都要兜左成個圈先知後門響邊…

上到去好彩個tutor響度，比左份notes我，教左d野咁啦~
哇，我都未試過同個大陸tutor講咁多野…仲要係唔識聽廣東話果隻…
跟住就上lab做功課啦，寫game份project要畫公仔啦~
自知技術差，都係畫下d場景…樹呀石頭算啦…

出去補完習返中大食飯，乜can都閂，結果去左shaw can~都ok喎…
之後上人地宿打左陣winning…慘敗…
跟住竄返落lab繼續畫公仔…同做下其他野咁啦~

10月12日

今日又係上堂日…見老細日…都冇咩特別啦…
上完堂返lab，見到新莊傾莊，哇，好少人咁喎似乎…
現莊頹成咁，我地老鬼都忍唔住贈返新莊幾句…
希望新莊做得好好睇睇啦，尤其是送舊…哈哈~

食完飯返宿擺低野就上UC練舞…準備院慶開幕禮~
果首所謂斧頭舞…d舞步好怪雞，而且好難記…
練左成兩個鐘，都記得下o既…
之後落SU房做下電腦野，返到宿12點o者~

10月13日

今朝一早就出左去，都係院慶野…
今日幫手搞個宣傳活動，要拎兩架單車去百萬大道，
而且果兩架係家庭式單車…所以要幾個人幫手…
齊人就搭車去馬鞍山，個新單車公園真係幾偏僻下…
跟住就幾個人又踩又推咁將兩架車送去中大…

呢隻單車我印象中真係未踩過，好似仲難控制過普通單車…
不過無啦啦可以享受下踩單車o既樂趣，都唔錯丫~
但最辛苦就係返到中大之後…猛推車先上到本部…
我相信我係史上第一個坐住家庭式單車過賤橋o既人~
跟住o既時間都係幫手宣傳啦~周圍兜下載下人咁…
宣傳效果應該都ok o既…不過百萬大道都係冇想像中咁多人…

之後出去補習，然後返中大繼續院慶…
聽日開幕禮，今日要去綵排啦~
都係怒跳果隻舞，由UC跳到烽火台，
雖然好累，但都越跳越high~yo~
練到11.幾都要走啦…仲要返宿做野…

10月14日

今日係UC院慶開幕禮大日子，11點就落左本部standby~
不過落到去除左好多旗海之外，一個OC都見唔到…
之後就慢慢有人黎到…然後就慢慢做綵排~
今日好熱呀…仲要著住件黑色OC衫，仲要冇食過野，
其實都好辛苦…仲要走黎走去…乜都要搞呢…

不過辛苦都當然係值得~今年開幕禮真係幾好~
唔理外間反應先啦~自己都好enjoy每一part~
比起兩年前果隻舞，今年果隻難好多~但更加好玩~
之後係咁影相之後先散水，當然要執返d野走啦…

搞完個開幕禮，累死之餘成身都濕哂，
當然要去lab hea下涼下先~仲要等上UCFYP…
今次呢組講BL漫畫，我覺得比上個禮拜果個好好多~
但係竟然比上組o既人怒插…唉…BA人…

之後去人地宿hea陣就去準備下個禮拜宣傳活動…
什麼街頭賣藝…今晚主要都係練武…光輝聯合拳，哈哈~
到時仲要打鑼打鼓，唔知仲有冇咩可以玩呢~

10月15日

今日出左去睇《童夢奇緣》…果然係睇到喊…
有好多情節都觸動到我…其實都已經忍住忍住…
聽講話有d場有8成人喊…但我呢場睇都好少人…
如果真係咁多人喊，相信我都會喊哂咁離場…

之後返屋企怒訓晏覺，爽呀~
禮拜六日都要休息下啦…

10月16日

今日日間都係hea下抖下，夜晚食完飯就返中大搏殺啦…
其實都係做院慶野…首先去烽火台綵排聽日宣傳…
跳左陣舞都完左…因為係其實我遲到…
跟住幫手搬返d野上UC，然後就去cap返開幕禮條片~

但部機不時比人用左，結果冇野做就幫下手cut banner…
其實係塊梯畫…要將塊banner切開廿塊之後逐級貼上去…
之後cap cap下片，又比人召左去幫手dem game…
什麼飛機欖大激鬥…其實我只係負責夾「飛機欖」…
但夾得黎又要避免人地踩爆綁住腳o既氣球，好鬼累…

dem完之後條片都cap完啦，於是去幫手貼banner啦…
但唔知點解今日冇叫人幫手，都係得d P同VP做野…
塊banner大到死，貼一級都要幾個字，
5,6個人去做…結果都做到5.半先做完…哇…

10月17日

6.幾先訓，夾硬起身上9.半堂都冇乜意思，
索性一起身就搞院慶啦~落去百萬大道宣傳啦~
今日o既活動係街頭賣藝…當然係得啖笑果隻啦…
我就淨係負責打鑼打鼓，仲有碎大石吞劍就唔輪到我啦~

雖然應該有好多人經過，但一直都冇乜人駐足觀賞…
d表演其實就冇難度架喇，但個人認為娛樂性十足，
我諗中大d人都係太忙啦，連幾分鐘o既免費show都懶得睇…
其實都係當自娛就算啦~宣傳效果都有o既~

跟住上堂…上到幾乎等如冇上…晏d又要出去補習啦…
夜晚都係響lab做下功課咁啦…進度緩慢…

10月18日

今日上得兩堂…之後又去lab做野啦…
然後又要補習…個細路唔知測驗定考試…幫佢溫下啦…
跟住去書店hea下…就出旺角…今晚同網友食飯~
去左「珊瑚咖啡閣」(即係大家樂…)打邊爐~順便同人慶祝生日~

大家樂要搵10個位真係有點難度…都要等半個鐘…
不過都值得~42蚊食得好飽~
跟住仲去滿記食甜品，返到中大冇校巴啦…
行環迴路返宿…累死…好彩都有個伴…

10月19日

今日本來day-off，但都要早d返lab做野…
上完tuto又要準備見老細，今日有d野dem下啦~
不過事前準備不足，gap gap地，不過算啦…

今晚約左班year 1同3食餐飯，認識下對方…
之前幾乎冇活動係兩個year o既人都有去…
佢地都總算成哂莊啦，都叫做好彩…哈哈~
呢餐都比我想像中多人去…雖然氣氛唔知點咁~
其實事前都冇咩準備過，結果都係好似傾莊咁…
都係果句…希望佢地唔好好似現莊咁頹啦~

10月20日

今日最後一日院慶宣傳啦~再度加演街頭賣藝~
今次雖然我地少左人去，但反而多左觀眾欣賞…
之後就返lab開始做另一份功課啦…但結果變左重裝linux…
跟住出去補習，補完就趕返中大睇shawlane啦~

三年shawlane，今年係最唔期待o既一次…都係嘉賓問題啦…
去到首先擦餐飽先，今次唔係好屈到野食添…都要自己買…
食飽飽就去睇show…唉~比人fake左話有人黎，結果一個都冇…
後尾先至搵到其他人一齊，如果唔係我應該返宿啦…

估唔到李龍基原來係最掂果個嘉賓，purple姐姐都ok~
其他什麼葉宇澄…李逸朗就真係冇乜睇頭，免費show就算啦~
睇完返宿放低野就再出發…院慶宣傳部食宵慶功！

同人一齊行環迴路落火車站，原來呢條路線都唔錯架喎~
等左一大輪終於齊人，浩浩蕩蕩咁去泰源啦~
廿幾人坐埋一檯我都係第一次見，好熱鬧呀~
今次又玩返久違o既猜枚啦，好正呀~
玩到兩點幾就走啦，都未夠前年咁癲…不過都好開心~

完左食宵，所有宣傳活動亦都完左，宣傳部都曲終人散啦…
其實聽晚仲有食宵，不過黎唔到…
雖然有段時間院慶同其他活動撞哂時間，
雖然都係未算同d人好熟，但總算冇後悔玩院慶o既~
如果比較兩年…都係差唔多啦~前年有新奇感d囉…

10月21日

今日都幾忙碌下…訓左4個鐘就要起身落去上assembly…
是日院慶大日子，又係一堆致辭同頒獎啦，可以安睡了…
之後生日會，但要山長水遠先食到件蛋糕，都係免啦…
而且我食完飯都趕住返lab做功課，半抄半做咁做完啦…

做完冇耐又要去上UCFYP啦，終於見返之前通頂貼o既梯畫啦~
今堂簡直係上緊stat堂，完全唔知d term係點…
要分析有上莊有住宿o既人係咪去多左食宵…使唔使咁複雜呢…
今次竟然比prof喝停唔比問咁多問題…我仲有野想問呢…

之後返宿hea下又要出去，又係去傾份project…
唉…仲有一堆野要加要改，真係唔知要拖到幾時…仲有份尾數…
真係唔明點解唔可以搵日大家坐低開個會…
算啦…傾完d野都返屋企食飯啦…
本來今晚係UC千人宴，但我都無緣去啦…

10月22日

禮拜六又係休息日…食完晏去飛個髮先…
嘩…今次剪到唔知想點…我相信我今年之內都唔需要再飛髮…
跟住又開工啦，一次過清哂噚晚傾o既野啦…唔好煩喇…
至於溫書…今日頹左添…聽日要努力啦~下個禮拜有兩個midterm…

10月23日

今日都係溫書日…真係冇咩值得寫~
夜晚返中大，涼左好多啦…秋天終於黎啦…
呢種秋天o既氣息…次次都比到種奇怪o既感覺我…

10月24日

今日係midterm日…起左身就落lab溫書…
唔知點解而家midterm大家都咁認真溫書…因為final year?
今次比用一張貓紙，又要想盡辦法將成疊notes塞哂入去…
但最後發覺都係浪費時間同手力…得兩條式用得著…

考完都冇得休息，因為聽日又有第二科…
不過今晚成班人去中菜廳食飯，總算可以輕鬆下啦…
響lab溫到搭尾班車返宿再溫…真係final都冇咁勤力…

10月25日

又黎多個midterm，今次係落機做，好緊張呀~
其實都係睇code做卷，唔係自己寫program，都好…唔使比人屈機…
呢科講實Q，其實真係幾有趣…如果對hack人有興趣的話…
考完之後都唔使抖就直落做功課…又係同一科，真係nonstop…

呢份功課因為要做d竊取資料o既野，所以局住落樓下實Q lab做…
嘩…呢個lab簡直同9樓果個係天堂地獄o既分別…
呢間房冇窗又焗，d機又舊，響度d人又唔熟，真係可以幾個鐘唔講野…

10月26日

今日去左上堂啦…好似好耐冇上過咁…
晏晝唔使見老細，總算有時間去食返個tea…
上完堂又出去補習啦，之後又努力做功課…
唉…竟然因為一部機上唔到網，而浪費左一個鐘時間…
今晚做淨一part，要自己諗一個program黎做，真係冇乜idea…

10月27日

day off…晏晝落lab繼續做功課…頹做左d野出黎，唔知收唔收貨呢…
之後都返宿做FYP…呢個sem淨返幾個禮拜…要加把勁啦…

10月28日

食完晏去lab諗住做下功課啦，不過都冇乜進展…
跟住又去UCFYP聽present啦，今日呢組勁喇，
幾個都係黎自大陸，講下中大同北京大學o既飲食習慣，
雖然用英文present，但知道下其他地方d野，都算幾得意o既…
但下個禮拜就到我地啦…到時就唔慌唔得意…

補完習返中大食pizza，同朋友慶祝生日~~
跟住集體響lab打機，之後返宿…聽日仲要傾FYP呢…

10月29日

今日去傾UCFYP…仲有6日就到我地present啦…
食完飯就上左人宿開始執powerpoint，傾下分工咁啦…
搞左3個鐘左右先散水…之後返宿訓晏覺，爽呀~

夜晚出左去睇joey演唱會，氣氛都幾好~
尤其是個啜啜環節，真係幾搞笑~可惜係浪費左d歌…

10月30日

今日又響屋企大訓特訓啦，個鬧鐘噤熄左n次我先肯起身…
食完個tea，好乖咁做UCFYP…再唔做唔知幾時得閒做…
夜晚同屋企人去食元氣，當係預祝小弟生日咁，多謝哂先~
之後就返中大啦…響宿hea陣又要落lab開工，份野聽日dead啦…
好彩都比預期早完成…2點可以返宿啦，yo~

10月31日

今朝早堂…6個CE人得1個去左上…果個當然唔係我啦…
跟住去lab搞下份功課，叫做有少少進展，但都好奇怪…
上完堂去dem另一份功課，一去到已經好多人…
結果等左個半鐘先dem到，期間不斷玩linux裡面d game消磨時間…

dem完又即去上堂，都遲左幾個字…
上完做陣功課，返宿執下野就出去啦~
今晚萬聖節，同網友去左蘭桂芳行下，當係見識下啦~
過到去中環，首先係醫肚先…又係大家樂見~

之後就打蛇餅行入蘭桂芳，估唔到要兜得咁緊要先入到去…
我地都冇入去d酒吧，只係周圍睇下d鬼影下相，
我覺得最緊要都係感受下個氣氛啦~都幾正~
不過原本諗住兜去另一面，點知行行下去左出口…
眼見再入去果條人龍長過乜咁，都係放棄啦~

跟住去七仔買野飲，再一齊搭船過九龍，
呢個萬聖節之夜就完滿結束啦~
都要多謝班網友順便同我預祝埋生日~
今年生日交接之時，居然係響火車上度過…

20016789101112月
2002123456789101112月
2003123456789101112月
2004123456789101112月
2005123456789101112月
2006123456789101112月
2007123456789101112月